من يومين جارنا بعتلى طلب صداقة على الفيس كل عيلته يعتبر عندى الصراحة طنشت رجع جدد الطلب تانى قولت عادى دول جارنا من زمان يعتبر متربين سوا كانت ماما وممتو يودونا عند نفس المدرسين وكدا بس مكنش ليا كلام معاه قبلت الطلب قعد يعلق على الحاجة إلى بنزلها بعدها لقيتو بعت رسلتين على مسنجر ومسحهم تانى الصراحة اقعد افكر هو كان كاتب اى ومسحو بعد كدة بعتلى انو من زمان فى مشاعر من نحيتى انا معرفتش ارد لانى مش عارفة هل انا حباه ولا لا بقيت متلغبطة شويه احس انى اتبسطت وساعات لا معرفش هو ده الشخصية الى عاوزاه ولا لا وحاسه انى اتصرفت غلط لما قبلت الطلب وبفكر اعمل بلوك وانا طبيعتى مش بكلم حد
السلام عليكم ورحمة الله، هو أنتِ عامة مكنش ينفع توافقي على الطلب حتى لو كان كل العائلة عندك، أنتِ بنفسك فتحتِ له الباب وهو اعتبر ده إشارة منك أو فرصة إنه يقرب. أنا مش عارفة سنكم قد إيه لكن إذا كنتم في عمر يسمح بالزواج فهو المفروض الخطوة الصح الوحيدة اللي لازم ياخدها لو بيحبك إنه يتقدم لك رسمي ويخطبك من أهلك. لو لسه صغيرين وهو عارف كويس إن مفيش فرصة تتزوجوا دلوقتي فهو عاوز إيه من اعترافه؟ تمام، هو اعترف... بعد ما توافقي إيه الخطوة اللي بعد كده؟ تتكلموا على النت؟ تتصاحبوا وتبقوا مرتبطين زي ما بيحصل دلوقتي بين البنات والولاد؟ ولحد ما ربنا يسهل بقى ويكون نفسه ويفكر ييجي يتقدم لك والله أعلم هل هو صادق فعلا ولو صادق هل مشاعره دي هتتغير مع مرور الوقت. لو عاوزة النصيحة، حتى لو انتِ مش عندك حيرة في مشاعرك، فمينفعش أبدًا إنك تتجاوبي معه. الحل الوحيد إنه يتقدم لك رسمي، غير كده هتبقى صحوبية وعلاقة حرام وربنا مش هيرضى عن كده. لو هتعرفي تعتذري منه بذوق يبقى كويس، قولي له إنك مش مستعدة لأي ارتباط وإنك عارفة إن حرام أي علاقة غير خطبة شرعية أو زواج ومش هتقدري تعملي حاجة تغضب ربنا أو تخوني بها ثقة أهلك بك. دي نصيحتي، وكمان نصيحة صغيرة، خدي لفة في التطبيق واقرأي كم المشاكل اللي حصلت للبنات من ورا العلاقات والصحوبية. ربنا يحفظك ويبعد عنك أي سوء. بالتوفيق.
تم النشر الاثنين، ٢٨ أكتوبر ٢٠٢٤
بصي يا سكره من الاخر كدا لو هو عنده مشاعر ناحيتك وكدا ممكن لو انتي حابه انك تتكلمي معاه خليه يجي بيتك ويدخل البيت من بابه زي ما بيقولوا كدا ممكن تديه فرصه بس قوليله عندك مشاعر اتجاهي تعالا اتقدملي واقعدي مثلا مره واتنين معاه بس على الاقل اهلك هيبقوا عارفين ولو ارتاحتي وحسيتي انه ممكن تحبيه او تتقبليه يبقا سلميها لله وصلي استخاره واتخطبي لكن تكلميه وكدا لأ لانه اكيد لو اتكلم معاكي هيتكلم عليكي بره ويقول انك بتكلميه وتطلع عليكي سمعه مش كويسه فخليني دايما بتفكري استوعبي اللي انتي هتعمليه وبلاش تجيبي الأذيه لنفسك ولو انتي لسه صغيره على سن الخطوبه يبقا تتجاهلي تماما فهماني؟!
تم النشر الأحد، ١٠ نوفمبر ٢٠٢٤
الباب ال يجيلك منه الريح سده واستريح
تم النشر الأربعاء، ٣٠ أكتوبر ٢٠٢٤
لعرض السؤال في فدني اضغط هنا