مش عارفه هل ارجع علاقتى مع صحبتى تاني ولا لا!

Question

من 4سنين تقريبا اتعرفت على بنت جديدة ف المدرسة ف 2ع وبقينا صحاب جداااا وعلاقتنا اتطورت اوى وبقيت فعلا بحبها اوى ف 3ع صاحبت ولد كان معانا ف المدرسة وهى كانت على طول حلقة وصل بينا لو انا قفلت الموبايل او حصل مشكلة أو حاجة قعدنا تقريبا مع بعض 6شهور وبعدين انا زهقت جدااا من علاقتنا وكنت عايزة اوقف الموضوع ده ف حاولت اوضحله كتير و فجأة بطلت كلام معاه وبطلت ابعتله ف نفس الوقت صاحبتى اتعرفت على صاحبه ف لما انا بطلت أكلمه راح باعت ل صاحبه عشان يقولها وهى تقولى أن هو غلطان أنه وثق فيا وكلام كتير كده المهم مش ده الموضوع ف نفس اليوم بليل كنت بكلم واحدة صحبتى تانية والكلام جاب بعضه فا حكيتلها وف نص الشات كده اتارى مامتها هى ال كانت بتكلمنى بعدين كلمت ماما تانى يوم وحكيتلها كل حاجة ف ماما قالتلى متكلميش البنت دى تانى ال هى البنت الاولى وانا عشان دايما لما ماما بتكون مش مرتاحة لحد من صحابى ف ببعد عنه ع طول ف قطعت معاها فجأة وهى كانت بتقعد تكلمنى تقولى نخرج طب ننزل وانا بحاول اهرب منها وطبعا واضح من طريقتى انى كنت بقفل معاها لحد م قطعت هى كمان بس هى عمرها م راحت م بالى ودايما ببقى نفسى ارجع انا وهى لحد م جيت السنة ال فاتت 2ث وبعتلها فقعدت طبعا تعاتبنى وكده وانا قولتها انا عارفة انى غلطانة وكده وقولتلها كمان وانا عارفة أن ده كان غباء منى جداااا أن ماما قالتلى ابعد عنها بس انا وهى كانت العلاقة بينا فعلا تسمحلنا بحجم كبير اوى م الصراحة وانا دائما متعودة معاها ع كده ف حسيت ساعتها أنه عادى اقولها كده وهى تقبلت الموضوع وقالتلى حاولى تصلحى صورتى قدام مامتك المهم انا عملت عملية ف طبعا قطعت فترة وكده وعلى م جيت ابعتلها كانت متدايقة اوى و ردة فعلها م ال انا قولته اتغيرت اوى وكنا ساعتها ف ايام امتحانا اخر السنة قالتى أما نعدى الايام دى نتكلم وطبعا مردتش ترد عليا بعد م خلصنا دلوقتى انا ف 3ث وبالصدفة طلعنا بنمتحن ف نفس المدرسة وانا بحاول اهرب أننا نشوف بعض ومعرفش هى خدت بالها منى ولا لا وانا خايفة اروح اسلم عليها تكسفنى وف نفس الوقت انا مش عارفة مشاعرى من نحيتها زى زمان ولا لا وخائفة لو رجعنا تبقى علاقتنا غريبة ومبقاش مبسوطة ولا اسيب الموضوع كده وخلاص مفكرش فيه ولا احارب عشانه

Accepted Answer

اوقات بيبقى رأي الاهل صح وليهم نظرة ثاقبة في الموضوع، وأوقات تانية لأ. لكن لو انتي بجد شايفة انك لازم تعملي اللي عليكي اتجاه العلاقة ديه للاخر .. علشان متبقيش مقصره روحي واتكلمي معاها .. وقولي كل اللي جواكي اتجاه الموضوع ده، وانك اكيد مكانش قصدك تبعدي .. وان اللي بعدك ظروف صحيه وهكذا .. والله تقبلت الموقف وفهمت يبقى خير. متقبلتش يبقى خير برضه، وانت هتبقى عملتي اللي عليكي وقتها.

Answer

هقولك موجز قصة قصيرة ليا أنا و صديق من أعز الاصدقاء ليا حالياً خودي العبرة منها فقط من فتره زي 8 أو 7 سنين واحده جت تسلم على أمي و معاها أبنها أنا كنت شايفوا شخص مش محترم نهائي و لا يليق بيا إني اصحبو أو حتى اقولوا السلام و ده كان رأي مين برضوا (بظبط ده كان رأي والدتي) بعدها بفتره فى أوله إعدادي مش فاكر إيه حصل بظبط لكن أنا و هو اتصحبنا تقريباً كان تشارك لعبة مش فاكر عدت الأيام و بقينا فعلاً بمعنى الكلمة صحاب مش هقولك أنو اخلاقوا من أحسن الأخلاق لكن يكفي أنو معايا بيحترمني دخلت ثانوية جت تالتة ثانوي لا أنا بكلموا ولا هو بيكلمني تعرفي ليه؟ لأني فهمتوا الموضوع واحد اتنين تلاتة أنا لازم أركز السنة دي بس و هو فهم و قالي هنعوض الوقت ده كلو طب بعد كل ده أنا مالي بكل ده ؟ المقصد لو هيا فعلا زي ما أنت وصفتي و قولتي صدقتنا فى مستوى تاني و أحسن صحاب يبقي أكيد هتتفهم موقفك و هتتقبل اعتذارك بس مش يكون اعتذار بكلمة و يا تقبلها يا متقبلهاش لا اعتذار فيه توضيح و باين فيه الأسف الشديد لو فعلاً عايزة كده رأي الأهل مهم طبعاً لكن فى بعض الأوقات الأهل بيحكموا من الغلاف شكلوا حلو خلاص يبقى محترم (ساعات مش دايما) وبس ده كل حاجه نصيحة مني أنا بقى لو عارفه صحبتك شاطرة فى أنهي مادة بعد الامتحان استنيها قدام باب المدرسة لو معاها حد قوللها عايزة أكلمك كلمتين فى إحتمال كبير تقولك رد فيه تلقيح زي (لا صحبتي و بثق فيها مش زي بعض الناس) ساعتها هتعملي نفسك مش واخده بالك و تقوللها تعالي نقف على جنب على الأقل و شوفي بقى هتقولي إيه بس أهم حاجه متحاوليش تطلعيها غلطانة أو تلقي اللوم على والدتك علشان ده هيزيد الموضوع سوء مش اكتر طب لو الاعتذار متقبلش؟ مش مهم أنت عملتي اللي عليكي و كده مش هتحسي بتأنيب ضمير أو ندم بعدين و بالتوفيق و إن شاء الله اللي فيه الخير يقدموا ربنا

Answer

من غير افكار وترتيب كتير ....خلى الموضوع يترتب بطبيعته شوفتيها ...سلمى عليها واسأليها على الامتحان وعليها بابتسامه من قلبك الحلو اللى جواه صداقتكم الصافيه دى. لو فى فرصه هتلاقيها هى بتفتح كلام او تكلمك هى وتدور عليكى ...او هتشوفيها صدفه تانى او هتافقى معاها كده ع طول انكم بعد كل امتحان تتطمنوا على بعض وبعدين تروحوا وهكذا. العشرة القديمة والصداقات دى ممكن يكون ده مكانها بس اننا لما نفتكرها ..نقول كان عندى صاحبه كنا قريبين اوى ...مش لازم تبقي ححدوته وحشه لمجرد اننا مكملناش قرب لاخر العمر.

مش عارفه هل ارجع علاقتى مع صحبتى تاني ولا لا!

اجتماعية

أصدقاء

أهل

علاقات

سؤال من احد أعضاء فدني

تم النشر الخميس، ١٥ يونيو ٢٠٢٣

3 إجابة

6 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك