بما إنك طبيبة بردو فأكيد سمعتي ع حالات كتير بيتقال ليهم مستحيل تخلفوا وبيكون بالفعل بعد الزواج وسبحان الله ربنا بيرزقهم توائم ٢ و٣ كمان وفى حالات ظاهريا بتبان طبيعية وفي الاخر مش بتخلف وده كتير اوي والرجالة حاليا أخر كام سنة الإحصائيات بتأكد إن بقى فى مشاكل عندهم كتير عكس ٤٠ سنة ورا مثلا فده ممكن يخلق جو من تقبل فكرة تأخر او مشاكل الإنجاب وسط الناس بصفة عامة بس بشكل خفي بردو غير زمان كان الموضوع صعب ولو حد اتاخر فى الخلفة شوية الدنيا بتتعقد ولكن طبعا يظل نعمة وزينة الحياة فبالله ما تخلي الشيطان يخليكي تيأسي من رحمة الله ولا تشوفي نفسك أقل من حد لانه رزق ولو مكتوبلك مفيش حاجة ف الدنيا هتمنعه ولو مش مكتوبلك فلو مليون طبيب قالك هتخلفى مش هيحصل طالما مش نصيبك وده اختبار من ربنا فركزي كويس إنك تسيطري على اي وساوس جواكي وتحمدي ربنا على كل نعمة عندك وغيرك لا يملكها.... بالنسبة للتجربة اللى فاتت فالحمدلله إن ده حصل قبل كتب الكتاب كمان عشان اضعف الإيمان متتحسبش عليكي جوازة (ده بالنسبة للناس اللي بتحسبها ) وكويس إنك قولتى لان الوجع بيكون اكبر بكتير لو تم الزواج بالفعل ومن الواضح ان وقتها رد فعل الشخص ده هيكون اسوء بكتير من اللى عمله .. المصارحة أكثر حل فيه رحمة لقلبك إنتي صدقيني وأكتر حاجة هتخليكي مقبله وحابة العلاقة دي مش شايلة همها وأكتر حاجة تخليكي مطمنة شوية لأنك هتختبري رد فعله بدري مش زي لما يبقى بعد الزواج وكمان المصارحة خليها بدري شوية مش متأخر زي المرة اللى فاتت (بس طبعا متكونش ف اول مقابلة والكلام ده ويكون له هو فقط اكيد مش لاى حد من أهله ) واسمعي سلسلة "إيه المشكلة" الحلقات اللى تخص الخطوبة او الزواج ..الإنسان عموما بيحتاج فى القرارات الكبيرة زى الزواج إنه يدقق ويفكر ويعيد حساباته ألف مرة ف الطرف التاني مش مجرد علاقة والسلام لإنك انتى كمان كبنت هتطبعي بطباعه هو اكتر من انه هو يتطبع بطباعك فلازم تختارى حد طباعة ونمط حياته إنتى تتقبليه لإنك هتمشي عليه بعدين في اغلب الحالات وبعدين إنتي كطبيبة مش أى حد هينفع تاخديه وديما بتكون ليكي نظرة اكبر من اللى ف سنك لانك ببساطة شوفتى كتير عنهم وتعبتى وسهرتي وصبرتي واتعاملتى مع ناس كتير فأشد لحظات الضعف والألم والذل وأدركتي إن الدنيا متستاهلش أوي كل اللى الناس بتعمله ده وأهم حاجة ف الدنيا هي رضى ربنا وحياة هادية وده هيحصل بإذن الله مع شخص أفضل وحسيتى منه إنه متقبلك وشاف المميزات اللى فيكى أكتر من العيوب واختار إنه يكمل معاكي عشان حياته معاكي هتكون أفضل من أى حد تاني فمتتعلقيش بالماضي واتفائلي بالمستقبل واسعي في الحاضر إنك تكوني أحسن من امبارح وارضي بكل قضاء الله وادعي بالرضى لإن الرضى شعور والمشاعر مش بإيدك ده فضل من ربنا على الإنسان وصدقيني والله العظيم وقتها هتحسي إن أي بلاء هااان وصدرك وسع وتقبل كل حاجة بتحصلك بشكر وحمد غريب !
تم النشر الأربعاء، ٢١ فبراير ٢٠٢٤
و اتوجعت فعشان كدة بسال بس اتوجعت من طريقه كلامه و تفكيره كان بيحدف طوب مش عالشخص و اني كملت او لا
تم النشر الثلاثاء، ٢٠ فبراير ٢٠٢٤
لا انا ما زلت انسة بس حصل حوار خطوبة و بعد كدة حكيت الموضوع بعد فترة قبل كتب الكتاب و ساعتها الدنيا اتقلبت و بعد كدة فركشت
تم النشر الثلاثاء، ٢٠ فبراير ٢٠٢٤
اعراض ظهرت و حللت لاني شكيت لاني طبيبه بس مش نسا و بعد كدة اتاكدت من حد طبيب نسا
تم النشر الثلاثاء، ٢٠ فبراير ٢٠٢٤
لعرض الإجابة في فدني اضغط هنا