السلام عليكم
انا خريجه صيدلة
بقالى ٤ شهور متخرجه وداخله ع خامس شهر ،٤ شهور معملتش اى حاجة فيهم ، بحاول اقدم ع شغل وكل الدنيا مقفله ف وشي مع ان كل صحابى اشتغلوا ،اروح شغل مستحملش واسيبه ،وخبرتى بدأت تقل بدل ما انزل ادرب ف اى صيدلية استسلمت للاكتئاب وقاعدة ف البيت مبخرجش من اوضتى وتعبانه نفسيا وحتى علاقتى مع خطيبى بدأت تكون خناقات ومبقاش مستحمل شكاوى ليا طول الوقت خصوصا انه ادد ويشتغل وطالع عينه عشان نتجوز بس كله غصب عنى حاسة كل حاجة رفضانى وكل مكان رفضنى
مهم جدا تاخدي بالك من علاقتك بالي بيحبوكي، هو مهم اه يكون ف حوار بينك وبين شريك حياتك، بس ميكنش كله شكاوي ومشاكل كدا بالعكس انتي ممكن تستغلي المده الي بتتواصلو فيها ف انك تخرجي من الاكتئاب معاه فاهماني. اصل انتي زعلانه بس هو مفيش ف ايده حاجه يعملهالك فهيزعل عشانك وهيحس بالعجز انه مش عارف يساعدك مع ان الموضوع مش ف ايده. المهم تاخدي بالك من علاقتك بخطيبك وتجنبي تجنبي الكلام ف المشاكل معاه، لأنها بتنفر الناس بجد. عايز اقولك ع نقطه، لو حد من صحابي بيشتكي كتير مش هقعد معاه تاني، فما بالك لو واحده مرتبط بيها واوبشن اني مقعدش معاها دا مش متاح، بصراحه هتخنق. تاني حاجه ودي مهمه الفرص بالنسبه للخريجين مش احسن حاجه، بس لازم تشتغلي عشان دماغك تكون ف مجالك دايما وحتي لو خبرتك مش هتزيد بس ع الاقل مش هتقل، وبالنسبه للقاعده ف البيت بتجيب اكتئاب لوحدها فما بالك نبقى قاعدين ودماغنا طول الوقت مشغوله بالكارير والحياة بايظه والبلد ضاعت ومفيش مستقبل و و و. كلها أفكار سلبيه بتأثر فينا بالسلب وبتنعكس ع الناس الي بيحبوا وبنحبهم، فمش مشكله تنازلي شويه واشتغلي ف اي حاجه ف مجالك ودوري ع فرصه احسن وانتي بتشتغلي، والفرص الأحسن مبتجيش اصلا غير باحتكاكنا بالشغل.
تم النشر الجمعة، ١٧ نوفمبر ٢٠٢٣
وعليكم السلام ورحمة الله وبركاته الف الف مبرووك يا دكتورة لتخرجك وباذن الله كل اللي جاي خير. اللي انتي فيه ده طبيعي جدا، ف نهدى اهم حاجه كل فترة هتاخد حقها المهم ازاي نعرف نتعامل معاها. اولا غلط جدا، اننا نبدأ نقارن نفسنا بحد .. كل شخص وله ظروفه الخاصة .. ف ازاي تيجي تقارني نفسك ب غيرك، ف حين ان مش كل حد فيكم ظهرت له نفس الاشياء ولا ظروفكم زي بعض .. مش ال 4 شهور دول برضه اللي الدنيا هتخرب فيهم .. نهدى شوية علشان نعرف نفكر كويس .. لان الحالة ديه لو دخلتي فيها ولا هتعرفي تفكري ولا هتبقى كويسة .. لو مفيش شغل .. يبقى انزلي ادربي في صيدلية ده اساسا هيفتح ليكي باب شغل .. انزلي خدي تدريب فترة ولو صاحب الصيدلية لاقى منك مجهود وشغل كويس مش بعيد انه يخليكي تمسكي الشغل بمقابل مادي .. وده بيحصل. متخليش دماغك تلعب بيكي وقومي اعملي اللي عليكي .. لان مش الدنيا هي اللي صعبة وبس، لا كمان احنا اللي بنصعبها على نفسنا. ده فيديو مهم اوي اوي .. كأنه ليكي اتمنى تشوفيه انهض! واترك الكسل | Aliaa Essameldin | TEDxYouth@AlDafna بالنسبة لخطيبتك معلش استحمليه انتي قولتي بنفسك هو اساسا مضغوط واكيد بيشتغل ليل ونهار علشان يقدر يغطي مصاريف الزواج ومصاريفه .. ف تخيلي يجي حد ويقعد كمان يشتكي له علطول .. اكيد هيتخنق. هوني على نفسك وعليه .. الموضوع ضاغط لوحده ومش محدش مستحمل ...
تم النشر السبت، ١٨ نوفمبر ٢٠٢٣
اربع شهور او خمس شهور مش فتره كبيرة تستدعي كل القلق و الاكتئاب ده كله ، هوني ع نفسك....الإنسان بيخبط ع 100 باب عشان يتفتحله باب واحد..وهوني ع خطيبك هو مش محتاج اخر اليوم منك فلوس ، محتاج يسمع منك كلام حلو و تطيبي خاطره...ربنا يجمعكم ع خير
تم النشر السبت، ١٨ نوفمبر ٢٠٢٣
لعرض السؤال في فدني اضغط هنا