انا دلوقتي شاب عندي 27 سنه ابويا كان خرجني من المدرسة وانا في 3 ثانوي بسبب انو يكمل تعليم اخواتي البنات عشان المصريف يعني المهم انا دلوقتي انا الحمدلله علمت نفسي و كملت في مجال الجرافيك ديزاين و مستوى في الغه الانجليزيه كويس دلوقتي جاء لي شغل بره مصر في كندا بس دلوقتي اهلي مصمين اتجوز قبل لما اسافر عشان احمي نفسي علشان الحرام هناك سهل والكلام اللي انتم عارفينه ده بس انا دلوقتي اصلا خايف اتقدم لوحده بسبب موضوع تعليمي بس انا اصلا بحتقر الموضوع التقييم بالتعليم ده بس انا مش هعرف اغير الواقع ولا هعرف اغير تفكير الناس انا اصلا شايف ان تعليم الجامعي ما بيغيرش غير ان هو اللي عاوز يتغير بنفسه انا اصلا بروح الجامعه من انا صغير بسبب امي عشان امي كانت دكتوره في الجامعة فاكنت باجي معاها وكنت بشوف الطلبه هناك كل واحد هناك بيتعامل بالخبرات اللي هو عرف يكتسبها بنفسه ان اصلا في ناس ما كانش بتيجي غير على الامتحانات وتروح تاخد شهاده وخلاص المهم انا دلوقتي مش عارف اعمل ايه مش عاوز اهلي يبقوا غضبانين عليا وخاصه امي في خطوه مهمه زي دي بس انا مش عايز اتهور ورح اتقدم لوحده واترفض بسبب النقطه دي عشان مش عاوز حاجه تقصر على نفسيتي بذات قبل لما اسافر بذات ان بشوف البنات على فيسبوك مثلا بيكتبوا ان الموضوع ده هم مش بيحبوا يرتبطوا بواحد اقل في تعليم الاكاديمي من هم فانا عنفسي كنت عاوز لما اسافر بره اتجوز من هناك اريح دماغي من تفكير المجتمع المصري ده بس امي هيا الي وقفه قدامي انا اصلا مش بحب ازعلها مني بس مش عارف اعمل ايه لدرجه اني فكرت اروح وكذب في النقطه دي بس واقول اني معايا مؤهل جامعي وخلاص بس انا مش حابب كده وده ضد مبادئي مش عاوز ابدا حياتي بكذب بس انا مش عارف عشان ما تقدمتش ولا اعرف واحده في حياتي ان الموضوع ده بيفرق ولا ما بيفرقش فانا دلوقتي محتار و مش عارف اعمل ايه هل اسافر ما وسمعش كلام اهلي ريح دماغي ولا اروح اتقدم لوحده وشوف مع انا الحمدلله ان اه ماديا مش احسن حاجه بس اقدر افتح بيت و الحمدلله دين حافظ القرآن الكريم كامل و بصلي في الجامع وبحاول احسن نفسي كل شويه بس انا دلوقتي محتار ومش عارف اعمل ايه اطنش واسافر ولا اجرب اخد خطوه وشوف نصيبي
والله انا شايفه انك متتعيبش و كمان انت بتقرا و بتكتب كويس جدا و انجيلزي بتاعك بتقول كويس ممكن حد يبقا معايه شهاده عليا و مش كويس في انجيلزي زيه متلا في عادي مهم اخلاقك بنات مش زي بعضه مهم انك تكون شخص محترم و قد مسئوليه و اكيد بما انك اتحرمت من حاجه زي كده هتبقي اب كويس لولادك و هتعلمهم كويس اتوكل علي الله و بنت الا هتقدمله عرفه ظروفك كله قبل اي شي رسمي لو لك نصيب في شي هتخديه و سيبها لله و ربنا يرزقك زوجه الصالحه
تم النشر الجمعة، ٢٢ مارس ٢٠٢٤
قبل ما تروح لواحدة وتتقدم ليها .. ياريت تبقى معرفها كل حاجه عنك وتشوف هل هتقبل ولا لا من البداية قبل ما تروح وتضايق من انهم هيرفضوا مثلا علشان خاطر الشهادة! وفي نفس الوقت ممكن تاخد بنت تكون متوسطة التعليم .. وتكون زيك في مستواك الثقافي والعلمي. وحاول مع نفسك اهم حاجه تتقبل شئ معين .. (تقبل الرفض) من حق اي شخص يرفض .. انا عارفه انها مش سهلة عليك .. وهتضايق، ولكن ده حق اي شخص. انت نفسك ممكن تعمل ده .. مش مثلا لو روحت لواحدة جامعية وكانت مثلا موافقة عليك، ولكن كان مستواها الفكري والثقافي لا يليق بتفكيرك مش هترفضها! ما هو اكيد لو انت شايفها مش متوافقه معاك من كذا جانب هترفضها! هل ده عيب فيها؟ اكيد لا، اكيد هتلاقي الشخص اللي هو كمان يتناسب معاها في نفس المستوى الفكري. مش كل الناس زي بعض .. وده من رحمة ربنا علينا. خليك انت كمان رحيم بنفسك .. واقبل الرفض .. لاننا بنترفض تقريبا في كل حاجه في حياتنا سواء شغل ولا علاقات .. ف الرفض مش بس في الزواج. وربنا يوفقك واحب احييك لانك مستسلمتش في مكانك .. بل قدرت تتفوق على ناس واخده الشهادة وقاعدة على القهوة.
تم النشر السبت، ٢٣ مارس ٢٠٢٤
أنصت الي اهلك وأتبعهم لان رأيهم يصب في مصلحتك أن دققت النظر ستجد في ما يريدونه الحل ان تقدمت ورفضت فتكون فتحت لك فرصه لتفهم اهلك موقفك وفكرك ورأيك وان قبلت فيكون الله قد كرمك بزوجه مثقفه وواعيه لا تعترف بتلك المقاييس الوهميه وأهلها كذلك ومن جانبك انت خروجك من الدراسه وعدم تلملكتك للدراسه الأكاديميه كون لديك شعور بالنقص اعلم انك تعرف قيمه نفسك ولكن حينما تنظر للمعايير الاجتماعيه تشعر بذلك ولذلك تخاف من التقدم حتي لا تشعر بنقصك وهذا شئ وهمي تفرضه المعايير المجتمعيه فثق بنفسك وتذكر أنت من تحملت المسؤوليه مع والدك انت من ضحى من أجل إخوته انت البطل وانت أيضاً لك عده مميزات في عده جوانب مثل الجانب العملي انت يمكنك العمل بمهارتك الجرافك ويمكنك العمل كمترجم وانت كما قلت علمت نفسك بنفسك فتستطيع تعلم الكثير من المهارات الأخرى والعمل بها وثانياً من الجانب الديني انت تحفظ القران وملتزم ومتدين انت حرفياً جوهره ثمينه في هذا العصر فنصيحتي لك خذ هذه الخطوه ولا تتردد فأنت فهي في حالتيها تصب في مصلحتك
تم النشر السبت، ٢٣ مارس ٢٠٢٤
اتقدم وسيبها على الله اهلك كلامهم صح لم تتغرب هتعرف قيمة كلامهم النقطه اللي انت خايف منها دي حاجه مش بايدك وهتفضل خايف تاخد الخطوة طول عمرك الشيطان بيوهمك ويبعدك وهيفضل وراك حتى لو خطبت هيحاول يفشكل الدنيا علشان يوقعك في المعاصي دي فرصه غيرك كتير بيتمناها الجواز استقرار وعفاف زوجتك تعينك على ماسي الحياه وصعوبتها والغربه صعبه جدا نفسيا بس احسن الاختيار وخليك واضح وصريح مع شريكت حياتك لو لقت تفاهم ما بينكم هتحبك زي ما انت ومش هتدور على اي حاجه تاني توكل على الله وخد الخطوة وربك يعينك علشان انت عايز تعف نفسك
تم النشر السبت، ٢٣ مارس ٢٠٢٤
نصيحتي قبل ما تتقدم لواحده عرفها ظروفك كويس جدا تعليمك كل اللي انت هتسافر او هتاخدها معك ولا لا وكل حاجه عشان اذا في اي عليه اعتراض يبقى من البدايه قبل ما تتقدم عشان ما تروحش تتقدم وبعد كده يعترضوا على حاجه من دول تاني حاجه مش لازم تتجوز واحده جامعيه ممكن تتجوز واحده مع ثانويه عامه او دبلوم او اي حاجه هتلاقي ويكون مستواها الفكري او الثقافي زي ما انت عايز برضو ده ممكن تلاقيه ان شاء الله يعني.
تم النشر الجمعة، ٢٢ مارس ٢٠٢٤
نصيحتي اليك طع والديك ففي طاعتهم رضوان الله عليك وتقدم لخطبة شريكة حياتك واظفر بذات الدين
تم النشر الجمعة، ٢٢ مارس ٢٠٢٤
هيا الواحده ممكن ترفض واحد مكملش تعليمه بس ده لو هوا اصلا معندوش طموح ومينفعش يفتح بيت بس انتا ماشاء الله عندك طموح وسعيت فى حاجات كتير فكونك مش معاك شهاده جامعيه ده ابدا ميقللش منك يقلل منك أمته لما تكون اعتمد او اللى هوا بابا اللى خرجنى انا مليش دعوه وعشت فى دور المجنى عليه وهكذا
تم النشر الجمعة، ٢٢ مارس ٢٠٢٤
زى ما فى ناس بيفرق عندها التعليم فى ناس مبيفرقش عندها برده فهى عموما مش بتبقى قاعده يعنى فى ناس بتركز على الشخصيه اكتر على الجانب الاخلاقى والدينى ومش مهم انك وقفت تعليم على قد ما مهم انك كافحت وبتحاول تتطور من نفسك بس المهم لما تاخد خطوه زى دى تكون انتا اللى عاوز تاخدها مش عشان حد اهلك اه تبرهم وتراعي ربنا فيهم بس بعيد عن حياتك الشخصيه حياتك دى بتاعتك انتا
تم النشر الجمعة، ٢٢ مارس ٢٠٢٤
بص انت ممكن تقنع اهلك انك تسافر ولما ترجع تبقي تتجوز أو تشوف بنت تكون دماغها كبيرة بمعني انها مش بتبص ل التعليم ومش شرط انك تتقدم ل واحدة وترفضك علشان التعليم مش كل حاجه التعليم والله نفسي بجد الناس تفهم أن مش كل حاجه تعليم والدتك معاها حق بره فعلاً عندهم الحلام عادي وهي خايفه عليك فا انت ممكن تشوف بنت وان شاء الله تكون عقلها كبير وتوافق وبعدها تسافر
تم النشر الجمعة، ٢٢ مارس ٢٠٢٤
فيه بنات مش بيفرق معاها التعليم يبقي عالي أهم حاجه تبقي شخصيتك مثقفة وطموح وده هيبان ف طريقة تفكيرك ف تربية الأولاد عايز تربيهم علي النجاح والتفوق ولا اي تعليم ومش شاغل بالك ، كمان انت لما تيجي تتقدم لواحده لازم تبقي معرفهم الأساسيات علشان متتحرجش زي م قلت، أدعي ربنا يرزقك الزوجة الصالحة التي تتقبلك زي م انت ، مفيش حد كامل علفكرة كلنا عندنا حاجه محسسانا بالنقص بس ربنا يرزقك حد يكمل النقص ده ويكون حنين عليك ويحتويك
تم النشر السبت، ٢٣ مارس ٢٠٢٤
مش عارفة حاطط موضوع تعليمك قدامك ليه وحاطه تحت الميكروسكوب؟ ما فيه بنات كتير معاهم ثانوية عامة برضه وفيه بنات معاهم جامعة ومبيفرقش معاهم المؤهل أد ما بيفرق معاهم شخصية المتقدم، اتوكل على الله واتقدم بس أهم شيء تختار واحدة واعية ومسؤولة وعندها القدرة النفسية إنها تتغرب وعلى قدر من التدين عشان متضيعوش هناك
تم النشر الأحد، ٢٤ مارس ٢٠٢٤
لعرض السؤال في فدني اضغط هنا