بعد وفاة أبي لم يعد أحد يفهمني أو يشعر بي، بداخلي حزن ولم يعد لدي ثقة بالناس، ماذا أفعل؟

Question

انا عايشه في الحياه جسد بدون روح اخدت فتره كنت منعزله فيها شويه بسبب الناس والأصدقاء والأهل يعني من كله انا ليا اصدقاء بيغيروا مني وفي حقد منهم عليا وفي اللي بيكره رغم اني انسانه محبوبه من كل الناس..انا طبعاً بعدت عنهم تاني حاجه الاهل يعني ماما المفروض تكون صديقتي ماما قربت منها كتير بس كانت معظم كلامها مش فاضيه، طيب بعدين ،او يمكن بتتكلم معايا بس اللي هو أكن الواحد بيقول انا سامعك وهو في عالم تاني اصلا يعني..ده غير أنها عصبيه شويه ف كانت بتصرفاته بتبعدني عنها غير أنها زمان حصل منها موقف خلاني ابعد ومش عايزه اقرب منها حتي اخويا برضه نفس الكلام عصبي وتصرفاته تخليك تقول ياريتني ما اتكلمت معاك الوحيد اللي كان فاهمني وحاسس بيها هو بابا الله يرحمه حتي لما كنت منعزله في وقت حزني كان عارف واستني لما اهدي وجه كلمني وقالي احكيلي حتي لما كنت بتكلم معاه كنت بحس براحه لانه فاهمني وحاسس بيا وفاهم شعوري كان هو بيسمعني ويطبطب عليا ولو احتاجت حاجه كان بيجبهالي قبل وفاته بأيام كان موصي اخويا بأنه ميحسسونيش بغيابه بس انا حسيت بغيابه كتير انا اخويا في مره كنت متضايقه وملقتش حد اتكلم معاه واحكيله بس كان عصبي وتصرفاته خلتني ابعد ومتكلمش معاه حتي لما بحتاج حاجه هو مش بيهتم حتي لو نسيها...انا واخويا مفيش بينا تفاهم ودايما هو عصبي ماما زمان وانا صغيره لما كنت بحكي لها حاجه كانت بتقول لمامتها أو صاحبتها يعني كان كل حد بيكون عارف وده خلاني ابعد ومتقولش ليها اي حاجه تخصني لاني عارفه أن الكلام هيخرج برا كذلك بردوا اخويا اي حاجه تخصني معظم الحاجات كان بيقولها ل عمي وده كان بيضايقني هو عمو كويس ومحترم بس انا مش بحب حد يعرف اي حاجه عني أو كلمه تخرج برا البيت حتي لو انا قولت لماما موضوع او اي حاجه مش بحب أنها تقولها برا مش سر ولا حاجه بس انا مش بحب الكلام يخرج برا كمان بابا مكنش زيهم كده بابا كان سري وأماني وسندي وحنين وكل حاجه هو مكانش بالنسبالي اب وبس لا ومن بعده انا عانيت جدا لاني بقيت وحيده يعتبر انا مكانش ليا غيره حتي صحابي اللي بيغيروا لما عرفوا أن والدي اتوفي مكانوش عارفين يوصلولي لاني انا بعدت عنهم لحد ما في يوم كانت عندي طنط قالتلي أنهم زعلانين علشانك وعاوزين يكلموكي ومش عارفين يوصلولك بس انتي واخده جنب منهم مش عارفه ليه طبعا هيا متعرفش انا ليه واخده جنب منهم وبعدت ومش عارفه هل هم بقوا كويسين ولا زي ماهما انا معنديش ثقه بالناس بابا لما كان موجود كان بيقولي اي حاجه تخصك متقوليهاش برا لشخص.. طنط دي هيا كويسه معايا ودايما بتقولي انتي بنتي بس هيا ليها اصدقاء وزمايل ولو انا حكيت ليها ممكن تقول لاي شخص انا مش عندي ثقه بالناس ويعتبر دلوقتي انا وحيده عايشه بلا روح ولا سعاده وخصوصا أن الشخص الوحيد بوجوده كنت سعيده بس هو مش موجود انا مش عارفه اعمل ايه بابا كان بيوصي ماما عليا ف أنها تقرب مني أو تخلي بالها ومقعدش لوحدي لان دي عزله ماما من بعد الوفاه بتحاول تعمل اي وصيه من اللي وصاهالها بس معرفتش كمان انا لو زهقانه أو مضايقه أو حتي لما بسألها وباجي اقولها كانت بتقولي يعني اعمل ايه مش عارفه كنت بتصدم من ردها وكنت بقولها متعمليش حاجه وبسيبها انا مش مستنيه اي حاجه من حد ولا سند ولا حنان بابا كان غانيلي عن اي شي ومن بعده لاني عرفت الناس علي حقيقتها مبقتش عايزه حاجه من حد حتي اصدقائي مش عارفه هل هم فعلا زعلانين ولا شفقه وهل بقوا كويسين وبيحبوني انا شخصيه مش بستسلم ومش بضعف من اي حاجه انا دلوقتي مليش حد وانعزلت عن العالم جه في بالي أني اتواصل مع دكتور/ه نفسي وعصبي بس مش عارفه هل ده القرار الصح ولا لأ ولو صح ف هل ممكن تنصحوني ب دكتور/ه يكون كويس وشاطر ومحترم اتواصل معاه كمان انا مش كل حاجه هحكيها للدكتور انا مش عارفه اعمل ايه بجد انا في ضغط جوايا حزن كبير دي الحقيقه.. وشكراً

Accepted Answer

الانعزال عن العالم مش هوا الحل بل انتى كده بتأذى نفسك بالبطئ قبل اى حاجة قربي من ربنا اكتر صلي الفروض كلها وداومي على قيام الليل والدعاء كتير شغلي الرقية الشرعية كل يوم اسمعيها بالشيخ إللي انت حابة تسمعيه اذكارك متنسيهاش مهمة جدا للتحصين قرآنك ورد يومي بحسب مقدرتك الاستغفار بالعدد إللي تقدري عليه وربنا يرحم والدك ويسكنه الفردوس الأعلى من الجنة يارب ومش تزعلي من والدتك ابدا هي بتحبك والله بس مشاغل الحياة بتحتم على الإنسان حاجات عكس إرادته ربنا يديمكم لبعض يارب ابدأي اتعلمي مهارات جديدة اقرأي كتب مفيدة صدقيني ده هيفيدك كتير وابدأي اخرجي واشترى إللي نفسك فيه اتمني يكون كلامي افادك حبيبتي ربنا يسعدك يارب

Answer

السلام عليكم ورحمة الله وبركاته ومغفرته مبدائيا البقاء لله ربنا يرحمه ويغفر له ويسكنه الفردوس الأعلى من الجنة مع النبيين والصديقين والشهداء وحسن أولئك رفيقا ، ربنا بيقول ونحن اقرب اليه من حبل الوريد قربي من ربنا اشكي همومك متشكيش لحد اشكي لله وحده وانتي في سجودك طلعي كل اللي جواكي وفي كمان في حاجه وَوَصَّيْنَا الْإِنسَانَ بِوَالِدَيْهِ حَمَلَتْهُ أُمُّهُ وَهْنًا عَلَىٰ وَهْنٍ وَفِصَالُهُ فِي عَامَيْنِ أَنِ اشْكُرْ لِي وَلِوَالِدَيْكَ إِلَيَّ الْمَصِيرُ(14) وَإِن جَاهَدَاكَ عَلَىٰ أَن تُشْرِكَ بِي مَا لَيْسَ لَكَ بِهِ عِلْمٌ فَلَا تُطِعْهُمَا ۖ وَصَاحِبْهُمَا فِي الدُّنْيَا مَعْرُوفًا ۖ وَاتَّبِعْ سَبِيلَ مَنْ أَنَابَ إِلَيَّ ۚ ثُمَّ إِلَيَّ مَرْجِعُكُمْ فَأُنَبِّئُكُم بِمَا كُنتُمْ تَعْمَلُونَ} لقمان 15 مهما كانت الوالدة بتعملك كلمه واحده بس علي لسانك غفر الله لي ولكي ياامي في سرك وكل يوم بعد متصلي الفجر بوسي ايديها وراسها وقوللها ربنا يجبر بخاطرك ويرضي عنك ويفرح قلبك وحياتك ياماما وكل شويه قوللها حاجه حلوه صدقيني بعد يومين تلاته بالكتير هتلاقيها جيا واخدكي في حضنها وبتطبطب عليكي بس انتي اصبري الصبر مفتاح الفجر حافظي علي صلاتك واذكارك ووردك القرآن وكمان حاجه حافظي علي قراة سورة البقرة بتملا البيت بركه وموده ومحبه وبتطرد الشياطين من البيت. ربنا يجبر بخاطرك ويرضي عنك ويراضيكي ويفرح قلبك وحياتك يقمري.

Answer

أولا أنا أحب اقولك انك تعتبريني اختك وتقدري تحكي وتتكلمي معايا حاسه بيكي وبحالتك وإن دي حاجه مش ساهله بس انتي قويه بجد انك مستحمله كل الضغط دا انك لسه بتحاولي تطلعي من الحاله دي دا بدايه الحل لأي مشكله اوقات فعلا بيكون الاهل مش متفاهمين مع اولادهم مش لوحدك بجد بيحصل مع كتير مننا بس دا بيكون لان الاهل زي ما احنا عارفين تفكيرهم بتاع زمان غير تفكيرنا احنا لان الاجيال بتتغير وبالتالي التفكير بيكون مختلف اللي اقصده ان مامتك شايفه انها لما تحكي لحد علي اللي بتقوليها دا شئ كويس وممكن مش قصدها غير أن بس الشخص دا يساعدها اخوكي ممكن يكون حابب فعلا يطبق وصيه بابكي وانه يهتم بيكي بس الطريقه بتكون غلط ويا حبيبتي بجد انتي لازم تقربي من ربنا في الفتره دي اكتر اشغلي نفسك بأي شئ انتي بتحبيه واعمليه انا مريت بحاله نفسيه وحشه اووي اووي بجد وكنت بقول مستحيل اقدر اطلع منها واني هفضل كدا تعرفي بقيت بتكلم مع ربنا كأنه واقف معايا حد بيحكيله وهو بيطبطب عليا وبيقولي انا جنبك كان احساسي في وقتها بجد فرحني وبقيت اقرب اكتر لحد ما بفضل ربنا اتعافيت واقولك اوقات بكون علي وشك ارجع لنفس الحاله بس بروح لربنا كلنا بنمر بظروف صعبه وانتي جميله وقويه وهتقدري تعدي المرحله دي بينما دكتور فأنا انصحك تسألي حد ممكن يكون يعرف اكتر لان انا مقدرش اقول وانا مش عارفه إذا كان صح او خطأ بس هرجع اقولك خلي ربنا بس هو ونيسك وهو اللي بتحكيله كل اللي عاوزه تحكيه ربنا يهون ويخفف عنك واشوفك اسعد حد في الدنيا بإذن الله ♥️♥️

بعد وفاة أبي لم يعد أحد يفهمني أو يشعر بي، بداخلي حزن ولم يعد لدي ثقة بالناس، ماذا أفعل؟

نفسية

اجتماعية

اكتئاب

أهل

سؤال من مجهول م

تم النشر الخميس، ١٨ يوليو ٢٠٢٤

4 إجابة

9 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك