انا مدرس تاريخ جديد وبجتهد جدا وشاطر الحمد لله عايز اعرف طرق لجذب الطلاب لي اكتر واكتر خاصة ثانوي واعدادي واعداد المراجعات النهائية
ممكن مثلا تعمل المراجعات النهائيه بالمجان وكدا الطلاب هتيجي وتقدر تشوف شرحك وبإذن الله يعجبهم ويبدؤا بقا يجوا ياخدوا درس بس افتكر ان لو رزقك إتأخر شويه ف دا كرم من ربنا وانت لازم بردو تواجه صعوبه ف البدايه علشان تعافر وان شاء الله موفق بإذن الله وربنا يرزقك يارب وجرب تعمل إعلانات كتير وخلي بالك مش بالعدد المدرس الشاطر دايما بيبقا أعداده قليله وبعدين كل اما الاعداد بتكون قليله كل اما بتلاقي نتيجه اكتر استجابه للشرح اكتر وتقدر تطلع دفعه محترمه على ايدك وهيبدأ الطلاب ينقلوا سمعتك الحلوه وشرحك وتبدأ الطلاب تيجي بس عاملهم انك اخ ليهم وانصحهم دايما وبلاش تحبطهم لان الطلاب بتحب الدرسين اللي بينصحوا الطلاب وانصحهم من الجانب ديني مثلا زي انهم يبعدوا عن الارتباط وانهم يصلوا يعني ف اخر ٥ دقايق من الحصه تتكلم معاهم و كدا تبقا كسبت قلبهم َكسبت ثواب كمان من ناحيه توعيتك ليهم وربنا يبارك في حياتك ويرزقكم من حيث لا تحتسب وعمل موفق بإذن الله
تم النشر الخميس، ٩ يناير ٢٠٢٥
السلام عليكم و رحمة اللّٰه و بركاته اولا احنا ك طلاب بنعرف ان مستر اشطر من غيرو لما نلاقيه بيقول معلومات جديده و مفيده و متنوعه بس ف إطار الدرس بمعنى حضرتك تقول معلومه تربط بيها احداث درس التاريخ عشان نفهمو و نستوعبو و تشرح الدرس كأنك بتشرح قصه لإن التاريخ شبه القصص ف لما بيتشرح كدا الحاجه بتثبت اكتر و بتكون الحصه ممتعه بالنسبالنا و طبعا مش معنى ان حضرتك هتشرحها قصه يبقا متكتبش الفكر الرئيسيه او الخلاصه بمعنى اصح و مفاتيح الحل بنحتاجها جدا خصوصا ف ثانوي و بلاش المذكرات لإن بردو ف الأغلب مش بنذاكر منها و بنذاكر من الكتاب pdf عشان في اسئله بتكون بين السطور و المستر ممكن ميكونش واخد بالو منها و ميحطهاش في المذكره ظناً منو ان هو كدا بيلخص غير كدا ف الغالب المستر بينسى ينزل اجابات اسئله كل درس ف بنكون حاسين اننا بنحل ع الفاضي و مش عارفين الإجابات و بنحب المستر المتابع يعني كويز كل حصه امتحان شامل كل شهر و واجب يتشاف كل حصه و متابعه مع ولي الأمر رغم ان الموضوع بيبقا متعب بس الحقيقه ده بيفيدنا جدا انا عن نفسي مقدرش اخد مع مستر إلا لو كان كدا و بردو في فكره حضرتك ممكن تعملها هتبقا كويسه جدا و هي ان كل كويز ف كل حصه تجمع درجات كل طالب اخر الشهر و تعملها ف نسبه مئويه و تكرم الي جايب اعلى درجه و بردو في مدرسين بيعملو فكره ان الي جاب مثلا ف الكويز 10 من 10 بيروح ياخد ختم من المستر احمر و الي جايب اقل بدرجتين ياخد ختم ازرق و الي يجمع اكبر اختام لونها احمر يتكرم احنا ك طلاب بنحب يكون في عدل يعني من العدل يكون الشاطر على الأقل المستر عارف ان شاطر ف بيجازيه ب بختم احمر على الكويز و جملة كويسه و يكون في تشجيع ب حاجات بسيطه ذي الأول في الشامل هياخد شهاده او الأول هياخد درع و التاني شهاده الحاجات دي بتبسطنا جدا و بتبقا دافع اننا نذاكر و بلاش انشطه غريبه و برا إطار الحصه المدرسين ساعات بيعملو مثلا مسابقه و نقسم فرقه و كل واحد يجاوب عدد محدد الحاجات دي بنحسها ان هي تضييع للوقت يعني لو بدل مسابقات كل واحد حل امتحان اول الحصه على الحصص الي فاتت و بعدها دخلنا ف الشرح هيكون أفضل طبعاً انا بكلم حضرتك ع ثانوي لكن اعدادي و ابتدائي ف بتختلف في طلاب بتتفاعل جدا ف الحاجات دي و في لاء ، لكن ف ثانوي احنا عايزين الخلاصه و منضيعش وقت و ناخد الأفكار المهمه و نرجع بيوتنا أما مسابقات و كدا ف مبيبقاش ف نظرنا حاجه ممتعه بالنسبه للمراجعات ف دي لو المستر عامل مذكره صغيره بيلم فيها اهم الفكر بتبقا حاجه حلوه و كويسه بالنسبالنا و معسكر يلم الدنيا و المستر مثلا يشرح كل باب ف يوم بس ميكونش بيكروت و ف نفس الوقت متكونش الحصه كبيره يعني حصص 6 ساعات دي بتبقا اكبر تضييع وقت بالنسبالنا عشان المفروض احنا بنراجع مش بنشرح من الأول و حابه أقول لحضرتك حاجه بجد بجد مهمه جدا بالنسبالنا ك طلاب ثانوي و هي ان المستر يدينا طاقه إيجابية و كلام إيجابي مش سلبي يعني بلاش جمله انتو مش فالحين و غيرو ، و طبعاً بردو من المهم ان حضرتك تكون عارف ان مش معنى ان حصلك موقف مش احسن حاجه و مخليك زعلان طول اليوم او متعصب ان تطلع دا ف طلابك لإن احنا محتاجين الي يشجعنا و يكون كويس معانا مش يزعقلنا بلا سبب ، بس طبعاً مش معنى كدا ان حضرتك تهزر طول الحصه و تخرج برا إطار الدرس كتير لإن دا بردو بيخلينا حاسين ب تضييع وقت على كلام مش مفيد و بردو من المهم متفرقش بين بنت او ولد عشان في مدرسين بيبقا عندهم التفرقه العنصريه عاليه بيننا لدرجه التمييز ف الجوائز و يدوا للولاد جوائز و البنات لاء و يخلوا البنات تجاوب و الولاد لاء ده بيبقا مش حلو أبداً بالنسبالنا و بس اتمنى اكون افدت حضرتك و بالتوفيق
تم النشر الأربعاء، ٨ يناير ٢٠٢٥
💡أدعوك للاستفادة من هذا اللقاء الماتع مع الدكتور المبدع /عادل منير أبو الروس بعنوان /كيف تثير اهتمام طلابك 🔗 https://www.youtube.com/live/NShKaDYh0qk?feature=shared
تم النشر الأربعاء، ٨ يناير ٢٠٢٥
أهلاً بك، عزيزي المدرس. من الرائع أنك تسعى لجذب الطلاب وزيادة تفاعلهم مع مادة التاريخ. إليك بعض الطرق التي يمكنك اتباعها لتحقيق ذلك: استخدام القصص التاريخية : حاول الربط بين الأحداث التاريخية وشخصيات مثيرة، مما يجعل الدروس أكثر حيوية. عندما يتفاعل الطلاب مع القصص، يصبح التعلم أكثر سهولة. تقنيات التعلم النشط : استخدم أساليب مثل المناقشات الجماعية، والألعاب التعليمية، والمشاريع البحثية التي تشجع الطلاب على المشاركة الفعّالة بدلاً من التلقي السلبي. التكنولوجيا في التعليم : دمج التكنولوجيا في دروسك يمكن أن يكون له تأثير كبير؛ استخدم العروض التقديمية، والفيديوهات، والموارد الإلكترونية لجعل المعلومات أكثر جذباً. تقديم محتوى متنوع : حاول أن تغني المناهج بالدروس عن العالم الإسلامي، والثقافات المتنوعة، وأحداث حقيقية معاصرة مرتبطة بالموضوعات التاريخية. تخصيص المراجعات : بالنسبة للمراجعات النهائية، يمكنك استخدام أساليب مثل انشطة المراجعة التفاعلية، والأسئلة التنافسية، والاختبارات القصيرة، مما يساعدهم على استرجاع المعلومات بطريقة مسلية. تعزيز العلاقات الشخصية : حاول بناء علاقات جيدة مع طلابك، كن مستمعاً جيداً لدعمهم وتشجيعهم، مما يزيد من رغبتهم في التفاعل معك ومع المادة. تقديم تحفيزات : يمكنك تقديم بعض المكافآت البسيطة أو إشادات للطلاب المتميزين أو الذين يشاركون بشكل فعّال، مما يحفز الآخرين على المشاركة. تذكر دائماً أن تجعل دروسك مليئة بالشغف، لأن شغفك بالتاريخ سينعكس على طلابك. وفقك الله في مهمتك التعليمية!
تم النشر الثلاثاء، ٧ يناير ٢٠٢٥
الطالب بيحب المدرس المتمكن من المادة اللي يقول معلومات جديدة ميسمعهاش عند مدرس تاني والتعامل الأخلاقي مع الطلبة يعني الطلبة البنات زي أولاده أو اخواته الصغيرين، وكذالك الطلاب الشباب، مش مهم تعرف أسماء الطلاب مش عارف ليه بس الطالب لما يشوف المدرس عارف اسم صاحبه وهو لا بيكره المدرس ده دي أسباب الترغيب في المدرس
تم النشر الثلاثاء، ٧ يناير ٢٠٢٥
الجزء بتاع المعلومات الجديدة دا عندي بقول حجات كده في سياق الشرح جديدة لدرجة ان الطلاب بتسألني عنها حتة اسماء الطلاب حافظهم والمذكرات ها تمام ماشي الحال الايجاز عندي الي ممكن يكون محتاج شوية مذاكرة
تم النشر الثلاثاء، ٧ يناير ٢٠٢٥
فكرة المراجعة النهائية عبارة عن جزء تبسيط للمنهج وجزء الأسئلة الجديدة أو الخداعة أو الأكثر شيوعا في الإمتحانات.
تم النشر الثلاثاء، ٧ يناير ٢٠٢٥
بالتوفيق🤍
تم النشر الأربعاء، ٨ يناير ٢٠٢٥
تربية
تم النشر الأربعاء، ٨ يناير ٢٠٢٥
خريج اداب؟؟
تم النشر الثلاثاء، ٧ يناير ٢٠٢٥
وكمان الدرس يكون متلخص ومتنظم كويس والمذكرة كذالك وبلاش تفنن في الغلاف أنا بشوف مذكرات غلاف فوق الروعة وتفتح المذكرة تحسها كتاب مدرسة 😅 ، أنت ممكن تكون مذاكرتك شبه باقي المدرسين بس فنياتك في الشرح بتفرق بالتوفيق 💛
تم النشر الثلاثاء، ٧ يناير ٢٠٢٥
لعرض السؤال في فدني اضغط هنا