مرتبط بسيدة منفصلة وهي لا تريد أطفال وأنا لا أريد أن أنفق كثيرا، فقالت لي هرتبط بواحد غيرك

Question

انا شاب اعزب ٣٩ سنه من سنه حصل حادث ومازلت في اثر عمليه وآخر عمليه جراحيه عملتها مش شهرين المهم انا اتعرفت علي واحده منفصله ٤٢ في كان من خمس شهور كنا بنتقابل قبل العمليه اللي عملتها واتعرفنا واتقابلنا وحصل بينا انسجام كبير مع الوقت بقا حب فهي كانت عايزه جواز وانا بصراحه كانت فكره الجواز من منفصله مكنتش في دماغي بس لما حبيتها واجهت كذا مشكله اول حاجه انها مش عايزه تخلف تاني عندها اولاد كبار ومش عايزه وجع دماغ العيال من تاني تاني حاجه اني لو وافقت علي الطلب ده كنت خايف من اني الجواز ما يكملش عشان كده مكنتش هقول لاهلي في الوقت الحالي وفي نفس الوقت هيا كانت عايزه طلبات انا مش هكدب عليكم كنت من خوفي من عدم استقرار الجواز كنت عايز اقل حاجه عشان لو حصل انفصال مااخسرش كتير وهيا فضلت تلح اوى كل شويه في الشهرين اللي بعد العمليه علي طول واقولها طب نصبر لحد ما اقف علي رجلي تقولي لازم نتفق ونحط النقط عالحروف مع تكرار الموضوع كذا مره كنا بنتخانق ووصلنا في مره اننا قولنا كده مش نافعين لبعض بس انا بحبها وهيا بتحبني وتقولي انت بتستخسر فيا عشان انا منفصله وكلام من ده وعايز تتجوز ببلاش وكده وانا والله من خوفي كنت عايز اجيب اقل حاجه قولت لحد ما نستقر مع بعض ونجيب اي حاجه نقصانا تاني واحنا متجوزين لحد ما في مره بعد ماتكلمناش كم يوم كده انا كنت رايح لها واقابلها عشان عايز اقرب المسافات لقيتها بتقولي خلاص انا هرتبط مع واحد تاني كان بيزن عليها وهو عارف اخواتها وكان بيضغطوا عليها ويقولها ده سارى وهيجبلك اللي انتي عايزاه وكده انا دلوقتي والله بحبها وحسيت أن في حد خد حبيبتى مني قولتلها طب عالاقل اقعدى فتره نقاقها كل واحد يعيد ترتيب حساباته عشان حتي لما تاخدى قرار ارتباط بحد تاني يكون نفسيتك وعقلك وقلبك في اتزان وتاخدي قرار صح واكون انا مش موجود في الصوره انما للاسف بتقولي انا خلاص أنفقت معاه عايزني أقوله لا علي اساس ايه وهو معملش حاجه وحشه انا بحبها وحسيت اني مكنتش براضيها بطلباتها بس مش عارف اعمل ايه وهيا انا عارف انها مشتته بس مش عايزه تغدر وتنقض اتفاقها مع الشخص ده اعمل ايه فيدوني بجد نفسيتي مدمره كل ما اعرف انها بتكلمه ولا قابلته

Accepted Answer

طيب حضرتك راضيها على نفسك ازاي؟ يعني معاك ومع غيرك في نفسك الوقت، وهي كل همها التفاصيل المادية!! معلش بس خليك معايا في السيناريو اللي ممكن يحصل .. الحب هيعمل ايه معاكم بعد كده؟ لما تضيق عليك شوية في اي وقت زي ما بيحصل في كل البيوت هي هتعمل ايه؟ الحب هو اللي هيلبي وقتها مصاريفها؟؟ ما هو نخلينا واقعيين بقى وننزل على الارض شوية ونسيب الحب دلوقتي! هي ولا هتفكر في حب ولا في فراشات ولا دباديب.. ابسط حاجه عملتها حاليا عرفت عليك واحد وبتخرج معاه وبتكلمه .. فانت معلش متوقع المستوى اللي بعد يبقى ايه بالظبط؟ تاني شئ .. انت متقبل حاليا 100% مشكلة الاطفال؟ يعني متقبل انه يكون معندكش طفل؟ معتقدش بصراحه انك متقبل ده، لانه من الواضح انك مذبذب. اتمنى تعيد تقييمك للعلاقة ديه تاني ... من غير (حب).. علشان مفيش حاجه بضيع الدنيا غيره، فيه حاجات كتير تستحق التفكير حضرتك غيره.

Answer

اولا /الف سلامه عليك وان شاء الله تقوم بسلامه. انت تفكيرك من الاول سليم مليون في المائة علشان هي فعلا موش هنكمل معاك . بس وضعت شرط مستحيل اي حد يرضا بيه إلا إذا كان كسر يعني متجوز قبل كده وعنده اولاد وعايز زوجة تانيه فهي تنفع زوجة تانيه موش أولي وانت حضرتك دا اول جواز ليك مهما كان سنك راجل مننا سنه ميعبوش ابدا تمام علشان كده احساسك من ناحيتها موش حب اكيد دا مجرد اعجب وميول للجنس الآخر أمر عادي ومع الوقت هتنسي وهتعدي ولو كان فيها خير كان ربنا وافقك . نصيحه "موش دا إلا هتشيلك في مرضك موش دا ام اولادك " ملحوظه هي لو بتحبك كانت انتظرت لحين تعافيك من المرض موش تدور علي غيرك انت ربنا نجاك 🌸

Answer

انا شايفه انك بتضحك على نفسك بصراحه ومحتاج تعيد النظر فى معاييرك ومبادئك فى تناقض كبير فى وسط كلامك انت حبيتها وهى منفصله ...تمام ...كنت عامل حسابك على ايه بقى ....لانك اتفاجأت باصرارها على الجواز والست بتتكلم فى الحلال الصح ...ومش فى دماغك تتجوز منفصله ...امال كنت بتتسلى مثلا . الجواز اللى هو حاجة بتبقى سبيل للمحبين يفضلوا مع بعض ..انت بتقول انك حاطط احتمال الانفصال ماشاء الله ومركز اوى فيه وفى خسارتك ومش فى خسارتها هى كمان . انت مش فارق معاك شروطها ولا فارق معاك كل ده ...انت بطبيعتك الذكوريه كنت فاكرها بتاعتك وخلاص وانت اللى بتأجل وتصبر وتحسب احتمالات المكسب والخسارة ....ولما هى عملت زيك بتلوم عليها ازاى تعمل كده وعاوزها تشتريك وانت اصلا مشتريتهاش . انتوا فعلا متنفعوش مع بعض ...قصة وخلصت وشوف حالك وسيبها فى حالها

مرتبط بسيدة منفصلة وهي لا تريد أطفال وأنا لا أريد أن أنفق كثيرا، فقالت لي هرتبط بواحد غيرك

نفسية

اجتماعية

علاقات

زواج

حب

سؤال من احد أعضاء فدني

تم النشر الثلاثاء، ٢٤ أكتوبر ٢٠٢٣

4 إجابة

2 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك