الأنثى بحكم الفطرة وطبائع الأشياء والأصول وقوانين الطبيعة والنظريات الفيزيائية (!) هي الطرف المطلوب الذي يسعى له الذكر في علاقة الارتباط ويبذل من أجله الغالي والنفيس من أجل الوصول له .. فما الذي حدث وقلب الأمور هذا التقليب العجيب فأصبحت الفتاة تبتذل نفسها ابتذالا شديدا وتبذل من عواطفها ومشاعرها لأول ذكر يبتسم لها في السوشيال ميديا أو على أرصفة الجامعة؟
لماذا رخصت الفتاة نفسها إلى هذا الحد فأعطت من روحها ومشاعرها مجانا لكل عابث تحت مسمى الارتباط ما كان تُبذل من أجله كرائم الأموال من قبل حتى كان أهل العريس يفتخرون في الثقافة الشعبية بأنهم أخذوا العروسة (بالسيف الماضي وأبوها مكانش راضي)!!
وطبعا حين يجد الذكر أن الحصول على ما يريد بهذه السهولة يصبح التخلص (أو التملص) من العلاقة حين يمل منها والانتقال إلى غيرها بنفس السهولة!
إننا نقرأ كل يوم هنا في فدني عن مهازل علاقات الارتباط العابثة التي تحدث من وراء الأهل والدمار النفسي الذي يعقبها حين يستنذل أحد طرفي العلاقة!
والمصيبة الأكبر أن البنت أصبحت تدخل هذه العلاقات في سن صغير جدا ليس فيه أي احتمال للزواج فلم نعد نستغرب أن تكتب فتاة في الثامنة عشرة أنها قضت آخر خمس سنوات في علاقة شيطانية دمرت لها فترة صباها!!
لماذا تفعل الفتاة هذا في نفسها؟
الدنيا اتغيرت وكل يوم بتزيد فيه الفتن والمعاصي وللاسف الانسان بيقلد الناس فى الوحش وبقت اكتريه البنات الا من رحم ربي تكلم ولاد وخروجات فيه منهم بيبقا عارف انهم بيتسلو بيهم بس دايما بقول العيب على البنت هى إلى فى أديها توقف كل واحد عند حدو ومتبقاش تسليه او لعبة فى ايد حد ودة هايعزز منها جدا مفيش ولد هايتقدم لبنت ويأمن على أنها تشيل اسمو او تربى عيالهم سعتها هايقول ارتبط بوحدة ماشى معها ودة ٩٠%إلى بيحصل وبشوفو فى الدروس وتقول وتنصح هما خلاص فى دمغهم كدة وفى ناس ودة من اكتر المشاكل إلى لقيتها هنا أن بيكلمو ويحبو علشان لاقو اهتمام اكتر من اهتمام العيلة ودة غلط الاحتياج للمشاعر والأمان يوصل الانسان لكدة البنت اهم حاجة فيها سمعتها عاملة زى الجبنة البيضا لو قعت فى التراب خلاص ملهاش لازمة لازم يتقو نفسهم واهلهم يعززو نفسهم لأننا محل طلب
تم النشر الأحد، ١٢ مايو ٢٠٢٤
اجابتي مش هتكون بس عن العلاقات المحرمة .. هتكون عن تفكير الشباب ف الوقت دا .. يا ترى فكرنا أو فاكرين نفسنا واحنا قدهم كنا بنفكر ازاي ؟ كل شخص بيكون عايز يثبت نفسه ف الدنيا .. تفكيرنا بيكون مستهدف ع إثبات ذاتنا سواء مراهق أو مراهقة بتكون فترة نمو و بنكون لا إراديا بندور ع الفترة وهي إثبات الذكر أنه رجل و إثبات الانثى أنها امرأة .. و كلنا بلا استثناء جربنا احساس إن حد ينصحنا ف مجالات كتير منها ذاكر كويس اهتم لمستقبلك .. صلي .. متكلمش بنت .. متكلميش شب .. رتبي اوضتك .. البسي كويس .. اوعى تشرب سجاير .. اصحابك دول هيفسدوك ... والخ... من النصائح وعلى حسب الأهل سواء بتكون النصائح ب اسلوب معنف أو لا .. بس الشئ المشترك هو إن معظم المراهقين بيحسوا إن دا تقليل من شأنهم و اكبات لرغباتهم .. و بيتحول المنصح ل عدو .. و بنكره إن حد ينصحنا و بنبقى فاكرين أننا الصح وإن مثلا الولد اللي بحبه دا كويس و هيحميني و غير ما هما فاكرين .. و بنفرض فكرة أن علاقتنا تكون غلط و بنرفض فكرة إن علاقتنا مش هتكمل .. لان هما لو مدركين أنهم مش هيكملوا سوا مش هيدخلوا فيها من الاول .... والشيطان ليه دور أساسي طبعا ف توسيع الفجوة بين الأهل والابناء ... و طبعا ببساطة شديدة لما الأهل بيمنعوا التصرف الغلط عن الأبناء بالقوة النتيجة أن الأبناء بيكذبوا و بيكملوا ف تصرفاتهم بس بالسر .. و بيكونوا قدام اهلهم خلاص اتغيروا و كبروا و فهموا ومش هيعملوا الغلط تاني علشان احنا عارفين نربي ... و هما للاسف محلوش المشكلة خالص .... الخلاصة .. لازم الأهل يكونوا مدركين أن أولادهم بشر .. يعني طبيعي هيعملوا حاجات حلال و حاجات حرام .. شئت ام ابيت .. لازم تعلمه أنه يحب ربنا ويخاف من غضبه وأنه يعصيه ... لان المشكلة أننا بنخاف من كلام الناس اكتر من خوفنا من ربنا للاسف .... تاني حاجة مهمة .. نعلمهم طريق الرجوع لربنا علشان لو ف يوم تاه ف الدنيا ميحسش أنه ضاع وإن باب ربنا مقفول ف وشه ف بالتالي ينغرس ويكمل ف الطريق الغلط من يأسه ... ثالثا .. الاامااااااان ... نحسسهم أننا بنحبهم و بنخاف عليهم مهما عملوا .. وأننا بنثق فيهم بجد .. لان لو حسسته انك واثق فيه بجد عمره ما هيخونك ولا هيخون ثقتك .... اتمنى تكون وجهة نظري وصلت .. واسفة ع الاطاله.
تم النشر الأحد، ١٢ مايو ٢٠٢٤
الحياة بقت مملة ومليانة فتن ومعاصي والواحد معنوش شغف ولا طاقة للتغير لان كل الناس عرفة الصح والغلط واكترهم جهلة ميعرفوش حاجه معلوماتهم عن الدين صفر والواجب ان الناس تنصح وتغير مش لاهل العلم بس الامر بالمعروف والنهي عن المنكر دا واجب كل مسلم ومسلمة ال يقدر يغير حاجه يغيرها لان الحياة بقت صعبة انا عارف ان كلامي متناقض بس لان بحاول اتغير بحارب نفسي بس الحياة صعبة وبستسلم ف النهاية 😪💔
تم النشر الأحد، ١٢ مايو ٢٠٢٤
في كتاب ثغرات في الضمير - نظرة على أحوالنا يقول الدكتور النفسي أحمد عكاشة ما يلي : كلنا نشكو، ولنا جميعًا الحق في شكوانا. وإذا كنا نحسّ أسفا على ما آلت إليه أوضاعنا الأخلاقية وما آلت إليه قيمنا مما يمسّ الضمير العام، إلا أننا جميعًا خلال التعبير عن هذا الأسف، ننسى أن ما نشكو منه هو في واقع الأمر نتاج لما حدث على مر السنين. بمعني أن ما يشكو منه البعض ــ وهو طرف فيه أو شاهد عليه ــ قد يتجاهل أصحابه تماماً أن لهم بالمثل ممارسات يمكن أن تكون مثار شكوي آخرين، ومن هنا يصبح على المجتمع كله أن يتفق على أن الإصلاح وتدارك الأخطاء وإيقاظ الضمير العام مسئولية جماعية تضامنية. وبدون ذلك لا أظن أن الضمير العام سيسلم من اتساع الثقوب، التي كلما حاولنا رتقها أخفقنا بل وفوجئنا بالمزيد من الثقوب... ومن وجهة نظري أن غياب الوازع الديني وعدم قيام الأسرة بواجبها ودورها الرئيسي هو من أهم الأسباب والدوافع ولكن أيضا جهل الأباء والأمهات بمناهج التربية وطرق التعامل السليمة والصحية مع الأبناء والبنات هو من ضمن الأسباب ف المشكلة في ظاهرها خاصة بالأسر وعامة بالمجتمع محو الأمية التربوية هو خيط البداية ومحور حل المشكلة ! والسلام على من اتبع الهدى ثم اهتدى .
تم النشر الاثنين، ١٣ مايو ٢٠٢٤
لازم البنات تعرف وتتأكد إن الشاب اللي هيصاحبها ويتكلم معاها سنين هيسيبها في النهاية لأسباب كثيرة أهمهم إنها مش محل ثقة تكون زوجتة اللي تربي أولاده في المستقبل. وبالتالي يوم ما يفكر يتزوج هيروح للي هيختاروها ليه أهله اللي هي محتشمة ومحترمة وملهاش في كل المواضيع الزبالة دي عشان قلبه يطمن وأولاده يتربوا أحسن تربية. والبنت اللي بتعمل كده لازم تعرفي إنك إنتي رخيصة جدا إنتي لا مؤخذة زي اللبانة اللي الشخص بيمضغها وياخد طعمها الحلو ولما يزهق منها يتفها في الأرض إنتي خاينة نعم خاينة لأن كلامك مع شخص غريب بالليل في التليفون بدون علم أهلك فإنتي كده بتخونيهم كما لو أنك متزوجة وبتفعلي هذا مع زوجك. ومعلش أنا آسف لكل بنت هتقرأ الكلام ده سامحوني على الكلام القاسي اللي قولته ومتزعليش مني أنا أخوكي ولازم أقولك كده عشان تفوقي قبل فوات الآوان وتحافظي على نفسك وتبقي من البنات الغالية اللي الشخص يكون أقصي طموحه إنه يشوف وشك ولو من بعيد.
تم النشر الاثنين، ١٣ مايو ٢٠٢٤
الحقيقة انه بيحصل أكتر من كدة بكتير يعني انا عندي 17 سنة واللي بسمعه والله لا يسر ابدا كل يوم فلانة بتكلم فلان وفلان سابها وبقى مع صاحبتها وده كله لغياب الدين وعدم وجود أسرة تهتم بأبنائها وبناتها وتلفزيون واعلام فاسق حتى والله اعرف ناس البنت باينة محتشمة وهي ماشية مع فلان وفلان وأهلها مش عارفين والله بنات أزهر فين الدين مش معنى إنها محجبة تبقى محترمة يمكن غصب ويمكن موضة واللي بتلبس الأيام دي مش حجابشعرها ورقبتها ومعالم جسمها على مرأى للجميع المفروض الحجاب واسع ده ستر مش تغليف والشاب الفاسد اللي يضحك على البنت وهو عنده اخوات بنات والله انا اعرف بنت هي اللي ضحكت على الشاب وتلاقيه لابس سلسلة كلب ولبانة وهاند فري قال وهدوم مقطعة قال يعني دي الموضة يعني ايه ولد أو بنت ماسكين تليفون من الحضانة وأهلهم مش عارفين بيعملوا ايه عليه فعلا والله يأتي زمن على الناس القابض على دينه كالقابض على جمر الأستاذ حكى لنا انه فيه مسيحي راح الأندلس فلما راح يدخلها( وكانت محاطة بسور )الحراس لم يسمحوا له لأن هيئته مش مسلم ووجد طفل بيبكي فسأله بيبكي ليه قاله ان صحبه اصطاد حمامتين وهو حمامة واحدة قاله خلاص المرة الجاية تصطاد اتنين الطفل قاله لأ ده معناه لما نكبر هو هيقتل اتنين صلبيين وانا واحد فالرجل اندهش ورجع حكى ما حصل معه قام الصلبيين بعتوا نساء ارتدوا ملابس اسلامية ودخلوا الأندلس ونشروا فيها فسوقهم وبعد فترة راح حد من الصلبيين وجد شاب يبكي سأله ليه بيبكي قاله صديقتي وعدتني اننا نتقابل ومجاتش ام صديقي صديقته وعدته وراحت ساعتها الصلبيين عرفوا انه وقت احتلال الأندلس وللأسف أصابنا ما أصابها إلا من رحم ربي( وما أبرئ نفسي إن النفس لأمارة بالسوء) والشاب اللي حاول يتواصل معايا يشهد الله من ساعتها لو شافني ماشية في شارع لا يرفع عينه ولا يدخل شارعنا على الرغم من انه شارع عمومي وآخر تجرأ وقال لأصحابه انه كلمني أصحابه كدبوه وقالوا له بالنص نجوم السما اقرب لك من مصدر موثوق البنت لازم تتقي الله في أهلها وفي نفسها وفي دينها والشاب لازم يتقي الله فيها لأن الرسول قبل ما يموت وصى على الصلاة والنساء وربنا يهدي الجميع
تم النشر الثلاثاء، ٢٦ نوفمبر ٢٠٢٤
كل كلمة حقيقه فعلا، م اسوأ الظاهرات المنتشره حاليا، بس لو كل بنت بتفكر انها م لاقيه الامان ف بيتها او م اهلها ف تروح تدور عليه برا كدا انتى بتدمرى نفسك اكتر.. ليه مثلا منكتفيش بامان الله وقربه وان مهما كان اللى حوالينا م حاسيين بينا م لازم ان نرتبط بشباب وندخل ف علاقه محرمه وغيركدا فاشله البنت بتبقى تحت سن 18وبتقول ان ازاى هى م فعلاقه وازاى مرتبطتش.... بجد دا مش ظاهرة دا بلاء وبيوقع الشباب والبنات فيها وفى نقطه كمان حابه اتكلم عليها ف بنات ما شاء الله بجد بتكون مفيش رقيب واخده الحرية والثقه التامه م اهلها وبتكون ف ايدها انها تعمل وترتبط بكذا وكذا.. بس لا بيحافظوا ع نفسهم وبيتقوا الله ف نفسهم وف ثقة اهلهم ليهم... واحب اقول للبنات مفيش واحد هيبقى بيتمنالك الخير او هيحافظ عليكى هيخليكى تمشى ف الغلط والحرام.. الللى بيحب حد بيخاف عليه م بالك ب سمعتك وكرامتك ونفسك لما بتخليهم ف ايد واحد ميسواش.. 🤷🏻♀️
تم النشر الجمعة، ٢٤ مايو ٢٠٢٤
رايي في هذا الموضوع سببه هو social media وضغطها الشديد علي البنات والسيدات من حيث المنافسه الشديدة في المظهر قبل الجوهر ، اصبح تقديرها لذاتها منخفض جداا ، وكله خارجي فقط وعدم الوعي بقيمتها الحقيقيه وان ربنا خلقها في احسن تقويم. فضحت بنفسها وصحتها من اجل صوره خارجيه ،لذا من الممكن ايضا تضحي بنفسها من اجل اي رجل !لان الخوف اصبح المسيطر علي كافه تصرفاتها إلا طبعا من رحم ربي ومن لديه الوعي .
تم النشر الخميس، ١٦ مايو ٢٠٢٤
الاسباب الكبرى هى استسهال المبررات وانتشارها وصوتها العالى افكار كتير بتخلى كل بنت تدى لنفسها حجة ببساطة عشان تبعد عن الفطرة وتروح للمنتشر واللى يبان فى ظاهره هيوصل متعه واشباع لواحدة من احتياجاتها سواء الاحتياج ده ( عاطفى او اجتماعى او نفسى ) مجرد ان بقى فى مبرر يسكت صوت الضمير بيخلى الموضوع بابه مفتوح بدون رادع الاصوات بتاعت التربية الايجابية واد ايه الاهل دول غير واعيين وبيأذوا اولادهم نفسيا ..دى خلت بقى فى بجاحه حرفيا كمان فى تقبل عواقب النوع ده من الخطأ الزرع كمان من الاهل بقى غير صلب ..محدش بيعرف بنته قد ايه هى غاليه ولا بيشبعها عشان متلاقيش مبرر وبيتسابوا الاولاد والبنات فى بحر الافكار والكوارث اللى بتتحدف فى الانترنت من قليلى الدين والاخلاق والفهم
تم النشر الاثنين، ١٣ مايو ٢٠٢٤
أعتقد أجاباتي هتبقى محتلفة شوية لإني مش من أنصار حجة غياب حنان الأهل، ليه غياب حنان الأهل مش سبب؟ لإن الأجيال قبلنا كتيير منهم كبروا من غير ما يعدوا بفترات الأرتباط والكلام وكان يمكن أهلهم أكتر في القسوة من الموجودة في أهلنا في الجيل الموجود دلوقتي ولكن المشكلة كلها في التساهل في النقطة دي وإن أغلب الجيل إتحطله من التليفزيون والسوشيال ميديا والروايات فكرة إن وإيه المشكلة في إني أدور ع الحب وأجرب وإن أهلي شداد ومش بيدوني حنان كفاية إني أكون شخص سوي، وكمان المشكلة إن أغلب الجيل هش جدا نفسيا والقرآن والدين بقت حاجة قليلة الأنتشار وبقى في تساهل كبيير جدا في أبسط أحكام الدين من ناحية إجتناب الحرام والإقبال على الحلال أعتقد كون الموضوع بقى متاح بشكل أسهل خلاه ينتشر أكتر.
تم النشر الاثنين، ١٣ مايو ٢٠٢٤
ممكن انا سنى صغير انى اتكلم فى مواضيع زى دى و لكن تقريبا نص بنات مدرستى كدا و دى حاجة استغربتها جدا لانى مكنتش قادرة استوعب ان ممكن يكون فى فعلا نماذج كدا فى الواقع و خاصتا ان دا سن مبكر جدا و من اللى استنتجته او لاحظت انه مشترك تقريبا مع كل بنت فيهم 1-هو غياب دور الاهل يعنى لو البنت متشبعة بالحنان و الحب و الحرص و الاهتمام من الاهل نسبة احتياجها لمصدر خارجى لكل هذا تكاد تكون معدومة فدور الاهل لا غنى عنه و هو عامل اساسى يعنى لما اظهر حبى و اهتمامى و حرصى على بنتى و اعاملها كأميرة و صديقة و ابنه ونكون فى علاقة قوية مش هتكون (صيدة سهلة) لواحد عايز يلعب بيها و العكس تماما كل ما كانت علاقتنا جافة كل ما زادت رغبتها انها تبحث عن بديل تلاقى فيه كل الحاجات اللى فقدتها مع اسرتها 2-الدين معظم ان مكنش كل اللى بتدخل فى علاقات زى دى الدين مش جزء اساسى فى حياتهم و مش عارفينه كويس للاسف لانها لو تعرف دينها هتعرف ان دا غلط و هتقدر تستوعب هو ليه غلط و عواقبه فى الدنيا و الاخرة فأكيد مش هتقع فى حاجة زى دى3-البيئة او الاصدقاء دول و للاسف ليهم تأثير كبير ممكن البيئة تربى فى البنت ان دا عادى و صح و ممكن الافلام و المسلسلات و السوشيال اللى زرعت فينا افكار و معتقدات و اللى اترجمت بعد كدا فى افعال كلها غلط فى غلط و حتى من غير ما نحس بدا غير اصدقاء السوء بقى بصراحة العوامل اللى تخلى الانسان مش بس البنت يفسد بكل المقايس و دى بعض الاساس اللى خطرت على بالى و لاحظت فعلا اهميتها و لكن فى النهاية كل دا بيختلف من بنت (شخص) لاخر و لاختلاف العقول و الشخصيات و اسباب تانية بس بجد حضرتك معاك حق و للاسف وضع البنات و الشباب وضع مؤسف جدا و فى الاخر بيعلقوا هذه الاخطاءعلى شماعة احنا فى سن مراهقة انا مبعترفش ابدا بسن المراهقة من الاساس مفيش حاجة اسمها مراهق في ناضج واعى
تم النشر الاثنين، ١٣ مايو ٢٠٢٤
اولا مفيش مبررر للغلط مهما كانت الظروف اجابه سؤالك "سورة النور" التشريع الاول للعيش في حياه أكثر عفه وشرفا و الحفاظ علي القلوب لرب القلوب السورة ال بتقولنا علي تشريعات بتكمل بعضها وبدونها صور الانحلال الخلقي بتظهر لا في غض بصر ولا في ححاب ولا في اقامه حد علي زاني أو مُقذف محصنات لا في اداب في التعامل ولا في ستر وحِفظ فرج، لا في رجاله في البيوت تعلم الولد قبل البنت الاحترام ولا بيعاملوا بناتهم كويس ولا امهات تستحق الكلمه، بَعدنا عن الشرع بطريقه تخلينا نشك في ايمانا ربنا يتولي
تم النشر الاثنين، ١٣ مايو ٢٠٢٤
البنات والولاد الي بيعملو كدا هما الاتنين غلط والي يقلك مشاعر ومش مشاعر احب اقلك انتا الي بتتحكم في مشاعرك انا اهو واحد يمكن اكبر من ناس كتير بتقول انها بتحب وعمري ما فكرت في الحب والكلام الفاضي دا + انتو يابني ادم الي عوزين تعملو الغلط والشطان بيحلهالك في دماغك وانتا طبعا بتساعده والغلط مش من البنات بس برضو الاولاد غلط
تم النشر الأحد، ١٢ مايو ٢٠٢٤
والله انا ما عارفه اقول ايه انا عندي ١٥ سنه ومعايا دفعتي كلها ما عدا يعني مش محصلين ربعهم بنات وأولاد وكل واحده ماسك واحده وبيكلمها ولما يملو من بعض يروحوا مبدلين مع حد تاني انا كان معايا صديقه عمري اتفرقنا بسبب الموضوع ده يعني قعدت سنتين بتكلم واحد وياما نصحتها وقولتلها ان ده غلط وحرام بس هيا مكنتش راضيه عن كلامي ومصممه ان اللي هيا بتعملوا صح لان الدفعه كلها بتعمل كده تقولي يعني جت عليا وبسبب ده اتفرقنا وهيا دلوقت أهلها عرفوا واتسحب منها الموبايل وبقيو اخوتها الاولاد بيروحوا معاها يوصلوها الدروس ويستنوها ومبقتش بتطلع من البيت ذي الاول وحياتها بقيت زفت آدي اللي هيا استفاتو وهوا عايش حياتوا وبيكلم غيرها وولا همه هيا وكل صحابها بعدو عنها وخسرت كل حاجه اصحابها واصدقائها وثقه أهلها
تم النشر الأحد، ١٢ مايو ٢٠٢٤
غياب تام لدور الأب. الأب هو المسؤول عن تقويم الإبن والإبنه وهو وليها والكلمة كلمته ان خاف فسادها زوجها والا فلا. دياثة الأب حين يترك ابنته تخرج الي الشوارع بحجاب غير مكتمل او بملابس جذابة او ما هو أسوأ.
تم النشر الأحد، ١٢ مايو ٢٠٢٤
عندك حق يا محمد الجانب الديني مهم جدا .. العلاقات العابثة اللي بيدخل فيها الشباب من وراء الأهل بيبقى فيها تعدي لحدود الله عز وجل
تم النشر الأحد، ١٢ مايو ٢٠٢٤
بتبقي مرحله مراهقه كلها مشاعر متلغبطه في منهم بيتعرف علي اصحاب من النت والشارع بيشجعو علي ده اكتر والي ممكن يخلي البنت والولد يعملوا كدا إنهم مش لايقين صحاب فيجيبوا من برا ويقوا علاقتهم معاهم لحد مبيبقوا بيعملوا زيهم وفي ناس كتير عاقله علفكرا بردو ممكن إحنا بنشوف الجانب السئ بس بس في بنات و ولاد كتير محترمه وللأسف البنات اكتر لأن حراسه الاهل علي الولد مش بتبقي نفسها علي البنت حتي فتره المراهقه
تم النشر الأحد، ١٢ مايو ٢٠٢٤
معاكى كلنا بنغلط بس المهم كل واحد يتعلم من غلطة بس بردو متخليش احتياجك للأمان تثقى فى واحد بيتسلى او بيلعب على مشاعرك سعتها هاتفقدى الامان من كل الجوانب
تم النشر الأحد، ١٢ مايو ٢٠٢٤
ليه يغالي متكلمتش عن الموضوع من الجانب الديني يمكن الناس تتعظ شوية ؟
تم النشر الأحد، ١٢ مايو ٢٠٢٤
البنت العاقلة المحترمة يا سارة مش هتكلم ولد وتعيش حياتها معاه على السوشيال ميديا والواتس كأنها بتكلم واحدة صاحبتها
تم النشر الأحد، ١٢ مايو ٢٠٢٤
بأنك تتعلمي دينك وتتقي ربك وتعرفي قدر نفسك والغاية التي خلقت من أجلها وتشغلي نفسك بما ينفعك حتى لا تشغلك بما يضرك. إذا زاد إيمانك وزاد عقلك زادت كمية "الإنسان" فيك
تم النشر الأربعاء، ١٨ ديسمبر ٢٠٢٤
لو سمحت ممكن أسأل حضرتك سؤال.. إزاى أنا ڪبنت أقي نفسي من الأمور دي، وأعف نفسي عن ڪل الفتن المنتشره ف الزمن القاسي، وأڪون بنت ذات قيمه، يحترمها المجتمع؟؟
تم النشر الأربعاء، ١٨ ديسمبر ٢٠٢٤
حاولي تتضغطي علي نفسك وصلي قيام ليل واستمري فيه هتلاقي ربنا جبرخاطرك كتير واعملي لنفسك ورد يومي ♥️
تم النشر الاثنين، ١٣ مايو ٢٠٢٤
أنا أتكلم عن ظاهرة موجودة ومنتشرة .. وطبعا هناك بنات محترمات لا يدخلن هذه العلاقات المشبوهة
تم النشر الاثنين، ١٣ مايو ٢٠٢٤
الخلل دا مش وليد اللحظه من وجهه لكنه ناتج عن عوامل عده أهمها الاسره وغياب الوازع الديني : الاب والام مشغولين طوال الوقت مفيش وقت للتربيه ولا للحب ولا للعطاء ولا لزرع القيم في الأبناء .... ايضاالعوامل الاقتصاديه وتدني مستوي المعيشه كان سبب في تنحي دور الاسره .... التقدم التكنولوجي من أكبر عيوبه أنه قدر يوصل لشريحه مجتمعبه كبيره أن السجائر موضه والسرقه شطاره والرقص ع التيك توك للبلوجر الكيوت و الحب حق مشروع وان اللبس المكشوف رقي ... الخ
تم النشر الأحد، ١٢ مايو ٢٠٢٤
الانسان راجل او ست اذا ماشبعش حب وحنان فى بيته بتسبب ان الراجل بيطلع عنده نقص بيعوضه فى علاقات كتير مش حب حقيقي بس بيشبع النقص اللى عنده والبنت اول ما تكبر بتفتح على حب ابوها لو مفيش حب وحنية بتطلع تدور على الحنان ده بره فأساس الإنسان المتزن نشأته الاولى فى بيته وسط اهله بيعتمد عليه
تم النشر الأحد، ١٢ مايو ٢٠٢٤
مش علشان تجربة فشلت تعملى كدا لا اتعلمى من دة مفيش حد بيتعلم ببلاش بس قبل ماتحبى تانى حبى بينك وبين نفسك لحد مايجي البيت سعتها اه الحب دة مضمون لاكن تانى العلاقة إلى اولها مترضيش ربنا نهايتها وحشة
تم النشر الأحد، ١٢ مايو ٢٠٢٤
يبقي غصبن عني ونبقي غلطه بس كلنا بنغلط مهو السبب مش لقين امان
تم النشر الأحد، ١٢ مايو ٢٠٢٤
يعني اي ڪمية الانسان؟
تم النشر الأربعاء، ١٨ ديسمبر ٢٠٢٤
طيب ازاى اتعرف علي ربنا؟
تم النشر الأربعاء، ١٨ ديسمبر ٢٠٢٤
هو انت ليه بتعمم معلش؟
تم النشر الاثنين، ١٣ مايو ٢٠٢٤
عشان الاهل
تم النشر الاثنين، ١٣ مايو ٢٠٢٤
الحب طلع وحش قوي
تم النشر الأحد، ١٢ مايو ٢٠٢٤
لعرض السؤال في فدني اضغط هنا