انا خايفة ادخل الجامعه وكل يوم اقعد افكر بالساعات واعيط خايفه بسبب شكلي علشان انا تخينه خايفه الناس تتريق عليا ومتحبنيش لأني من صغري كدا من ساعه لما اتولدت كدا من كيجي والناس بتتريق عليا ومش عارفه اعمل ايه بجد الموضوع دا والتريقه بقيت اخاف من كل دا وبقيت انتقد نفسي واقول اني فعلا مستهلش بلاقي الناس كلها تقول ايام الدراسه حلوه وكدا بس انا مش بتبقي حلوه بالنسبة لي. مش بعرف اتعامل مع الناس ولو بتعامل مع حد واتوترت بخاف علشان بيحصلي لاإراديا تشنجات في وشي ساعات بتخيل اني حلوه وكل حاجه بس بقلب تاني ساعات ببقا بعيط وساعات تاني مش بيهمني وكأن الحياه عادي بس الفتره دي خايفه اروح الجامعه مش عارفه اعمل ايه
السلام عليكم يا جميلة هو مين أصلاً اللى حدد ان التخين وحش والرفيع حلو مين اللى حدد معايير الجمال بالنسبة للبشر لا فرق بيننا إلا بالتقوى يوم القيامة ربنا مش هيحاسبنا بشكلنا ولا مين الأحلى فيدخل الجنة لا مين اللى عمل صالح، الله ينظر لقلوبنا لا لجمالنا الخارجى لإننا كدة كدة كلنا اتخلقنا فى أحسن تقويم، وبعدين انتِ تأخدى ليه بكلام الناس دول هما ايه من محور حياتك مين هما علشان يحكموا عليكى مجرد ناس فاضية رأيهم ولا ليه لازمة وبثقتك انتِ فى نفسك كلامهم والله ولا هيفرق معاكى انتِ بس اللى من حقك تحكمي على نفسك مش حد تانى، وتقدري تنزلى جيم او تتابعى مع دكتور لو حابة تخسي وده فى الأول وفى الأخر برضو علشانك انتِ انتِ وبس مش علشان رأى حد فيكِ، وانتِ مش نازلة الجامعة علشان رأيهم فيكِ أكيد انتِ نازلة تحققى الهدف اللى عايزاه، دمتِ بخير
تم النشر الأحد، ٢٢ سبتمبر ٢٠٢٤
لا تهتمي لكلام شخص فانا ايضا تخينه شويه بس مش قوي ولما حد يتنمر عليا ابص له واضحك ضحكه خفيفه كده والشخص ده هيكون هيموت من برودي وما بيقدرش يتنمر عليا تاني وبعدين خليكي واثقه في نفسك وان انت قدها وان عمر ما حد هيهز ثقتك في نفسك
تم النشر السبت، ٢١ سبتمبر ٢٠٢٤
بصي أولا محدش هيديكي طاقة اجابايه يحسسك انك حلوه وثقه بالنفس غيرك آنتي أولا لازم تكون انتي اوعي تعملي كدا فنفسك متستخسريش فنفسك كلمتين حلوين ثقي بنفسك بجمالك انتي مش أول ولا آخر بنت عندها وزن زياده او مشكله تشنجات بقي او غيره في كتير بس فرق وآحده عن تانيه إنها بتتخطي الموضوع ومش بتديه اهميه وبتثق نفسها قولي كلام حلو عن نفسك قدامك نفسك وبذات قدام الناس تبصي كدا فالمرايه ركذي فالحاجات التانيه الي ربنا انعمها عليكي ملامحك صحتك حاجات كتير اشكري ربك عليها وحبيبها لو عملتي كدا وقربتي من ربنا وحمدتيه مش هيفرق معاكي كلام الناس آنتى جميله وقويه وخلي عندك أراده وردي علي الناس الي بتضايقك حطي فبالك انو ربنا بيجبلك حقك وحاولي تعملي رجيم أنا كان ليا حد زيك نفس الموضوع بس هي حطت فدماغها وفعلا خست كتييير الزومبا باستمرار الرجيم ابمتقطع ولو تابعتي مع دكتور تخسيس بقي واخدتي خطوه هيبقي احلي واسهل بكتير لو عرفتي وإنتي هتقابلي ناس كتير واشكال كتير فالجامع منهم الحلو ومنهم الوحش حاولي انتي بس متركذيش مع حد بس وخليكي جمب لناس الكويسه وفالعموم متخافيش دي مرحله بتعدي علي أي حد قبل الجامعة وحطي فبالك انو مشكله الخسسان دي عادية قدام ناس كتير وبالنسبه لناس كتير فاحمدي ربنا ومتحطيش الموضوع فبالك بس انتي حاولي تغيري ده❤️
تم النشر الجمعة، ٢٠ سبتمبر ٢٠٢٤
السلام عليكم بصي انت كده كده مش رايحه عشان الناس هناك في الجامعه تحبك. ولا علشان هم اللي يقولوا لك انت شكلك حلو ولا لا او يعجبهم او يعجبهم. لو انت مركزه في انه مش ده الهدف الموضوع هيخف شويه انا عارفه طبعا انت مش تقدري تمنعي تفكيري بسبب. التاريخ اللي عندك من التنمر والتريقه والناس بتعلق على شكلك او على وزنك. بسبب انك يعني تقول الفتره اللي فاتت دي ما تعاملتيش مع الموضوع فهتفضل الافكار تهجى معاك بتخلينا نقول شويه حاجات كده صغيره لو قدرتي تعمليها الموضوع هيكون احسن معاكي ان شاء الله بدل ما تركزي على اللي حواليك هيقولوا ايه وهيعملوا ايه اغلبي ده بالفكره بتاعه انه انا شايفه نفسي ازاي مش عايزاك تشوفي نفسك بعينيهم وتشوفي نفسك بعين ربنا اللي خلقك ربنا اللي خلقك خلقك حلوه عموما ان انت صغيره ان انت بيبي اا بشكل جسمك او بوزن جسمك ربنا خلقك جميل ربنا ما خلقش حاجه وحشه اولا ثانيا ثقتك بنفسك وتقبلك انت لنفسك ولا يغير الامور كلها. انا بقول لك ده مش بس كده كلام نظري بس ده فعلا تجربه وعن حقائق موجوده في ناس ما شاء الله اوزانهم مش قليله خالص وجسمهم. لو هنوصفه بان هو في سمنه او تخان عن اللي حواليهم وعن اللي في سنهم الا ان انطلاقهم وحيويتهم وحركتهم اللي هي بتكون اصلا اخف من اللي ممكن يكون والده اقل منهم بيخلي الناس تبص لهم الانبهار وهم اللي بيكونوا حابين يقربوا منهم فانطلاقه انت خليكي دائما بشوشه ومبتسمه ومش شايفه في نفسك حاجه غلط ولو هدفك انك تكوني محبوبه حتى هتلاقي الناس بتقرب منك عشان هيكونوا حابين يشوفوا الشخصيه الجميله دي البشوشه ومبتسمه جميله ازاي ونحب نقرب منها الناس بقى اللي هي كل قصتها في الحياه ان هم يتريقوا على الدخان طول اصلا حتى لو قربوا منك انت اللي تبعدي عنهم. ما تحبيش انك تتعرفي عليهم ولا تكوني وسطيهم؟ اختاري انتي الناس ما تخليش الناس هي اللي.
تم النشر الجمعة، ٢٠ سبتمبر ٢٠٢٤
انتي جميلة ، والشكل الخارجي لو ملناش دخل فيه ، فهو خلق الله لنا ، واي حد يتريق او يتنمر علينا بسببه ، فهما بيتريقو على خلق الله .. وبياخدو ذنوب كتير اوي لانهم بيأذو انسان ملوش اي ذنب في كلامهم. انا معرفش وزنك كام بالنسبة لطولك .. مش عارفة اذا انتي فعلا زي ما بتقولي تخينة ، ولا توزيعة الدهون في جسمك هي اللى مختلفة شوية عن معظم الناس ... بس اكيد في ناس بنفس وزنك وشكلك وقادرين يعيشو ويخرجو وثقتهم بنفسهم عالية وتقديرهم لذاتهم عالي .. وكلام الناس بيرموه في الزبالة لانه لا يعني شيء الا انهم اشخاص عديمي الاحساس وعندهم نقص اخلاق و تربية. شوفي كام ممثل مثلا وزنهم كبير شوية وشوفي ازاي دمهم خفيف وشخصيتهم حلوة والناس بتحبهم ... اكيد انتي كمان شخصيتك فيها مميزات كتير ، واكيد كمان حلوة وملامحك جميلة متخليش خوفك من كلام او تعليق اي حد، يمنعك من الخروج والحركة والتعامل مع الناس ، مستقبلك ودراستك هي الاهم دلوقتي .. هتلاقي باذن الله بنات محترمة واخلاق يحبوكي ويصاحبوكي في الجامعة زي ما انتي ويحترموكي لذاتك ولاخلاقك وشخصيتك .. ودول هما الصحاب اللى بجد اللى تحافظي عليهم . بالنسبلة لوزنك ، افضل حاجة انك تواجهي الموضوع بانك تروحي لدكتور تغذية وامراض سمنة ونحافة ، يكون حد شاطر والناس بتشكر بيه وبتوصي بيه عن تجربة ، مش مجرد حد ناشر اعلانات او بيطلع في اي قناة .. يكون حد فعلا عن تجربة لان صحتك اهم حاجة تحافظي عليها. روحي للدكتور ،وهو هيساعدك تعرفي طبيعة جسمك ، وايه الانسب لصحتك ووزنك ، واسباب زيادة الوزن لو فعلا وزنك زيادة ، هيتاكد ان مافيش مشكلة في الغدد ولا الهرمونات هي السبب ، وهيحطلك برنامج صحي غذائي رياضي تمشي عليه يساعدك على تقليل وزنك ويعيد توزيع الدهون في جسمك فيبقى شكلك متناسق ووزنك مناسب ... اللجوء للدكتور عشان تحلي مشكلة الوزن دا ، هيحافظ على صحتك دلوقتي و في المستقبل .. وهيساعدك كمان تبقى حركتك اخف في الجامعة .. فهو عشانك انتي اولا قبل اي حاجة تانية وممكن كمان الدكتور يرشحلك اللجوء لمتخصص نفسي لو زيادة الوزن ليها علاقة بالاكل والحالة النفسية ماثرة على كميات الاكل اللى بتاكليها .. وكمان المتخصص النفسي هيساعدك في تحسين نفسيتك وزيادة ثقتك في نفسك وتقديرك لذاتك ويبقى عندك قوة اكبر في التعامل مع اي تعليق من اي حد ومياثرش على نفسيتك
تم النشر الجمعة، ٢٠ سبتمبر ٢٠٢٤
عزيزتي، أفهم تمامًا مشاعرك وما تمرين به من قلق وتوتر حيال دخولك الجامعة. من الطبيعي أن تشعري بالخوف عند الانتقال إلى مرحلة جديدة في حياتك، خاصة عندما يتعلق الأمر بتجارب سابقة مؤلمة. أولاً، أود أن أؤكد لك أنك ليست وحدك في هذا. الكثير من الشابات يشعرن بمشاعر مشابهة عند بدء الجامعة، حيث يتعرضن لتحديات جديدة وضغوط اجتماعية. فيما يتعلق بمشكلتك مع شكل جسمك، أذكرك بأن الجمال يأتي بأشكال وأحجام متعددة. الأهم هو الثقة بالنفس والتقبل الذاتي. اسعي لتطوير مشاعرك الإيجابية نحو نفسك. يمكنك أيضًا التحدث مع متخصص نفسي إذا شعرت بالحاجة لذلك؛ فالتعبير عن مشاعرك ومناقشتها يمكن أن يكون خطوة إيجابية. حاول أن تتركي انطباعات الآخرين تأثيرها عليك. ليس من الضروري أن تعجبي الجميع، فما يهم هو قدرتك على أن تكوني نفسك، وأن تعرفي قيمتك. اجعلي تركيزك على التقدم الشخصي والعلمي. يمكنك أن تفعلي أشياء صغيرة تضيف إلى ثقتك بنفسك، مثل ممارسة هواية تحبينها أو التعلم شيئًا جديدًا بكل يوم. عندما يتعلق الأمر بالتواصل مع الآخرين، يمكنك البدء ببناء صداقات مع الأشخاص الذين يشاركونك اهتمامات مشابهة. كوني لطيفة مع نفسك ولا تفرضي ضغطًا زائدًا على نفسك للتوافق مع الآخرين. وفي النهاية، تذكري أن الجامعة ليست فقط مكانًا للدراسة، بل هي أيضًا فرصة لتحقيق الذات وتنمية المهارات. انظري إلى هذه المرحلة كتجربة جديدة وتجديد. إذا كنت بحاجة إلى مزيد من الدعم والاستشارة، لا تترددي في البحث عن مختص يستطيع مساعدتك. التغيير دائمًا قد يكون صعبًا، ولكنك قادرة على التغلب على هذه التحديات. كوني قوية واثقة بنفسك.
تم النشر الجمعة، ٢٠ سبتمبر ٢٠٢٤
أولا كده حبي نفسك إنتي جميلة ياروحي مفيش بنت وحشه واهتمي بنفسك وإنزلي جيم وطورى من حياتك العملية واشغلي وقتك دايما بحجات ترضي نفسك بيها
تم النشر السبت، ٢١ سبتمبر ٢٠٢٤
مفيش بنت وحشه كل بنت ليها جمالها الخاص فيها ، حبيبتي اولأ لازم نتقبل نفسنا علي اي شكل او اي وضع ولازم تحبي نفسك لو انتي محبتيش نفسك وتقبلتيها متستنيش من حد يعمل كدا ، بعدين لو شايفه وزنك مش مظبوط شويه انزلي الجيم
تم النشر الجمعة، ٢٠ سبتمبر ٢٠٢٤
لعرض السؤال في فدني اضغط هنا