عاوزه اشتغل وانجح في حياتي وهو معترض واقف قدامي في اي خطوة شغل ممكن اعملها والسبب ان اهله مش عاجبهم وهو ضعيف الشخصية بيمشي ورا كلامهم ويرضيهم لدرجة انه بيمنع عننا نصيبنا في توزيع اللحمه في العيد بسسبب تسلطهم
تنصحوني اعمل ايه اكمل مشوار شغلي حتي لو هوا معترض؟
فى البدايه كده من الواضح أن حضرتك شخصيه طموحه وحابه أن يكون ليكى كيانك وتحافظى على مكانتك وشغلك فمعنى ده أن حضرتك عندك هدف مهم جدا بالنسبالك وبتسعى لتحقيقه واكيد هتواجهك صعوبات ومنها زى ما حضرتك ذكرتى موقف زوج حضرتك ممكن حضرتك تتكلمى معاه بهدوء وتوضحى ليه بأسلوب مختلف أهمية الشغل بالنسبه ليكى وان الموضوع ده هيفرق جدا فى حياتكم واستقراركم . وكل ما كان عندك صبر فى توضيح الأمور بطرق مختلفه كل ما ابتعدتى عن اختلاف وجهات النظر بينك وبين زوجك فى المستقبل فكونى صبوره لكى تصلى إلى هدفك وتحقيق ذاتك .وكونى دائما على يقين بأن الله معاكى وهيساعدك فى كل خطواتك وكونى واثقه انك هتقدرى .
تم النشر الثلاثاء، ١٨ يونيو ٢٠٢٤
أعرف قد ايه الموضوع ده ممكن يكون صعب ومعقد عليكي. صعب لما تحسي ان فيه حد بيحاول يوقف طريقك وإنك مش لاقية الدعم اللي إنتي محتاجاه من شريك حياتك. هقولك نصيحتي: كلمي جوزك بصراحة: حاولي تفهمي منه ووصلي له شعورك قد ايه الموضوع ده مسببلك احتقان وحزن. حاولي تكوني هادية ومتفهمة وانتي بتكلميه. اديله فرصة يتغير: ساعات الناس مش بتعرف انها بتعمل حاجة غلط لغاية ما حد يقولهم. يمكن لما يفهم انك جدية في الموضوع ومستعدة تاخدي خطوات عملية، يبدأ يشوف الأمور من زاوية مختلفة. عيشي وأكملي في شغلك لو ده بيفرحك: اذا الرفض منه مجرد بسبب رضاه لأهله مشببرر منطقي، فكري في نفسك ومستقبلك. ساعات بيكون صعب اتخاذ قرار زي ده لكن لو انتي مؤمنة بقدراتك وعاوزة تنجحي، انطلقي ولا تخلي أي حد يكون عقبة في طريقك. استشيري مستشار نفسي او اخصائي علاقات زوجية: ممكن يساعدكم تشوفوا الأمور بوضوح أكتر وتلاقوا حلول وسط ترضي الطرفين. كوني واضحة في أهدافك: دايماً خلي جوزك وأي شخص حواليكي يعرف كويس ان دي أحلامك وأهدافك وانك مش ناوية تتنازلي عنها بسهولة. الأهم إنك تعيشي حياتك بسعادة ورضا. مش سهل، بس ممكن. الأمنيات بالتوفيق ليكي يا حببتي!
تم النشر الثلاثاء، ١٨ يونيو ٢٠٢٤
لا ما توقفيش في وشو سايسيه و اسمعي كلامه و اكسبيه مش هيحصل حاجه لو قعتي سنه او سنتين في البيت لحد ما تكسبيه في صفك و اسمعي كلامه و حاولي تسايسي اهله علي قد ما تقدري و قليلي الخناق شويه لحد ما يبقي تحت طوعك و اطلبي منو الي انتي عوزاه براحه مره و اتنين و تلاته ولما يرفض قوليلو الي تشوفه يا حبيبي و اطلبي منو فلوس كتير علي حجات تافهه و قوليلو معلش بقي دي حجات حريمي مافيش اي ست تقدر تتخلي عنها لحد ما يزهق و هو بنفسه هيقولك انزلي اشتخلي و هاتي الي انتي عوزاه 😉😂😂❤
تم النشر الثلاثاء، ١٨ يونيو ٢٠٢٤
خلاص اقرفيه بطلباتك التافهه و هو هيستسلم معلش ربنا يصبرك علي ما ابتلاكي بيه بس ما تخربيش بيتك حرام كلو الا خراب البيوت ❤
تم النشر الأربعاء، ١٩ يونيو ٢٠٢٤
فاهماكي بس انا قعدت ٧ سنين بسايس
تم النشر الأربعاء، ١٩ يونيو ٢٠٢٤
لعرض السؤال في فدني اضغط هنا