السلام عليكم ..
انا الشخص اللي معايا الحمد لله شخص محترم جدا و بيصلي و عندو مميزات كتير و بيحبني جدا بس المشكلة اوقات بتصدر منه تصرفات بتضايقني و بتشككني فيه ، مثلا أنه مش بيرد عليا غير وهو لوحده و كمان فكرة أننا نخرج مع بعض كل شوية يطلعلي عذر و حجة مختلفة بقالنا شهر بالظبط مشوفناش بعض و عيد ميلادي كمان اسبوع قولت اشوفه قبل عيد ميلادي علي بكرا كده عشان كان في موضوع مهم لازم نتكلم فيه فالاول وافق و بعدين طلعلي حجة أنه بيفكر يروح مصيف مع أهله اسبوع فسكت و اتخنقت جدا و لما لاحظ اني اتخنقت قالي خلاص وقت ما تحبي نتقابل بس وهو مضايق ف كده كده مش هقابله وهو مش حابب أنه ينزل معايا ، و طبعا حكيت لماما لأنها لقتني مضايقة مع اني دايما والله بحكي كل حاجة كويسة عنه بس فعلا كنت جايبة اخري .. بالمناسبة ماما دايما سواء في سبب أو لا بطلعه وحش و ده بسبب أننا كنا بنحب بعض قبل ما يدخل البيت و هي عرفت ف دايما شايفة أنه انسان مش كويس مهما يعمل معايا و معاهم .. المهم قعدت تقولي ده تلاقيه يعرف واحدة عليكي و ازاي كل ده ميفكرش يكلمنا يستأذن و تخرجو مع بعض شوية و بقالكو شهر و اكتر و تلاقيه مش عايز ينزل معاكي عشان يعرف واحدة عليكي .. و فضلت تزرع الفكرة دي في دماغي لدرجة اني صدقتها و طبعا ده مخليني مدمرة اوي و طول اليوم عياط و حتي بقيت اتصل بيه في أوقات غريبة عشان اتاكد أنه مش بيخوني مع حد و مش عارفة بجد لكن الشخص ده انا اعرفه كويس و مفتكرش يعمل كده ولا دي تربيتو و لكن تصرفاتو بانو ميحبش يكلمني في أي وقت ولا يخرج معايا غير بالشهر و الاتنين ده اللي قالقني ومش عارف اعمل ايه نفسي بس ارتاح عشان مظلموش ولا افضل افكر كتير
وعليكم السلام ورحمه الله وبركاته أولا متفهمه موقفك اللي سببه كلام والدتك،، أولا محتاجه يكون في صدق وصراحه مع خطيبك في عدم اهتمامه وتتفقوا على اوقات تكون ثابته تتكلموا فيها مع بعض ثانيا لو الشك دخل حياتك هيدمرها قبل ما تبتدئ ليه التصرفات دي متكونش بسبب اعذار مقبوله ممكن تلتمسيها انتي ليه ممكن يكون مش معاه فلوس أو عنده حرج من شيء ما ومش عايز يصرح بيه ليكي كل واحد ليه ظروف نقدرها ونصارح اللي معانا اي السبب في كذا ،، حافظي علا علاقتك بالعقل وليس بالشكوك وحاولي تقدري ذاتك وتثقي في نفسك وفي حب خطيبك ليكي ،، تحياتي
تم النشر الخميس، ١١ يوليو ٢٠٢٤
اتكلمي معاه بوضوح فالموضوع دا وزي مقولتلك الاجابه هتقنعك ولا لا لو هو شخص مبيحبش العتاب والكلام دا يعني مالآخر مش خايف علي زعلك وانصحك وقتها ان بلاش تكملي انا اه مليش حق اقول دا بس لازم اعرفك الحياه بتتعاش مره واحده ايا كان تعلقك بيه هيتفك مع الوقت هيبقا احسن من انك تختاري اختيار مش كويس وتندمي عليه طول عمرك وفوقي دايما لنفسك وذاتك متنسيش نفسك سيبيله مساحه ممكن انتي بتزني عليه كتير بتاع وهو مثلا بيبقا عاوز وقت لنفسه او كدا بس فكرة انه بيخرج مع صحابه اكتر منك دي بصراحه حاجه متطمنش ف زي مبقولك واجهيه الأول و برضه اديه فرصه فإنك تفهمي منه هو بيعمل كدا لي لان بصراحه من باقي حكاويكي حساه شخص مش صريح وبيتهرب ف لو في حاجه الحقيها من دلوقتي يحببتي احسن من ما تتجوزوا وتكتشفي الأكبر من كدا فكري فنفسك شويه وفكري هتدفعي التمن ازاي من طاقتك ونفسك ..واي حاجه احنا معاكي 🤍🤍
تم النشر الثلاثاء، ٩ يوليو ٢٠٢٤
بغض النظر عن المشكله هل انتي شايفه ان خطيبك عايز يجيلك ويشوفك فعلا ولا انتي اللي بتشحتي منه الزياره ؟ وعايزه الفت نظرك لحاجه ان ف الشرع اصلا لا يحل للواحده انها تقعد مع خطيبها فتره طويله بدون محرم قبل كتب الكتاب فممكن تجيبيها لمامتك من الناحيه دي اي رايك؟
تم النشر الاثنين، ٨ يوليو ٢٠٢٤
وعليكم السلام،، أوف، مشكلتك معقدة شوي، بس تقدري تحليها بطريقة حكيمة وناخد الأمور وحدة وحدة. أول شي، خدي نفس عميق. التوتر و التفكير الزايد عمره ما هيحلك المشاكل، بل بالعكس هيزودها. بما أن الشخص اللي معك عنده ميزات كويسة و بتحبيه، يبقى الحل مش في الهروب من العلاقة بس في مواجهتها بذكاء. إليك بعض النصايح اللي يمكن تساعدك: فتح حوار صريح : صارحيه بكل اللي مضايقك واسمعي منه. بس خلي الحوار يكون هادي وصريح من غير تجريح. الثقة والشفافية : لازم يكون بينكم ثقة متبادلة. لو شككتي فيه بس بسبب حكي والدتك، ممكن يكون ظلمتيه. استخدمي الحكمة واتأكدي بنفسك عن طريق كلام مباشر بينكم. الاتزامات والاحترام المتبادل : جهزي وقت تكونوا أنتو الاثنين مرتاحين فيه وتقابلوا، واحترمي وقت بعض. لو هو عنده التزامات عائلية، حاولي تكوني متفهمة. تقليل التواصل في أوقات غريبة : اتصالتك المتكررة في أوقات غريبة ممكن تزوده توتر وقلق. خلي التواصل يكون مبني على الحاجات الهامة فعلاً. دعم من أشخاص محايدين : لو كانت والدتك مش دايماً موضوعية، حاولي تاخدي رأي شخص تاني في حياتك تثقي فيه. احتياجك للاهتمام : اشرحي له بهدوء إنك محتاجة اهتمام وعيد ميلادك قرب وحابة تحتفلوا مع بعض. وشوفي ردة فعله. في النهاية، لو بعد ما حاولتي مع كل ده حسيت أن الأمور مش بتتحسن وبتضيق أكتر، لازم تفكري إزاي الحياة معاه هتكون في المستقبل. العلاقة لازم تكون مريحة ومبنية على حب وتفاهم واخلاق. أتمنى لك التوفيق والسعادة يا حبيبتي، وان شاء الله تحلي مشكلتك قريب. 💕
تم النشر الجمعة، ٥ يوليو ٢٠٢٤
ممكن بسبب انكم بتتقابلوا بدون محرم و هو مش عايز يقابلك علشان ميشلش ذنب ومش قادر يقولك ده
تم النشر السبت، ٦ يوليو ٢٠٢٤
اعتقد احسن حل انك تصارحيه باللي جواكي دا يمكن يطمنك او تفهمي منه بلاش تسيبي نفسك لدماغك طالما شخص كويس وفي بينكم لغة حوار اسأليه عن اللي انتي عاوزه تسألي عليه وناقشيه وفهميه اللي مضايقك يمكن مثلا عنده ظرف او حاجه ومش عاوز يشغل دماغك بيها او نفسيته مش احسن حاجه شوفي يعني وبلاش ترمي ودنك لأي حد طالما شكه فحاجه واجهيه بس مش بالاتهامات هاتيها بطريقه كويسه الأول افتحي معاه موضوع الخروج دا وعرفيه احساسك تجاه الموضوع وان الموضوع دا مضايقك وبلاش تحسسيه انك شكه فيه شوفي المهم ردوده الأول هتبقا مقنعه بالنسبالك ولا لا
تم النشر الاثنين، ٨ يوليو ٢٠٢٤
لعرض السؤال في فدني اضغط هنا