معنديش بربع جنيه ثقة ف نفسي ، وع طول قاعده ف البيت وخايفه اخرج ومبحبش اشوف الناس ،ولو خرجت عيني بتبقي ع الناس شايفيني ازاي هل شكلي حلو ، ط هل لبسي كويس ،
مممكن أعقد ف البيت سنه عادي مش بزهق النهم اني مشوفش الناس ولا احتك بيهم اعمل اي
محتاجة الاول حد يكون ثقه يشجعك ويكون جنبك ويقولك كلام حلو كتير مدح فى نفسك. خدى رأى حد بتحبيه واتأكدى منه من اللى مش عارفه تتأكدى منه فى نفسك لوحدك. موضوع الناس هتشوفنى ازاى ...هو تمرين صغير هتعمليه كل مره قبل ما تنزلى ...تسألى نفسك السؤال ده ( لو معجبتش الناس ..ايه اللى هيحصل يعنى .ايه اسوا حاجة هتحصل ؟ ) افضلى ورا السؤال لحد ماتحطى رد فعل ليكى على اسوأ حاجة ممكن تحصل ...ومينفعش تقولى مش هعمل حاجة...لانك بتخلى بس مخك يستعد وده هيساعدك تهدى ومتخافيش من الوجود وسط الناس. مثال ( اسوأ حاجة ان حد يبصلى بقرف ....طيب انا فى الحالة دى ممكن اعمل ايه.....مش هبصله او هبصله بقرف بردوا او هعمل نفسي مشوفتوش ) الاهم من كده انك تعرفى ان اراء الناس مختلفة وانتى مش بتلبسي عشان تعجبي حد ولا تكونى شبه حد ولا يكون رأى حد فيكى حلو....ولو فاكرة ان فى طريقة سحرية تخليكى قوية بدون ما تتعاملى مع الناس فده مش طبيعى وانسيه ...زى تجارب الاكل كده ...بتجربي اكتر من مره عشان تبقي محترفه فى عمل الاكله وبتكونى عرفتى كل التفاصيل اللى بتفرق فى نجاحها.
تم النشر الأحد، ٢٦ فبراير ٢٠٢٣
بقولك ايه فكك من اي حد ، وانزلي العبي رياضه ، بوكسنج مثلا او روحي جيم هترجعي ثقتك وبزيادا و دي مش نصيحه على فكرا دا امر واقع عن ناس انا دربتها كتير و كانو في حالة اصعب ف اتحرك وخدي خطوة
تم النشر الأربعاء، ١ مارس ٢٠٢٣
فالعموم الحل بيبقي تشتغلي علي self talk. يعني غيري نوعيه الكلام مع نفسك وافضلي دعبسي علي مييزاتك وطوريها ولما تنجزي وتتقني موهبة إحساس الانجاز هيعلي إحساس التميز لازم حد يفضل يسمعك كلام تشجيعي كتير عن نفسك من غير حاجه تقدميها دور مامتك واختك وصديقتك ال هو حب غير مشروط وفالغالب بيبقي اتحرمتي من الاحساس ده من أهلك فبتفقدي فنفسك فكره التميز لكن لو عاوزه حل ليكي آنتي لازم تحكي آكتر أهلك بيعملوكي إزاي وسنك قد إيه وليه شايفه نفسك مش كفايه.. اقرأي طيب عن الاستحقاق الذاتي كتير. والناس بجد لو ملكه جمال العالم ونابغه هيكلموا برضو فالناس آخر حسبانك لازم مخك يفهم ده كويس إن عنيكي أدق مقياس لنفسك
تم النشر الأحد، ٢٦ فبراير ٢٠٢٣
نتمنى تسردي تفاصيل اكتر طبعا علشان نقدر نساعدك .. انتي كده من امتى؟ وهل فيه اعراض بتحسي بيها لما بتخرجي من البيت؟ وهل كانوا اهلك بيمارسوا عليكي اسلوب المقارنة وانتي صغيرة؟
تم النشر الأحد، ٢٦ فبراير ٢٠٢٣
طيب انتي كده من امتى؟ وهل كان في تعليقات سلبيه عليكي قبل كده شكلك او لبسك؟ او اتعرضتي للتنمر ف وقت قبل كده وانتي صغيره ؟ ولو في عرض من دول بتحسيه لما تطلعي وتتعاملي مع ناس قوليلي خفقان القلب رعشه ف الجسم احمرار ف الوجه تعرق بروده شديده اضطرابات المعده والغثيان؟
تم النشر الأحد، ٢٦ فبراير ٢٠٢٣
من وجهة نظري و عن تجربه .. قربي من ربنا و جربي تقري كتب وروايات .. حبي نفسك اكتر .. اختاري أصحاب بحرص و عنايه و شوفي ايه اكتر حاجه بتحبي تعمليها و اعمليها بحب و بقترح عليكي تكتبي خواطر او اي كتابات بتمنالك التوفيق والسعادة
تم النشر الأحد، ٢٦ فبراير ٢٠٢٣
أهم حاجة أمسحي كل أفكار سلبية عن نفسك وقيميها على الأشياء الإيجابية والنجاحات السابقة من حياتك .. ستجدي نفسك أفضل من ملايين من البشر .. فعندما تواجهي المجتمع أعلمي أن هناك كثيرين أقل منك في أشياء كثيرة .. فلا داعي للخوف والرهبة من أوهام في دماغك أنتي صنعتيها لنفسك بنظرة تشاؤم ليس لها محل صحيح في حياتك .. واجهي الناس بكل ما هو حلو سيء عندك .. هذه هي الحياة يا عزيزتي .. حياتك ملك لكي وحدك تقرري بيدك هل تريديها سعيدة أم لا .. وقبل كل شيء حاولي تقربي من الله سبحانه وتعالى لأنه وحده قادر على جعل الاطمئنان في قلبك ...
تم النشر الاثنين، ٦ مايو ٢٠٢٤
لعرض السؤال في فدني اضغط هنا