كيف أشعر بفرحة العيد وفيما أشغل وقتي كي لا أشعر بالحزن المعتاد في كل عيد؟

Question

السلام عليكم ورحمه اللّٰه تعالى وبركاته ، اولا كل عام و حضراتكم بخير و بصحة وسلامة وعافيه يارب العالمين و عيدكم مبارك أنا عارفة ممكن يلى هقوله دلوقتى مش صح بس انا مش عارفة ليه كل ما يجى العيد احس بضيق و احس انى زعلانة هو أولا احنا أقصد عائلتى مش زى بقية الناس لا بنخرج نصلى العيد و لا بنروح لاى مكان ابدا طوال العيد أو حتى فى أيام غير العيد و ده بصراحة بيخلى عندى حالة من الحزن مثلا من صغرى وانا كنت معتادة انى اتفرج على الناس من الشباك أو فى البلكونه واشوفهم و هم خارجين من المسجد و يشتروا الهريسة مثلا و بعد كده يروحوا على الملاهى ، أما أنا بكون واقفة اشوفهم بس بحس انهم فى عالم تانى و انا كأنى محبوسة و مقدرش اكون مثلهم ، أنا بحب العيد و فرحة العيد و الله لأن تعظيم شعائر الله و فرحة العيد سنه عن الرسول صلى الله عليه وسلم ، بس بسبب كل ده بحس بضيق و حزن جوايا حتى فى العيد كل أهلى ليكونوا نايمين و يكون الجو ملل ، مع العلم انى عندى امتحانات بعد العيد إن شاء اللّٰه لانى فى فرقة اولى كلية تمريض ، اتمنى حد يفيدنا و يقدم لى نصائح أعمل ايه علشان اشغل وقتى أو انى احاول انى ما أحس بالحزن و الضيق يلى عندى و شكراً لحضراتكم مقدماً ، وجزاكم الله كل خير ، و عيد فطر سعيد مرة أخرى

Accepted Answer

كل عيد وانتى بخير كل ما بنربط فرحتنا بصورة محدده بنبقى سجننا نفسنا جواها الحقيقة ان اشكال الفرح كتيره وكلها متاحه ...احنا اللى بنقرر هنستخدم ايه من المتاح تركيزنا على الغير متاح بيعمينا عن المتاح كله مثال بسيط ومؤسف كمان..بس حقيقى ...شوفى ازاى وسط دمار الحرب والفقد والموت اهل غزة بيحتفلوا بالعيد المتاح حتى لو قليل ...حتى لو وسط الخراب نقدر نفرح بيه المسألة اختيارك ...ابعدى عينك عن الغير متاح وركزى على المتاح ونصيحة من تجربتى الشخصية ...دفى البيت وسط الاهل مع بيجامة جديدة ...احسن من خروج فى الشارع بقى كله تجاوزات ومناظر بهرجة بدون داعى

Answer

كل عيد وانتي بخير، انا فهماكي جدا بس ليه ماتحاوليش وتبدأى انتي،يعني جهزي طبق كحك حلو وبنبوني والصبح اعملي شاي افطروا سوا،ولو تقدري تروحي تصلي مع جيرانك او اصحابك يبقي حاجة جميلة جدا،ماتستنيش حد يفرحك لأنك تقدرى تفرحي نفسك ولو بحاجة بسيطة جدا

Answer

لو كان يوم عادي زي باقي الايام الروتينية مكنتيش حتحسي بالزعل لكن عشان عيد بتفكري ان فيه حاجة مميزة حتحصل او شخص معين حيكلمك يعني مستنية حاجة من الاخر وده بيصيبك بالاحباط لما ميحصلش اللي انتي عاوزاه متستنيش حاجة من حد او اي حاجة تحصل عموما...ابسطي نفسك بنفسك (مع الأسف هي دي حقيقة الدنيا وعاوز اطمنك انك مش لوحدك ومهما بان على وشوش الناس العكس فربنا أعلم بما في القلوب)

كيف أشعر بفرحة العيد وفيما أشغل وقتي كي لا أشعر بالحزن المعتاد في كل عيد؟

نفسية

اجتماعية

سؤال من احد أعضاء فدني

تم النشر الأحد، ٣٠ مارس ٢٠٢٥

5 إجابة

6 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك