السلام عليكم
انا طالبه في تانيه ثانوي وحرفيا مش لاقيه وقت اذاكر فيه لان مدرستي مسائي فباخد دروس الصبح وبعد المدرسه فبرجع بجد مش قادره اذاكر وببقى هموت وانام وطول الوقت حاسه الإرهاق المستمر.
بقالي اكتر من يومين بدخل انام من الساعه ٩ فصحيت اول امبارح الساعه ٣ بليل علشان اذاكر وكدا بس بحس بالتشتت والنعاس الدائم وكمان الوقت بيضيع بسرعه خالص وامبارح نمت ٩ بليل وصحيت النهارده ١١ ماروحتش درس الانجلش بسبب ان عايزه انام فصحيت من النوم على المدرسه فلما رجعت ارتحت شويه وحاسه ان مش قابله المذاكره خالص وحاسه ان عايزه انام.
مع العلم ان جربت اذاكر الفجر كتير بس بقيت حاسه ان عايزه انام مع ان في أولى ثانوي دايما كنت بذاكر الفجر مش عارفه السنه دي مش قابله حاجه خالص ومحتاجه انام مع العلم ان باخد ادويه للإرهاق ومنع الاكتئاب لان كنت دخلت فتره في اكتئاب الفتره دي كانت كبيره خالص لسه بقيت كويسه الحمد الله بقالي اسبوع بس دخلت في الأسبوع دا المدرسه وحسيت ان كل حاجه تراكمت عليا كتير اوي لدرجه ان لسه مخلصه محاضرات الاسبوع اللي فات امبارح.
والله عايزه اذاكر وبحاول ان اذاكر بس مش عارفه وخايفه خالص والفيزيا مأخدتش فيها غير درس واحد وحاسه ان السنه دي مقصره خالص بس مش بإيدي والله مع ان بصلي الحمد لله بس والله مش عارفه اعمل اي وانا لوحدي والسنه دي حرفيا اكتر سنه جيت على نفسي فيها في أولى ثانوي الترم التاني جات نفس الفتره دي بس كنت بقول لا هذاكر وكنت بالفعل بسيطر على نفسي وبعرف اذاكر لكن تانيه ثانوي من الاجازه وانا مكتئبه بطريقه وحشه خالص.
حاولت اطلع منها وبالفعل طلعت منها الحمد لله بس لسه واقفه في مكاني مش بتحرك وكل حاجه حاسه انها بايظه معايا محتاجه حد يقولي اذاكر ازاي ولا اعمل إيه وابدأ منين والله مش قادره خالص وبقيت بحس بالعجز كنت بحفز نفسي دايما في أولى ثانوي لكن دلوقتي مفيش حاجه بقت بتفرق معايا ودايما بقول مش مهم وبستسلم من أقل حاجه مع ان والله مش بإيدي خالص انا كنت دخلت فتره كنت بذاكر فيها وانا بعيط والله.
ياريت تدعوا لي اعتبروني اختكم الصغيره واي حد والنبي لو شاف الأسك دا يرد عليا ضروري لعل وعسي تفيدوني وجزاكم الله كل خير بحبكم في الله
___ڪان في حد لطيف قبل ڪده قال إنه إذا الإنسان حس إن يومه عدى من غير إنجاز لأي سبب وبدأ يشعر بالإحباط ، ممڪن يذڪر الله، لأن الذڪر ممڪن يغفر ذنب، يڪتب حسنة، يرفع درجة، يبني بيت أو يزرع نخلة في الجنة، يڪون عدل تحرير رقبة، يعتق من النار، وڪل دي إنجازات جميلة، والأجمل إن ربنا بيذڪره "فاذڪروني أذڪرڪم" ❤""".جـاهـدي واسـعى لهـدفك في الحـياه بكل جـديه ، حـتي لـو كانت خـطواتك بطـيئه وصـعبه ، ومـتهـتميش للـنتيجه ، عـشان الـنتـيجه دي اخـتص بيـها رب الـخير ، وطـالما انتِ سعـيتُ وحـاولتِ الوصول، ربنـا هيـجيبلك كل الـخير وهيكرمك وهيفتح ليك كل الطرق ، حـتى اللي انـتِ عـمرك مـا اتوقعـتيها🤎
تم النشر الاثنين، ٣٠ سبتمبر ٢٠٢٤
وعليكم السلام ورحمة الله وبركاته، أولًا انتي محتاجة تهدي خالص لأن كل مشكلة لها حل بإذن الله وتوترك وقلقك مش هيفيدك وهيمنعك تاخدي الخطوات الصح للخروج من المشكلة. قلقك من ضيق الوقت وعدم استطاعتك المذاكرة وكل التوتر ده أكيد بينعكس على جودة نومك وبالتالي لما بتحاولي تصحي الفجر عشان تذاكري أو لما بتصحي عمومًا بتكوني حاسة بنعاس وعاوزة تكملي نوم. فيه كم نصيحة هقولهم لك وإن شاء الله تقدري تستفيدي منهم: أولهم وأهمهم الاستعانة بالله، تأكدي إن مفيش شيء صعب أبدًا طالما بتطلبي العون من ربنا، صلي وواظبي على الصلاة وحاولي يكون فيه خشوع قدر الإمكان وادعي ربنا يقويكِ ويعينكِ ويجعل الصعب سهلًا بإذن الله. التزمي ذكر (لا حول ولا قوة إلا بالله) ردديه على قد ما تقدري وردديه دايمًا بيقين واستحضار لمعناه وكمان أذكار الصباح والمساء، وجربي تلتزمي قبل النوم بالذكر اللي الرسول عليه الصلاة والسلام أخبره لابنته فاطمة رضي الله عنها لما طلبت خادم يعينها، والذكر ده بإذن الله هيعطيك قوة وطاقة تنجزي اللي وراكِ... قبل النوم تقولي سبحان الله 33 مرة والحمد لله 33 مرة والله أكبر 34 مرة. ثانيًا، زي ما قلت الهدوء والبعد عن التوتر. ممكن مع مشروب هادئ كده وجلسة خلوة مع نفسك تبدأي تفرغي كل أفكارك ومشاكلك على الورق لحد ما تهدي تمامًا وتبدأي ترتبي الأفكار دي. احسبي الوقت ما بين الدروس واحسبي الوقت اللي بتاخديه في طريقك للدرس أو المدرسة وأي وقت تاني فاضي وكمان احسبي الوقت اللي ممكن مللك وتوترك بيدفعك إنك تفتحي الموبايل والسوشيال ميديا خلاله. حسابك للوقت ومراقبتك له هيعطيكِ فكرة عن طريقة استخدامه وهل فيه فعلا وقت كان ممكن تستغليه بطريقة ما لكن أضعتِه. اعتبري الوقت اللي بتقضيه في الدرس والمدرسة ده وقت مذاكرة، بمعنى إنك تكوني في قمة تركيزك وقت الشرح وتسجلي المعلومات، اللي هيفيدك أكتر إنك تحاولي تقرأي الدرس قبل الشرح بحيث يكون عندك خلفية عنه ومحضرة له ولما المدرس يشرحه هتعتبر مراجعة وزيادة تأكيد لمعلوماتك وتوضيح للي مقدرتيش تفهميه المرة الأولى. ممكن لو بتروح مواصلات تقرأي الدرس أو الملاحظات اللي أخدتيها، ممكن تستغليه في سماع شرح على اليوتيوب مثلًا. ومهم جدًا تعرفي إن الخطوات الصغيرة بتفرق جدًا والدقائق اللي بتجمعيها خلال اليوم لو عرفتِ إزاي تستغليها بطريقة ذكية هتفرق كتير ومع مرور الوقت هتلاقيكِ بإذن الله مشيتِ خطوات كتيرة في المذاكرة. اهتمي بالمراجعة المتقطعة على فترات حتى لو المراجعة عبارة عن قراءة فقط للدرس والملاحظات اللي سجلتِها، التكرار بيثبت المعلومة ووقت الامتحان بإذن الله تقدري تسترجعيها اهتمي بجودة نومك واتفقي مع أهلك ميكونش فيه أي إزعاج وقت نومك وتكوني قبلها شاربة مشروبات مهدئة للأعصاب زي النعناع والبابونج. انتي كل اللي محتاجاه تهدي وترتبي أفكارك وتستعيني بالله وتبدأي حتى لو خطوات صغيرة هتفرق كتير بإذن الله. بالتوفيق.
تم النشر الاثنين، ٣٠ سبتمبر ٢٠٢٤
بصي انا زيك برده ومسائي المدرسه بتروحيها الساعه 2:00 كده فانت اصحي الساعه 9:00 او 8:00 او 7:00 على حسب ما تقدري بس حاولي تصحي بدري تصلي تقراي قران تبداي مذاكره لحد ميعاد المدرسه وتخلصي دروس والمدرسه وتيجي تنامي وتعيدي نفس الحوار تاني بس اهم حاجه الصلاه والقران صدقيني هيفرق معاكي لان انا زيك وبذاكر قبل ما اروح المدرسه بوقت طويل والدنيا تبقى بتظبط معايا
تم النشر الثلاثاء، ١ أكتوبر ٢٠٢٤
واظبي علي صلاة في اوقاتها واذكار تعالي نامي ساعتين بعد دروس ومدرس واشرب كوباية قهوة صغيرة وابدا وتوكلس علي الله وحاولي تركزي ابعدي عن مشتات زي موبايل وسوشايل ميديا ركزي تلت او اربع ساعات حسب استيعابك وخلصي مثلا فبل الفجر ونامي شوية دول اللي بين دروس
تم النشر الاثنين، ٣٠ سبتمبر ٢٠٢٤
وعليكم السلام ورحمة الله وبركاته، أختي العزيزة، أنا هنا لأستمع إليك وأساعدك بما أستطيع. أقدر تمامًا الضغط والتحديات التي تواجهينها، وأفهم مشاعرك من الإرهاق والاكتئاب. أولاً، من المهم أن تحافظي على صحتك النفسية والبدنية، وهذا أمر أساسي في فترة المذاكرة والدراسة. إليك بعض النصائح التي قد تساعدك في تجاوز هذه الفترة الصعبة: تنظيم الوقت : حاولي وضع جدول زمني يحتوي على فترات محددة للمذاكرة والراحة. خذي فترات قصيرة من الراحة بين فترات الدراسة لتحسين تركيزك. إذا كانت لديك مشاعر بالإرهاق، فربما تحتاجين إلى تقليل عدد الساعات الدراسية خلال اليوم. التوازن : حاولي تحقيق توازن بين الدراسة والراحة. يمكنك تحديد أوقات لتخصيصها لممارسة هواياتك أو الأنشطة التي تستمتعين بها، فهذا سيساعدك على تجديد نشاطك. التغذية والنوم : تأكدي من تناول وجبات غذائية متوازنة والحصول على قسط كافٍ من النوم يساعد على تحسين مستوى الطاقة لديك. من المهم أن تكوني مقادرة جسديًا على مواجهة التحديات الدراسية. التواصل : لا تترددي في التحدث مع معلميكي أو مستشاري المدرسة حول وضعك؛ قد يكون لديهم بعض النصائح أو التوجيهات التي تناسب حالتك الخاصة. الدعم النفسي : إذا كنت تشعرين بأن الأدوية التي تتناولينها لا تكفي، من الأفضل أن تستشيري طبيبك أو مختصًا نفسيًا. الدعم النفسي قد يكون مفيدًا جدًا في تقدمك. التأكيد على الإيجابية : حاولي التفكير في الإنجازات الصغيرة التي تحققينها، بدلاً من التركيز على الأمور التي لم تنجزيها بعد. كل خطوة صغيرة تعتبر تقدمًا. تذكري، أنك لست وحدك في هذه الرحلة، والكثير من الطلاب يواجهون تحديات مماثلة. كوني لطيفة مع نفسك وامنحي نفسك الفرصة لتتقدمي في الوقت الذي تحتاجينه. أسأل الله أن يوفقك ويساعدك على تحسين وضعك. أنت محط اهتمام ودعاء لي ولكل الطالبات الأخريات. إذا احتجت إلى المزيد من المساعدة، فلا تترددي في طرح المزيد من الأسئلة.
تم النشر الاثنين، ٣٠ سبتمبر ٢٠٢٤
ابعد عن صحابك اولا متخليش اي حاجه تدمر نفسيتك
تم النشر الأربعاء، ٢ أكتوبر ٢٠٢٤
الشعور دا طبيعي عشان مش عارفه توفر وقت وفعلا إرهاق جامد بس قبل متكلم مع حضرتك ع الجدول والنظام اللي انت فيه دا بسبب الاكتئاب. اي اللي حصل مخليك مكتئب كدا
تم النشر الاثنين، ٣٠ سبتمبر ٢٠٢٤
ولو من ناحيه الصحاب والأهل ف انا بحاول ان أتخطي هي صعبه بجد بس بنحاول
تم النشر الاثنين، ١٤ أكتوبر ٢٠٢٤
هو ايوا في تراكم بردو بس مش زي الاول
تم النشر الاثنين، ١٤ أكتوبر ٢٠٢٤
حاسه ان الامور بدأ تتحسن معايا حرفيا عن الاول والحمدالله يعني
تم النشر الاثنين، ١٤ أكتوبر ٢٠٢٤
للاسف عندي نفس المشكلة
تم النشر الاثنين، ١٤ أكتوبر ٢٠٢٤
حصل معايا مشاكل كتيير منهم مشاكل الصحاب والأهل ف أصبحت نفسيتي مدمره خالص ومنهم ان انا مستوايا قل خالص ف دا كل اللي حصل
تم النشر الثلاثاء، ١ أكتوبر ٢٠٢٤
لعرض السؤال في فدني اضغط هنا