السلام عليكم .. أنا ام وعند بنتي ٣ سنين ونص جبت ليها مدرسه تأسيس البيت وكانت كويسه بس قعدع معاها نص شهر وبعد كده المس لغت كل دورس البرايفت لظروف عندها واضطريت ادور انا وصاحبه ليا (عندها بنت برضو ونفس المس دي كانت بتروحلها ) علي مدرسه تانيه نزلت اعلان عالفيس فردت عليه مس قريبه من منطقتنا وانا بتدي وكده قولتها تمام واتفقنا وجات وبصراحه اتحسنت معاها وابتدت تمسك القلم وتكتب الحروف بس كان اسلوبها فيه غشم شويه وبنتي بتخاف منها ومش بتحبها بس انا كنت شايفه انها شغاله كويسه معاها واقتربت منها علي المستوي الشخصي وبقينا بعد الحصه بنتكلم عن حياتنا ومشاكلنا وكنت بحكليها حاجات كتير بتضايقني من اهل جوزي بس من غير ما اغلط فيهم والله لحد ما بنتي وصلت لمرحله أنها كل متشوفها جايه تفضل تعيط لحد ما جوزي طلب مني امشيها عشان البنت متتعقدش ومكنتش عارفه اجبلها ازاي خصوصا اننا بقينا اصحاب لحد ما ف يوم بنتي فضلت تعيط رافضه تجاوب معاها قامت شخطه فيها وبتضربها زق كده قولتها بلاش عنف مع البنت .. البنت بتخاف منك وباباها مبقاش حابب الوضع ده ..كلامي ضايقها وقعدت تغلط ف بنتي وتقولي بينتك مش مفروض تتعامل الا كده ده محدش طايقها ولا جي غير محدش هيطيقها اضايقت من كلامها جدا وقولتها تمام هنكتفي كده مع بنتي وباقي فلوس الشهر مش محتاجها عادي ومشيت لاقتها بتبعت ف رسايل تهيني فيها وتغلط فيا وفي باباها واننا مقصرين مع بنتنا واننا خسرنا قيمه كبيره اوي زيها واننا مهما دورنا مش هنلاقي زيها وكلام ردح كده قولتها مصدومه فيكي والله انا ازاي كنت سايبه بنتي بين ايد وحده بالاسلوب ده .. وعملت ليها بلوك وتاني يوم كنت صايمه وعامله افكر في الحوار اللي حصل وقررت افك البلوك ابعت ليها رساله نتصافي فيها برضو احنا اكلنا مع بعض عيش وملح لكن بعد ما عملت كده استنكرت اني اعتذرلها وخصوصا اني شايفه اني مغلطتش قيها فحذفت الرسايل من قبل ما تقرءها لاقيتها بعد ما شافت البلوك اتفك دخلت تغلط وتستفزني تاني وانا رديت بزعيق معاها انها بتتنطط عليه ايه كفايه اسلوبها الفظ مع الطلبه وهكذا لاقينها بتهددني أنها هتروح لاهل جوزي تحكيلي عن المشاكل اللي انا حكتلها اللي بينا عشان تنغص عليا عيشتي بصراحه خوفت حبه حياتي تبقي مستقره كده مش عايزه مشاكل وانهم يقولي بتتكلمي علي حياتنا مع الغريب فروحت لمامتها البيت اخكليها علي اللي حصل واعاتبهم لاقيت بيتهم مش شبنا ابدا وناس مستواهم متدني وبتوع مشاكل وبيشربو سجاير ومخدرات ومامتها اسلوبها كان فظ وانا دكتوره وليا قيمتي حسيت اني رخصت نفسي اوي بمرواحي عندهم ومعرفتش اخد حقي منهم والكلام بقي كتير ويتنقل من هنا لهنا لخد ما وصل لجوزي واتخانقنا لدرجه انه لاول مره يهيني ويمد ايده ليا بسبب اللي حصل ده وحياتي اتعكننت عالاخر .. وفضلت ادعي عليها حتي وانا صايمه .. وفوجئت بصدفه وانا بدخل اكونتها من حساب جوزي ..لاقتها منزله بوستات انها تعبت من غدر البشر وظلمهم وبتدعي عليهم ومامتها بتقولها ف الكومنتات فوضي امرك لربنا وهو هيخلص حقك ...انا من ساعتها خايفه اكون انا اللي غلطانه وانا السبب وان في حد بيدعي عليا عشان شايف ان ظلمته ..انتو رايكم ايه واسفه عالاطاله بس حبيت اشرح الموضوع كامل لانه تعبني نفسيا وقلقني جدا
شكرا لحضرتك علي المشاركة تخيلي حد من اصحابك بيحكيلك اللي حصل ده ممكن تقوليله ايه ؟ هل انتي شايفه انك اخدتي حق من حقوقها ؟ انتي ايه اكتر حاجة مزعلاكي فالموضوع ككل ؟ ايه الحاجة اللي لو حصلت ممكن تحسي براحة من الموضوع ده ؟
تم النشر السبت، ٢٧ يناير ٢٠٢٤
اولا بالنسبة لموضوع بنتك حوار وخلص بالنسبالك انتى المفروض اول حاجة تعمليها تحاولي على قدر الإمكان انك تحلى مشاكلك مع جوزك ولازم يكون متفهم علشان يوقف معاكى فى الموضوع ده ،علشان هى حاسة جناحك مكسور فأنتى لازم تثبتيلها العكس ، وانتى مظلمتيش حد هى اسلوبها اللى وصلها لكدا وكانت هتسبب عقدة كبيرة مع البنت قال تعالى(وَلَوْ كُنْتَ فَظًّا غَلِيظَ الْقَلْبِ لَانْفَضُّوا مِنْ حَوْلِكَ)
تم النشر السبت، ٢٧ يناير ٢٠٢٤
طيب مبدأيا كده حضرتك واصح انك طيبة وبتتصرفي بحسن نية ولكن مفيش حد مش بيغلط والعاقل هو ال يتعلم من اخطاؤه مش يتجاهلها ويكررها تاني حضرتك غلطتي اول مرة خالص لما فضلتي مستوى بنتك التعليمي على شعورها وراحتها النفسيه ومشاعرها ناحية المعلمه رغم ان نت ٣ سنين ونص يعني مش مستقبلها هيضيع بكرة لو تاخرنا شويه وقت نجرب معلمه جديدة فدي نقطه خلي بالك منها ----- التعليم براحة نفسيه افضل وبيثبت في الذهن اكتر من التعلم بضغط نفسي وعصبي ثاني غلطة وهي الاهم والاكبر وال سببت مشاكل كتير بعدها انك حكيتي معاها عن مشاكلك مع اهل زوجك وده اكبر درس تتعلميه مشاكلك الشخصيه مع زوجك واهله متخرجش برة بيتك ابدا الا لشخص ناصح او امين وتكوني اختبرتي الشخص ده اكتر من مرة في كءا موقف وتاكدتي من نصحه وامانته والمشاكل متخرجش من باب الفضفضه تخرج في الضرورة فقط في حالة الحاجه الى نصيحه او استشارة وانك مش عارفه تتصرفي ازاي غير كده لا وفي اي حاجه هتامني حد فيها على سر فكري مليون مرة ان كلام ده لو اتقال باي شكل هيكون ضرره عامل ازاي فبلاش يتقال لشخص مش هيهتم به من الاول ثالث خطا انك اثبتي لها ان نقلها لاسرارك نقطة ضعف عندك بذهابك اليها في بيتها وده مكنش المفروض يحصل حتى لو هي هددتك باي شئ انت لو على كلامك ال حكيتيه مش شايفه انك ظلمتيها في حاجه انت ولا اكلتييها فلوسها ولا شهرتي بيها وباهلها ولا اي شئ فبالتالي مهما كتبت ومهما عملت طالما متاكده انك لم تؤذيها ولم تظلميها يبقى متقلقيش من اي شئ ربنا عليم ومطلع على كل شئ بس بلاش تكرري اخطائك تاني
تم النشر السبت، ٢٧ يناير ٢٠٢٤
• أولًا - البنت عُمرها 3 سنوات ، ومن الجيد أنكِ مُهتمة بها وتبحثين عن تأسيسها وقد بدأتي معها في العُمر المُناسب ، ولكن من الضروري أن تكون المُعلمة التي تتعامل مع ابنتك تتسم بالأخلاق والهدوء والرحمة والصبر حتى لا تكره ابنتك التعليم بشكل مُجمل. ثانيًا - ستجدي مُعلمات كثيرات أفضل منها ، هذا ليس أمر صعب ، بل بالعكس مازال هُناك معلمات لديهن ضمير ومُتميزات في عملهنّ ، ولكن عليكِ أن تحرصي أن تعمل مع ابنتك مُعلمة مُتخصصة تربوية ومُثقفة ، وليست أي مُعلمة خريجة أي معهد تعمل مع الأطفال في مثل هذا العُمر وغيره ، وبالمُناسبة أين منطقة سكنك ، يُمكنني أن أرشح لكِ مركز أنا شخصيًا أعمل بهِ ، وأضمن لكِ أن تسعدي بالنتائج. ثالثًا - اعتذري لزوجك وأغلقي صفحة هذا السيدة من حياتك ، وأنتِ لم تظلميها نهائيًا بل على العكس وإنما هي تخوض معكِ حرب نفسية فقط ، لمعرفتها بحُسن خُلقك وطيبتك.
تم النشر السبت، ٢٧ يناير ٢٠٢٤
انتي مش غلطانة هي مكنش ينفع تكمل مع بنتك لكن غلطك في انك سلمتليها رقبتك في موضوع عيلة جوزك وكدا والحل تلغيها خالص من حياتك ومتخليهاش تستفزك والزمي السكوت ولو هددتك متخافيش وواجهي وقولي اعملي اللي تعمليه هي جبانة لو قادرة بصحيح كانت راحت وقالت
تم النشر السبت، ٢٧ يناير ٢٠٢٤
من كلام حضرتك مش شايفه انك غلطانه ،،وفي مدرسات كتير أفاضل الحمدلله ،،نصيحه لو بنتوتك مش مرتاحه مع مدرسه متضغطيش عليها ،علشان الطفل طول ماهو مش مرتاح مش بيستقبل معلومات كويس،،نصيحه تاني اوعي تحكي لحد عن حياتك ابداً ،،غير لحد متخصص
تم النشر السبت، ٢٧ يناير ٢٠٢٤
• أنتِ طيبة جدًا ، كم عُمرك ؟
تم النشر السبت، ٢٧ يناير ٢٠٢٤
مهو طبيعي محدش بيشوف نفسه وحش ولا غلط حولى تبعدى عن اى تواصل بيها وتحلى مشكلك مع جوزك
تم النشر السبت، ٢٧ يناير ٢٠٢٤
لعرض السؤال في فدني اضغط هنا