انا في تالتة ثانوي وفي يوم 22/10 واحد جه اتهجم عليا في البيت وضربني ٥ طعنات فرحت المستشفى اتحجزت ١٠ ايام وطلعت والحمد الله ربنا كرمني ورجعلي حقي واتحكم عليه ب ٣ سنين
وانا المفروض رجعت البيت يوم 1/11 انا من يوم 1/11 حتي يوم 16/2 انا مش بذاكر انا اتعودت على اني بقعد اتفرج علي ريلز و شورتس وسوشيال مديا بقى والمصيبة الأكبر اني ربنا يعافيني ويعافي كل مبتلى يا رب انا بمارس العاده السريه وبحاول ابطل بس بصراحه بقى لي فتره ما حاولتش
كان عندي صديق لي كان برده هو كمان بيعملها فاتفقنا مع بعض ان احنا نقوم ونسند بعض ونكتب بعض ونبطل مع بعض المهم احمد صديقي وصل ل 40 يوم تقريبا وعملها مره وقع فانا ساندته قلت له كلام ووقفت بضهره لحد هو ما تعافى تمام هو انا جيت بعد 10 ايام عملتها وما قدرتش اقول لحد ومن ساعتها وانا في دوامه ما انا حاولت وفشلت هحاول ليه ثاني
وكنت بقى لي فتره كبيره مش بصلي من اكثر من سنتين على العكس المتوقع انا كنت فاكر لما ارجع من المستشفى ان انا هنتظم في الصلاه وعكس اللي بيتقال بقى ان هو ان انت بعد بيحصل لك حاجه كبيره وازمه انت بتنتظم في الصلاه وكده
انا مش ده اللي حصل معايا بس انا بحاول ابطل وبحاول اصلي هو انا اصلا يعني عملت العاده السريه عشان والدي توفى يوم 19/6 وفي 2019 انا من ساعتها وانا كنت دخلت في مرحله اكتئاب وزعلان ما كانش في اي حاجه بتدخل لي مصدر سعاده او بتخلي الدوبامين فاتجهت ان انا اشرب قهوه
في بدايه الموضوع في اول شهر كانت بتفرز كميه دوبامين تخليني اقدر اشتغل بس بعد كده لا من خلال السوشيال ميديا او الفيديوهات والشيوخ اللي هم بيتكلموا على العاده السريه وكده فبحثت عن فيلم اباحي وعملتها وهو انا من وقتها في دوامه القهوه والعاده وانا مش عارف اعمل ايه
انا ولا عارف ابطل قهوه ولا عارف أوقف ممارسة العاده السريه طب والمشكله ان انا وصلت لمرحله ان انا والدتي كانت بتقول لي قوم صلي وانا كنت في معظم الاحيان مش بكون طاهر فكنت ان بمثل اني اصلي
انا مش عارف اعمل ايه دلوقتي انا مش عاجبني الوضع اللي انا عايش فيه ومش عارف اعمل ايه مش عارف هل ده الواقع ولا لا انا وصلت لمرحله انا مش عارف اهتماماتي انا مش عارف هو انا هو انا ده ولا دي الشخصيه اللي انا اخذتها من السوشيال ميديا ان انا بحب العربيات وبحب الدين
انا بحب كل حاجه طب هل لو ما كانش في سوشيال ميديا كنت هبقى كده الاجابه لا طبعا وانا وصلت لمرحله من من الزعل والحزن انا داخل على مرحله اكتئاب مش عارف انا حاسس ان انا طولت بس يا ريت تردوا بس يا ريت تردوا بالله عليك انا محتاج حد فعلا يتكلم معاه واهلي مش هيفهموني لو اتكلمت شكرا
السلام عليكم ورحمه الله وبركاته. الحقيقة اه فعلا لو مفيش سوشيال ميديا الوضع كان هيكون افضل بكثير بس خلينا نقول انه في حاجه اهم لو موجوده فهتقدر تغلب السوشيال ميديا ووجودها وتعودك عليها للاسف الحاجه دي هي الاحساس بالمسؤوليه وارادتك تجاه اي حاجه بتعطلك. الظروف اللي عدت كانت تقيله وكانت صعبه بس الحمد لله عدت، في اثناء الظروف دي احنا للاسف اتعودنا اتعودنا على روتين، الروتين ده الرتم بتاعه بطيء جدا جدا ويعني زي ما بنقول كده ان هو واخد مطه في الزمن لانه طبعا في اوقات انا قاعد فيها في المستشفى، يوم المستشفى اللي انا قاعد فيه في المستشفى طويل اليوم اللي انا قاعد فيه في البيت برضه في مرحله الاستشفاء طويل ما بقدرش اعمل حاجات كثير لاني مش بقدر اتحرك كثير وهكذا فده خلاني احس كانه كل اما احب اعمل حاجه فانا هستنى فتره طويله عقبال ما تتنفذ رجوعك للرسم بقى طبيعي بتاع الحياه،بيحتاج نقله زي كده يعني لما نيجي ننقل العربيه انت قلت ان انت بتحب العربيات. لو جاي انقل العربيه من من الغيار الاول للغيار الثاني اكيد مش بعمله مره واحده، بهيأ العربيه انه انا هنقل على الدرجه الثانيه ا.و الثالثه او الرابعه وهكذا ليه بعمل كده علشان خاطر ممكن يكون الموتور مش جاهز مع ان هو فجأه يطلع على درجه من السرعه اعلى احنا كمان كده احنا بنحتاج ان احنا نهيئ نفسنا ليه الوضع اللي هيكون اسرع شويه. اول حاجه محتاجين ان احنا نشوف انا دلوقتي بقدر اؤدي بانهي سرعه انا حاليا على انهي سرعه. هتعمل تقييم لنفسك انا هستحمل اقرب كم صفحه اقرأهم بس طيب قبل ما احس ان انا اتخنقت ومش قادر او اني همسك الموبايل هشوف كمان برده انا هقدر افهم محتوى قد ايه يعني يا دوبك مسطرين افهمهم مش هقرأهم هفهمهم وهيدخلوا دماغي فعلا ولا ثلاث اسطر ولا اربعه ولا خمسه قبل ما ابدأ افقد تركيزي او قبل ما اخد بعضي واروح اشتت التركيزي نوتيفيكيشن جه على الموبايل او افتح السوشيال ميديا كده بشكل تلقائي واقلب في اي حاجه وخلاص كالعاده هقيم انا دلوقتي سرعتي كم عشان اقدر اعرف انا محتاج اهيأ نفس ازاي عشان انقل على السرعه الثانيه.
تم النشر الأربعاء، ١٩ فبراير ٢٠٢٥
ماشاء الله النصايح كلها جميله وصح جدا وبإذن الله تقدر تعملها.انا هقولك ع حاجه كده هتفيدك ف الوقت ده. وهو انك تدور ع حد يدخل معاك الصوره. لان طول ما الدايره مقفوله عليك اليوم هيعيد نفسه. انت تدور ع حد تذاكر معاه بره الييت. لو مستواك المادي يساعد يبقى ده مدرس اصلا يبقى حلو جدا. انت اول ماهتنتظم ف المذاكره هتحس بالإنجاز. شعورك بالتوتر والخزي وكرهك لنفسك هيقل. هتلاقيك معظم الوقت بره اصلا. مع حد بتتكلم معاه في مذاكرتك هتصلي ف جامع هتلاقيها ظبطت. وتشيل من دماغك انا لازم أبطل والتزم. بمعنى انك اما هتعدل الcore اللي عاملك توتر اصلا الفتره دي باقي الدايره هتتفك بسهوله من غير ضغط وإجبار يخليك تقع زياده. وفي النص فرح نفسك بأي حاجه بتحبها الضغط الزياده هيقلل معدل تركيزك. والله يرحم بابا ويغفر له ويسكنه فسيح جناته.شعور فقد الاهل صعب وبيحتاج فتره عشان ندركه ده مش شعور هين. فاسمح لنفسك تزعل عادي بس ازعل وانت بتصلي وتدعيله هيبقي اهون كتير. والف سلامه عليك ع الإصابه والحمدلله انها عدت ع خير. مش كل الناس بتخرج من أزمات بتروح لربنا وتستمر. ادعي ربنا يوفقك لطريقه بالطرق الحلوه والهينه. والناس اللي بتلزم بعد ازمه بتستغل احساس وجود ربنا معاها.انت لسه صغير ومحتاج تفهم وتتعامل شويه ماتحكمش على نفسك. بإذن الله ازمه وتعدي وقرب لربنا اشتكيله. وبلاش حوار انا هبدأ اليوم من أوله ولازم أصليه كله او من بكره. ملحقتش ضهر اجيب عصر ماتسيبش اليوم يعدي منك لان اي صلاه هتجيبها هتعمل جواك زاويه حلوه ماتستهنش بيها❤️
تم النشر الخميس، ٢٠ فبراير ٢٠٢٥
الصحبة الصالحة بتفرق كتير جدا وهيعلموك حاجات كتير كويسة وانت نفسك هتبقا كويس وقادرين يغيروك للأحسن وحفظ القرآن في المسجد بيغير النفس من الضلال للنور الرباني الي خلق كل حاجة والي مفيش حاجة بتحصل إلا بمشيئته والي اصلا هوه خلقك على تعبده هو احسن رأي هو احسن طريق تمشي وراه مفيش احسن من طريقته وافضل حاجة تتبعها في حياتك تنام ازاي تعيش ازاي تتعامل ازاي تتبسط ازاي او تسعد نفسك ازاي هو القرآن هيعرفك الصح من الغلط... انزل صلي الصلوات جماعة في المسجد الصلاة الجماعة هتشجعك على الصلاة وفيها التزام عكس الصلاة في البيت فيها كسل وبخصوص الشهوة استر على نفسك انت وصديقك و ابعد عن الفتن انت عارف ان البصة الفولانية هتفتنك او حتى لو ممكن تفتنك ابعد برضوا امال ليه الشرع بيأمرنا بغض البصر عشان متتفتنش والشهوة تسوقك وانت مش حاسس غض بصرك من اول نظرة وابعد تمام البعد لو ظهر لك مثلا فيديو فيه نساء اخرج من التطبيق اصلا اكاد اقولك اقفل الموبايل لانك لو كملت الشهوة هتزيد وهتقع تحت خالص ومش هتعرف تقاوم صعب انت عارف مثلا ان اليوتيوب او المواقع فيها حاجات انت تخاف تتفتن بسببها ابعد عنها... فيه اختلاط في مكان ما خلاص ابعد عن المكان ده لأن انت تغشى على نفسك الفتنة والأغلب لو انت حاطط نفسك في مكان فيه فتنة زي اختلاط او نساء او مخافات مواقع غيره هتقع فيها الأن الأنسان ضعيف وبيحب الحاجات دي اصلا فمتقربش اصلا وجدد التوبة دايما مهما كان ومهما وقعت ولا يأسك الشيطان ابدا من نفسك فالهداية بيد الله بيد الرحمن الرحيم هوه ارحم من أمك وأبيك هوه القادر على أي شيء ولو انعدمت الظروف بدون ان تحتسب يكون الأمر والله تعالى يريد أن يتوب عليك وهوه أعلم بضعفك ألا يعلم من خلق وهو اللطيف الخبير بحقايق الأمور
تم النشر الأربعاء، ١٩ فبراير ٢٠٢٥
اما بخصوص العاده شد حيلك وسجل في معسكر واعي الرمضاني هيبداء من 1 رمضان بس مش معناه ان انتا تقوم خاربها بال 10 ايام الفاضلين انتا تبداء من دلوقتي تبطل تدريجيا لحد اول يوم رمضان عشان اول يوم معسكر تقوم مبطل ل اخر يوم رمضان
تم النشر الأربعاء، ١٩ فبراير ٢٠٢٥
عادي 😉
تم النشر الأربعاء، ١٩ فبراير ٢٠٢٥
حاول تنظم وقتك في المذاكره علس حسب الصلوات بمعني انك لو صليت الضهر يبقي في الفتره بين الضهر و العصر تذاكر ماده و كذلك مع كل الصلوات و تكون فتره زمنيه بسيطه يعني مثلا ربع ساعه نص ساعه و بريك كده هتنتج اكتر و ان شاء الله ربنا هيكرمك و حاول. تقفل السوشيال ميديا او تدي فونك لحد انت واثق فيه حد من العيله يعني لحد ما تخلص تاخده تاني
تم النشر الأربعاء، ١٩ فبراير ٢٠٢٥
رابط قناتهم على التليجرام https://t.me/Aware_Bootcamp
تم النشر الأربعاء، ١٩ فبراير ٢٠٢٥
ازي ادخل معسكر واعي الرمضاني
تم النشر الأربعاء، ١٩ فبراير ٢٠٢٥
بخصوص الدراسه انتا لازم تجبر نفسك انه تدرس طول يومك عشان تلحق تجيب معدل كويس وصدقني لما اقول طول يومك انا قاصدها حرفيا بس تخلي وقت قليل للراحه والصلاه وكده
تم النشر الأربعاء، ١٩ فبراير ٢٠٢٥
بص كده انا ولو ان مشكلتي اكبر من مشكلتك اصلا بس من وجهه نظري ان انتا لازم ترتب مشاكلك اول حاجه لازم تلحق تذاكر قبل ماتضيع وقت اكتر تاني حاجه انتا لازم تبطل العاده
تم النشر الأربعاء، ١٩ فبراير ٢٠٢٥
لعرض السؤال في فدني اضغط هنا