ليه ساعات بيبقي صعب علينا نحب نفسينا وحاسين دايما بأن عندنا نقص وأننا مش كفاية للحوالينا يعني أنا مثلا عندي واحدة صحبتي هي بقت قريبه مني في فترة وبعدها هي اتخنقت مع صاحبتها وقربت مني اكتر ولما صحبتها رجعتلها بقت فجاءة متحكليش علي كل حاجه وتخبي ولما صاحبتها قربت من بنت تانيه وسابتها فترة رجعت تاني تحكيلي علي كل حاجه والحوار اتكرر تاني صحبتها رجعت قربت منها بس المرة دي بقت تحكيلي علي كل حاجه بس بحسها دايما بتتبسط مع صحبتها اكتر من معيا يعني عارفه انها بتحبني جدا بس انا كنت ساعات بسأل نفسي هي صاحبتها احسن مني في ايه وكنت بلاقي اني احسن منها بكتير الصراحه بعني بحب صحبتها دي لانها هي صحبتي برضو المفروض بس ساعات بتدايقني لأنها مش عايزاها تقرب مني اوي انا مش عارفه اعمل ايه الصراحه وحاسه اني قليله دايما وكمان انا معنديش صحاب قريبين غيرها حد عنده حل؟
تم النشر السبت، ٢٧ أبريل ٢٠٢٤
هو مش احساس بالنقص بس هو احتياج انك تكونى مميزة عند اللى قدامك انتى مفتقدة الاحساس بالتميز ومركزة على الصداقة اكتر انك عاوزه تشوفى حد مختارك انتى اكتر من اى حد غيرك بس ركزى على تميزك فى حاجات محدده وده هيريحك اكتر لان حتى صاحبتك مميزاكى اهو بانها بتحكيلك انتى اكتر ..حتى لو بتقضى وقت اطول مع صديقتها التانيه مش لازم نبقى مميزين بشكل كامل ..بس هتلاقى نفسك مميزة فى البيت بحاجة بتعمليها اكتر واحسن من كل اللى فى البيت وهكذا فى المدرسة او وسط قرايبك ..شوفى تميزك وانك محبوبه بالشكل ده افضل بكتير عشان متحبطيش ع الفاضى .
تم النشر الأحد، ٢٨ أبريل ٢٠٢٤
انتى مهما عملتى هتحسي نفسك مش كفاية لحد ومفيش حد يرضى باللى بتقديمه ليه فانتى حبي نفسك وارضي نفسك وبس ومتستنيش حاجة من حد وخليكي واثقة ف نفسك انتى مش وحشة ولا اى حاجة من دى وخلى علاقتك بالناس اللى حواليكي سطحيه اه ان يبقا لينا صديق واحد بيحبنا حاجة حلوة ونادرة مش بتلاقيها كتير بس انتى اختارى اللى يقدرك ويحبك زى م بتحبيه عادى صاحبتى وحدة بس هى شايفاكى مش مقربة ليها عادى خلاص اعتبريها صحبة عادية لحد م تقابلى الصحبة اللى تبقى تحبك وتبقى انتى اقرب حد ليها لان الصداقة رزق زيها زي الجواز بالظبط يتصيب ي تخيب وانتى افضلى ادعى ربنا يرزقك بالصحبة الصالحة اللى تحبك وتساعدك ف الخير ودى تجربة شخصية والله وربنا يرزقك اللى بتتمنيه
تم النشر الأحد، ٢٨ أبريل ٢٠٢٤
متحسبهاش كده .. ولا قليلة ولا حاجه. هو الموضوع مش لازم يكون متركز علينا احنا وبس، انا مقدرة انك بحاجه للشعور ده. بس تعالى نعكس الموضوع. لو افترضنا انك متصاحبة على 3 بنات .. ولكن في واحدة بس هي اقرب حد ليكي، ال 2 التانين كويسين وبتحبيهم، ولكن الاولى ديه هي الاقرب، لانك بترتاحي معاها وفيه كيميا كده بينك وبينها. ايه المشكلة؟ هل مثلا اجي اقولك انتي كده ظالمة مثلا؟ او انتي ازاي ميكونوش ال 3 في نفس المستوى؟ او انك مثلا مش بتحبيهم؟ اكيد لا كل ما في الموضوع انك بترتاحي معاها اكتر، ليها مكانة اكبر في قلبك. ف متحسبيهاش انك فيكي عيب او وحشة .. بقلة الصحاب، اوقات الواحدة او 2 بيكونوا افضل من 10 ويكون ماليهم النفاق .. متركزيش ع السلبيات اللي حواليكي، حاولي تبسطي نفسك باقل حاجة ممكنة معاكي.
تم النشر السبت، ٢٧ أبريل ٢٠٢٤
بصى انا من وجهه نظرى بحب متديش حد اهميه اكتر من اللازم طلاما هى كل شويه تقرب وتبعد او بتتغير تبقى شخصيه مش اساسيه فى حياتك لان الشخصيات الاساسيه عمرها مبتتغير علينا واعرفى ان ديه مش الصحبه المناسبه ليكى لسه هتقابلى ناس احسن انا كان معايا صاحبه بقالها ٨ سنين وبعدت عنى فاجاه عرفت انها مكنتش شبهى وانى اخترت شخصيه غلط اصاحبها والحمد لله ربنا كرمنى بناس احلى وناس بتزود ثقتى فى نفسى وديما فى ضهرى فاللى معاكى ديه مش صاحبه اعتبريها معرفه ودورى على ناس تانيه شبهك احسن متضيعى عمرك فى التفكير فى عمايلها
تم النشر السبت، ٢٧ أبريل ٢٠٢٤
امشي ورا كلام جوجو لانه واقعى الفكره انك جبتيها وصدقتي مشاعرك تجاها هي اه بس هي بتحب صاحبتها ع فكره كل واحد أو واحده عنده حد مميز رغم صداقته الكتيره صاحبتك اسف فاللفظ بالنسبالها بتسديلها خانه الفراغ ال سابته الاولى فيها حبي نفسك بجد وحبي ليها الخير واوعى تكسر نفسك لانها ما بتتجبرش
تم النشر السبت، ٢٧ أبريل ٢٠٢٤
بصي يا حبيبتي الإنسان علشان يحب نفسه لازم يعرف قيمتها ويفتخر بالإنجازات بتاعته والناس طول مانتي واثقه من نفسك وبتحبي نفسك كذلك الناس هتحبك
تم النشر السبت، ٢٧ أبريل ٢٠٢٤
مش قليلة بالعكس انتي ممكن تكوني احسن من ناس كتير في حاجات مختلفة ، الفكرة انك تعززي من نفسك واعرفي انك كبيرة في عين نفسك قبل عيون الناس هتلاقي الدنيا حلوة وكله عايز يتقرب منك ويعرفك اكتر بالنسبة لصحبتك هي حره لكن اعرفي انك مميزة وماتخليش حد يآثر عليكي حتي لو كانت صديقتك المقربة
تم النشر السبت، ٢٧ أبريل ٢٠٢٤
لعرض السؤال في فدني اضغط هنا