انا امي ماثره عليا جدا ودايما عملالي ضغط نفسي لدرجه انها بتوصلني لمرحله اني اتمني الموت او افكر اني عاوزه اموت نفسي ودايما عارفه ايه ممكن يضايقني وتبدا تضغط عليا بيه ودايما تنكر كل حاجه كنت بعملها ولسه بعملها وتقول اني فاشله وكبرت ومش بعمل حاجه مفيده في حياتي انا بدور ع شغل دايما بس ربنا لسه مفتحليش باب رزق زيي زي ناس كتير في سني عادي دايما عاوزه تقرني باي حد كل انجازته في الحياه انه مثلا اتجوز ولا خلف عيل مع انها عارفه ان هم مش احسن حاجه في حياتهم بردو، مش عارفه اسد وداني وكل حاجه بتقولها بتاثر فيا ومبقتش قدره استحملها حتا مبقتش قدره اسمع صوتها او اقعد معاها في نفس المكان والموضوع دا مضايقني عشان دي المفروض امي بس انا بعمل كل اللي اقدر عليه عشان احارب الاحساس دا بس مش بقدر غير اني اخدمها ومردش عليها الاذي هل ربنا هيحاسبني ع احساسي دا واعمل ايه معاها، مع العلم هي مش بتعترف انها غلط ابدا
لو سؤالك هل ربنا ممكن يحاسبك على احساسك ده، ف لا اعتقد ان ربنا ممكن يحاسب على المشاعر خصوصا انها غصب عنك، وخاصةً كمان انك بتحاولي ترضيها وتعملي الواجب بتاعك اتجاهها بكل الطرق رغم انك متضررة منها ومن ضغطها عليكي. ولكن لو هنتكلم اكتر في العلاقة بينك وبينها هي ممكن تكون من النوع اللي بيمارس اسلوب الضغط لانه شايفه صح، يعني ايه؟ يعني ممكن تكون عايزة تخليكي احسن، عايزة تخليكي احسن حد في الدنيا ف تبتدي تعمل اسلوب الضغط والمقارنة ده عليكي، وده غالبا ممكن يكون من وانتي طفلة ديما في مقارنة حتى مع اصحابك وديه اشطر وديه وديه ... الخ ف هنا لو ركزتي على نيتها (انها عايزة تخليكي احسن) ولكن للاسف الفعل شنيع جدا، وطبعا غير سوي ولكن لو حاولتي فعلا تركزي على النية فقط احساسك بيها ممكن يكون افضل. أما لو مامتك اساسا اسلوبها كده مع كل الناس ومع اي حد وديما شايفة الوحش فقط في كل الناس وفي اي حد، ف هنا التمسي لها العذر، اه .... التمسي لها العذر لانها اكيد مرت بحاجات وتربيتها ونشأتها خلوها الانسانة اللي هي عليها دلوقت، فالحل هنا انك تركزي على نفسك اكتر وتحاولي تعملي حاجات افضل في حياتك ومتركزيش معاها في الكلام اللي بتقوله، واعملي لها كل اللي عايزاه زي ما انتي بتعملي. ولكن حاولي تقعدي معاها وتحاولي تفهمي منها هي ليه بتتصرف معاكي كده، يعني ليه يا امي شايفة اني وحشة طول عمري؟ هل عايزاني طيب احسن ولا مش عايزاني، وليه بتقولي لي كده، وانتي من خلال حديثك معاها هتعرفي هي انهي شخصية في اللي اتكلمت عنهم. واتمنى ليكي السلامة
تم النشر الأحد، ١٢ مارس ٢٠٢٣
الحاله الوحيده ال بنتحاسب فيها علي مشاعرنا إن كانت مؤذية لنفسنا أو لشخص ولو اتنفذت.. لكن طول ما هي فكره ف بالنا من الشيطان أو من سوء نفسنا وقاومناها فلا بالعكس هنؤجر ونثاب علي مجاهده دي. من حقك عادي تحسي بضغط لأن جايز شخصيتها فعلا صعبه بس زي مانتي بتعملي سايسيها وحاولي تواجهيها باسلوبها هي.. يعني ممكن تريحيها وتقوليلها وقتها ماما ادعميني وفرحيني زي ما حاولت افرحك.. فهميها براحه مش بصيغه التعليم عشان ده مش كل الأهالي بتتقبله ، لا بصيغه الفضفضه عادي.. وحاولي دايما يبقي ليكي يوميات تكتبي فيها عشان لما هتفرغي وتحكي هتعرفي تشحني من تآني طاقه تستحمليها. و احتسبي عند ربنا هو احن من الام والاب وادعي ربنا يهديها لك.. وافتكري في ناس بتتمني وجود أمها وابوها وفي ناس أهاليهم فعلا سيئين جدا جدا وميستحقوش القاب ام واب فده هيخليكي ترضي بحالك وتستشعري مميزاتها آكتر مش عيوبها..ربنا يقرب بينكم يارب
تم النشر الأحد، ١٢ مارس ٢٠٢٣
الاحساس ده محتاج مواجهه منك ليها وتأكدي ليها انكمش فاشله وانك في حجات كتير عملتيها كويسه وان من حقك انها تشوف الحلو ليكي اكتر من الوحش ومن حقك متتقارنيش بحد لان الظروف متغيره والجواز والخلفه نصيب ربنا بيبعته ف وقت محدد وعرفيها ان العلاقه بين الام وبنتها المفروض صحاب بس هي كده بتعمل فجوه بينك وبتبعدك عنها واسأليها هي تعرف عنك ايه تعرف كام مره انتي نمتي معيطه بسبب تعليقاتها دي وكام مره فكرتي ف الموت المواجهه دي صعبه عارفه بس مهمه جدا عشان تكسر حاجز بينك وبين والدتك لانها مش بتعمل ده كرها فيكي انتي حته منها بس هي اتربت ان الاسلوب ده صح وان اهم انجازات الست الجواز ومش بتكرهك لانها امك بس واجهيها عشان ع الاقل متدايقكيش كده وعلاقتكم تقرب مع الوقت متبعدش
تم النشر الأحد، ١٢ مارس ٢٠٢٣
لعرض السؤال في فدني اضغط هنا