انا ف تانية كلية زراعة حابة المجال جدا وفعلا عايزة اكمل فيه بس انهى قسم معرفش مش عارفه اقرر!!
لانه عمرى م قررت حاجة بنفسي+انى كل م اعرف حاجه انساق وراها يعني منح برا تمام هقدم ومتحمسة طب ف مجال ايه معرفش طب هل هينفع ولا هتبهدل وانا مش فاهمه حاجه ف دنيتى اصلا وعرفت كمان ان لو رحت منحة برا ف انا هدرس ال ٤سنين ولازم ارجع اجبارى طب كدا انا عملت اي منا مش هلحق الاقي شغل يبقا معملتش حاجة طب افضل هنا ولا احاول اسافر طب اتخصص ايه طب هلاقي شغل ف المجال ال حباه ولا لا طب ايه هو المجال ال حباه اصلا طب اخد كورسات ايه طب انا مش معايا فلوس للكورسات طب اشتغل بس اشتغل ازاى وانا ف كلية عملية ولازم اروح كل يوم وبرجع متأخر وبيتى ف حتة مقطوعة مبلاقيش مواصلات لو اتأخرت اوى طب اعمل ايه بجد انا تايهة اوى اوى ومحدش بيساعدنى ولا بياخد بايدى انا اصغر واحدة ف البيت ولما باخد رأيهم ولا اسألهم بيتريقو عليا او مبيهتموش بكلامى ولا بياخدوه جد او مبيردوش عليا اصلا ومليش صحاب ولا حد اتكلم معاه وتايهة معرفش انا فين وراحة ولا جاية منين
انتي دلوقت في مرحلة مشتتة جدا. ف بلاش تاخدي قرارات فيها تكون قوية جدا زي السفر مثلا وانتي لسه مش مقررة هتعملي ايه او ايه التخصص اللي عايزاه. نبتدي واحدة واحدة .. انتي قولتي انك حابه المجال اللي انتي فيه كويس .. يبقى ليه عايزة تغيريه وتسافري .. طالما حباه ؟ انتي ممكن تسألي الدكاترة او المعيدين اللي في الكلية عن التخصصات ومجالات الشغل اللي فيه ... وكمان ممكن تسألي الدفعات اللي فاتت في الكلية . وتستفادي من تجربتهم. بالنسبة لموضوع الكورسات .. انتي مكن تاخدي كورسات ومن انتي في البيت .. ومن جامعات ممتازة جدا من على منصة كورسيرا .. منصة معتمدة وهتستفادي منها جدا https://www.coursera.org/ الكورسات مش ببلاش لو هتاخدي الشهادة .. ولكن ممكن تقدمي على الدعم الملي وبيردوا بعد 15 يوم عليكي على الميل بالموافقة .. هجيب ليك فيديو بيشرح الكلام ده .. https://www.prceg.com/2017/05/get-a-financial-support-from-coursera.html ديه مقالة بتشرح ليكي التعامل مع المنصة والتقديم وكل حاجة. انصحك جدا بانك تتابعي الموقع ده ( نادي القراءة العملية) ممتاز جدا اللي هتقري منه المقال. بالنسبة للشغل .. انتي ممكن تشتغلي في الاجازة لو مش هتقدري خالص تشتغلي دلوقت. بالنسبة لاهلك وانهم مش واخدين اي كلام منك بجدية .. يعني يمكن من وجهة نظرهم علشان انتي نفسك مش عارفه تعملي ايه .. او بتتكلمي معاهم كده بدون ما تاخدي اي قرار. لان خلي بالك انتي في اول كلامك كنتي بتقولي انك مشكلتك نفسها عمرك ما قررتي حاجة بنفسك. واظن هي ديه مشكلتك الحقيقية .. علشان قولتلك بلاش موضوع السفر دلوقت. انتي محتاجة تهدي .. مع نفسك وتفكري اتعلمي واقري ازاي بنفكر .. وازاي بنقرر وبناءا على ايه بنتخذ القرارت ديه؟ وازاي نتخذها اساسا؟ المنصة ديه بتاعة كورسات برده اسمها ادارك .. ممكن كده تشوفيها عليها كورسات تطوير ذات كويسة .. https://www.edraak.org/ دخلي القراءة في حياتك .. هتستفادي جدا لو قررتي مع نفسك كده تقري كل يوم صفحة او اتنين .. حتى لو كانوا في المواصلات!
تم النشر الأربعاء، ٤ يناير ٢٠٢٣
طيب شوفى المجال الاول اللى تقدرى تشتغليه فى اوقات مناسبه لمكانك وكمان تكونى هتقدرى تكملى فيه ...ومفيش مشكلة دلوقتى لو اخدتى فكرة من الدكاتره او المعيدين عن كل مجال وتبحثى فى كل واحد عن الشغل المتاح والاماكن ., كل ده هيخليكى تشوفى انهى مجال شد انتباهك اكتر
تم النشر الأربعاء، ٤ يناير ٢٠٢٣
بالنسبة لموضوع التخصص تكلمي مع الدفعات اللي أكبر منك والمعيدين ثم الدكاترة وشوفي هاينصحوكي بإيه ولا أنصحك بالسفر في هذه المرحلة بالنسبة لموضوع اتخاذ القرارات ففي حاجة هتهون عليكي كتير وهو الاستخارة والتوكل على الله .. لما يكون موضوع شاغلك فكري فيه من كل جوانبه واستشيري ولو لقيتي نفسك مقبلة عليه وفيه مصلحة وراه صلي صلاة استخارة وتوكلي على الله وهو حسبك ونعم الوكيل ..
تم النشر الأربعاء، ٤ يناير ٢٠٢٣
اول متحسي انك تايهه امسكي ورقه وقلم وسجلي كل الي انتي نفسك تعمليه وتحققيه ومحتاره فيها زي مثلا القسم ف كليتك اكتبي كل الأقسام المتاحه ليكي وابدأي اعملي سيرش عنهم افهمي كل قسم مواده ايه ومجالات شغله ايه وهيوصلك لحلمك ولا لا رتبيهم ترتيب من اعلى لأقل ف المميزات الي هتحصلي عليها من الاقسام ورتبي كمان السلبيات من الاقل للأعلى لاقسام وقتها هتلاقي اقسام مميزتها حلوه جدا والي اقل سلبيات اختاريه وطبعا ده بعد متعرفي كل التفاصيل عن كل قسم نقطه السفر والمنح ممكن تعملي سيرش كمان عن الدول الي فاتحه باب التقديم للمنح وعموما معظم المنح بتكون كامله التكاليف ف مش بتحتاجي تشتغلي وقت السفر لكن تقدري ففتره سفرك تعرفي اكتر عن البلد واماكن العمل المتاحه ليكي وتزودي خبرتك العمليه وتعملي علاقات مع زمايلك او اساتذتك الجامعين بتلاقي عن طريقهم شغل ده طبعا بعد موافقه اهلك بسفرك واقتناعهم بيه والكورسات مش ضروري تاخديها وقت الدراسه او شغلك يبقا ف الدراسه اجازه الصيف استغليها ف شغل وخدي الكورسات الي عايزاها وهتقدري باذن الله وفي كورسات بتكون فري وورش ليوم واحد كمان ممكن تساعدك جدا و مش ضروري عشان اصغر واحده في البيت ف انتي خبرتك قليله ومش هتنجزي حاجه بالعكس انتي ممكن يطلع منك افكار كتير انجازات كتير تقدري تعمليها بس تثقي في قدراتك وفي نفسك وانك هتقدري توصلي طالما حاطه حاجه في دماغك وليكي هدف هتوصلي ليه وان شاءالله
تم النشر السبت، ٧ يناير ٢٠٢٣
انا كمان في زراعه بذاكر وبشتغل في ارض ابويا ومعايا مشاكل كتيره بس بجري و بدور عايز ادرس بره زيك و عايز يكون عندي مشروعي الخاص و عايز انجح عملت اي بقي لكل ده اول حاجه جيبت قموس للغة الألمانية وبحفظ كلمات عشان لما يكون معايا فلوس اخد حورس لان التعليم في المانيا مجاني للمعه اللغة تاني حاجه مشروعي الخاص عامله انا وتلاته اصحابي كل فرد ب داخل ب راس مال 500 جنيه رقم اهبل و الشغل ده يدوب بيدخل لكل واحد 1000 جنيه رقم صغير بس هي كل بدايه بتكون كده المذاكره ابعدي التليفون عن ايدك و افضلي قاعدة على المكتب حتى لو مش هتذاكري و ب النسبة للقسم شوفي اي المتاح ليكي كمان 10 سنين هتقدري تشتغلي فيه لان انتِ بنت هتقبلك مشاكل كتير و والله بتمنى اكون عملت ولو حاجه بسيطه عشان توجهك لنقطه واحده على الاقل في طريقك
تم النشر الأربعاء، ١٨ يناير ٢٠٢٣
لعرض السؤال في فدني اضغط هنا