السلام عليكم ورحمة الله وبركاته ✋
انا شاب عندى ٢٤ سنه خاطب بنت من محافظه غير محافظتى مرتبطين ببعض من ٧ سنين تقريبا لقاءاتنا نقدر نقول انها تعادل يومين في عدد الساعات انا بروحلها زياره كل شهر تقريبا او اكتر بأيام وما الى ذلك علاقتنا تعتبر كلام ف التليفون هم ناس طيبين واحنا كمان كده يعني محدش فينا واقف للتاني على حاجه انا خاطبها من سنتين .. قبل ما اخطب انا كانت حالتى الماديه سامحالي بالخطوبه والزواج لكن بعد انا خطبت بشهرين تقريبا اكتشفت انه اهلى مديونين في مبلغ مادى الى حد ما كبير وكان لازم اساعدهم في تسديد المبلغ ده بقالنا سنتين بنسدد فيه وحاليا احنا خلاص بنخلص من اللى علينا المهم انه شقتي معرفتش اكملها زى ما كنت انا متفق والسبب انا قولته اعلى لما شافوني كده عرضو عليا شقتهم وده الكبيعي من أى اهل انا رافض المبدأ وكمان نسايبي كذلك عرضت عليهم موضوع الإيجار بعد إلحاح مستمر من خطيبتي شهور حاولت تقنعني لحد اما انا اللى اتكلمت بعد اما اهلها وافقو انا نفسيا مش مرتاح لمشوار الايجار انا مؤمن بالله وعارف انه كلها ارزاق وبإيد ربنا لكن انا من جوايا بقيت في حيره مابين انى اكمل او لا انا من كتر مانا مضغوط وصلت بيا الحاله انه اهلى بيسألونى انت عايز اى تكمل ولا لا بقول معرفش انا عايز اى معرفش انا المفروض اكمل ظعاها للاخر ولا لا مع العلم انى مش عاشق يعني حبي ليها يكاد يكون حب تعود حاولت بقدر الامكان انى اكون مكتفي بيها لكن معرفتش واديني النهارده مش عارف اخد قرار خايف اكلع في النهايه ظالم ليها ولنفسي .
أولا أنت ظلمت نفسك وظلمتها بالفعل عندما أقمت معها علاقة لا محل لها من الإعراب من سبع سنوات وأنت في السابعة عشرة من عمرك قبل أن تخطبها .. والله يغفر لك ولها ثانيا جزاك الله خيرا على وقوفك بجانب أهلك في الضائقة المالية واعلم أن الله لا يضيع أجر المحسنين - عوضك الله خيرا مما أنفقت ثالثا: ما المشكلة أن تتزوج في شقة بالإيجار حتى يفتح الله لك أبواب الرزق؟ أليس هذا أفضل من أن تؤخر الزواج لعدة سنوات إذا كنت مستعدا نفسيا لموضوع الزواج وتحمل المسؤولية؟
تم النشر الأحد، ١٢ فبراير ٢٠٢٣
في جملة استوقفتني الحقيقة وهي الجملة ديه (حاولت بقدر الامكان انى اكون مكتفي بيها لكن معرفتش) ليه بتقول كده؟
تم النشر الاثنين، ١٣ فبراير ٢٠٢٣
من وجهه نظري لو كانت تهمك مكنتش فكرت ف انك تسيبها اصلا الاحسن انك تسبها من دلوقتي لان علاقتكو ف المستقبل ممكن تاذيها اكتر لأنك مش بتحبها ♥️
تم النشر الاثنين، ١٣ فبراير ٢٠٢٣
وعليكم السلام ورحمة الله وبركاته ربنا يبارك فعمرك وصحتك ويبصرك ويدبرلك أمورك عاجلا.. ليه خالط المشكلتين ببعض! مشكله البيت سواء الحمدلله شقتك موجوده بس محتاج تشطبها أو الايجار ال بنسبه كبيره مش دايما هتستقر فيه بس لازم تعاهد نفسك سنتين جمعيه و ادخار عشان الدنيا مش تاخدك.. أو ممكن تأجل سنه كمان تشد فيها آوي علي نفسك تنجز جزء كبير من شقتك وتتجوز سنه وآحده ف إيجار بدل سنتين مع إنه مش حلو تطول الخطوبه. وبين خطيبتك ومشاعرك تجاهها!! إنت خايف تسيبها دلوقتي عشان ال ٧ سنين والعشره ومش خايف يكون قرار خاطئ مجرد هروب من إحساس بالذنب وتعاطف وتبقي حياتكم بعد الشر مش فيها تفاهم و تظلموا آنتو آلأتنين عيالكم عشان مش قادرين تحتووهم! هو أصلا جايز دي محنه و ابتلاء تكفير ذنب علاقه وانت كنت لسه مراهق ١٧ سنه! حاول تفصل بين المشكلتين عشان تلاقي حل سليم من غير حيره.. **استخير وراجع نفسك هل دي البنت ال هتكمل معاها حياتك وإن كان آه يبقي فكروا سوا ف مشكله الشقه وإن كان لا يبقي عندك وقت تخلص فيه شقتك وفالحالتين الضغط قل.
تم النشر الأحد، ١٢ فبراير ٢٠٢٣
واضح انك مش عاوز تكمل و بتاخد موضوع الشقة ده عذر لنفسك.. خليك واضح وصريح ...قيم علاقتك بيها مرة تانية وبعيدا عن فكرة الشقة خالص.
تم النشر الأحد، ١٢ فبراير ٢٠٢٣
فكره انك تاخد القرار تحت ضغط صعب جدا ومنصحش بيه ابدا وكمان انك تكمل معاها عشان تعود بس كمان مش صح قوي وفكره الاكتفاء ملهاش علاقه قوي بالطرف الاخر غالبا بتبقا من الشخص نفسه انه عارف ان الشخص الي معاه رابطه بمسؤليه وارهقته ف بيشتت نفسه عن المسؤليه دي بشخص تاني ... بس الاهم من كل ده انك تحاول تفصل نفسك ع الاقل يوم او اتنين بعيد عن اهلك وخطيبتك وعن اي حد ممكن يتسببلك ف ضغط ومع نفسك كده حط مميزات وعيوب الايجار ومميزات وعيوب انك تكمل معاها اصلا ولا لا واسأل نفسك اسأله زي ان دي الي اتمنتها تكون زوجتك وام ولادك ..طب هي قصرت ف ايه معاك ...طب هل هي مقدرتش ف يوم من الايام ظروفك .كمان فكر من حيث الايجار مش ضروري تعيش عمرك كله فيه مهو ممكن مؤقت لحد ظروفك متتحسن وبعدين متعرفش ربنا هيسهلهالك ازاي زي مسهلتها ع اهلك وسديت معاهم ديونهم الاهم لما تحط المميزات والعيوب اختار الي مميزاته اكتر وعيوبه اقل واستخير ربنا ع القرار ده ومتخليش حد يفضل يزن عليك او يبدأ يضغط ويأثر ع افكارك عشان متنضغطش وتاخد قرار مش مناسب
تم النشر الأحد، ١٢ فبراير ٢٠٢٣
لعرض السؤال في فدني اضغط هنا