السلام عليكم ورحمه الله وبركاته
انا بنت مصرية من حوالى سنتين كنت باخد دروس فى سنتر معين و فى يوم كنت أنا و زميلتى بنهزر قبل الدرس و هى جابت دوريتوز (سناكس) فبقينا ناكل و بعدين أنا اخذت وهى قافله الكيس ف اتكسر السناكس ده ف أنا علشان اصالحها جبتلها واحد زيو فهى اخدته عادى و بعديها الدرس خلص ف كان ورانا درس وراه علطول و فى الدرس التانى ده هى زعلت برضه لسبب تافه ف أنا علشان لصالحها ادتلها العشرة جنيه اللي كانت معايا و قلتلها تاخدى العشره جنيه دى و تصالحينى قالت ماشى و حطيتها فى جيبها و والله العشرة جنيه دى مش بتاعتى دى باقى فلوس الدرسين و بعدها أنا حاولت آخدها من جيبها علشان هى تحس ان ايدى فى جيبها و تلتفت لى و افهمها أن الفلوس دى مش بتاعتى بس هى مخدتش بالها أو خدت بالها بس سابتنى بمزاجها بس أنا أعتقد أنها مخدتش بالها و انا اخدت الفلوس والخميس بدأت شرح ف مكانش فى و قت اكلمها و بعدها اتكسفت اقوللها لحد ما بطلت دروس فى السنتر ده و انا الموضوع ده كان شاغلنى جدا و سمعت أنا اللى بكون عليه دين بيكون حسابه متعلق فى القبر إلى أن يشاء الله أو الشخص إلى هو مديون ليه يسامحه ف أنا من حوالى ست شهور روحت و حطيت العشرة جنيه دى فى صندوق كفالت الأيتام فى نفس المسجد لأن أنا كنت فاكره ايام ما كنت باخد درس أن هى كانت بتدفع أقل مننا و صحبتى التانيه إلى هى مقربه جدا منى كانت بتدفع برضوا زيها و قالتلى إنها يتيمه ف أنا دلوقتى حاسه بالذنب بس أنا عمري ما سألتها علشان مجرحهاش و انا حاليا مفيش بينى وبينها اى تواصل لأن حتى تليفونها كان زراير بس ملحوظه هى كانت فى مدرسه مشهوره جدا خاصه و كمان لبسها نضيف و كويس بس ده مش مبرر ليا طبعا انا عارفه إنى كان لازم اقولها من الاول او كان لازم ماخدش الفلوس واقول لماما و المفروض من الأساس والصح انى مكنش صاحبتها لانى مكنتش بعرف اختار أصحاب كوييسن أما دلوقتى أنا اتغيرت للاحسن الحمد لله انا عايزه اعرف هل اللى أنا عملته كافى ولا فى حاجه تانيه لازم تتعمل و ياريت الى هيجاوب ميتكلمش عليها و على شخصيتها أو يستهون بالعشرة جنيه دى لأنها كبيره جدا عند ربنا ممكن اخالد فى النار بسببها
السلام عليكم، هو أنا شايفة إن نيتك كانت هزار وانتي مكنتيش ناوية تعطيها الفلوس أصلا وأخدتيها، يمكن هي انتبهت أو منتبهتش ومفيش طريقة حاليًا إنك تقولي لها إن كان نيتك كذا، عشان تريحي نفسك خلي نية التبرع بالفلوس صدقة باسمها عشان برضه تكوني صفيتِ ضميرك وارتحتِ... عامة ده رأيي بس إذا عاوزة تتأكدي أكتر ارجعي لدار الافتاء وابعتي لهم رسالة وهم هيفيدوكِ أكتر برأي الدين... ده الرابط في كذا طريقة للتواصل معهم فاختاري الأنسب لك. https://www.dar-alifta.org/ar/darservices/خدمات-الدار
تم النشر الخميس، ١٩ سبتمبر ٢٠٢٤
لعرض السؤال في فدني اضغط هنا