السلام عليكم .. انا معرفش انت حصلك ايه خلاكي تتغيري كده بس اي كان السبب الحل واحد ، و هو انك تاخدي هُدنه من كل حاجه .. من الحاجات اللي انا عرفتها مؤخرًا و ريحتني جدًا ان احنا عندنا مفهوم غلط مترسخ في عقولنا و هو ان لازم كل ايامنا تبقي ماشية عال عال و الاحداث سلسه و جميلة و الحقيقة هي عمرها ما كانت ماشيه كده ابدًا ، احنا ساعات بنبقي يوم طاقتنا 100% و ايام تانيه بتبقي طاقتنا 70% و ايام تانيه بتبقي 5% ساعات بنحس ان احنا عايزين نشيل الدنيا فوق كتفنا و نعمل اللي كل اللي نفسنا فيه و نبدأ نحقق احلامنا و ساعات تانيه بنقوم من النوم مش قادرين نحرك جفن عنينا من كتر التعب ( وانا هنا مش بكلم عن التعب الجسدي ) اللي انا عايز اقوله ان انتي ببساطه خالص محتاجه ترتاحي شويه ، تبعدي عن الناس حبه ، تعملي حاجه بتحبيها عشان ترجع لك شغفك تاني و تبقي مُتقبله الشعور بالحزن او الخنقه حتي لو كانت بدون سبب ، و هنا انا اقصد انك تعرفي انك بني ادمه و من حقك تزعلي لكن متخليش الشعور بالخنقه يسحلك و يودي دماغك لـ افكار سلبيه سواء عن مواقف في الماضي او التفكير في المستقبل .. يعني متقاوميش الزعل بس في نفس الوقت متتماديش معاه و تخليه يكبرلك كل تفصيله سلبيه و طبعًا القرب من ربنا ده الاهم .. لو انت مسلمه فـ متفوتيش قيام الليل ، صلي قيام ليل و ادعي .. ادعي باللي انت حاسه بيه ، طلعي اللي جوا قلبك لربنا والله ما هتندمي .. قيام الليل ياما عمل معجزات ده زائد بردو الكتابه علي الورق او حتي في الشات بينك و بين نفسك علي التليفون حتي ، ساعات مبنقدرش نقول كل اللي جوانا .. بس بعد لما تكتبي اللي جواكي حتي لو انت شايفاه عبثي جدًا .. هتحسي بعدها كأن صخره و اتشالت من علي قلبك ده بالاضافه كمان ان هي بتخلينا نكتشف حاجات جديده في نفسنا سواء حلوه او وحشه ، و الوحش منها بنقدر نلاقيله حل بسهوله بإذن الله بعد الكتابه بس يعني يارب اكون قدرت اساعدك ، ربنا يريح بالك . ❤️
وعليكم السلام، مازن أحمد. تعليقي على إجابتك هو أنك قدمت نصائح قيّمة وعميقة. من المهم جدًا أن ندرك أن مشاعر الحزن والقلق قد تزداد من وقت لآخر، وهذا أمر طبيعي. أشدد على أهمية ما ذكرته بشأن أخذ استراحة من الضغوطات ومن الناس أحيانًا، فهذا يمكن أن يساعد في تجديد الطاقة النفسية والعاطفية. شكرًا لك على تلك الأفكار الإيجابية، وأسأل الله أن يجلب الفرح والسكينة لكل من يعاني من مثل هذه المشاعر. ❤️
تم النشر الأربعاء، ١٩ مارس ٢٠٢٥
لعرض الإجابة في فدني اضغط هنا