السلام عليكم
انا دلوقتي في شخص انا عرفاه بيحبني وعايز يتقدملي فأنا صليت استخاره قبل ما انام امبارح و نمت وانا نايمه حلمت بشخص تاني كنت بحبه وكنت متعلقه بيه جدا بس احنا بعدنا من فتره " خمس شهور" مبقناش نتكلم اصلا مع العلم ان الشخص ده انا مش عارفه مشاعره ناحيتي ايه ولا فاهمه هو عايز ايه صحيت الصبح لقيته باعتلي مسدج كان بيسأل عليا
انا دلوقتي مش عارفه اعمل ايه خايفه اظلم يحيي وارفضه ويطلع هو اللي كان هيعوضني عن الاذي النفسي اللي التاني سببهولي وخايفه اقبل ميطلعش خير ليا انا خايفه ومش عارفه اتكلم مع حد مفيش حد هيفهمني
صليت استخاره تاني النهارده بعد الضهر بس بردو مش عارفه اعمل ايه
انا قلت ليحيي متكلمنيش الا اما افكر كويس وابلغك قرارى بس انا مش عارفه اعمل ايه
والله يا بنتي يعني المشكله كلها في ان احنا فاهمين الاستخاره غلط الاستخاره مش معناها ان انا بسال ربنا يا رب اختار ده يا رب امشي في الطريقه ولا ما امشيش فيه الموضوع مش كده خالص الاستخاره معناها ان انا بفكر بعقلي بالمنطق وبكل الحاجات اللي واضحه الدلائل الماديه اللي قدامي بكل الحاجات اللي ربنا اداها لي قال لي اختار بيها ازاي واقرر صح ولا غلط ازاي وبعد ما اخلص تفكير انا وبعد ما اشوف اه والله انا شايفه انه ده هو الاختيار تمام انا كده ايه اخترت بعد ما اختار بقوم مصليه استخاره الاستخاره دي معناها ايه انا بقول يا رب انا كده فعلا مختاره صح ولا انت ممكن توجهني لاختيار اخر طيب ربنا ازاي للاختيار ورد الاستخاره ان ربنا بيقول لي هو اختيارك ده السليم الدنيا بدات تقف ويحصل فيها مشاكل او يبدا عقبات كتير يبقى الخيره فيما اختاره الله وربنا اداني رساله انه الاختيار ده مش هيكون اسلم اختيار يعني دي بتكون دلائل الاستخاره مش خالص الحلم الاحلام دي دي احلام جايه من جوايا احنا جايه من تفكيرنا جايه من الشيطان اا اللي ممكن يكون استلمنا اول ما نمنا ده حاجات كثيره جدا فتعتمديش على الحلم نهائي ما تعتمديش على سهل الرساله بتاكد انه كده الشيطان جاي يشتغل يعني هو راح يشتغل حلو قوي قوي قوي همم اشتغلت انت بالحلم وبعد كده راح رايح للشخص خليه يبعت لك رساله في الوقت ده بالذات وصلوا يبعت لك رساله في الوقت ده بالذات عشان خاطر ياكد عليك انك تصدقي ان انت حلمت بيه. اتمنى ان انا اكون افدتك اتمنى. ربنا ييسر لك الخير.بيدينا دليل الاستخاره اللي احنا عملناها دي يعني ازاي بقى نستقبل رد ربنا رد ربنا علينا في الاستخاره ما بيكونش دائما بحلم يعني الاستخاره الرد بتاعها ما بيكونش حلم خالص الاستخاره بتكون انا بعد كده همشي في الخطوات بتاعه الاختيار اللي انا اخترته لما امشي في الخطوات دي هبدا اشوف بقى الدنيا بدات تتيسر وماشيه بيسر وبسهوله يبقى معنى كده ان ربنا
تم النشر السبت، ١٥ فبراير ٢٠٢٥
السلام عليكم، اولا انتي صليتي استخاره مرتين، لو حسيتي بإرتياح ليه بعد ما صليتي استخاره، يبقي وافقي، لو محستيش براحه تجاهه، برضو بعد الاستخاره متقبليش، واوعي تتجاهلي الشعور اللي بتحسي بيه بعد الاستخاره، يعني مثلا محستيش براحه، متقوليش لا انا بحبه وهو بيحبني وهيعوضني، وتقبلي بيه، ممكن انتي تكوني بعد الاستخاره حسيتي براحه بس مش عارفه الشعور راحه ولا ايه، فالحلم ده من الشيطان، اللي خلاكي تحلمي بالشخص اللي ذكرتيه، وانتي مش عارفه مشاعرك ناحيته، ممكن تكون مشاعر يعني ممكن تكوني بتعوضي الحنان العاطفي اللي المفروض يقدمه لك بباكي او مامتك، ممكن تكون دي مشاعر عاطفيه بتحاولي تعوضي بيها الحنان اللي فقداه. الاذي النفسي. وتأكدي ان الاذي النفسي او اي حاجه مضيقاكي علاجها القران الكريم واستغفري (الا بذكر الله تطمئن القلوب) وتوبي لإنك لما قلتي كنت متعلقه بيه جدا، فممكن تكوني بتكلميه عالموبايل بتتقابلي معاه، وده ذنب، ولو كان بيحبك وراجل كان جه اتقدم مش كلام بس، ولما قعد خمس شهور متتكلموش، كدا دا رد فعل غير مباشر انه مش بيحبك، انتي مش لعبه عشان يعلقك بيه وبعدها يسيبك ويرجع لك تاني ويسأل عليكي، كدا هو معتبرك تسليه بس، ومتوقفيش نصيبك علشان حد زييه، كانتوا عارفين بعض من قبل ما يتقدملك يحيي، لو كان بيحبك حقيقي كان اتقدم، لان الحب افعال مش كلام، ومتوقفيش نصيبك عشانه، الاذي النفسي علاجه الصلاة والاستغفار والقران، ومتخفيش مش هتظلميه، لو رفضتي اللي اتقدملك وقضيتي عمرك تكلميه كدا، كدا هتبقي ظلمتي نفسك، نفسك بس، استخيري مره واتنين وعشره، لحد ما تعرفي شعورك ايه، لوحدي شعرتي بالراحه تجاهه، اقبلي بيه واقبلي باللي يختاره ليكي بباكي، وشيلي اللي كنتي بتحبيه دهن من دماغك لانه مجرد تعويض نقص الحنان العاطفي،(وعسى ان تكرهوا شيئا وهو خير لكم) ممكن اكون صغيره علي اني اقول كدا لان عمري 14 سنه، بس اعملي كدا مش هتخسري حاجه، والسلام عليكم ورحمة الله وبركاته ♥
تم النشر السبت، ١٥ فبراير ٢٠٢٥
لو الشخص التاني الي بتحبيه مستعد يتقدم ليكي وفي اسرع وقت تمام لكن لو لسه راجع يتسلي اتجوزي الي متقدملك وصلي كتير مش مرة او اتنين يعني صلي كل يوم بعد العشا وشوفي قلبك مرتاح لمين دا طبعا في حالة أنه الاولاني اتقدملك اصلا وربنا يقدم لك الي في الخير يارب وادعيلي لاني تقريبا في نفس حيرتك
تم النشر السبت، ١٥ فبراير ٢٠٢٥
انا وانت ان شاء الله
تم النشر السبت، ١٥ فبراير ٢٠٢٥
ولا تعب ولا حاجة ربنا يوفقك و يكتبلك الخير
تم النشر السبت، ١٥ فبراير ٢٠٢٥
لا لا لا خالص ممكن في حته خايف انه يترفض ممكن تكون صح بص اصل حصلت حوارات كتير اوي يطول شرحها تخليني انفي كل اللي بتقوله انا اديت فرصه ليحيي وانا حاسه اني مبسوطه وشكرا بجد معلش تعبتك معايا
تم النشر السبت، ١٥ فبراير ٢٠٢٥
انا هحاول احلل الموضوع حسب كلامك من وجهة نظري بما انه مديرك هو شخص متحفظ برستيج بيخاف على منظره جداا قدام الناس و طموح شوية و بيحب شغله فهو بحكم ان انتوا مع بعض و في تواصل علطول مع الوقت اتعود على طريقتك و اسلوبك و حصل الإعجاب ده بس هو في الأغلب كانت مشكلته حاجة من اتنين رقم واحد حاسس ان لسه عنده أهداف و حاجات كتير يعملها اهم عنده من الجواز الفترة دي او هو مقرر مثلا يتجوز على سن معين مش شاغله دلوقتي فهو معجب بيكي بس مش عايز يربطك لانه مش ناوي ياخد الخطوة دلوقتي و رقم اتنين انه خايف يقولك و تكوني مش بتبادلي نفس المشاعر او حتى لو بتبادليه يحصل رفض لاي سبب كان هو خايف يترفض بحكم انه المدير و حاسس إنك لو رفضتيه مش هيعرف يتعامل معاكي زي الاول و هيحصل فجوة كبيرة او ان شكله مش هيبقي حلو لو اتعرف في المكان انه اترفض فممكن حاول يجيبها بطريقة غير مباشرة انه يقول لحد مش شايفها من زاوية تانية بس نيجي لنقطة انتي مشيتي بيسأل عليكي مشيتي ليه؟؟ ده شئ أساسي ده مديرك ده هو أول شخص اصلا المفروض يهتم و يسأل ده لو معملش كدا ينحط عليه علامات استفهام بس عمل ريأكت و خلاص و مفتحش كلام دي رسالة ان الموضوع بالنسباله ميت و بقي عادي خلاص ده لو واحد غريب ياستي هسأله اكتر من كدا مشيت ليه و هتعمل ايه و هتروح فين و حصل حاجة ضايقتك ولا حاجة بحكم العشره حتى مش هكتفي بريأكت و خاصة ان المشكله لو كانت في السبب التاني انه خايف يترفض و ميعرفش يتعاملك معاكي زي الاول خلاص انتهت انتي مشيتي هخاف من ايه بقي ما هقولك اللي جوايا و بس كدا فانا شايف اعملي استخارة تاني و كملي مع يحيى و ان شاء الله يبقى هو العوض و ربنا يكتبلك الخير 🙏
تم النشر السبت، ١٥ فبراير ٢٠٢٥
بص احنا شغالين مع بعض وهو كان مديري مكنش في بينا شات اعجاب وحب ولا نيله كان كلامنا عادي كان بيحكيلي عنه اغلب الوقت وكلامنا عن الشغل بس كان بيتعامل معايا كأن مفيش غيري في المكان طريقته وتصرفاته وكل اللي بيعمله بينتلي انه حاسس بحاجه ناحيتي وهو ده اللي علقني بيه طريقته في التعامل معايا خليته واحده واحده يتغلغل حوا تفكيري وقلبي لحد ما اتأكدت اني حبيته واتعلقت بيه لحد ما بعدنا لاسباب عبيطه وطول الفتره دي مسألش عليا زي ما يكون زهق وحب يشوف واحده تانيه الله اعلم بس انا الفتره دي كانت اسوأ فتره في حياتي عارف شعور انك تبقي في سابع سما وفاجأه تلاقي نفسك نزلت لسابع ارض وانت مش فاهم ازاى مش فاهم ازاى جت من البنأدم ده بالذات ازاى هونت عليه بالطريقه دي عيشت اقذر فتره في حياتي واللي كان بيخليني مش عارفه اتخطي انه موجود معايا في نفس المكان لحد ما وحده وحده اتعودت علي عدم وجوده وبقي شبه مش فارق معايا لحد ما قعدت من الشغل مره واحده من اسبوع كده وكله سأل عليا ما عدا هو قولت عادي يمكن معرفش لسه وكبرت دماغي يحيي باعتلي يوم الاربع بالليل واعترفلي بمشاعره وانه عايز يتقدملي صليت استخاره يوم الخميس قبل ما انام حلمت بيه هو مش قادره افهم ليه وصحيت الصبح لقيته باعتلي مسدج بيسأل انا مشيت ليه!!!! ليه دلوقتي مش قادره استوعب كنت طايره من الفرحه احساس انك طلعت فارق مع اكتر بنأدم حبيته في الدنيا شعور لذيذ طفي كل فرحتي طفي كل حماسي برده البارد عليا وعمل ريأكت علي المسدج وخلاص!!!!!!! طب ما دام انا مش فرقالك ومش عايز تفتح معايا كلام وبتقفل الكلام باعتلي ليه!!!! مش قادره استوعب ازاى بنأدم يبقي غير مفهوم للدرجه دي عارف انا كمان عرفت ايه من ايام قريبه؟؟؟ عرفت انه كان قايل لواحد صاحبه في الفتره اللي كنا كويسين فيها وكنا بنتكلم عادي كان قايله انه عايز يتجوزني!!! طب انت دلوقتي عندك مشاعر تجاهي وحابب تتجوزني ليه مجتش قولتلي حقيقه مشاعرك دي!!! انت ازاى كده انا مش قادره استوعب انت متخيل انا عارفه من شخص تاني اصلا من 4 ايام انه كان وقتها بيتكلم مع صاحبه وبيسأله هو فلان مش ناويين نفرح بيه قام صاحبه رد عليه قاله ده عايز يتجوز كذا اللي هو انا ف بما انك شاب وفاهم دماغهم ازاى تكون عندك مشاعر لشخص وتروح تقول لصاحبك وانت اساسا مش معرف الشخص ده ومش موقفه علي ارض صلبه !!!!!! من اللي انا جمعته كان مستنيني انا اللي اروح واعترف تقريبا 😂 مع اني عاشرته واتكلمت معاه كتير بس انا عمري ما فهمت هو عايز مني ايه ، في اخر الحوار انا كلمت ماما علي يحيي وحاسه ان الدنيا سهله ف اتمني يكون ده العوض بقي انا اتأذين نفسيا كتير اوي اتمني يعوضني عن كل ده 😂
تم النشر السبت، ١٥ فبراير ٢٠٢٥
لا انا مش حضرتك خالص انا لسه ٢٤ سنة و انتي زي اختي و بكلمك بتفكير شاب، أنا مش عارف درجة التعلق كانت واصلة لفين بينكوا شات ٢٤ ساعة و في مواضيع عادية و لا مواضيع حب و إعجاب و كلام من ده و الموضوع كان مجرد شات بس ولا خروجات، بس ايا يكن اقطعي الشك باليقين و خليكي انتي الشخص الدايركت هو رجع يكلمك اسأليه و اعرفي آخره ايه قوليله ايه فكرك بيا دلوقتي تاني بعد ٥ شهور راجع تكلمني تاني بصفتك ايه احنا علاقتنا دي إيه او انا بالنسبالك ايه إحنا بقالنا مثلا فترة x بنتكلم و آخرتها اعرفي من حبة اسئلة كدا هو بيتسلي و لا ممكن الشخص اللي ياخد خطوة قدام لقيتيه بيتسلي خلاص معلش دوسي على قلبك شوية و انسيه و اقطعي كل صلة تربطك بيه و انتي اصلا المفروض غلطتي من الاول انك دخلتي في علاقة او شات مع حد و عارفه ان ده اصلا حاجة مترضيش ربنا افتكري انتي حاجة كبيرة و غالية مينفعش تحطي نفسك في حتة ان حد لما بيجيله مزاج يكلمك ملوش مزاج يطنشك لو هو مش حاسس بقيمتك روحي للي يقدرك صح و معلش تعالي على قلبك شوية و لما تقطعي كل صلة بيه الوقت هينسيكى كل حاجه و يحيى انتي مش هتظلميه ولا حاجة خدي فترة خطوبة و شوفى و كل حاجة هتبان يمكن ترتاحي معاه اصلا و تحسي بقبول و ربنا ييسرلك و يكتبلك الخير
تم النشر السبت، ١٥ فبراير ٢٠٢٥
لا عايزه اقول لحضرتك انه اصلا كان بيتسلي وعمره ما اعترفلي بحاجه وهو فعلا وقت الجد هيقولي انا موعدتكيش بحاجه انتي زي اختي اتوقعها منه عادي هو شخص غير مفهوم بس للاسف هو عرف ازاى يعلقني بيه وللاسف حبيته واتعلقت بيه جدا بس فعلا معاك حق اخد اللي بيحبني وماخدش اللي بحبه بس انا خايفه اظلم يحيي انا من مسدج بعتهالي الشخص التاني كنت طايره بيها انا اتأكدت اني فعلا لسه متختطش بس رجعت تاني للاحباط اما رد عليا ببرود مش فاهمه هو تعبان في دماغه ولا ايه اه انا عايزه ادي فرصه ليحيي بس خايفه اظلمه خايفه مبادلوش نفس الشعور
تم النشر السبت، ١٥ فبراير ٢٠٢٥
قرار زي ده فكري فيه بالعقل و واحدة واحدة كدا مع نفسك لان محدش هيعرف يقرر حاجة زي دي غيرك و قرارك انتي اللي هتتحملي مسئوليه بس هفكر معاكي بصوت عالي حد جاي يتقدم و بيحبك و شاري و ابن حلال و من عيلة كويسة و سألته عنه كويس و شخص محترم و متدين و مقتدر ماليا لو فيه الصفات دي انتي مش موضحة اوي بس لو الصفات دي فيه اتوكلي على الله لان ده اللي بيصون و يكفي انه بيحبك يعني دايما زي ما بيتقال خد اللي بيحبك و متاخدش اللي بتحبه هو لو بيحبك انتي مع الوقت هتحبيه، نجيب للجانب التاني هو شخص انتي عارفاه بس بقالكوا خمس شهور مش بتتكلموا انا معرفش السبب بس هو قدملك ايه وعدك مثلا بالجواز بس لسه بيجهز نفسه او شقته؟! هو ايه اللي قدمه لك علشان يبقى شاريكي و لو شاريكي و الدنيا كانت تمام قعد ٥ شهور مش بتتكلموا ليه ولا هو مثلا كل فتره بعيدة تيجي في باله تتكلموا شوية و خلاص و هل لما هتفضلي معاه فترة و تيجي بعد مدة تقولي اتجوزني يقولك الموضوع مش في دماغي انتي زي اختي انا موعدتكيش بحاجة انا كشاب بقولك رأيي دايما خليكي مع الدوغري بتاع الفعل مش اللي بيتسلي او مش واضح و او مشكلته مادية ما يجي يكلم والدك و تاخده سنة أو اتنين خطوبة مثلا دي وجهة نظري و ربنا يكتبلك الخير
تم النشر الجمعة، ١٤ فبراير ٢٠٢٥
لعرض السؤال في فدني اضغط هنا