انا بنت عندى 17 سنه انا عمرى ما كلمت ولد فى حياتى وكنت رافضه تماما فكرة انى احب او انى ارتبط والكلام ده لحد ما نزلت لعبه وكنت الى بيدخلى بعمله بلوك على طول لحد ما ولد لعب معايا وبعتلى طلب قبلت لانه مدايقنيش ومكلمنيش قولت لعب بس لحد بعد كام يوم كلمنى اتحرجت انى انهى الكلام او احرجه لانه كان ذوق ومحترم فى اسلوبه طلب الانستا اديته عشان ابعده عنى حاولت اعلق رسايله و ارد متاخر جدا ومع ذلك مكنش بيبعد لحد اما بقيت ارد عليه واتعرفنا على بعض فى البدايه مكنش فى اى مشاعر اتجاهه مع الشهور لقيت نفسى متعلقه بيه وبستناه بفارغ الصبر ينزل اجازه عشان اكلمه مع العلم هوه طالب فى الكليه الحربيه لحد اما اعترفلى بحبه الشديد ليا وانا وافقت ارتبطنا لمدة سنه وانا خلال الفتره دى كنت بحس بذنب كبير حاسه انى خونت ثقة اهلى و خالفت دينى وان انا بعمل حاجه غلط مع ان الشخص محترم وهوه طلب انه يتقدملى بس انا رفضت لانى صغيره وبجد نفسيتى تعبت وبقيت اكتر من صلاتى وادعى ان ربنا يهدينى للطريق الصواب لان احساسى بالذنب مش بيفارقنى لحد اما بالفعل قولتله بالفعل ان الى بنعمله ده غلط وانفصلت عنه غصب عنى هل انا عملت الصح ولا انا غلطانه وحرام عليا لانى كسرته
انتي صح جدا ... انا بحيكي على قرارك .. انتي بنت شجاعة جدا .. انتي عارفه ان فيه زيك كده كتير مش قادر ياخد الخطوة اللي انتي اخدتيها ديه. بس حقيقي انتي شجاعة واتصرفتي صح. 👏🏻👌 اولا هو ممكن ميبقاش جد معاكي، هل انتي ضامنه ده؟ اكيد لا احتمال كبير يكون بيتسلى .. لان ده شخص مجهول، انتي ولا تعرفي عنه اي حاجه .. انتي قولتي انكم اتكلمتوا وهتقوليلي بس انا عارفه عنه حاجات كتير .. هقولك لا مهما كنتي تعرفي انتي متعرفيش حاجه، وده مش عيب منك ولا اي حاجه. لان الشخص ده مجهول ومهما عرفتي منه انتي ولا عاشرتيه ولا تعرفي عنه حاجه، غير اللي هو قاله ليكي. ثانيا .. طبعا الكلام معاه حرام وكله حاجه .. وديه تاني حاجه .. عايزة الفت نظرك لحاجه برضه انتي قولتي علشان ابعده عني بعتله الانستا! - طيب ازاي علشان تبعدي شخص عنك تقربيه منك اكتر!!! اه انتي كده قربتي منه اكتر، انك تبعتي له الاكونت بتاعك .. التصرف الصح اللي كان لازم يتعمل .. انك لما تلاقي شخص بتلعبي معاه المفروض كنتي تقفلي اللعبة. ده التصرف الصح .. مش انك تكملي، وتتكلموا ولما يطلب انه يتكلم معاكي اكتر تبعتي له الانستا ..! عموما اللي حصل حصل .. وكفايا اوي انك اعترفتي بغلطك .. بس كان لازم اقولك النقطة ديه. اما بالنسبة ل كان صادق .. ف متقلقيش اللي انتي عملتيه علشان ربنا اهم واصح من اي حاجه .. ثم انتي لازم تتأكدي من حاجه مهمه ، مفيش حاجه اسمها حب سوشيال ميديا .. امال ده كان ايه؟ كان تعلق بالكلام والاهتمام، مش اكتر .. الواحد لما يتعود على كلام من حد بيبقى صعب عليه شوية انه يفترق عنه، ف اعتبري ان ديه اعراض انسحاب وهتمر الفترة ديه بسلام، ولكن ده مش حب.
تم النشر الاثنين، ٨ يناير ٢٠٢٤
الي عملتيه صح جدا و هو لو فعلا بيحبك يبقى هستناكي و يتقدملك و لو كلمك تاني في الحالة دي ابعتيله رقم والدك و اعمليله بلوكو هو لو فعلا مش بيلعب بيكي يبقى هيكلم والدك و يتقدملك
تم النشر الثلاثاء، ١٦ يناير ٢٠٢٤
انا فاهم كل اللي بتقوله مش هقولك اني انا المثالي و اللي ماعملش حاجا غلط محدش ملاك بس في نفس الوقت بصي قدام شوية ممكن حد يشوفكو و يبقي دي مشكلة و نقطة في معلش عدم اللمؤاخذة شرفك و من طريقة كلامك انتي بتخافي تتكلمي مع اي حد من قرايبك أو اللي تعرفهم عشان تخافي علي سمعتك و باينلي انك شايفه أنهم مش هيفهموكي فماظنش انك حابة حاجا زي كده تحصل و افرضي ماحصلش و عدت علي خير تفتكري ممكن تكملو ده باردو واحد عارفاه من عالنت ولا شفتيهوش ولا مرة قدري كملتو تفتكري هتتجوزو الشباب الكبيرة مش عارفه تتجوز الصغير هيتجوز قدري حصل نصيب و قرأ فاتحة ايشعرفك أنه هيطلع زي ما انتي فكراه و مش بيتسلي شوفي مشاعرك اللي هتستنزفيها عالفاضي صدقيني ده مجرد اعجاب منك مش اكتر و ياريت اعجاب بيه هو ده اعجاب لاهتمامه يعني لو جبتي كلب بلدي بداله هتعجبي بيه اكتر منه مش قصدي حاجا انا بس بحاول افهمك
تم النشر الاثنين، ٨ يناير ٢٠٢٤
هشوف كده ده ممكن
تم النشر الأربعاء، ١٠ يناير ٢٠٢٤
بالتوفيق
تم النشر الأربعاء، ١٠ يناير ٢٠٢٤
بصي خليه يتعرف علي اهلك وبلاش خطوبه..تبقي قرائه فتحه..علي الاقل بابكي حيعتبره ابنه و علي الاقل الفتره دى تعرفوا كويس مناسب ولا لا
تم النشر الأربعاء، ١٠ يناير ٢٠٢٤
حضرتك قربه منى هيكون ذات نفسه تشتيت لان كل شخص عارف نفسه وانا متاكده ان انا هفضل افكر فيه بالتالى مش هركز فى دراستى خالص
تم النشر الأربعاء، ١٠ يناير ٢٠٢٤
ليه متقوليش أنه حاز ليكي وبرضه من غير زيارات ولا خروجات ولا عزومات اوفر..تعتقد انك كده انتي مش مشتته اصلا
تم النشر الأربعاء، ١٠ يناير ٢٠٢٤
صعب لان خطوبه يعنى زيارات و خروجات و عزومات وانا هتشتت عن دراستى كده
تم النشر الأربعاء، ١٠ يناير ٢٠٢٤
الارتباط علي الاقل خطوبه..والانتظار لحد متكوني جاهزه
تم النشر الأربعاء، ١٠ يناير ٢٠٢٤
البنت مش بتتخطب عندنا غير فى اخر سنه فى الكليه او اما تخلص مش هيوافقوا خالص
تم النشر الاثنين، ٨ يناير ٢٠٢٤
خليه يتقدملك ويستناكي علي ما تخلصي دراسه
تم النشر الاثنين، ٨ يناير ٢٠٢٤
لعرض السؤال في فدني اضغط هنا