عندى مشكله مش عارفه احلها ازاى دلوقتى انا عملت غلطه بغض النظر هى ايه بس انا عارفه انى غلطانه وحاولت اصلحلها وبتتصلح فعلا بس انا مجبتش سيره لحد ولما الغلطه دى ظهرت بطريقه ماا بس هى خلاص بتتصلح ف حد واجهنى بيها وقالي انى غلطانه ومينفعش انا اضايقت اوووى رغم انى خلاص صلحت الغلط ده بس مخنوقه اوووى محبتش انى اواجه الغلطه دى قدام حد رغم انى واجهت الغلط وصلحت بس مش قادره اتخطى اللي حصل محتاجه اسمع كلام ايجابي لانى مش عايزه احكى بس ممكن تقولو حاجه تحسن من نفسيتى لان الكلام بيفرق معايا جدااا ومعنديش حد قريب منى احكيله واكون واثقه ف انه هيقف جنبي ولو بكلمه
ايا كانت الغلطة هي ايه .. ف حابب أقولك أن كلنا بنغلط الرسول صلي الله عليه وسلم قال ( كل ابن آدم خطاء وخير الخاطئين التوابون ) .. والله عز و جل في القرآن يقول ( مَّنْ خَشِيَ الرَّحْمَٰنَ بِالْغَيْبِ وَجَاءَ بِقَلْبٍ مُّنِيبٍ ) و معني منيب اي المعترف بذنبه أو خطأه في خلوته فيستغفر منه .. وانتي الحمد لله اعترفتي بغلطك و توبتي و حاولتي تصلحي و ربنا كرمك و الدنيا بقيت تمام يعني بإذن الله خطأك مغفور ايا كان هو ايه . انتي حاليا كل اللي مضايقك الضغط اللي عليكي لما حد عرف الغلط دا و دي حاجه طبيعية انك تزعلي و خصوصا أن الدنيا بتتصلح زي ما بتقولي ، ف انتي مش بإيدك حاجه تعمليها فبلاش تكوني قاسية علي نفسك انتي اعترفتي بغلطك و صلحتيه .. دلوقتي مفيش حاجه تقدري تعمليها غير الدعاء .. ادعي ربنا يفرج همك و يزيح هذا الكرب و الغم و الضيق عنك ، ولا تستهيني بالدعاء نهائي ، سلاح عظيم والله بس اللي يعرف يستغله .. ادعي ربنا بنية صادقة .. ولو مش لاقيه حد تفضفضي معاه ؟ قومي صلي ركعتين و اسجدي و فضفضي مع ربك و قولي كل اللي في نفسك و ابكي بين ايديه .. الرسول صلى الله عليه وسلم يقول ( إن الله تعالى حيي كريم ، يستحي إذا رفع العبد إليه يديه أن يردهما صفرا ) ربنا مش هيخذلك ابدا خلي يقينك في ربك كبير مهما كان ذنبك صغير او كبير ربنا كريم و هيزيح عنك كل ضيق بإذنه فقط ❤️
تم النشر السبت، ١٣ مايو ٢٠٢٣
المواجهة درجات ....انتى اصلا عملتى اصعب واحده فيهم ..انك تواجهى نفسك ...فانك تواجهى غيرك دى اسهل فى الاساس بعين قوية اللى يكلمك فى اى غلط على اساس انه بيعتب عليكى انك تغلطى من الاساس ...قوليلة انا بشر عادى ولو مضايقك غلطى فى حق نفسي متبصش عليه ...وبص على غلطك انت فى حق نفسك لان محدش فينا معصوم. ايوه كلنا منحبش شكلنا يبقي وحش وبنحافظ على صورة معينه لنفسنا....وده اللى بيخلينا زعلانين ان الصورة دى اتمس منها حته.. بس خلينا نفتكر ان الصورة دى بتاعتنا واحنا اللى رسمناها والفرشه فى ايدينا احنا واحنا اللى نقدر نظبط اى حاجة لو باظت فيها ونقدر نرسم الاحلى منها كمان . بيساطة كده ...رسمتى و خطواتى وشغبطتى وانا المسؤولة عنها ....اغلط او اظبطها فانا اول حد هيشوف ويصلح او اول حد هيكون فخور بالصورة الحلوة بتفاصيلها. اللى مبيغلطش مبيتعلمش .
تم النشر السبت، ١٣ مايو ٢٠٢٣
كل بني آدم خطاء وخير الخطائون التوابين ... وقد فعلتِ هذا <3
تم النشر الخميس، ١٨ مايو ٢٠٢٣
تطمني وتحمدي ربنا انه مديكي نعمة ادارك الخطأ او الذنب وانك بتصلحيه او بتوبي منه قولي وبكل رضا الحمد لله ع نعمه... واي حد يوجهك او يتكلم او يلمح ابتسمي وقوليله الحمد لله ع نعمة الاحساس سواء احساسنا بالغلط واننا نعرف انه غلط اواحساسنا بالمشاعر لا بنجرح غيرنا بكلامنا ولا بننحرح بكلامهم
تم النشر الجمعة، ١٢ مايو ٢٠٢٣
الحمد لله على الحمد لله 💜💜
تم النشر الجمعة، ١٢ مايو ٢٠٢٣
الحمدلله ❤️❤️❤️
تم النشر الجمعة، ١٢ مايو ٢٠٢٣
لعرض السؤال في فدني اضغط هنا