فى البداية كده.ممكن تكونى الفترة دى مضغوطه نفسيا وده وصلك للحاله اللى بتمرى بيها احيانا التجهيز لحياة جديدة بيأثر جامد على تفكيرنا فى جوانب كتير وده ممكن يضغطنا نفسيا يوصلنا لدرجة عصبيه وأسلوب تعامل احنا مش متعودين عليه. حاولى تهدى لأن ده ممكن يكون شعور طبيعى بتمرى بيه الفترة دى . اتكلمي مع خطيبك براحة واشرحي ليه انتي بتمرى بأيه وانك متمسكه بيه واطلبى منه المساعدة أنه يكون جنبك الفترة دى. حاولى تكتبى كل اللى جواكى باستمرار وحابه تعملى ايه الفترة دى ،ايه العقبات اللى واقفه معاكى وازاى ممكن تتحل ده هيفرق معاكى جدا اكتبى كل حاجه حابه تعمليها فى بيتك واتكلمى فيها مع خطيبك واشتركوا مع بعض فى تفاصيل بيتكم ده هيفتح مجال حوار بدون عصبيه بالعكس هتفكروا بشكل مختلف. لما تحسي انك بتمري بضيق فكرى بشكل إيجابي وايه الحاجات اللى انجزتيها ، فكرى فى الحاجات اللى بتحبيها وبتلاقى نفسك فيها واعمليها تانى... كل واحد فينا بيمر عليه فترة بيحس فيها بضيق ممكن بسبب الضغوط أو الظروف المحيطة بيه . وده احساس طبيعى المهم انك متستسلميش وتكملى علشان تقدرى تحققى حلمك واكيد الدعم النفسى مهم جدا فحاولى لو ليكى صديقه مقربه أو لايف كوتش اتكلمى باستمرار معاهم وشاركيهم افكارك لأن ده هيفرق معاكى جدا وافتكرى دايما أن ربنا معاكى فى كل خطواتك وبيساعدك وانك قوية وهتقدرى 🌷
تم النشر الثلاثاء، ١٣ أغسطس ٢٠٢٤
0 تعليق
لعرض الإجابة في فدني اضغط هنا
عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك