أنا عارفة الموضوع صعب خاصة لما بيكون من أقرب الناس لينا واللي المفروض يكونوا الداعم الأول لكن فرضنا الدعم ده مش لاقينه منهم والعكس كمان يكونوا بيهدموا فينا، هل نسمح لده إنه يفضل عقبة في حياتنا ونساعدهم بنفسنا على هدمها أكتر وأكتر؟ الإخوات والأهل ساعات مش بيعرفوا يتعاملوا وممكن يقولوا كلام جارح من قبيل التشجيع أو الانتقاد أو حتى مجرد خناقات ومضايقات ومش بيفهموا إن الكلام ده بيأثر بطريقة سلبية. يعني ممكن لو اتكلمتِ مع حد هيقول لك أنتِ اللي حساسة وأنا مقصدش كلام يجرحك. فأنتِ قدامك خيارين، يا تقعدي تتكلمي مع أخوكِ بصراحة وتفتحي قلبك، متتعامليش مع بعصبية وندية، اتكلمي بهدوء وحسسيه بحزنك وتأثرك وعرفيه إنك بتحبيه وهو أخوكِ وسندك وإن كنتِ مش هتلاقي السند منه هتلاقيه من مين؟ وحاولي أكتر من مرة ولا تيأسي منه، إذا كان مفيش فائدة في النهاية قُدامك خيار إنك تتجاهلي انتقاداته وتتعاملي كأنك مش بتسمعيها وتقعدي مع نفسك وتبرمجي عقليتك على الأفكار الإيجابية... مش هتضحكي على نفسك، لأ... هتقولي أفكار إيجابية حقيقية فعلا... أنتِ جميلة وكل خلق ربنا جميل. أنتِ حتى لو جسمك زايد شوية فده مش معناه إنك وحشة، معناه بس إنك استسلمتِ لليأس ورتم الحياة وعدم الثقة بنفسك وصدقتِ إنك متقدريش تبقي نسخة أفضل من نفسك. أنتِ تستحقي الحب، وأول حد لازم تاخدي منه الحب هو نفسك، إذا مش متقبلة نفسك ولا بتحبيها فصعب تطلبي من الناس تحبك. حبك لنفسك وثقتك بها بينعكس على الخارج وبيجذب الناس لك والعكس بيحصل والناس بتلقط الهالة السلبية اللي أنتِ مصدراها من جواك عن نفسكِ وبيعاملوكِ على أساسها. ** على فكرة، الأولاد ممكن يكونوا مش بيبصوا لك أصلا وأنتِ اللي نفسيتك وشكك في نفسك هي اللي خيلت لكِ إنهم بيبصوا بقرف. ولو حتى فيه حد ناقص بيبص بنظرات فيها انتقاص فده يدل على نفسيته هو ومش على مشكلة فيكِ ودول لا تسمحي لهم أبدًا يهزوا نفسك. وبلاش تفكري إنك عاوزة تبقي حلوة عشان ولد يعجب بك ويصاحبك. ربنا يحفظك من العلاقات الحرام والنظرات الحرام... نظمي حياتك واهتمي بصحتك ونفسيتك عشان نفسك وعشان انتِ تستحقي ده مش عشان تعجبي حد. بالتوفيق يا قمر.
لعرض الإجابة في فدني اضغط هنا