انا بنت عمري 15سنه كل حاجه في حياتي غلط حرفيا مفيش حاجه مهمه عملتها في حياتي دراسه مش احسن حاجه فيها وتخينه ومش عارفه اخس مهما عملت ومليش صحاب قريبين عندي معارف مش صحاب كنت بدرب رياضه بحبها جدا بس وقفت علشان المكان الي كنت بدرب فيه مكنش ليه مستقبل مش عارفه أعمل إيه حسه أني حياتي فاضيه وانا مش مبسوطه ولا راضيه عن نفسي ولا شكلي
بصي ياحبيبتي كونك في السن دا طبيعي تعدي بكل دا ويمكن اكتر منه بس الفكرة تتغلبي علي دا ازاي .. أول حاجة حاولي تقعدي مع نفسك اكتر انتي محتاجة ايه في حياتك؟ تكتشفي نفسك بتحبي ايه؟ بتكرهي ايه؟ هواياتك ايه اكتر حاجة بتحبيها حاولي جربي كل حاجة اطبخي حاجة جديدة اقرأي كتب هتساعدك جدا .. دوني مشاكلك أو حزنك في نوت بوك .. وفكري عايزة تكوني ايه لما تكبري تخصص شغلك أو حابة مجال معين ابتدي دوري واسعي وخدي كورسات النت مقصرش كله بقا متاح دلوقتي .. كونك برضه انك شايفة انك مش مهمة أو مبتعمليش حاجة صح في حياتك انتي لسه في بداية الطريق دي مجرد وساوس من الشيطان انك مش هتوصلي لشيء اعرفي نفسك وحددي اهداف ليكي قدام لشغلك لحياتك لشخصيتك تغيري منها وتكوني افضل .. بالنسبة لموضوع الصحاب انتي المشكلة مش فيكي ويمكن مش في اللي حواليكي بس فكري للحظة أن ربنا بيحط في طريقك الناس اللي تشبهك وجود الناس دي في حياتك مجرد معرفة لأن ربنا شايلك الاحسن اعرف ناس كونت صداقات في سن كبير مش علشان هما وحشين علشان ربنا شايلهم الناس اللي تشبهم متستعجليش علي اي شيء في حياتك وسبيها علي ربنا وكله بأوانه وبمعاد خليكي محافظة علي علاقتك بربنا وايمانك بيه كبير وقربي من ربنا انتي محتجاه في الوقت دا .. اما عن انك تخينة فدا مش معناه انك وحشة انتي بس محتاجة مساعدة علشان تظبطي شكلك يبقي افضل ممكن لو امكانياتك متسمحش العبي رياضة في البيت بدل الجيم في قنوات كتير ممتازة في الموضوع دا ظبطي أكلك ومواعيده كلي بروتين كتير وقللي نشويات وسكر بقدر الإمكان ولو امكن تبدليهم بحاجات صحية انتي لسة في بداية الطريق ابدئي اشتغلي علي نفسك من دلوقتي وقدام هتلاحظي الفرق سواء في حياتك أو دراستك أو شكلك وكل حاجة بتاخد وقت المهم تركزي وتستمري علي دا .. ومذاكرتك حاولي بقدر الامكان تعدي في الامتحانات وتنجحي مش كل الناس بتحب المذاكرة ومش كله بيقدر يذاكر بس بيقدروا يعملوا اللي عليهم علشان بس ينجحوا ويوصلوا لاهدافهم وحلمهم .. وان شاء الله ربنا يجبر بخاطرك ويعوضك خير علي صبرك وحسن ظنك بيه ياقمر ❤️❤️
تم النشر الاثنين، ٢٧ يناير ٢٠٢٥
ياروحي❤️ طيب واحده واحده كده انتي في سنك الحلو ده ايه المطلوب منك. مطلوب منك توسعي افقك. بمعنى نذاكر بشكل انتي حباه ازاي بقي؟؟ نذاكر من دافع الفضول. يعني تحبي تعرفي معلومات جديده وتتحدي نفسك في انك تحاول وتعرفي وتغلطي وتصححي. وذاكري بالوان كده وعلي مهلك واشرحي لنفسك المعلومه كإنك بتشرحي لمجموعه وهاتي ورقه وقلم واسألني نفسك في اللي ذاكرتيه. طيب ممكن ايه كمان ممكن نقرا كتب في مسابقه اسمها اقرأ لطلاب المدارس شوفي شروطها وهاتي كتب واقريها وجهزي نفسك تدخلي السنه الجايه. لو ماما وبابا وافقوا تنزلي نشاط خيري قريب منك وآمن اعملي ده علطول. وقتها هتتعرفي علي ناس حلوه. واصحاب هيحبوكي امتي بقي؟؟ اما تحبي نفسك. تفتكري نحب نفسك ازاي؟عشان قلبوظه حبه وايه المشكله مانخس ونزيد براحتنا. الحياه مش حرب ياحبيبتي. انتي كل يوم تشكري ربنا انه رزقك صحه واني سليمه ومعافيه وتاني حاجه نحافظ ع النعمه اللي هي الصحه دي ازاي ؟؟ناكل اكل نضيف ونتحرك كل يوم. حركتك كل يوم دي جزء من الشكر لله علي النعمه. ممكن كمان تطلبي من ماما تحفظي قرآن اون لاين عشان وقتك ودروسك. تعرفي ان ده هيزود وقتك وهيخلي ادراكك اكبر. لو ماما مرضيتش حاولي انتي من النت. حبي جسمك وشوفي انتي بتاكلي كتير ليه ؟زعلانه ولا فاضيه ولا دي عزومه ولا عشان هعمل بكره دايت ؟ ولا فجأه انا لاقيت نفسي فاتحه التلاجه واخدت بالي بعدين؟ اي اختيار من دول متاكليش فيه.بسطيها علي نفسك. شويه قللي اكلك بس تاكلي من اكل البيت شويه لا حلويات يومين بس وقطعه واحده وشويه مره واحده ف الاسبوع. لحد مانقللها ماتصارعيش حياتك اتبسطي وخدي baby steps❤️عمرك ووقتك وجسمك دي حياتك استغليها زي ماتحبي. دوري ع صحتك واهميه وقتك بما اننا كده كده عايشين عيشيها بااحسن مايمكن❤️
تم النشر الاثنين، ٢٧ يناير ٢٠٢٥
السلام عليكم، حبيبتي انتِ لسه صغيرة وبدري قوي تقولي مفيش حاجة صح في حياتك أو تفقدي الأمل في نفسك. وعلى فكرة مهما كان العمر ومهما كبرتِ مش لازم أبدًا تشعري بيأس من نفسك وقدرتك إنك تتغيري للأفضل. كل مشكلة لها حل. المهم نعرف إزاي نمشي صح لحد ما نخرج من الدائرة اللي قافلينها على نفسنا بأفكارنا السلبية. هاتي ورقة وقلم واكتبي كل حاجة أنتِ مش راضية عنها في حياتك. بعد كده اكتبي كل مشكلة وقصادها الأفكار والخطوات اللي محتاجة تعمليها عشان تحلي المشكلة دي، يعني مثلا مشكلة الوزن الزائد.. أحلها ازاي؟ محتاجة أعرف إن شكلي مش هو اللي بيحدد شخصيتي ويأثر في نفسيتي... محتاجة تمارسي رياضة وتظبطي أكل.. محتاجة توقفي العادات السيئة اللي بتأدي لزيادة وزنك. مشكلة الدراسة... أحلها ازاي؟ وهكذا... كل حاجة انتِ مش راضية عنها اكتبيها وفكري إيه الحل لها وابحثي على النت وسجلي الحلول اللي هتقابلك. مش محتاجة تعملي كل حاجة في نفس الوقت. ** حددي أولوياتك الأول... إيه أهم مشكلة عندك محتاجة تحليها الأول وبعدين تشوفي اللي بعدها. متستعجليش نفسك ولا تضغطي عليها واعرفي إن التغيير بياخد وقت ودي حاجة طبيعية. ** طول ما أنتِ يائسة من نفسك وبتغذيها بالأفكار السلبية طول ما عقلك الباطن هيصدق وينفذ اللي بتقولي عليه. ** كل فكرة سلبية تفكري فيها على طول قولي لنفسك فكرة إيجابية عكسها وصدقيها وقومي نفذي واشتغلي. عادي نقع كل شوية بس نرجع نقف تاني. لسه الوقت قُدامك عشان تتغيري للصورة الأفضل منك ربنا يعطيك طول العمر في الطاعة إن شاء الله. ابدأي واستعيني بربنا ولو عندك تقصير في جانب الصلاة والعبادات ابدأي به عشان هو الأساس وهيظبط كل حاجة بعده. أنصحك تشوفي الفيديو ده وفيديوهات د. أسماء عامة هتفيدك عشان تظبطي مشاكل حياتك. https://www.youtube.com/watch?v=8xO-FS0IJKs&t=821s&ab_channel=dr_AsmaaElkady بالتوفيق إن شاء الله.
تم النشر الاثنين، ٢٧ يناير ٢٠٢٥
عزيزتي سما، أود أولاً أن أخبرك أنك لست وحدك في شعورك هذا، فالكثير من الفتيات في عمرك يشعرن بنفس الطريقة في بعض الأحيان. من المهم أن تدركي أن الحياة تتضمن العديد من التحديات واللحظات الصعبة، لكن هناك دوماً فرصة للتغيير والتحسين. أهمية النفس الإيجابية : حاولي أن تتقبلي نفسك كما أنت في الوقت الحالي. قناعتي عن ذاتك لها تأثير كبير على كيف تشعرين. ابدئي بكتابة الأشياء التي تحبينها في نفسك، سواء كانت صفات شخصية أو مهارات أو حتى مظهر. تحديد الأهداف : حددي بعض الأهداف الصغيرة التي ترغبين في تحقيقها. يمكنك أن تبدئي بأهداف بسيطة مثل تحسين دراستك في مادة معينة، ممارسة الرياضة مرة أخرى، أو حتى تكوين صداقات جديدة. الهدف من ذلك هو تعزيز ثقتك بنفسك. ممارسة هوايات جديدة : إذا كنت قد أحببت الرياضة سابقاً، فحاولي البحث عن أنواع رياضية جديدة أو نوادي محلية قد تساعدك على العودة لممارستها. هناك الكثير من الأنشطة التي يمكنك الاستمتاع بها. تكوين صداقات جديدة : حاولي المشاركة في أنشطة مدرسية أو مجتمعية حيث يمكنك التعرف على أشخاص جدد. الصداقات تحتاج إلى وقت ولكن الأصدقاء الحقيقيين سيجعلونك تشعرين بالسعادة والانتماء. التحدث إلى شخص تثقين به : إذا كان لديك أحد أفراد الأسرة أو معلم أو مستشار يمكنك التحدث إليه، فلا تترددي في مشاركة مشاعرك. أحيانًا مجرد التحدث يمكن أن يخفف عبء المشاعر السلبية. تذكري أن التغيير يتطلب وقتًا وصبرًا، ومن الطبيعي أن تشعري بالإحباط في بعض الأوقات. ولكن كل خطوة صغيرة تأخذينها نحو تحسين نفسك وحياتك تُعتبر إنجازًا يستحق الفخر. بارك الله فيك.
تم النشر السبت، ٢٥ يناير ٢٠٢٥
مشكلتك هيا ممكن تكون شئ كويس لان كما قال تعالى عسى أن تكرهو شيئاً وهو خير لكم لكن الصبر والتعلم للأفضل شئ كويس لازم تركزي عليه
تم النشر الاثنين، ٢٧ يناير ٢٠٢٥
السلام عليكم.. مامدي علاقتك بالله?
تم النشر الاثنين، ٢٧ يناير ٢٠٢٥
لعرض السؤال في فدني اضغط هنا