انا عندي 17سنه و كلمت ولد اتعرفت عليه في لعبه كنا بنتكلم لمده شهر و نص تقريبا و كان الكلام فيه حدود و انا اصلا مبكلمش ولاد خالص بس كنت تعبانه نفسيا و مش لاقيه حد افضفض معاه و هو مر بظروف شبهي اوي فكان حاسس بيا و متفهم مشكلي و مش بيقللها هو أكبر مني ب ٣ سنين بعد الشهر و نص كنت خايفه لحد من اخواتي الولاد يشوف الشات عشان مخنش ثقتهم فيا ف قولتلو ده و قولتلو هترضاها علي اختك قالي لا قولتلو خلاص منتكلمش تاني بس قالي هو ممكن يبعتلي في عيد ميلادي عشان كان قرب وافقت قعدت لغايت عيد ميلادي كان بعد ما بطلنا كلام ب شهر تقريبا فعلا افتكر عيد ميلادي و عيد عليا بعديها ب اربع ايام عملت حادثه بسيطه بالاسكوتر بس كنت طالعه منها مش في وعي كلمت صحبتي و حكتلها و فضلت تعاتبني ف ادايقت و روحت قولتلو قالي الف سلامه عليكي و فضل يطمن عليا في نفس اليوم بليل قلبي انقبض و مش عارفه ليه اول حاجه جت في بالي هو كلمت و طلع متخانق مع والدو و ساب البيت مردتش اسيبو في الحاله ديه و كلمتو لمده ٣ ايام لغايت مطمنت عليه ف كلمتو و قولتلو مش هقدر اكلمك تاني عشان عرفت ان الصحبيه حرام و خوفت لتعلق بيه الصراحه من ساعت اليوم ده الي هو من شهرين و انا بحاول انساه لقيتو انهارده فجا رن في ماسنجر بس كنسل علي طول قولتلو انها وصلت قالي اسف ايدي كانت مبلوله و المبيل كان بيدوس في كل حته قولتلو ماشي و سكت
انا حاسه انو بيكدب و كان بيقرأ الشات مابينا و حسه اننا اتعلقت بيه بس عايزه انساه
ازيك، يارب تكوني بخير 17 سنة هل انتي شايفة من وجهة نظرك أنه وقته، ممكن من جواكي تقولي اه مش وقته، بس أيا كان اللي حصل، ف اللي حصل حصل فعلا، وأنا معاكي اللي حصل حصل. بس انتي محتاجة تعرفي أنك لسه سنك مش جاهز للحوارات ديه كلها، كمان محتاجة تعرفي أنك محبتهوش، ديه حاجه مهمة جدا، انتي لسه في فترة كل حاجة جواكي متلغبطة فيها، مشاعرك، وكل حاجة، لسه في مرحلة المراهقة. كل حاجه لسه مش متزنة، ف أيا كان العلاقة ديه من أولها لأخرها مش هتروح في أي حته جد أبدا، لكذا سبب، أولا انتو لسه صغيرين، لسه محدش فيكم فاهم هو بيعمل ايه، انتو مجرد اتنين اتقابلوا في لعبة، كل واحد فيكم كان محتاج أنه يتكلم مع حد، أيا كان الحد ده مين، لظروف ما كان هو الحد ده، وانتي كمان كنتي الحد ده. ف الحكاية مش رائحة في أي منعطف جد أبدا. ديه كلها حاجات لازم تكوني مقتنعة بيها، طالما اقتنعتي بالافكار ديه هيبقى سهل عليكي تنسيه، انتي كمان عارفه انتي محتاجه تنسي ايه، محتاجه تنسي الحالة نفسها، لا احد يقدر ينكر أن الحالة اللي انتي كنتي فيها، وانتي بتتكلمي معاه كانت حالة كويسة. وعدم وجوده ده بيشعرك بالفراغ، عارفه انتي لما تكوني متعودة على حاجه كذا شهر او كذا يوم وفجأة الحاجه ديه أصبحت مش معاكي، هتحسي أن يومك كده مش تمام، وإن فيه حاجه ناقصة، ده طبيعي جدا، لاننا بنتعلق بالحاجة ديه، سواء كنا حابين وجودها أو لا. فهماني في النقطة ديه (سواء كنا حابين وجودها أو لا) التعلق حاجه والحب حاجه تانيه خالص. فاشغلي وقتك، متسبيش نفسك لاي وقت فراغ، انزلي جيم، اهتمي بنفسك، اهتمي بمذاكرتك، اقعدي مع أهلك وقت كويس، خدي كورسات، اتعلمي حاجات جديدة، شوفي هواياتك. املي حياتك. اتمنى انك تبقى بخير في أقرب وقت
تم النشر الأربعاء، ٣٠ نوفمبر ٢٠٢٢
تنسيه بأنك تقربي من ربنا أكثر وتفكري في مستقبلك وتخلي شوية منطق في تفكيرك وتسألي نفسك هل هناك احتمال أكبر من ١٪ أن ولد عنده ٢٠ سنة تعرفتي عليه في لعبة يكون هو زوج المستقبل اللي يربطك معاه في العلاقة اللي مالهاش أول من آخر على الأقل ٥ سنين عقبال ما يقدر يبني بيت وخلال ال٥ سنين دول الله أعلم انتي هتكوني مريتي بإيه وهو ممكن يكون كلم كم واحدة غيرك .. اللي انت فيه نتيجة للظروف النفسية اللي مريتي بيها وعلاقة بهذا الشكل قطعها مرة واحدة للأبد هو أفضل حل لها وحاولي ركزي في مستقبلك ودراستك
تم النشر الأربعاء، ٣٠ نوفمبر ٢٠٢٢
مجرد فراغ ...الفترة العمرية دى فترة اختبار مشاعر جديدة ياريت تخلى بالك منها كويس مش محتاجة غير انك تعتبرية جزء من اللعبة وبس وجيم اوفر خلاص...مفيش محاولات اخرى انتى بنفسك بتعاتبي نفسك على التصرف ده فاللى نايع منه العتاب ده يبقي صح. وخلى عندك حد من صاحباتك تلجأيله وقت الفضفضه او حتى تطبيق زى هنا تتكلمى بشكل مجهول ..عشان متلجأيش ف اى وقت انك تفتحى باب مش هيجيب الا المشاكل ليكى. ولو بتفكرى انه ممكن يكون معجب بيكى ...فلو هو راجل وتمام هيمشي معاكى من الطريق الصح...غير كده مش تمام ومش مهم اى اعجاب لو مش ف الطريق السليم
تم النشر الاثنين، ٥ ديسمبر ٢٠٢٢
استشيري حد موثوق منه وكبير يحببتي ، العمر قدامك طويل ده سن تقلبات عاطفية ، متحكميشي علي مشاعرك من تجربة وشتت ولا وانتي تحت ضغوط نفسيه . اوعاكي تاخدي قرار في ساعه ضع نفسي هتتندمي أشد الندم ابعدي عنه ولو عاوزاك هو هيكلمك ويتقدملك غير كده بتتعبي نفسك على الفاضي
تم النشر الخميس، ١ ديسمبر ٢٠٢٢
لعب عيال
تم النشر السبت، ٣ ديسمبر ٢٠٢٢
لعرض السؤال في فدني اضغط هنا