لو فيه مشكله في الخلفه نسبه الحمل قد تكون ١٪ هل لما حد يتقدم المفروض اقوله و لا .. مع العلم ان شرعًا مش لازم اقول لان المشكله مش حاجه تمنع العلاقه بين الطرفين
هل كراجل لو اتقالتلك حاجه زي دي ممكن تقبل عادي لو البنت و اهلها كويسين و لا هتقول و انا ايه يعكني ... و لو متقلش و عرفت بعد الجواز هتحس انك اتضحك عليك و هتضايق من اللي قدامك؟
السلام عليكم ورحمة الله وبركاته. بصي هو أولا انا مراتي قبل الجواز كل الدكاترة قالولها الخلفة هتكون صعبة و احتمال متخلفيش و الحمدلله كانت حامل من اول شهر و الطفل الثاني كنا مانعين و كان عندها مشاكل في الرحم و الدكاترة قالولنا ممكن يكون ورم و كان حمل . دة مش معناه اني بقولك متقوليش بس انتي فكري فيها انك تحطي نفسك مكان الطرف الثاني لو ربنا مأرادش الخلفة و عرفتي انه هو كدب عليكي . و فكري فيها ان كتير ناس كانت مفيش اي مشاكل بس مش هيخلفوا مع بعض . انا مش اهل فتوى بس ربنا اداني عقل. فقهيا انتي مش ملزمة انك تقولي بس انا لو قولتلك ان الدين بيحرم الغرر في العقود بمعنى انه بيحرم انك تكتبي عقد و فيه حاجات مجهولة دي حاجة . و التانية انك أكيد لو لاقدر الله مرزقكيش وارد انك تكوني أذيتي الشخص الاخر و اكيد دي حاحة تأثمي عليها . عموما خلي كل حاحة واضحة احسن حتى بنية تسليم الامر لله بالكامل و عشان لو الشخص مكملش من الاول هيكون اسهل عليكي انه يمشي بعد كدة و لو مشى فأكيد مكنش خير ليكي و لو كملتوا هتكوني متأكدة من حبه و هيتكون بينكم المودة و الرحمة و ربنا يرزقك يارب باللي تتمنيه
تم النشر الاثنين، ١٩ فبراير ٢٠٢٤
لا تقولي لأن دا حقه طبعا لازم تبني كل حاجه على صراحه من البدايه
تم النشر الأربعاء، ٢١ فبراير ٢٠٢٤
اظن المصارحه هتكون افضل لان ده كمان بيجنبك التجربه وانك ممكن تشيلي لقب مطلقه اذا استمر زواجكم اربع او خمس سنوات مثلا بدون انجاب ويتضح بعدها ان المشكله من عندك وقتها هو ممكن يطلقك عشان محتاج يكون له اولاد... فتصبح فرصتك بعد ذلك في الزواج اقل من حيث النوع وليس من حيث العدد... يعني اقصد هيجي لك رجال ممكن اللي مطلق واللي ارمل واللي معاه اولاد واللي فيه عيوب لكن لو صارحتي من الاول ممكن يكون افضل فاللي يقبلك يقبلك عشان بيحبك احسن ما يسيبك بعد كده وربما يعتبر انك غشيته
تم النشر الثلاثاء، ٢٠ فبراير ٢٠٢٤
نسبة الحمل دي عرفتيها ازاي هل سبق لكي الزواج وبناءا ع ده عرفتي ؟ ولا هل عندك عيب خلقى ومفيش رحم من أصله وده حالة نادرة جدا يعني !ممكن يكون رحم غير مكتمل او مشوه وده ممكن يتم فيه الحمل ولكن بصعوبة عن الطبيعي لكن يظل مش مستحيل .. النسبة بتتحدد أكتر بعد الزواج وبفحوصات كتييرة والنسبة بردو مش بتكون اكيدة .. قد يكون عندك مشكلة ولكن ممكن يتم الحمل باساليب متعددة كتير والطب تطور جدا فى المجال ده ..وما ذلك على الله بعزيز ! .. فمتأسيش ولا تفترضي أحتمالات من دلوقتي وربنا بيرزق من يشاء ، كمان تظل المصارحة أفضل عشان ميحصلش مشاكل وتعلق انتي في غنى عنه وفي النهاية كل شئ نصيب .
تم النشر الثلاثاء، ٢٠ فبراير ٢٠٢٤
وممكن ربنا يكرمك وميحصلش اي مشاكل وتخلفي علطول والدنيا تمام كله خير ان شاء الله ودا شيء مش يعيبك بس بجد مش حلوه انك تخبي حاجه ناس كتير اختلفوا فيها وعملت مشاكل بعدين واتحسبت جوازه ووقت من عمرهم مع شخص غلط
تم النشر الاثنين، ١٩ فبراير ٢٠٢٤
بصي هو بعد الشر عليكي لو فعلا مقولتيش واتجوزتوا وطلع بيحب الخلفه وفارقه معاه اكتر من علاقتكم ف دى فعلا هتكون عله هتدمر اي شيء حلو ف علاقتكم وهتبعدوا عن بعض بتدريج ليه تعيشي نفسك ف قلق من اللحظه اللي هيعرف فيها الحاجه دى لما ممكن تخلصي من كل التوتر والقلق ده في ناس اعرفهم بتبقا العلاقه تمام ومفيش اي حاجه وتبوظ وتبقا مقرفه ومتعبه بسبب ان طرف هيتجن علي الخلفه وبيلوم التاني علي التاخير ده
تم النشر الاثنين، ١٩ فبراير ٢٠٢٤
انا معرفش شرعا حكمها ايه بس معتقدش ان الشرع هيقول اننا نخبي موضوع مهم زي ده عن شخص هيكون مهم ف حياتنا لو تم خطوه رسمي الصراحه افضل وان كل طرف يصرح ب اي حاجه ممكن تسبب مشاكل كبيره بعدين ليه نخبي واحنا لسه علي البر لما بعد الشر لو كانت سبب مشكله بعدين وطلاق وتتحسب جوازه؟!!
تم النشر الاثنين، ١٩ فبراير ٢٠٢٤
في ناس بتفرق معاها الخلفه درجه اولي بنسبالها وفي انسان تاني لو فعلا عاوزك ممكن يقولك نجرب سوا يمكن ربنا يكرمنا بس تجنبا ل جمله انتي خدعتيني وخبيتي عليا شيء مهم عشان لو بعد الشر حصل مشاكل تقوليله انا كنت صريحه معاك وانت اخترت نجرب سوا
تم النشر الاثنين، ١٩ فبراير ٢٠٢٤
اناا كراجل لازم اعرف ، ومتقلقيش هتلاقي زوجك سواء دلوقتي او بعد سنتين او ٥ سنين المهم في الاخر هياجيلك
تم النشر الاثنين، ١٩ فبراير ٢٠٢٤
انا سالت كذا دار افتاء .. ما يجب ان يقال هو اي علة تمنع العلاقه بين الزوجين
تم النشر الاثنين، ١٩ فبراير ٢٠٢٤
لعرض السؤال في فدني اضغط هنا