السلام عليكم
انا بنت وعندي 15ونص ولابسه الخمار من ومش هاجره القران ومش عاقة لاهلي وكمان بصلي نوافل ومش بتفرج علي مسلسلات وافلام وبقرأ كتب ومعنديش غير اربع صحاب وانا بقى اللي عندي حاسها انو مرض غير اني قعدت اتعالج خمس سنين يعني طفولتي ودلوقتي بتعب من اقل حاجه بس الحمد لله انا كويسه
انا بقى المهم اني بخاف جدا علي زعل الناس وحتى اهلي يعني كل كلمه بقولها بحاسب نفسي عليها بزعل مثلا لو حد طلب مني حاجه لازم اعطيه حتى لو فوق طاقتي ومش بحب ارد علي حد حتى لو زعلنني رغم ان كلهم بيزعلوني اوي ومحدش حاسس بيا كل ما اتكلم يقول ليا انك صغيره
غير اني شفت منظر اباحي وانا 12سنه على الواقع يعني جنس ومن ساعتها وانا بخاف من الجنس الاخر يعني بخاف حد يلمسني لو حد قرب مني يمكن يغمي عليا انا بزعل اوي علي زعل الناس وبندب حظي اني كده عشان كده كرامتي في الارض
المهم انا المدرس بتاعي باخد عنده من وانا في أول اعدادي وكده يعني فأنا عندي المدرسين لهمم احترام وهو فرق السن تسع سنين فأنا معدش بروح الدرس رحت عند مدرس تاني وانا كنت فوت حصه عند مدرسي الجديد فبعت لمدرس دا انو يبعت ليا شرح بعت ليا الشرح وبعدها هو بدأ يحكي ليا اسرار عنه وانا لسه صاغ سليم ومحصلش اي حاجه كل على التلفون هو لم بطل يكون في حدود يعني هو بيعاملني بيعتبرني اخته
فلما بطلب منه حاجه بيرفض بس قبل كده كان بيقبل لم ظهر علي حقيقته بطل يساعدني وانا وقعت في مشكله واهلي كانوا مش موجودين وطلبت منه مساعده رفض وقال انو مش بيفهم في الحاجه دي وقالي بصي انا مضايق فانا اتعصبت وزعلت وبعدها اتأسفت اني طلبت منه وهو زعل مني وانا قعدت اعتذر كتير كتير اوي عشان مش بحب حد يزعل مني وضميري بيفرمني من التأنيب ان حد زعلان مني وانا اتأسفت كتير
وقعد افرحه عشان ميزعلش وانا مش بحبه انا قايله محدش هيمتلك قلبي غير زوجي اعمل ايه وحاسه اني بوظت نفسي لاني اصلا كلمته وكل الموضوع دا اسبوع بس انا خايفه اوي لاني كده معتش عندي حياء لاني كلمته اسبوع وانا بوظت كده
اعمل ايه عشان اصلح نفسي وأتخطى وازاي ارجع حيائي لاني حاسه اني ضعت انا اصلا مش بكلم اي بني ادم انا كده بوظت وربنا مش هيسامحني وعشان خنت اهلي لمده اسبوع
اسفه علي الرسالة الطويله بس عايزه رد لاني ضايعه في افكاري والله كنت بعتربه اخويا وانا مش فاهمه نواياه عايزه حل وتحليل
السلام عليكم، كويس إنك حسيتِ بغلط اللي عملتِه، خلي إحساس الذنب والندم دافع للتوبة وعدم الرجوع أو تكرار التصرف الخطأ لكن بلاش تحوليه لهاجس وشيء يدفعك لليأس من نفسك لأن ده ممكن يكون مدخل من مداخل الشيطان حتى يدفعك لنفس الطريق بحجة إنك كده كده لوثتِ نفسكِ أو ربنا غضبان عليكِ. ارجعي لربنا وصلي واستغفري وانوي متكرريش اللي حصل وركزي على قربك من ربنا ودراستك وتنمية نفسك وتطويرها للأفضل. وبلاش كمان تغرقي نفسك في دوامة الإحساس بالذنب تجاه الآخرين أو الرغبة في إرضائهم ولو على حساب نفسك، ده تصرف خطر وممكن يدفعك لتقديم تنازلات تؤذيكِ أو يوقعك في مشاكل أنتِ في غنى عنها. أحبي نفسك وفكري فيها وفي مصلحتها وبلاش تتنازلي عن كرامتك مهما حصل، وقبل ما تقرري تقدمي أي شخص على نفسك فكري هل تصرفك صح وهل الشخص ده يستحق فعلا الخطوة دي. بالتوفيق إن شاء الله.
تم النشر الثلاثاء، ١١ مارس ٢٠٢٥
1. اهدي وحاولي تفكري بهدوء الندم مش شيء وحش، لكنه ما ينفعش يكون سبب في تدمير حياتك. اللِ حصل حصل، والأهم هو تتعلمي منه وتقدري تتجاوزيه. 2. مش ذنبك لو حد أساء فهمك تصرفك كان بحسن نية، ولو حد فهمه غلط، دا مش ذنبك. أنتِ اعتذرتِ، ودَ ڪفاية. 3. ما تخليش الذنب يسيطر عليڪي كل بني آدم بيغلط، وربنا رحيم وبيسامح، المهم هو النية الصادقة في التوبة وعدم تكرار الخطأ. 4. ركزي على تطوير نفسك بدلاً من التفكير المستمر في الذنب، حاولي تشتغلي على نفسك، سواء في دراستك أو علاقتك بربنا أو حتى هواياتك. 5. أحيطي نفسك بناس داعمة ابعدي عن أي حد يحسسك إنك إنسانة سيئة، وقرّبي من الناس اللي بيفهموكي ويدعموكي. 6. اهتمي بعلاقتك بربنا الصلاة والدعاء هيڪونوا مصدر راحة ليڪي، وربنا بيقبل التوبة الصادقة. 7. استشيري حد تثقي فيه. في النهاية: أنتِ مش أول حد يغلط ومش آخر حد، والحياة بتكمل. الأهم هو تتعلمي من التجربة وما تعيديهاش، وتركزي على مستقبلك وشخصيتك الجميلة اللِ تستاهل تعيش بدون حمل الذنب ده على قلبها.
تم النشر السبت، ٨ مارس ٢٠٢٥
ربنا يعفو عنك ،، متضغطيش نفسك ،، انسي الشخص ده واقفلي الباب ده .. ركزي في حياتك
تم النشر الأحد، ٩ مارس ٢٠٢٥
لعرض السؤال في فدني اضغط هنا