سمعت قبل كده من كام شخص سؤال لحد الآن مش عارفة اجاوب عليه و السؤال ده هو لو قابلت نفسي هحبها و لا لا و انا قولت لا في عقلي بس مش عارفة ليه لا؟ مش فاهمه ايه الشيء الي يخليني محبش نفسي و عقلي بيقولي ان عشان الي حواليا مش بيحبوني و عشان معنديش صحاب بس برضو مش فاهمة ليه يعني عشان شخص معندوش صحاب و مفيش ناس كتير بتحبه يبقى هو شخص وحش؟
و لما حاولت اعرف انا ليه معنديش صحاب قريبين بالرغم من اني طيبة مع الناس و مش بصدهم لقيت انه ممكن يكون بسبب اني شاطرة في الدراسة...
عشان لاحظت او حسيت ان زمايلي بيغيروا مني و رغم اني بعاملهم كويس لكن برضو بحس انهم مش طايقيني او مش عاوزين يقربوا مني
مش فاهمه بصراحه ليه ممكن شخص يكره حد عشان بس اشطر منه في حاجه معينه
مازلت مش فاهمه هم ليه مش طايقيني رغم اني بتعامل معاهم كويس و مش متكبرة و لما حد بيطلب مساعدتي في حاجة بساعده
انا عارفة اني مش ملاك نازل من السماء بس انا قصدي اني معملتلهمش حاجه وحشة عشان يكرهوني و ممكن اكون انا الي بفكر زيادة و بحس كده و ده غلط و هم مش بيكرهوني و لا حاجه بس في كل مرة بتعامل معاهم بحس كده
و مش عارفة اعمل ايه بصراحه يعني انا حاولت كتير جدا اني اكون صداقات و سبحان الله في كل مرة لازم افشل في الموضوع ده و ابعد عن الشخص خالص او يبقى تعاملنا مع بعض سطحي و بجد حاولت كتير ادور في نفسي على الصفات السلبية الي عندي الي بتخليهم يبعدوا عني و غيرت الصفات دي بس برضو نفس الوضع و ده من و انا طفلة حرفيا لحد الآن
و مش لاقية سبب مقنع غير انهم غيرانين مني لان تصرفاتهم بتظهرلي ده و يمكن انا ظالماهم و انا الي حساسة شوية بس مش عارفة بجد فياريت لو حد يقدر يفيدني بنصيحة لان بجد تعبت من كتر التفكير في سؤال انا شخص وحش و لا كويس و لو انا كويسة ليه معنديش صحاب مقربين و لو حتى واحدة و وصلت لدرجة اني زيفت اني عندي صاحبة قدامهم عشان ميشفقوش عليا او عشان ميفكروش اني مش ورايا غيرهم (عارفة انه غباء مني اني اعمل كده بس ملقتش حاجه تاني اعملها)
في واحدة بتغير مني اوي لاني شاطرة و حلوة و سمعتها في مرة بتتكلم مع صاحبتها و بتقولها عليا: تلاقيها غيرانه مننا عشان احنا مقربين و انا في الحقيقة و لا غيرانه و لا حاجة (كنت بس بتمنى يكون عندي صديقة ذيهم كده و دي غبطة مش حسد و لا غيرة او اي شعور سلبي اتجاههم)
البنت الي قالت عني كده دي كانت زميلة ليا و كنت بحبها و حاولت اقرب منها كتير جدا و بعد كده دخلت في اكتئاب و لما خفيت ادركت ان انا مكنتش بحبها بل كان عندي تعلق مرضي و وقتها عرفت قيمة نفسي اكتر و ادركت قد ايه كانت تصرفاتها معايا بتوضح انها غيرانه مني و انها مش شايفاني كصديقة ليها ذي ما انا كنت شايفاها و بعدت عنها و من ساعة ما بعدت عنها و تخطيتها فعلا كانت اسعد ايام حياتي بجد بس لحد الان مش قادرة انسى كل الي عملته عشان اخليها تحبني و هي كانت توكسيك كانت بتتجاهلني بالساعات و كانت بتحاول تخليني اغير منها و كمان كانت بتحاول تخليني اغير عليها مثلا كانت تسيبني و تروح تاخد صاحبتها دي الي كلمتها عني (في الوقت ده مكانتش صاحبتها اوي كانت مجرد زميلة) و تروح تمشي و تسيبني و تفضل تضحك معاها و تبصلي بنظرة الي هو ايوة بلا غيري انا عاوزاكي تغيري و انا عشان حمارة مكنتش شايفة ده كله في الوقت ده و كنت ذي الهبلة بساعدها و لما كان عندها اكتئاب حاولت اساعدها و هي و لا عبرتني حتى (ممكن تقولوا اني ما اتخطيتهاش بس لا انا تخطيتها لان وجودها مبقاش يفرق معايا دلوقت و بقيت اسعد بكتير لما بعدت عنها لكن الفكرة هنا اني مش قادرة انسى اني اتعاملت بالشكل ده في الوقت الي كانت نيتي بريئة فيه) و من ساعة البنت دي و انا بزيف اني عندي صديقة و بنزل ستوريهات عنها من فترة لفترة على اساس اني مش مثيرة للشفقة و كده🤡
صح اني اسعد دلوقت و حالتي احسن مليون مرة من الوقت الي كنت متعلقة فيه بالبنت دي و عالجت اكتئابي و اضطراب الطعام الي كان عندي و مستوايا الدراسي بقى اعلى و الاهم انه بقيت بحب نفسي اكتر من الاول بس دايما بتجيلي الافكار الي كتبتها فوق دي و بجد هي شبه مش بتفارقني
كإنها شخص تاني معايا و الشخص ده سلبي و توكسيك و اوحش انسان مر عليا في حياتي و وظيفته الوحيدة في الحياة هو انه يخليني ارجع اكتأب تاني و اكره نفسي تاني و ثقتي في نفسي تقل تاني
اتمنى حد يساعدني لاني مش فاهمه هو اي الافكار دي و ليه مش عارفة اوقفها او اخليها متأثرش عليا لان في نهاية اليوم بتتغلب عليا مهما كنت قوية قدامها
بصي العين مبتحبش الاحسن منها سوا الشاطر او الاذكي و.... الخ ودا انا بشوفه حقيقي وواقعي بعض البنات بيبقوا غيرانين من نجاح غيرهم علشان بيحبوا يطلعوا عقدهم علي غيرهم بمعني مش عايزين يقربولك علشان انتي شاطره وكدا بصي اتجنبي النوعية دي من البنات واللي يقرب ي مرحب بيه واللي يبعد مع السلامه بلص من كلامك بتقولي انك شاطره ومشاء الله عليكي واعتقد مفيش انسان شاطر مش بيحب نفسه واثق من نفسة برضو بلص عايزه اقولك مطربتيش دي بدي مش علشان انتي كويسه معندكيش صحاب مش بتتقاس كدا يمكن انتي شخص مش اجتماعي بطبعك واقولك حاجه بجد ممكن تفيدك متخليش شعور معين أو حاجه معينه تحسسك بالنقص من ناحيتها بمعني مش علشان معندكيش صحاب يبقي انتي شخص وحش والكلام دا بلص انتي مش في آخر محطه في الدراسه هتعملي صحاب بعدين وتلاقي ناس نظيفه وشبهك ويفرحوا لنجاحك لان الصاحب اللي يغير من نجاح صاحبه مش صاحب وانا واثقه هتلاقي صحاب بجد بعدين انتي حد شاطر وذكي وربنا يوفقك ويكرمك يارب
تم النشر الثلاثاء، ٢٣ أبريل ٢٠٢٤
انا هقول لك احنا ليه ممكن نحكم على نفسنا بان احنا مش حابين النسخه بتاعتنا الشخصيه وكان نفسنا ان هي تبقى حاجه تانيه. لما بتمر علينا تجارب مش لطيفه زي التجربه اللي انت حكيتيها مع البنت دي ان هي كانت بتتصرف معك بطريقه مش كويسه فوصلت لك احاسيس مش كويسه ومن وقتها وانت مطبوع جواكي زي الختم كده بفكره بانه انا مش مش كفايه علشان خاطر حد يعاملني حلو او علشان اتحب هي فكره موجوده ومتغلفه كده ومخفيه وانت مش شايفاها بشكل واضح لكن هي الفكره دي اللي عماله بتاثر على كل افكارك وكل تصرفاتك فهتلاقي نفسك وانت بتبصي لبقيت زمايلك التانيين هتبصي النظره دي فهتقولي يعني هو انا لما هاقرب منهم هم هيشوني عكس كده لا خلاص هو انا كده فبالتالي بتصدر منك افعالتي ما بتاخديش بالك منها انت اصلا ما بتقربيش من حد. وفي نفس الوقت منتظره الناس دي تقرب منك وتعتبرك صديقتها الصداقات محتاجه.
تم النشر الأربعاء، ٢٤ أبريل ٢٠٢٤
طريقة كلامك توحى انك فى ثانوى و انك ذكائك الاجتماعى ضعيف بس شخصية قوية و احييكى على دا بس دا ممكن يكون ليه تأثير فيما بعد الحل ... ١ . قراءه الكتب المناسبة ... اهمهم لغة الجسد مع انى شايف الموضوع ٢٠ نظرى و الباقى عملى ٢. اسمعى بأنساط و تكلمى قليلا فالكل يعشق من يستمع له ٤ . مع كتر السماع و تحليل الشخصيه وفقا للكلام الى فى الكتب الذكاء الاجتماعى هيزيد ٥ . اعملى الخير و ارميه فى البحر ... المعاملة بالحسنى ٦ . فكك من كلام الناس محدش بيعرف يمسك لسان الناس و افتقاد الاصدقاء احسن من صحاب السوء ... التكشيرة احسن من الدحكة الصفراء..
تم النشر الثلاثاء، ٢٣ أبريل ٢٠٢٤
مش شرط خالص علشان انتي معندكيش صحاب او حد قريب منك، يبقى انتي شخص وحش. اوقات زي ما بتقولي النفوس المريضة مش بتحب اللي احسن منها. واكبر دليل على كده، انك سمعتي البنت ديه بتتكلم عنك بكده. بس هو عموما مفيش اي ربط من انه يكون عندك صحاب وما بين انك تكوني محبوبه.
تم النشر الاثنين، ٢٢ أبريل ٢٠٢٤
النظرة الإيجابية للنفس عندما تعتمد على نظرة المجتمع والآخرين فلن نستطيع الوصول للمعاير الكمالية والمثالية التي يضعها المجتمع وأن نكون على حسب مزاجهم في كل الأوقات , انظري إلى نفسك ومهاراتك التي تمتلكها وقم بتنميتها , وتقبل نفسك كما انت واسعى للحصول على خبرات متزايدة , وإن كان احد والديك منتقدا لك بكثرة فهذا منشأ لمشكلتك , اقرأ كتاب فخاخ الحياة للدكتور جيفري يونج
تم النشر الأربعاء، ٢٤ أبريل ٢٠٢٤
ان النفس لأماره بالسوء
تم النشر الاثنين، ٢٢ أبريل ٢٠٢٤
لعرض السؤال في فدني اضغط هنا