انا ١٦ سنه .. بقالي دخلت اعدادي و كان عندي هدف.. بس بالرغم اني كنت بذاكر و بعمل الي عليا و بحزن كويسه في الدروس على طول بجيب درجات وحشه .. 3 سنين اعدادي كنت أقل وحده مبين اصحابي في الدرجات و اهلي كنت بتقارن بصحبتي الي مش بتاخد دروس و بتجيب درجات أعلى مني..كنت بضغط اوي على نفسي ..و كل شويه اسمع كلام من بتاع اني فاشله مش بذاكر بفضل قاعده على التليفون و الكلام من اهلي ..كنت بزعق معاهم و بتخانق معاهم كتير ..و بعد كده بروح و بعتذرلهم .. دخلت اولى ثانوي .. قولت اختار لغه جديده و صعبه زي الألماني و فعلا اتعلمتها و بدأت اذاكر اكتر و أهملت نفسي و مكنتش بنام
محدش كان بيهتم يعرف انا عملت اي في لامتحانات بتاعت الدروس العاديه و مكنتش يعرفوا حاجه عني .. المهم بعد كل التعب ده و إهمال صحتي روحت لامتحانات و معرفش أحل كويس ... جبت درجات وحشه و لنا عرفت النتيجة حزنت اوي و بقيت اقعد لوحدي اكتر من الاول .. مفيش حد اتكلم معاه .. بقالي شهر على الحال ده .. مش عارفه اذاكر زي الاول و كنت بتهرب و مش عايزه اروح المدرسه و مش عايزه اشوف المدرسين .. المديره بتاعت المدرسه شافت درجاتي و اتريقت عليا قدام اختى و صحبتي .. مشكلتي دلوقت اني مش عارفه اذاكر زي الاول و مبقتش عندي شعف زي الاول كل لما اعمل حاجه صغيره اهلي يضيقوا مني و يزعلوا مع اني مبقتش ازعق زي الاول و ادافع عن نفسي
عايزه اعوض درجاتي علشان لو معوضتش هسقط مش هعرف ادخل السنه الي بعديها ... بتجيلي أفكار كتير وحشه و بحاول أبعدها على قد م اقدر
دلوقت اهلي بيتجنبوني و بيخرجوا من غيري و مبقوش زي الاول و بقيت مكروهه في البيت
في البدايه يجب تضعي فكرة انك عفوا فاشله جانباً ولاتحاولي التفكير فيها نهائياً لأن هذه الفكره هي ما تقف أمام نجاحك واعلمي أن الطالب لكي يتفوق يحتاج أن يكون في اعلي درجات الصحه والسلامه النفسيه ف ردي علي فكرة الفشله بقولك انا مجرد انسانه مضطربه واضطرابي هذا نتج عنه تأخر وسأثبت لكي أنني ليس كذلك واتركي تلك الوساوس فهي وساوس لا تمت للواقع بصله وهي عدو يختبر من خلاله قوتنا ومهمتك هي القضاء علي ذلك العدو وكيفيه القضاء عليه بسيطه هي لا تتفاعلي معه ولا تغذيه بالتفكير فيه فعندما تفكري به ف انتي تغذيه وتقويه لكي يعود لك اقوي و يفتك بك واعتقد أن معرفتك لذلك كفيله بإضاءه اماكن في عقلك لكي تواجه بها هذا الوسواس ثانياً ضعي فكره المنافسه جانباً أيضاً ف ماهو واضح في كلامك انك تريدين بذلك درجات عاليه ومعني ذلك انك تريدين التفوق علي أشخاص معينين تلك الفكرة جميله وقبيحه في الوقت ذاته فهي من تدفعنا للتطور وتكثيف الجهود لكي ننجح أكثر واكثر ولكن هي قبيحه ومفتكه عندما نخطأ اونخفق يتولد من ذلك الشعور وساوس تفتك بنا مثل ما حدث معك حاولي أن تنافسي نفسك الحاليه وهذا الشئ اضمن لك تفوقك عليه في كل مره لانك ببساطه كلما كثفتي جهودك وسعيتي أكثر ستتفوقين علي نفسك القديمه وهنا سيحضرك شعور بالانجاز وذلك سيجعلك تشعرين بأنك افضل ثالثا حاولي ان تذاكري بطريقه صحيحه تجعلك تحصيلك الدراسي افضل طوري طريقتك في المذاكره انتي بحاجه الي أن تذاكري بذكاء وجهد ولكن بذكاء أكثر من جهد رابعاً تفهمي موقف اهلك بشكل صحيح اهلك يظنون أن منقارنتك بزملتك ذلك سيدفعك لتكثيف الجهود بالتالي تفوقك هذا ما يرونه اهلك من هذه المقارنه ومن جانب آخر ترك اهلك لك هو محاوله منهم للتخفيف عنك يرون معاناتك فلا يريدوا أن يوزيدوا آلمك سادسا من يسخرون منك لا يهتمون لأمرك ويريدون أن يحطيموكي نستطيع وصفهم بحاقدين والطريقة التي نقهر بها الحاقدين عدم الاهتمام بهم أولاً والتفوق والنجاح
تم النشر الثلاثاء، ١٢ مارس ٢٠٢٤
غيرى طريقتك فى المذاكره ..لان استخدام نفس الطريقة اللى مش بتجيب نتيجة تضييع للجهد والوقت كل واحد فينا ليه طريقة غير التانى ...استكشفى طريقتك الافضل وهتحققى بيها نتايج احسن ان شاء الله
تم النشر الاثنين، ١١ مارس ٢٠٢٤
هتفقدي حاجات كتير اوي فعلاً عشان ترجعي شغفك حاولي تتعرفي ع ناس شغوفه وناس شاطره ف دراستها بس يكونو فعلاً كويسين ويقدرو يحفزوكي انك تبقي احسن وترجعي زي الاول انتي لو حطيتي قدامك اني لازم ابقا احسن م الاول عشان كل الي بيحصل هتعملي كده اكيد موضوع الاهل ده اكتر جزء تاعبك لكن كل الي تقدري تعمليه انك تحاولي ترجعي نفسك زي الاول واحسن وساعتها يمكن يرجعو يتحسنو معاكي وعامتا بمكن لو هما متفاهمين شويه وتقدري تتكلمي معاهم اتكلمي وفهميهم انك بتتعبي من الي بيعملوه وحقيقي هما هيتحاسبو ع اي حاجه بيعملوها بس اكتر حاجه هتساعدك وقبل كل ده انك لو مش قريبه من ربنا قربي و ادعي كتير و لو عوزتي اي حاجه هقدر اساعدك فيها قوليلي
تم النشر الاثنين، ١١ مارس ٢٠٢٤
بصي انا ف نفس سنك يمكن اكون فاهمه شعورك شويه لكن الي اكتشتفه اني لما كنت بذاكر ومش بحصل اي حاجه وكنت بجيب درجات غيري عمل مجهود اقل ويقدر يجيب درجات احسن كنت فعلاً بضايق لكن بدات افكر ان يمكن طريقه مذاكرتي مش صح يمكن الطريقه دي مش الاحسن بالنسبه ليا جربي تغيري طريقه مذاكرتك وعن تجربتي ف احسن طريقه انك تذاكري بصوت عالي الموضوع التاني قله الشغف ده بييجي كتير اوي بس انتي لو سيبتي نفسك لفقدان الشغف ده هتفقدي ذ
تم النشر الاثنين، ١١ مارس ٢٠٢٤
مشكلتك سهلة في الاجابة بس محتاجة منك تركز ، غالباً عندك ضعف في التركيز لان انا كنت كدة كنت بذاكر بالساعات ومجبش درجات كويسة اولاً حبي المادة وافهميها ، انا مثلا في مواد التاريخ والجغرافيا كنت بذاكرها بالقصص بعتبرها قصة ليها تسلسل واحداث الكيما بشرحها لنفسي وافهم الرموز واربطها ببعضها بالقصة واعرف لية كل الرمز دة اتعمل ليها الانجليزي كلمات قبل كل شئ بعدها تعرفي قاعدة او اتنين ثم الممارسة والممارسة والممارسة
تم النشر الاثنين، ١١ مارس ٢٠٢٤
مش دايما هيكون عندنا شخص يدعمنا و يساعدنا و يفهمنا بس دايما عندنا نفسنا........المقصد بكلامي انك في المرحلة دي من حياتك و في الظروف الي بتعيشيها دي دلوقت انتي مش محتاجه غير نفسك عشان تطلعي من الي انتي فيه انا كنت زيك برضو بعاني من اكتئاب و محدش اهتم للموضوع و كنت برضو طول الوقت قاعدة في اوضتي و كان دايما الاكتئاب بيخليني افكر ان انا عملت كتير و حاولت كتير بس فشلت و محققتش الي نفسي فيه و ان مفيش فايدة من المحاولة و ان خلاص كده الأحسن ليا افضل نايمة على السرير في اوضتي لحد ما اموت لأن تعبت من المحاولة بس بعد كده الاكتئاب ده دمرني جامد لمدة ٣ شهور يمكن و ساعتها قررت انه ليه لا؟!!! ليه محاولش محاولة اخيرة؟!! يعني انا حاولت كتير في حياتي و جاية دلوقت استسلم؟!!!! مش انتي الي بتقولي ان الاستسلام هو الفشل!!! لحد ما فعلا اتخذت القرار ده و قررت وقتها اني هقف من تاني و هحاول من جديد وقتها حاولت اني اطلع من الاكتئاب و مشكلات تانية كده و الحمد الله نجحت و وقتها برضو كانت درجاتي نزلت جامد بسبب الاكتئاب و قررت اني هبدأ اذاكر تاني و هحاول تاني و ان مش مشكلة اذا فشلت لأن مازلت مستمرة و بحاول و اشهدلك ان و الله العظيم درجاتي رجعت تاني و أعلى كمان و من تكريم لتكريم و من درجة عالية لأعلى و الكل مش مصدق (الحمد الله طبعا) كل ده لأني قررت ما استسلمش طب دلوقت انتي قررتي ما تستسلميش و هتحاولي تاني ايه المفروض تعمليه؟ اعتبريني اختك الأكبر منك (انا في تالته ثانوي بالمناسبة😂) و اسمعي مني النصايح دي و نفذيها و بإذن الله يارب تحققي الي نفسك فيه و درجاتك تعلى ١-المذاكرة صح : كل واحد عنده طريقة مذاكرة بتخليه يفهم الدرس كويس جدا و يجيب درجات عاليه فإنتي لازم تعرفي ايه الطريقة المناسبة ليكي يعني مثلا عندك الي بيعرف يذاكر بالكتابة و في الي بيعرف يذاكر عن طريق انه يسمع الدرس من اليوتيوب او اي منصة و عندك الي بيعرف يفهم الدرس كويس لما بيتكلم مع نفسه و هو بيذاكر يعني بيقعد يشرح لنفسه المعلومة او بيمثل ان في شخص قدامه و بيشرحله كلها طرق صح و مفيش واحدة غلط بس لازم انتي تشوفي الطريقة الي بتفهمي منها اكتر حاجة ٢- بعد مذاكرة الدرس اقفلي الملخص او الكتاب او المذكرة و اشرحي لنفسك الي فهمتيه من الدرس مثال: يعني كإن في شخص قدامك مش فاهم اي حاجه و قاعد بيسألك و انتي الشخص الفاهم الي ذاكر الدرس و بيجاوبه هتسألي نفسك الدرس بيتكلم عن ايه؟ و تجاوبي السؤال لو معرفتيش تجاوبي يبقى انتي كده مكنتيش مركزة و مفهمتيش الدرس فتروحي تفتحي الملخص تاني و تحاولي تفهمي بيتكلم عن ايه بعد كده تشرحي لنفسك عناصر الدرس يعني مثلا الدرس بيتكلم عن موضوع معين و الموضوع ده في الشرح مكتوب عنه خصائص الموضوع و أسبابه و الي بيترتب عليه و هكذا فإنتي هتشرحي لنفسك العناصر دي (هتشرحيها مش بمعنى انك تسمعيها لا ..هتشرحي الي فهمتيه منهم) ٣- انتي خلاص ذاكرتي الدرس و فهمتيه و كله تمام هتروحي تحلي عليه و تصححي لنفسك و لو في سؤال غلطي فيه يبقى لازم تعرفي انتي ليه غلطي فيه يعني تروحي تسألي المستر او اي حد يعرف السؤال و يعرف يشرحلك و يفضل انه يكون مدرس المادة يعني بلاش تسألي زميلاتك لأن ممكن يشرحولك غلط او يجاوبوكي غلط و نفس الكلام لو معرفتيش تحلي السؤال خالص او مفهمتيش السؤال ٤- طبقي معلومات الدرس على أرض الواقع يعني مثلا قاعدة بتتكلمي مع زميلاتك و واحدة منهم بتقول "انا قمر" مثلا يعني فإنتي هنا تفتكري ان ده الي اخدتوه في العربي الي هو التشبيه و هكذا مع اي درس او مادة يعني تحاولي تطبقيها على أرض الواقع وقتها المعلومة هتثبت اكتر و هيبقى صعب انك تنسيها ٥- لازم تعرفي و تفهمي غلطاتك في الامتحان يعني لازم تعرفي انتي ليه غلطي في السؤال ٦-ما تقارنيش نفسك بحد و ركزي على مستواكي انتي و بس و كأن مفيش حد غيرك بيدرس و بيمتحن و لا تسألي زميلاتك عن درجاتهم و لا تقولي درجاتك ليهم و لا تقارني نفسك بيهم دي الحاجات الي عملتها و الي خلت مستوايا يعلى جدا بعد ما كنت في الضياع بسبب الاكتئاب و بالنسبة للإكتئاب عشان تطلعي منه لازم تقربي من ربنا و تقاومي أفكار الاكتئاب ذي انك فاشلة و انك مش هتنجحي و و و..... و كمان ممكن تقرأي عن الاكتئاب عشان تعرفي اكتر اذاي تتعاملي معاه و تطلعي منه اهم حاجة ما تنسيش ان في اللحظة الي هتستسلمي فيها وقتها كده انتي فشلتي فعلا
تم النشر الاثنين، ١١ مارس ٢٠٢٤
لعرض السؤال في فدني اضغط هنا