انا عندي 15 سنه يعني اولي ثانوي واحده صحبتي هيا مش صحبتي اوي بس بنتكلم يعني لقيتها داخله تكلمني وتس بتقولي إن في شخص معجب بيا وبيحبني اوي طبعاً افتكرتها بتهزر وخدتها بهزار قالتلي والله بتكلم بجد بقولها مين قالتلي اسمو وكده الولد دا جارنا وقدي في نفس السنه الدراسيه لكن مش نفس السن هما الولد وصحبتي دول يعتبرو قرايب لقتها بتقولي وانا بكلمها لقتها بتقولي هيبعتلك طبعاً وقتها عملت بلوك لقيتو داخل يكلمني عن طريق صحبتي ولقيها بعتالي الكلام اللي عاوز يبعتو قالتلي فكي البلوك هيقلك حاجه واعملي بلوك تاني فكيت البلوك وقلت له عاوز ايه قعد يقولي انو بيحبني اوي وبجد عمرو ما هيتسلي بيا وبيحبني اوي وقعد يتحيل عليا كتير اننا نتكلم طبعاً قعدت اقولو انا اسفه والله ما هينفع انا عمري ما كلمت ولد ولا عمري هكلم عشان عمري ما هخون ثقه اهلي فيا عملت بلوك تاني لقيتو بردو بعت عن طريق صحبتي لقيتها بتقولي هيقولك حاجه واعملي بلوك بعدها فكيت البلوك دخلت قولتلو عاوز ايه لقيت الشيطان بدا يوزني وبدات اتكلم مسكت نفسي وقلتلو انا اسفه لو جرحتك بس انا عمري ما هكلم ولاد في حياتي قالي هوريكي طريقه تخفي بيها الشات اللي بيني وبينك طبعاً رفضت قولتلو انا اسفه مينفعش اولا عشان السن وعشان كمان انا اهلي مش جايبنلي تليفون عشان اكلم ولاد وبعدها عملت بلوك بس طريقه كلامو والمحايلة بتعتو تحسو بيحبني بجد بس انت عمري ما هكلمو ،واكتشفت إني صحبتي بتكلمو رغم انهم مش قرايب اوي يعني هيا قالتلي انها صحبتو قولتها بتحبيه قالتلي لا هوا بيحبك انتي ،هل اكلم صحبتي دي تاني ولا اعملها بلوك وهل اللي عملتو مع الولد دا كان صح إني عملت بلوك.
انتي ثباتك كويس جدا بس انتي ممكن تبعدي عنها بردو وخليكي عارفه ان دا سن مراهقه والسن دا المشاعر فيه ممكن تأثر عليكي وعلى نفسيتك يعني مثلاا لو ارتبطي ب الشخص دا ما ممكن تحبيه تتعلقي وف الآخر يسيبك هتزعلي وقتها وهتنجرحي ومش هتعرفي ترجعي طبيعتك بعدها ف انتي حاولي تبعدي عنها بردو علشان كتر الزن ممكن يخليكي ان توافقي وانتي داخله ثانوي يعني داخله علشان هدف علشان مستقبل فهماني واتمنى ان ربنا يحفظك
تم النشر الخميس، ٢٩ أغسطس ٢٠٢٤
السلام عليكم و رحمه الله و بركاته اولاً انتي لسه ف سن صغير و ف اولى ثانوي يعني محتاجه تركزي في دراستك و مينفعش حاجه ذي دي تشغلك ابداً و براڤو على قرارك الصائب انك تعملي بلوك و تقوليلو كدا نصيحه مني ابعدي عن صديقتك دي عشان الصاحبه الي بجد هتشجعك على الي ميغضبش ربنا بالعكس لو هي صاحبه جدعه و بتحبك كانت هي اللي نصحتك لو لقتك بتكلمي ولد حتى لو كان قريبها اسمعي مني كلها علاقات محرمه و لعب بالمشاعر مش اكتر الكلام مش بفلوس حتى لو فضل يقول كلام كتير بردو متصدقهوش هو لو بيحبك بجد كان كتم مشاعرو تجاهك لحد ميجي الوقت الي يقدر يتقدملك في و مكنش هيرضى يخليكي تخوني ثقه أهلك و ربك لو قدرتي تغيري رقمك بحيث ميقدرش يزعجك تاني ف هيكون أحسن او حتى قولي لباباكي على حاجه ذي دي و وريلو الشات و انتي قولتي ايه و هو يتصرف معاه و هيخليه ميزعجكيش تاني و اتمنى لكي التوفيق.
تم النشر الخميس، ٢٩ أغسطس ٢٠٢٤
بصي يا جميله انت صح ولا لا؟ ما تكلميهاش الولد ده طبعا نهائي خليتي ثابته على موقفك انت موقفك صح وحتى لو المحل بتاعته. الشيطان ده خليك منها كده عشان يقول لك بصي ده بيحبك قد ايه لا بس ده ولد مش كويس بما ان هو مصمم ان الله يخليكي تعملي حاجه غلط وكمان عايزه اعرفك على طريقه تخفي بيها الشات ده جاي يعمل ايه بقى ده جاي مش بس يخليكي تخوني ثقه اهلك لا ده ما شاء الله بيعلمك علشان برده هي كمان مش بتعمل حاجه صح فاحنا لما نلاقي في ناس طريقهم مش طريقنا ما نفضلش معهم ولا نقرب منهم علشان ما يشدناش الحاجات احنا مش عايزين نوصل.حاجات غلط طبعا انسي تماما المحايلات دي لان هي كلها بتبقى حاجات بيعملوها الولاد علشان خاطر ااا يعني يوصلوا للحته اللي هم عايزينها ان هم يبقوا وقعوا البيت خلاص ما تمشيش ورا الكلام ده وخليكي في اللي انت بتعمليه صح؟ والبنت دي حددي كلامك معايا انت قلت مش صاحبتك ولكن حددي كلامك معاها وخليه محدود جدا لو هي حتى عايزه تصاحبك انت ارفضي انك تصحبيها او تبدئي يبقى في ما بينكم تفاصيل شخصيه.
تم النشر الخميس، ٢٩ أغسطس ٢٠٢٤
أولاً، أود أن أهنئك على وعيك الكبير وثقتك بنفسك في مواجهة هذا الموقف. من الجيد أنك تعرفين قيمك الخاصة وحدودك، وهذا أمر مهم جداً في هذه المرحلة من حياتك. بالنسبة للولد الذي يتحدث إليك، من الجيد أنك قمتِ برفض التواصل معه، فالأفضل هو الابتعاد عن الأمور التي قد تثير القلق أو الشكوك. إذا كنتِ تشعرين أن الحديث معه أو مع صديقتك قد يؤثر سلباً على موقفك أو يؤثر على ثقة أهلك بك، فإن قرارك بعمل حظر (بلوك) هو قرار حكيم. أما بشأن صديقتك، فإذا كانت تشارك معك تفاصيل أو تتناقل الأخبار التي قد لا تشعرك بالراحة، يمكنك التفكير في وضع حدود معها. قد يكون من المفيد التحدث إليها عن مشاعرك وذات الصداقة، فإذا استمرت في التعليق على الأمور التي لا تناسبك، يمكنك اتخاذ قرار بقطع العلاقة أو تقليل التواصل معها. تذكري دائماً أن سلامتك النفسية والعاطفية تأتي أولاً، ولا تترددي في وضع الحدود المناسبة لحماية نفسك. وفقك الله في كل خطواتك، وتذكري أنك تمتلكين القوة لاتخاذ القرارات الصائبة.
تم النشر الخميس، ٢٩ أغسطس ٢٠٢٤
المفروض ان صاحبتك تخاف عليكي وتحافظ عليكي مش تشجعك علي حاجه حرام خدي بالك منها ومن تصرفاتها ومتسمعيش كلامها في اي حاجه غير لما تراجعي نفسك الاول واحسبيها حلال وحرام انتي واضح انك متربيه ومحترمه بلاش تضيعي كل ده واللي عايزك هيستني الوقت المناسب ويجي يتقدملك ولو بعد عشرين سنه ولازم يحس بقيمه انه يبقا معاكي مش يكلمك من ورا اهلك والهبل ده انتي صح انك عملتي بلوك وصاحبتك لو ضغطت عليكي تاني انك تكلميه فهميها انك مش متقبله الوضع ده وانك مش بتكلمي حد وان سنك صغير ولو فتحت الموضوع تاني اعمليلها بلوك وازعلي منها وقوليلها انك هتقولي لاهلها هتقفل عالحوار خالص
تم النشر السبت، ٣١ أغسطس ٢٠٢٤
حبيبتي انتي مبدأكِ صح جدا بس كتر الزن ممكن يخليكِ عايزه تخوضي التجربة... الأحسن انك تبعدي عن صاحبتك دي تدريجياً وتقللي كلام معاها .. وافتكري دايما ان سن المراهقة صعب تطلعي منه سليمة .. متديش دماغك لأي حد ومش أي حد يبقى قريب منك وحاولي تقربي من الناس اللي شبهك اكتر وتنتبهي لدراستك.. الحاجة لما بتيجي في وقتها بتبقى حلوة.. متستعجليش على خطوة الحب والكلام ده خالص، كده كده الخطوه جاية جاية .. الحب في معاد غير معاده ما هو إلا تضيع وقت ولعب.
تم النشر الخميس، ٢٩ أغسطس ٢٠٢٤
انتي لسة صغيرة بلاش تدخلي في حب والكلام دا لو عايزك يجي يتقدملك غير كدة صدقيني بلاش عن تجربة
تم النشر الخميس، ٢٩ أغسطس ٢٠٢٤
لعرض السؤال في فدني اضغط هنا