انا مخطوبة من 10 شهور وهتجوز في شهر 4 ان شاء ﷲ
انا بحب خطيبي جدًا وهو بيحبني جدًا وهو شخص محترم معايا ومع أهلي وبار بأهله والحمد للّٰه هو بالنسبالي أحسن من أي حد
بس انا بقالي فترة بقيت بواجه مشڪلة صعبة جدًا، وهي ان هو في تصرفات بيعملها التصرفات دي بتضايقني جدًا بس عاتبته فيها ڪتير اوي اوي اوي لدرجة ان انا تعبت ومبقاش عندي طاقة للمحاولة:
يعني مثلا (بيڪون هو اللي غلطان وانا بعاتبه فَـبيقوم هو اللي زعلان واتعود ان انا اللي اراضيه واقوله خلاص حصل خير ربنا يهدينا لبعض وعشان خاطري متعملش ڪده تاني.. يقولي حاضر انا اسف حقك عليا ويرجع يڪرر نفس التصرفات تاني) بيقفل معايا وانا مضايقة منه وبيسيبني انام وانا زعلانة مع ان وﷲ وﷲ بيڪون هو اللي صدر منه حاجة زعلتني
بعاتبه و100 مرة اقوله لو عملت ڪده تاني مش هعاتبك ومش ومش ومش... الخ يقولي خلاص حقك عليا وأسف وبرده يرجع يڪرر نفس التصرفات واعاتبه وبقينا في الدوامة دي
اوقات ڪتير ببقي زعلانة وميسألنيش مالك يعني امبارح بعاتبه في الحتة دي راح قايلي ما انا معرفش انتي زعلانة ليه ولا اعرف حاجة والواحد كفاية المشاكل اللي عنده ومش عارف ايه، قولتله طيب كل واحد عنده مشاكل ف حياته بس ده مش مبرر انك تبقي شايف ان انا مش كويسة ومتسألنيش مالك حتي.. قالي تمام ماشي
يعني انا بعاتبه عشان يرد عليا الرد ده! قمت قايلاله انا وﷲ غلطانة ان انا كل مرة بعاتبك انا اسفة اني بعاتبك في حاجة وكنا بنتعاتب وبعتله يجي 5 ريكوردات بكلمه فيهم وبعاتبه وبشرحله وعاوزاه يتكلم معايا ويتعاتب ويطفي النار اللي جوايا..
حرفيا ولا ڪأنه سمع الريكوردات
رنيتله قولتله انت سمعت التسجيلات قالي اه قولتله مرديتش ليه قالي يعني عاوزاني ارد اقولك ايه.. قولتله وﷲ طيب تمام انا بعد كده مش هعاتبك في حاجه طالاما سمعت ومرديتش يبقي كلامي مالهوش لازمة.. مردش برده ولا كاني بتكلم (بيفضل ساكت وانا ببقي جوايا نار وبتخنق اووووي اكتر ما انا مخنوقة) قولتله يابني رد انا وﷲ ما عاوزة اتصرف تصرفات تانية بيقولي كل مرة تقولي مش عاوزة اتصرف تصرفات تانية هتعملي ايه يعني
قولتله هعمل كتير، هعمل زي ما انت بتعمل، هسيبك تتكلم ومش هرد عليك.. هسيبك زعلان.. هتبقي مخنوق ومش هسألك مالك، الخ
ساكت برده.. قولتله انت هترد ولا مش هترد يقولي وﷲ ما عارف اقوله ايه قولتله طيب تمام شكرا ليك يلا يا حبيبي قوم صلي وانا كمان قايمة اصلي قام قايلي ماشي
وبرده سابني بالنار اللي جوايا ولا كأني بتكلم
كنت برا وبعتلي يقولي روحتي ولا لسة، رديت بعدها بنص ساعة قولتله لسة قالي اوك وقام باعتلي قايلي انا هنام عشان تعبان شوية
مرديتش بس مسكت الموبايل بعدها بشوية ولسه هبعت مسدج اقوله ماشي يا حبيبِ نوم الهنا رن في نفس الوقت اللي المسدج بتوصل فيه
قالي ايه يا (ونداني بإسمي) هو في الطبيعي مش بيناديني بإسمي بيناديني بإسم الدلع عادي
فلما ناداني بإسمي استغربت.. يعني عامل فيا كل ده وهو اللي زعلان!
المهم قالي انتي فين قولتله لسه برا قالي تمام انا بطمن قولتله ماشي ومتكلمتش، مستنياه يطفي النار اللي جوايا ولا يتكلم في اي او اي حاجة كده
قام قايلي تمام يلا انا هنام انا سلام قولتله تمام سلام
الكلام ده من امبارح س9 بالليل ولحد الوقتي معبرنيش بمسدج حتي
هو في الطبيعي بيرنلي الصبح وهو رايح الشغل وبيبعت استيكرز يصبح عليا ولو انا مسمعتش الموبايل بيبعت يقولي لما تصحي طمنيني ومش عارف ايه وكده
ده ابسط مثال من الحاجات اللي بتحصل وبتتكرر
انا اخر مرة اخدت موقف بس مطولتش فيه ورجعت معاه على طبيعتي.. ودايما يلومني على اقل رد فعل وميجبش سيرة الفعل اللي هو عمله
بس المرة دي لما لقيت الموضوع بقي كده انا دماغي هتنفجر م التفكير ومعنتش عارفة أتصرف
على فكرة، مش بعيد لو جينا نبص من زوايته وطلبنا إنه هو يحكي هتكوني انتِ غلطانة ومش بتقدري مثلا ظروفه أو بتكبري المواضيع وهتلاقي نظرته للتفاصيل اللي انتِ حكيتيها مختلفة تمامًا. تفكير الشباب وردود أفعالهم مختلفة عننا عمومًا. أنتِ محتاجة تقعدي معه في وقت زيارته لبيتكم ويكون هادي معندوش مشاكل في الشغل مثلا أو مضغوط عشان مش هتقدري تتفاهمي معه ساعتها. حاولي وقتها تتكلمي معه بهدوء ومن غير انفعالات أو إنك تحسسيه قد إيه هو مقصر وكذا وكذا... أعتقد أي كلام سلبي في حقه هيخليه يصد محاولاتك. وبالمناسبة، الكلام والعتاب في التليفون وفي الشات أكبر غلط. مش بتبقي شايفة وش اللي قُدامك وتعابيره وغالبا كلام الشات بيتفهم غلط والكلام في الموبايل مش أفضل وسيلة للتواصل في وقت المشاكل. لازم تكونوا وجهًا لوجه وتتكلموا بهدوء... تعرفيه إيه مضايقك وتعرفي منه إن كان فيه حاجة مضايقاه أو إيه اللي مخلي فيه مشكلة في التواصل بينكم. حاولي كمان ميكونش هو محور تركيزك واهتمامك وإنك تكوني دايما المبادرة في الاتصال به والسؤال عنه. البعد أحيانا بيحسس الطرف الآخر بأهميتنا وإننا مش شيء مسّلم في حياته، اما تواجدك باستمرار وتعلقك به ولومك له على إهماله كل ده هيحسسوه إنه ضمنك ومفيش خوف من إنك تحاولي تبعدي.
تم النشر الأربعاء، ٥ فبراير ٢٠٢٥
أختي العزيزة، أفهم تمامًا ما تمرين به وكم هو مؤلم أن تشعري بأن خطيبك لا يتفهم مشاعرك أو يعيرها اهتماماً كافياً. الأثر العاطفي الناتج عن هذه الصراعات والتجاهل يمكن أن يكون مؤلمًا للغاية، خاصة عندما تحبين شخصًا وتودين التفاهم والتواصل الجيد بينكما. يبدو أن عدداً من التصرفات خلال هذه الخلافات تؤدي إلى إحباطك، لا سيما عندما تشعرين بأنه لا يتفاعل مع مشاعرك أو يستجيب لها بشكل ملائم. في علاقات الحب، من المهم أن يشعر كلا الطرفين بالاحترام المتبادل لفهم مشاعر الآخر. إذا كان يُظهر سلوك التهرب وليس الاحترام لمشاعرك بإظهار التفاعل، فربما يكون من الجيد أن تجلسي معه في لحظة هادئة وتعبري له بحب ورقة عما يجول في صدرك. قد تذكري له أهمية التواصل الصريح والمفتوح بينكما، وأنك تتوقعين منه أن يكون أكثر انفتاحًا على مشاعرك. ابحثي عن الوقت المناسب عندما يبدو أنه مستعد للاستماع. يمكنك أيضًا التفكير في تحديد حدودك بطريقة واضحة. كوني صادقة مع نفسك وما تحتاجينه من هذه العلاقة. إذا استمر هذا السلوك، فسيتعين عليك إعادة النظر في كيفية التعامل معه. تذكري أختي، يُمكن أن تكون هذه المرحلة تحديًا يحتاج إلى صبر وحكمة. أسأل الله أن ييسر لك الأمور ويهدينا جميعًا إلى ما فيه الخير.
تم النشر الأربعاء، ٥ فبراير ٢٠٢٥
ده خطأ انڪ سيبتيه لدماغه مش عاتبتي او شارڪتي ف الامر ده ان مزعلك ولا شي كان لازم تفڪري انتي وهو على ال حصل ده مش تسكتي كده ده هيتقلب عليكي بالخطا انك غلطانه ربنا يهدي الحال ليكم
تم النشر الثلاثاء، ١١ فبراير ٢٠٢٥
معتقدش كدا بصراحة هوه محتاج قاعده قصاد ناس كبيرة من غير ما تبقي رسمية ب اسأله محددة عشان إللي ف بطنه أو ناوي عليه يبان و هيه تبني موقف بناءا علي القعدة دي بس انما متاخديش موقف بناءا علي معلومات مبهمه عشان كل واحد ليه شخصيته و متغيرات حياته إللي محدش حاسس بيها غيره
تم النشر الجمعة، ٧ فبراير ٢٠٢٥
الله يصلح الحال
تم النشر الجمعة، ٧ فبراير ٢٠٢٥
بصي هو المفترض فترة الخطوبة طولت، بس الحمدلله طبعا على كلٍ، فترة الخطوبة ليها حدود زمنية وحدود تعاملية، مش صح انك تتعشمي في الخاطب مهما عمل، انا شايف ان التفاهم مش متصل، وهو بدأ يقلل اهتمام، على طول تفهمي انه بيفكر يفسخ الخطوبة، او شايف حد تاني، المهم انه هيبقى ف كل الحالات مش كويس، وما تستحقيش زيه اذا كان بيخاف المسؤولية او عينه بتزيغ ومتاح مع الباقي.... هي خطوبة يعني امتحانات مش قرار نهائي
تم النشر الجمعة، ٧ فبراير ٢٠٢٥
مش هقدر الومك أن تصرفاتك هي ال خلته كدا لانك. بتحبيه وبتتعاملي. بطبيعتك. لكن للاسف الرجاله بتحب البنت الصعبه حتي ف زعلها وحتي لما تتصالح كل ما كنتي تقيله تتخلي اكتر. لو عايزاه اتقلي بصراحه ده الحل الوحيد والتجاهل التجاهل هو للاسف ضامنك ف لو مستقبله وضعه كدا تمام لكن لازم تتقلي وكمان تتجاهلي واشغلي نفسك بجد. هيفرق معاكي.
تم النشر الخميس، ٦ فبراير ٢٠٢٥
اختاري العيب الي هتكملي معاه عمرك
تم النشر الأربعاء، ٥ فبراير ٢٠٢٥
لعرض السؤال في فدني اضغط هنا