بسم الله الرحمن الرحيم
ممكن الكلام ميعجبش اللي هيقرا اوميدخلش دماغه مثلا
انا عصبي لدرجه معتقدش ان في حد وصلها
وبتأثر عليا وبتخليني اعمل حاجات لو شخص مجنون ميعملهاش
زي ممكن موقف تافهه حصل في الصلاة اتعصب وافقد خشوعي في الصلاة وافكر فيه
اختصرت الناس كلها
انا مدرك باللي انا فيه
لدرجه اني مش عايز اتقدم اخطب لان هتبقي علاقه فاشلة والخراب هيبقي من نحيتي انا
فمبقتش عارف اعمل بحاول اتغير وبتغير فعلا بس وقت قصير وبرجع ازيد من الاول
معلش لو طولت بس بالله عليكم لو حد يعرف حل يقولي
يعني حتي لو هكشف هكشف اي او قسم اي عشان مضيعش وقت اوفلوس
مشكلة كبيرة ومدمرة لحياة صاحبها ومؤذية جدا لمن حوله فهي مش مشكلة تافهة او متدخلش الدماغ يعني.. •١ اول واهم حاجة هى الدعاء بالحاح على قد ما الموضوع مبوظ حياتك على قد ما تلح ف الدعاء والافضل تخصص يوميا وقت محدد للدعاء وليكن الساعه ٣ الفجر وممكن تدخل البلكونه وتبص للسما وانت بتدعى بيكون أفضل كتير واعمل منبه لده •٢تأمل (أو ما يسمى بالميديتيشن) افضل وقت الصبح بدري عند الشروق شوف الشجر والسماء والشمس الهادية واتنفس بعمق واسمع العصافير ده بيخلى نفسيتك ف مكان تاني خااااالص لانه بيفرز واحد من هرمونات السعادة "السيروتونين" (انصح بمشاهدة حلقة السعادة للدكتور كريم علي) واقرأ التعليقات بعد م تخلصه هتلاقى تلخيص للفيديو بحيث متنساش اللى سمعته •٣ أبعد عن القعدات او المواضيع او الاشخاص اللي عارف إنها بتعصبك بقدر المستطاع •٤ ألزم وصايا النبي صلى الله عليه وسلم عند الغضب :- خليك عارف إن الصبر بالتصبر والحلم بالتحلم (يعني مَثِّل إنك هادي ومش بتتعصب لحد م تبقى فعلا كده ) وأعرف كمان إن الصفتين دول بيحبهم الله "الحلم والإناة" وإن اللى بيُحرم الرفق بيحرم الخير كله فحاول متغضبش من الأول لان ده اسهل من إنك تغضب وبعدين تكتم غيظك ثانيا عند الغضب استعذ بالله من الشيطان الرجيم واذكر الله كثيرا وامسك لسانك واسكت حتى لو هتحط ايدك ع بؤك وتساعد نفسك انك متتكلمش بالطريقة دي اعملها توضأ عند الغضب ودي نقطة مهمة جدا لو كنت واقف اقعد ولو لسه غضبان استلقي (نام) •٥ سيب المكان كله واخرج خالص منه • ٦حاول تخلى لنفسك رياضة معينة فيها مجهود بدني قوي وليكن البوكسينج تخرج طاقتك فيه او الجيم والعبه على فترات منتظمه ممكن يساعدك شوية •٧ لو فى مشكلة معينة مسببالك ضغط تخلص منها بقدر المستطاع ممكن تكون فى مشكلة ضاغطاك بقالها سنين تكون هى السبب الرئيسي فلو معرفتش تتخلص منها حاول تلاقى طرق تخليك تتعامل معاها بشكل افضل •٨ كلم نفسك بشكل ايجابي عند الغضب يعنى قول لنفسك "اهدى اهدى متتعصبش امسك لسانك وده اختبار ولازم اسيطر علي نفسي وهكذا " •٩ انصحك بمشاهدة سلسلة " وعي حلقة الغضب " واقرأ واسمع كتير عن الغضب والسيطرة عليه وفضل الهدوء وكظم الغيظ •١٠ درب نفسك ع الصبر بوجه عام ده بيساعد فى التحكم ف النفس وعلى سيرة الصبر لازم تعرف ان دي رحلة طويلة ممكن تاخد منك سنين حتى فلازم تصبر على نفسك وع النتايج وخد قرار بعدم التراجع •١١ ممكن تعمل لنفسك تحدي يومي واسبوعي وشهرى انك لو غضبت خلال الفترة دي هتصدق بمقدار كذا (حدد مبلغ من البداية مش ع حسب الحالة المادية وقتها🙂) يعنى لو اتعصبت شوية صغيرين هتصدق مثلا ب٥ج لو شتمت هتصدق ب١٠ج لو بهدلت الدنيا خالص هتصدق مثلا ب٢٠ج في الاول خليها يومي وبعد م تبقى احسن خليها اسبوعي يعنى تحاسب نفسك ع مدار الاسبوع والصدقه تطلع اخر الاسبوع ع بعضها حسب عدد المرات هتتضاعف وبعد م تبقى احسن خالص خليها شهريا ...واعمل لنفسك مكافأة يعنى فلوسك مش هتشترى بيها حاجة بتحبها الا بحساب يعنى لو نجحت ف التحدي هتاخد مثلا ١٠ج وتشيلها ع جنب وتحوشها لحد م توصل للمبلغ اللى محتاجه عشان تشترى بيها حاجة بتحبها لكن هتبطل تشترى عمال ع بطال زى الاول يعنى بمجرد م تحتاج الحاجة يعني وبالعكس بالنسبة للعقاب يطلع ع هيئة صدقات ، الفلوس بتربي شوية خصوصا لما تبقى شقيان بيها وتلاقى نفسك بتدفع مبلغ وقدره أظن لسانك هيسكت من الصدمة :) ... لو ف حالة انك مش بتاخد فلوس خالص سواء من اهلك او مش بتشتغل (مش بخل ها😁) خليها ركعتين وعدد كذا من الاستغفار مثلا الف مرة لو اتعصبت ، والمكافأة مثلا ماتش كورة او اى حاجة بتحبها •١٢ ممكن تستعين بطبيب نفسي يساعدك شوية حتي لو بأدوية لحد ما تجتاز المشكلة دي واظن انه افضل م تفضل كده بس طبعا ده بجانب كل اللى قولناه فوق ربنا يصلح لك نفسك ويعينك عليها وإيانا
تم النشر الخميس، ٢٨ مارس ٢٠٢٤
اول ما تتعصب اذكر الله واكثر من ذكر سبحان الله وبحمده هتلاقي انشراح لصدرك والموضوع هيجي بالتعود
تم النشر الخميس، ٢٨ مارس ٢٠٢٤
حاول تتحكم بعصبيتك دي ومتخليهاش تفقد سيطرتها عليها لازم انت الي تسيطر عليها وبعدين حاول خلي اعصابك باردة لانو فش اشي بهليك تعصب.. هو الطبيعي انو فيه هرمون عند كل الرجال بعصبو على طول بس الشطارة بقى انك تتحكم فيها ف كون قدها وخف عصبيتك.. ومن رائي متخطبش عالاقل الفترة دي لانو خطيبتك مش ملزمة انها تتحمل عصبيتك المفرطة وبالتالي حتخاف منك بدل ما تحتمي فيك... ف حاول لفترة طويلة تقعد بعصبية خفيفة ولا مانع انو بلا عصبية اصلا ومش لازم تروح دكتور او كشف لانو اذا ما قررت من نفسك مش حيزبط... اتمنى ما تعصب من ردي لانو بجاوب وانا خايفة صراحة بس لازم اجاوب..
تم النشر الخميس، ٢٨ مارس ٢٠٢٤
عليكم ورحمه الله وبركاته هو بالنسبه للعصبيه فخلينا نقول ان هي سلوك وتقدر انك تتخلص منه ولكن بالتدريب ده اولا طيب لازم نعرف سببه انت بتتعصب بسبب ايه؟ بسبب انك لما بتشوف مثلا حاجه قدامك هي غلط او حاجه مش بتتعمل بالشكل الصح بتقيس ده على نفسك بتقول ايه انا عمري ما اعمل زيهم كده وهما ازاي بيعملوا كده؟انت.
تم النشر الجمعة، ٢٩ مارس ٢٠٢٤
فضافض مع للي حوليك يعني لو حصلت مشكله حول انك تتكلم معه بلي جوك
تم النشر الخميس، ٢٨ مارس ٢٠٢٤
اتحكم في اعصابك وحاول تكبر دماغك وحط نفسك مكان الأشخاص وروح لدكتور نفساني علشان يعالجك وتبقي هادي
تم النشر الأربعاء، ٢٧ مارس ٢٠٢٤
محتاج حد يقرب منك ويتحملك ومع المواقف هتحس ان ف حد يستحق انك تتغير
تم النشر الخميس، ٢٨ مارس ٢٠٢٤
يعني مخ واعصاب مش كدا برضو ولا اي .ولا هو نفساني دا غيرهم
تم النشر الخميس، ٢٨ مارس ٢٠٢٤
لعرض السؤال في فدني اضغط هنا