بقيت أحس اني حد تاني يعني مش فيوم وليله بس جت عليا فتره بقيت بحس اني حساسه اوييي بتأثر ولو بكلمه صغيره من اي حد لما كانت اختي بتاخد مني نصايح وبتقول عليا قوية وبعرف أرد وشجاعة كنت باخد الكلام منها وبحط نفسي فحته تانيه خالص بس للأسف الحقيقه مش كدا خالص لما باجي بتعرض لموقف بلاقي نفسي مش عارفة أعمل إيه ممكن اعيط بس ومعرفش أرد الموضوع ده بيأثر فيا آوي بحس نفسي ضعيفه وكذا موقف يحصل هكذا حتي ماما تقولي ليه بتعيطي ليه مقولتيش كذا كذا مبعرفش أرد عليها بحس نفسي ضعيفة اكتر ممكن مثلا من الحاجات الي مدايقاني بردو إني مبعرفش أواجه لو حد مدايقني او حد عمل حاجه المفروض اواجهه بيها معرفش مببقاش قادره افتح الحوار ده بسيبها زي ما هي بقول ساعات ممكن ده يكون بسبب فتره مراهقتي فهرموناتي متلغبطه او عشان مشاكل فالبيت مثلا معرفش بس الي انا عارفاه ان انا مش عايزه ابقي حساسه كدا وساعات بحس العيله وأخواتي الكبار برضو ليهم عامل فده حتي لو كان هزار بس بقيت اكتشف بجد إنو كلام منهم كتير بيأثر فيا وتكراره ليه زي انتي هتطلعي مهندسه إزاي يعني انتي اخرك معرفش ايه يضحكوا بقى يهزروا فحاجات كتير ببقي ساعات بجد بحس إني عايزه دعم او مثلا خناقه هبله من صاحبتي مثلا مع العلم انو إحنا صحاب خمس سنين مثلا أي حاجه هبله بحس إني بتأثر اوي بيها بردو بعد استني منها تقول حاجه أعد أشوف في رسالة جت ولا لا لو بقالنا فتره مش بتكلمني ممكن تأثر علي نفسيتي بجد لمجرد اني حسه علاقتنا مش أحسن حاجه وتعبت تعبت من عدم ثقتي بنفسي ماشي بشوف نفسي حلوه الحمدالله اموره بس كشخصية مش عارفة بجد حتي لما حد من صحابي يقولي لا آنتي عصبيه انتي مش عارفه ايه يعني يعدوا يعيبوا فيا كدا بجد بتأثر ساعات بحس إني عايزه يبقي معايا حد فاهمني وعارفني المشكلة إني معرفش أقول الكلام ده كلو لحد ولا لصحابي ولا لأهلي معرفش عايزه حاجه أحس بيها اني أحسن ومبقاش حساسه واثق بنفسي وخلاص لو حد عارف اتمني يساعدني اتطور شخصيتي وثقتي بنفسي واحس نفسي اقوي ومعلش لو طولت عليكوا فالسؤال
فكك منهم وهقولك كلمه واحده بس قوليها اول ما تحسى انك هتفقدى الثقه بنفسك ف اى موقف اعتبر الناس إلى حواليكى طماطم
تم النشر الاثنين، ٨ يوليو ٢٠٢٤
يا حبيبتي، أولاً بحب أقولك إنك شجاعة جداً لأنك جيتي وشاركتي مشاعرك الصعبة دي. ده بداية الحل، وإقرارك بالمشكلة هو نص الطريق لحلها. مشاعرك الحساسة وقلة الثقة بالنفس ممكن تكون ناتجة عن مواقف وتجارب من حياتك زي ما ذكرتي، وخلي بالك إن ده طبيعي وممكن يحصل لأي حد، إنتي مش لوحدك. ثانياً، مهم تعرفي إن الثقة بالنفس مش حاجة بتجيلنا بشكل طبيعي، لازم نشتغل عليها ونعززها. تعالي نشوف شوية حاجات ممكن تساعدك: البداية من جواكي: حاولي تفكري في الحاجات اللي بتحبيها في نفسك. ركزي على إيجابياتك ولو كانت صغيرة. اكتبي كل يوم 3 حاجات حلوة حصلت في يومك أو حاجات عملتيها وكنتِ فخورة بيها. التواصل مع الناس: لما حد يقول حاجة تضايقك، حاولي تردي بهدوء وتقولي له إنك ماحبيتيش الكلام ده، وإنه أثر في مشاعرك. اتكلمي مع حد تثقي فيه، سواء كان صديقة مقربة أو حد من العيلة. مش لازم تحكي تفاصيل، بس حاولي تفضفضي. تعليم الردود المناسبة: أثناء المواقف الحساسة، فكري في الرد المناسب قبل ما تتكلمي. ممكن تكتبي ردود جاهزة وتراجعيها بينك وبين نفسك في أي وقت. العناية بالنفس: ابحثي عن نشاط أو هواية بتحبيها وقضي وقت معها. ده هيخليكي تحسي بالإنجاز والثقة. اعملي حاجات تخليكي تحسّي بالراحة زي الرياضة، القراءة، أو التأمل. طلب المساعدة المتخصصة: لو حسّيتي إن الموضوع أكبر من طاقتك، فكّري في التحدث مع مستشار أو متخصص في الصحة النفسية. ده مش عيب ولا غلط، بالعكس ده ممكن يكون الحل الأمثل لمشكلتك. وياريت كمان متنسيش إن كلنا بني آدمين وممكن نتعرض لانتقادات وضغوط، لكن المهم إننا نعرف إزاي نواجهها ونتعامل معها. إنتي قوية جدًا علشان جيتي هنا وكتبتي كل ده. وأكيد مع الوقت والجهد، هتحسي بفرق وتحسّي نفسك أحسن بكتير. لو فيه أي حاجة تانية عايزة تتكلمي فيها، أنا هنا دايمًا علشانك. 🌸
تم النشر الاثنين، ٨ يوليو ٢٠٢٤
السلام عليكم ورحمه الله اهلا بيكي الثقه بالنفس و توكيد الذات دي مهاره مهمه جدا لانها بتنفعك في حياتك الاجتماعيه، طول ما بتعرفي تتصرفين كويس في المواقف كل ما الحساسيه اللي عندك هتقل و لوم الذات يقل و لذلك انصحك بقراءه كتاب أنه من حقك يا أخي للدكتور عبدالستار إبراهيم هتلاقي نازل منه نسخ كتيره علي الانترنت pdf تقدري تنزليها و تعرفي معني توكيد الذات و تطبقيه في حياتك. بالتوفيق لك
تم النشر الثلاثاء، ٩ يوليو ٢٠٢٤
لعرض السؤال في فدني اضغط هنا