انا شخص طموح وبسعى ورا احلامي ومهتمية بدراستي
وخلاص بحس اني بقرب من كل احلامي الي نفسي أحققها وبقعد كتير اخططلها وبستغل اي فرصة ممكن تزودني حاجه والحمدلله انا في جامعة دراسياً متفوقة
هل غلط اني عندي دايما أمل اني ممكن أحقق احلامي؟
وإن مفيش مستحيل؟
ليه كل شوية مجتمع بيقعد يقولي لازمتها ايه الي بتعملي ده انتي في الآخر هتجوزي
وهل جواز دمار لكل طموحاتي؟
يعني هل علشان اتجوز لازم استغنى عن أحلامي وكل السعي وتعب الي تعبته؟
انا بقعد اخطط كتير ازاي اقدر احققهم وباخد خطوات جدية
بس كله شايف علشان انا بنت يبقا ملهاش لازمة السعي ما أخرك هتقعدي في بيت يعني
انا فكرياً مش ضد كون المرأة أم لازم تأدي دورها ده في مجتمع وده شيء عظيم جداً اتمنى إني أكون مهيئة لي بس انا لسه صغيرة عندي ٢٠ سنة وبقول كل حاجه وليها وقتها
ليه ناس محسساني أن الجواز ده محور الكون وإن هو الحاجة الوحيدة الي أتخلقت علشانها مع إن موضوع مش بأيدي تماما وكل موضوع نصيب عمالة اقول ياربي ده انا لسه طالعة من الحياة المدرسة من سنتين بس ولسه ٢٠ سنة اومال قدام ولو لقدر الله اتأخرت شوية في جواز هيعملوا فيا ايه هيقولوا لي ايه
ولا لما أتخرج من جامعة هيبقا خلاص ماليش لازمة في الحياة؟ حياتي خلصت؟ دنيتي خلصت؟ علشان لسه مجاليش ابن الحلال
طب مادام انا في الآخر بعد كل دراسة وتعب في مذاكرة الي ذاكرته ده مش هحقق حاجه من احلامي وكل تعبي في حفظ معلوماتي وسعي إلى المعرفة ملهوش لازمة
اتعلمت ليه من الاول ما عادي مادام هما محسسني إني ملهوش لازمة
ما هو بردو ولادي هيفخوروا بيا وهبقا مصدر فخر ليهم ولا انا علشان بنت ؟
انا تعبت تعبت من إنجازاتي الي محدش من أهلي بيقدرها لكوني بنت فقط تعبت ان محدش فيهم مؤمن بيا وشايفين كل الي بيعمله وسعي علي فاضي وملهوش لازمة تعبت أنهم شايفين دوري بس يقتصر على البيت في الحياة الزوجية تعبت من إني اغير وجهة نظرهم تعبت من إنهم معلقين كل وجهات نظرهم الغلط على شماعة خايفين عليكي تعبت من إنهم قافلين كل حاجه كل حاجه في وشي لكوني بنت
لو دي هي الحياة فأنا مش عايزه اعيشها ومش عايزه أكملها
انا عنيت فترة كبيرة نفسياً بعد وفاة بابا ويمكن الحاجة الي خلتني أرجع كويسة وأشوف دنيا حلوة تاني بعد ربنا طبعا سبحانه وتعالى هي أهدافي الي بجري وراها وبشوفها بتقرب مني
انا حرفيا لو مسعتش وعملت لنفسي مستقبل أنا ممكن يداس عليا في مستقبل لظروف بيتي والدي أتوفى ومفيش حد سند ليا بعده رغم إني ليا أخوات ولاد بس مفيش حد سند والله حتى في ابسط المواقف
بيجي عليا اوقات وبصدقهم إني يا جواز يا مليش لازمة
ولما أتجوز كل احلامي وطموحاتي حتى شهادة جامعتي الي طلع عيني علشان أخدها هركنها على رف هي وتعب سنيني
هما عايزيني أصدق كده وإن دي شكل الحياة الوحيدة الي ممكن أعيشها
ارجوكم حد يرد عليا يقولي إني مبطلبش شئ مستحيل وإن عادي اعيش الحياة الي نفسي فيها
فى البداية كده.انا حابه جدا اتكلم معاكى .انتى بنوته طموحه فعلا مش بتستسلمى لأى وضع تقليدي لكن عايزه مستقبلك وحياتك تكون بشكل مختلف وده اللى بتسعى ليه وبأمر الله هيكون اجمل مما توقعتى. متتوقفيش لحظه عن تخطيطك لمستقبلك وازاى ممكن تحققى الهدف اللى نفسك فيه .الجواز مش اخر الدنيا دى بدايه حياه جديده ممكن تكون تقليديه وممكن تكون مختلفة ومميزة المهم متتوقفيش ابدا .ممكن وانتى بتحققى هدفك ربنا يكرمك ويصدفك شخص يكمل معاكى مشوارك . اكتبى دايما اللى جواكى ومهما كانت الأفكار اللى حواليكى مش مناسبة ليكى افتكرى دايما ان دى حياتك انتى ومن حقك تحققى هدفك لو فى صديقه مقربه أو لايف كوتش خليكى دايما على تواصل معاهم لأن الدعم النفسى مهم جدا وكمان خليكى قريبه من ربنا دايما لأن دى اهم خطوة فى تحقيق هدفك ادعم نفسك دايما بكل حاجه بتحبيها وبتخلى تفكيرك ايجابى وافتكرى دايما أن ربنا معاكى فى كل خطواتك وبيساعدك.وانك طموحه وهتقدرى 🌷
تم النشر السبت، ١٣ يوليو ٢٠٢٤
أولًا حبيبتي، خليني أقولك إنّي فخورة بيكي جدًا وبالإنجازات الجميلة اللي حققتيها لحد دلوقتي. كونك طموحة ومتفوقة وعندك رؤية واضحة لأهدافك دي حاجة عظيمة جدًا، ولازم تفضلي متمسكة بيها مهما كانت الظروف. فكّري في الدنيا بوجهة نظر واقعية: الحياة مش مجرد جواز وبيت وخلاص. الجواز ممكن يكون مرحلة جميلة ومهمة، لكن مش لازم يكون الهدف الوحيد في الحياة. أحلامك وطموحاتك وأهدافك دول حاجات ليهم قيمة كبيرة، وربنا خلقك بتتميزي بذكائك وموهبتك علشان تستخدميهم وتحقيق أحلامك. كون إنك بنت ميبقاش عائق أبدًا إنك تحلمي وتسعي وتحققي. بالعكس، فيه سيدات كتير في التاريخ والحاضر أدوا أدوار عظيمة وحققوا إنجازات كبيرة. الجواز مش نهاية الدنيا، ولا هو تذكرة لإنهاء طموحاتك. ممكن تتجوزي وتكملي تحقيق أحلامك في نفس الوقت. فيه كتير من النساء الناجحات قدرت تتوازن بين حياتها الزوجية والمهنية. السر في التنظيم والإصرار. الأهم دلوقتي إنك تركزي على اللي يريحك ويسعدك، وتفكري في مستقبلك بالطريقة اللي تشوفيها صحيحة ليكي. حاولي تتكلمي مع أهلك وتوضحي لهم رؤيتك وأحلامك، وحاولي تجدي نقاط تفاهم. وأخيرًا، كوني مؤمنة إن الله معكِ وقادر على تحقيق أحلامك، ولا تخلي أحد يحبطك أو يقلل من قيمتك. تابعي طريقك واتعلمي وحققي طموحاتك، وربنا يوفقك ويكون معاكي في كل خطوة. 💪🌟
تم النشر السبت، ١٣ يوليو ٢٠٢٤
بصي حواليكي وشوفي نسبة السيدات العاملات. ليهم أزواجهم وأطفالهم وأسرهم ومع ذلك ليهم حياتهم المهنية ماشية طبيعي جدا. وممكن جدا تكوني واحدة منهم. الفكرة ان الحياة المهنية محتاجة وقت ومجهود عشان تستقيم وتستمر. لو قصرنا فيها هاتنهار، زيها زي الحياة الخاصة بالضبط. من هنا تيجي المعضلة، هل يا ترى الست لبيتها وأسرتها ولا للعمل وحياتها المهنية؟ والإجابة مستحيل تعمم على كل البنات والسيدات بسبب الفروق الفردية. في سيدات عندها القدرة والطاقة للمواكبة بين الاتنين، وفي بنات لأ خالص وبتشتري دماغها وتقعد في البيت. اللي تقدري تعمليه هو انك تحسني الاختيار في الزوج والعمل. محتاجة من الزوج المرتقب انه يكون متعاون ويساعدك في الحياة الخاصة عشان يسمح لك تخصصي وقت ومجهود اكتر لحياتك المهنية، بالذات في فترات الحمل والسنوات الاولى للأطفال، ولازم يكون متقبل المبدأ من الاساس، ومايبقاش شايف ان شغلك مجرد دخل اضافي مش محتاجينه. من الناحية التانية، اختاري العمل أو شكل العمل الأنسب. مثلا هل الافضل تكوني موظفة بمواعيد ثابتة تقدري ترتبي يومك ومسؤلياتك عليها؟ ولا تكوني صاحبة العمل؟ أو يكون عمل حر وحسب ظروفك؟ ماتنسيش ان لكل حاجة ثمن لازم يتدفع. ممكن تدفعي الوقت والمجهود من صحتك واعصابك وراحتك لوحدك بدون الاستعانة بالزوج، أو تقسميه بينك وبينه، أو الثمن يتدفع فلوس لحد ييجي يتولى جزء منها، زي الحضانات والمربيات والشغالات في البيت، أو المساعدين والسكرتارية في الشغل. أو حتى أجازات الحمل والوضع ورعاية الاسرة اللي ممكن تأخر أحلامك شوية لكنك هاتحافظي على الفرص الموجودة حاليا. ممكن تقرأي عن الشخصيات المعروفة من السيدات وتشوفي ازاي نجحوا في حياتهم وايه اللي كان صح او خطأ في رحلتهم وقرري مسارك.
تم النشر الأحد، ١٤ يوليو ٢٠٢٤
بجد انا فخوره بيكي لأنك قويه ومش بتستسلمي وشايفه حلمك وبتسعيله بأذن الله هتوصلي كملي واستمري ربنا يوفقك يارب عايزه اقولك كمان إن احنا ك بنات من حقنا نحلم ويكون لينا كيان مستقل بينا زينا زي الرجاله او زي اي حد من حقنا نختار الحاجه اللي بنحبها وشايفين نفسنا فيها احنا متخلقناش عشان يكون كل دورنا فى الحياه اننا نتزوج ومش شايفه في الدنيا اي حاجه ممكن تعيق طريقك لأنك بنت وحقيقي مافيش حاجه اسمها مستحيل ولا اللي بتطلبيه مستحيل وعادي جدا تعيشي الحياه اللي نفسك فيها موفقه دايما وربنا يكرمك وتوصلي للي عايزاه
تم النشر السبت، ١٣ يوليو ٢٠٢٤
لا داعي للقلق يا جميلة، كانت السيدة خديجة من كبار تجار مكة ومن أرشدهم عقلًا بل إنه لم يكمل من النساء إلا أربع ومن بينهم السيدة خديجة رضي الله عنها. تزوجت وأنجبت قبل زواجها بالنبي، وكانت كما هي على رأس تجارتها ولم يرد إلينا أنها تركت تجارتها لأجل زواجها. وغيرها الكثير من نجمات الأمة، كنّ زوجات وناجحات في نفس الوقت. الفيصل يا عزيزتي في وضوحك التام عند مرحلة الزواج، اختاري من يؤمن بما تؤمنين به فيكون لك عونًا وسندًا وداعمًا، لن يقيم الدنيا ويقعدها لأنك تأخرت في عملك قليلًا وهو يريد كيّ قميصه مثلًا، بل سيكويه لنفسه أو يرسله لخدمة الكي. الخلاصة: اختاري من يدعمك وينظر للحياة بنفس منظورك، وفي نفس الوقت لا تقللي من وحهات النظر الأخرى، كل شخص حر في رأيه وقناعاته.
تم النشر السبت، ١٣ يوليو ٢٠٢٤
عاش بجد 👏 برافو كونك طموحه حاجه جامده الصراحه وم بتستسلم كملي سعي مش عشان لازم تتجوزي تبقي فاشله طوول ما انت مصدق نفسك وبتحقق احلامك دا شي جميل خالص متشغلش بالك باللي حواليك حتي لو كانو اهلك اسمعي الكلام من هنا وخرجيه من الناحيه التاني انت خلاص عرفتيهم وفهمتهم فمتزعلش نفسك خااالص وكملي ورا حلمك
تم النشر الأحد، ١٤ يوليو ٢٠٢٤
لعرض السؤال في فدني اضغط هنا