سلام عليكم
انا بنت عندى 20 سنه انا المفروض كنت هنخطب بس يوم الخطوبة جدة خطيبى توفت هى توفت فى محافظة تانية قولنا نأجل الخطوبة بس أمه وأبوه وعمه قالوا لا كاملوا الفرح وبعد ما يخلص الفرح ويلبسنى الشبكة يبقى يسافر ويجى احنا فى الاول كنا رافضين اوى بس بعد كده وافقنا بعد ما روحت الكوافير ولبست لقيت حمايا بيتصل ب بابا وقال كلام كتير وان ازاى أن احنا نعمل الفرح وكده بابا قالوا إن انتوا اللى قولتوا وكده بس مفيش المهم أن انا رجعت البيت بعد ما مسحت الميكب وقلعت الفستان وكده المهم أن انا كانت حالتى وحشة اوى ومكنتش بكلم ولا بقف على رجلى المهم خطيبى كان بيسأل عليا كل يوم بس اهلوا محدش سأل عليا خالص ولا حتى خطيبى قالهم أن انا تعبانة وكده المهم بعد ما رجعوا بابا نزل عزاهم بس ماما لا عشان كانت تعبانة وزعلانه عليا اوى وهى شايفنى كده المهم بعد خامس يوم الموته ومحدش برضو من أهلوا اتصلوا ولا حتى اطمنوا عليا المهم أن انا اتصلت بخطيبى بعد مافوقت شوية كان بيكلمنى وحش اوى بعد المكلمة دى قولت ل بابا اتصل بيهم وقلوهم أن كل شىء قسمة ونصيب رن على حمايا ومردش وبعد كده رن على خطيبى ومردش ف روحت بعت على الواتس بعد عشر دقائق رن من رقم غيريب وقال ل بابا اللى تشوفوا المهم احنا خسرنا كتير اوى حتى فلوس القاعة مدفعش منها جنية
هو انا حتى لو بحبوا ينفع ارجعلوا تانى ولا انا كده بجرح كرمتى
وعليكم السلام ورحمه الله وبركاته. الخساره اللي انت بتقولي في اخر السؤال انك ان انتوا خسرتوها ما تجيش حاجه خالص جنب خساره انك ترتبطي ولو لفتره قصيره وتتعاملي مع شخص وما يناسبكيش فالخساره القريبه دي احسن بكثير من الخساره البعيده اللي كانت هتبقى تكلفتها اكثر لان تكلفتها كانت هتبقى نفسيه اكثر بكثير من اللي انت حساه دلوقتي على الاقل انت الموقف ده خلاك انت اللي تقرري بنفسك وتقولي كل شيء قسمه ونصيب لكن لو كنت اتعلقتي شويه وبناتي معاه شويه احلام كده كان هيبقى الموضوع بالنسبه لك صعب ان انت اللي تقرري ده. احمدي ربنا انه في موقف ظهر لك ان الشخص ده مش مناسب وانه مش احسن حد تكملي معه ونتعلم درس بسيط وهو ان احنا بلاش نحط تكاليف في مواضيع الخطوبه دي بالذات ان هي الخطوبه اصلا المفروض يعني. نحن نخفيها ونخفيها دي معناها ان احنا منعملش يعني. اشهار فيها كده وقاعه يعني دي من الحاجات الغلط اللي احنا بنعملها ليه علشان ما نكلفش نفسنا على حاجه هي اصلا احتمالاتها في انها ما تكملش اكتر لانه هي المفروض الخطوبه علشان نعرف بعض اذا كنا مناسبين ولا لا يعني في اطار اسري وشرعي فليه ايه اللي يخلينا نعمل كده في حاجه هي محتمله ما بنصرفش مصاريف بعد كده قدر الله وما شاء فعل والحمد لله على تدابيره في ان هو يوجهنا ناحيه الخير. ان شاء الله ربنا هيكرمك للشخص اللي يعني يكون احسن من ده بكثير بيكون انسب لك بكثير ان شاء الله.
تم النشر الأحد، ٣٠ يونيو ٢٠٢٤
الواضح من الأمر أنهم أرادوا إنهاء هذه الخطبة على أي حال، فقاموا بهذا الموقف. يجب أن تكوني سعيدة لأن الله أنقذك منهم، وكانت تجربة وتعلمت منها، ولكن احذري من تفكيرك في العودة فمن الواضح، أنه لم يتحمل المسؤولية، فكيف تأتمنيه مرة ثانية؟
تم النشر السبت، ٢٩ يونيو ٢٠٢٤
شكرا لحضرتك على المشاركة اللي مريتي بيه مؤلم جدا ان فيوم فرحتك يحصل كده وانك تلاقي ردة الفعل دي من اهله الزواج لايقوم علي شخص فقط او شعور واحد فقط يعني ايه يعني الارتباط بيكون ارتباط وتوافق عائلة بأخري وتقدير عائلة بأخري واحترام الطرفين ومراعاة ظروفهم ولايقوم علي شعور الحب فقط فالحب نفسه متغير ودا لاينفي أهميه الحب فأي علاقة وإنما احتياجات المرأة للاهتمام والتقدير والحضور والعطاء مهم جدا ممكن احول الموقف كله لدرس اطلع بإيه من اللي حصل انتبه لاحتياجاتي عشان أفهم أنا عايزة ايه الاذي الواقع عليا أعالجه ازاي ؟
تم النشر الاثنين، ١ يوليو ٢٠٢٤
وعليكم السلام! أولاً، أنا آسفة جداً إنك مريتِ بكل هذه الظروف الصعبة. بصراحة يا حبيبتي، اللي حصل ده مش قليل وأكيد تعبك نفسيًا وجسديًا. بس خليني أقولك إن قرارات الزواج والخطوبة مهمة ومحتاجة تفكير طويل وعميق. من الواضح إن كان فيه توتر وسوء تفاهم كبير بين عائلتك وعائلة خطيبك. وده ماينفعش يكون بداية صحية لأي علاقة زواج. واللي حصل من عدم اهتمام أهله بيكِ بعد الموقف ده دي إشارة مهم تاخدي بالك منها. الدعم والاهتمام من أهل الزوج مهم جدًا في حياتكِ المستقبلية. كوني قوية واسألي نفسك خطيبك كان فين في كل ده؟ ليه أهله مكنوش داعمين ليكِ؟ وهل لو رجعتيله، هل الوضع هيكون أفضل؟ أحياناً الحب بيبقى مش كفاية لو لوحده. لازم يكون فيه احترام، تفاهم، ودعم متبادل من كل الأطراف. قرار الرجوع ليه تاني هو قرارك لوحدك، بس لازم تحطّي كرامتك وسعادتك في الحسبان. فكّري كويس واتخذي القرار اللي هيكون مفيد ليكِ على المدى البعيد. لو حبيتي تسألي أي حاجة تانية أو تحتاجي نصيحة إضافية، أنا هنا وأساعدك بأي حاجة.
تم النشر الجمعة، ٢٨ يونيو ٢٠٢٤
أنا مقدرش اقول إجابة....لكن ممكن انبه على أمر بسيط وهو إن كل ده سببه التسرع، وأنا مش جي أءنبك لكن قدر الله وما شاء فعل،نلتمس الأعذار لبعض حتى لا نندم
تم النشر السبت، ٢٩ يونيو ٢٠٢٤
لعرض السؤال في فدني اضغط هنا