السلام عليكم
عندي خاصية تسرع فى كل حاجه
عاوز نصيحة انى ابطل تسرع دى؟
وعليكم السلام ورحمة الله وبركاته.. التسرع ليه أشكال كتير بس بما إنك بتقول في كل حاجه ف اعتقد تقصد انك انك متسرع في قراراتك في حياتك بشكل عام .. هقولك كام حاجه لو قدرت تعملهم هتبقى أفضل. 1- كل يوم هنقعد لوحدنا كده نقفل عينيا مش نغمض جامد لأ خلي اعصابك مسترخيه .. هتاخد نفس من بطنك بتركيز وهتعد على ايدك تاخد النفس في 4 ثواني وتكتمه ثانيتين وتفرغ النفس في 4 ثواني بهدوء.. ممكن في الاول يكون صعب بس هتلاقي تمارين للطريقة دي يوتيوب هتفيدك.. هنكرر الخطوات دي مرتين على الاقل ف اليوم ولما تكون متعصب أو مضغوط أو حاسس بأي انفعالات زيادة. 2- اشغل لسانك دايماً بالذكر والقران سواء سماع أو قراءة .. (ألا بذكر الله تطمئن القلوب). 3- هنأهل نفسنا (وده بالتعود وهياخد وقت شويه بس كل ما تصبر كل ما هتعرف تعمل ده كويس) إنك تسمع كويس اللي قدامك وبعدين تفكر في كلامه وبعدين ترد.. هيتهيألك إن ده هياخد وقت وإن ازاي يعني اللي قدامي يتكلم وانا اسكت شويه وبعدين أرد بس ده مش حقيقي اللي قدامك مش هيلحق ياخد باله من الوقت لإنه هيكون مقدار إنك تاخد نفس عميق كده. 4- لو أي حاجه حسيتها مش واضحه من كلام اللي قدامك (تجنباً لسوء التفاهم) هنسأل اللي قدامنا انت تقصد كذا؟ أو بأي طريقة تانيه المهم نفهم الاول قصده من الكلام ومنصدرش أحكام وناخد رد فعل مباشرة. 5- لو في حاجه هتاخد فيها قرار هتطلب من الشخص التاني مهلة تفكر كويس حسب الموقف ممكن 10 دقايق وممكن يوم أو أكتر حسب القرار اللي هتاخده.. وده مش عيب أبداً ولا هيسببلك مشكلة بالعكس ممكن التسرع يسببلك مشكلة أكبر. 6- افصل مشاعرك عن أي قرار هتاخده .. متاخدش قرار وانت متضايق ولا وانت مبسوط.. استنى لما نشاعرك تهدى وبعدين خد القرار .. ابعد عن القرارات اللحظية. 7- لما تيجي تاخد أي قرار احسب مميزاته وعيوبه ومكاسبه وخسايره ووازن القرار صح واعرف عواقبه ايه وايه أسوء سيناريو ممكن يحصل عشان تتوقع هتتعاما معاه ازاي. 8- أخر حاجه وأهم حاجه إنك تدعي دايما ربنا يرزقك الصبر والحكمة والتأني في أمورك كلها. بتمنى أكون أفدتك ولو في حاجه مش واضحه ممكن تقولي.
تم النشر السبت، ١٧ ديسمبر ٢٠٢٢
وعليكم السلام ورحمة الله وبركاته نصيحة حط لنفسك روتين قبل تنفيذ اى حاجة.. مثلا مش هنفذ الفكرة الا لما اشرب كوباية مايه وهجرى ٥ دقايق ...ده هيديبك وقت تفكر واحتمال تغير القرار
تم النشر السبت، ١٧ ديسمبر ٢٠٢٢
أفتكر دايمًا إن الأنسان عَجول لكن بسبب كدة بيوقع نفسه في مشكلات كتيرة جدًا تخيل أن بتغضب على أسباب تافهة وده بسبب تسرعك ﻷن حضرتك مخدتش وقت تفهم شوف هتخسر قد إيه بسبب كدة شوف كم علاقة هتبوظ ونخسر صاحبها بسبب تسرعك في الحكم عليه ف خليك هادي مش لازم كل اللي يخطر علي بالك يكون صحيح .. مش لازم الـأجابة الأولى تكون كافية لنجاحك خد نفسك وفكر لو تفكيري غلط هيحصل ايه لو اجابتي غلط هيحصل ايه .... احتمل الخطا علشان تاخد مساحة ووقت تفكر في الصح
تم النشر السبت، ١٧ ديسمبر ٢٠٢٢
كلنا بيجيلنا فتره ونبقا كده نص الحل انك عرفت انك بتتسرع النص التاني تمهل نفسك ١٥ ثانيه على الاقل للتفكير بأي موقف قبل الاجابه
تم النشر السبت، ١٧ ديسمبر ٢٠٢٢
لعرض السؤال في فدني اضغط هنا