انا عمرى 25سنه أبى توفى من 30 يوم لا استطيع تقبل موته لأنه مات فجأة بدون أي تعب، قابلته فى الشارع قبل صلاة الجمعة وبعدين توفى بعد صلاة الجمعة على طول.
أنا الكبيرة في اخواتي واحنا اربع بنات بس، لايوجد أخ وعمامي ناس مش بيبرونا ولا يعرفوا اسمنا إيه ولا بيزورنا وخلانى مش جمبنى ومن وقت ما توفى بابا خلانى عاوزين يحكموا علينا ويغيروا اللي بابا ربانا عليه وغير أنهم بيقولوا أننا بقينا أيتام والكلمة دى صعبه قوى ومش قادرة استحمل الوضع ده حاسة إن الدنيا وحشه ومفيش اى حاجه حلوه من غير بابا حياتى اتلغبطت وحاسه بتقل فى ذراعى الأيسر والم في قلبي وصداع دايما ويحاول مكنش ضعيفه أمام اخواتى لأنهم بياخدوا قوتهم منى ولما ببكى بينهاروا
بمثل أن كل حاجه كويسه بس انا مش قادره أمثل اكتر من كده اعمل إيه
اولا البقاء لله ، ربنا يصبركم ويعينكم الموت من الابتلاءات الصعبة في الدنيا ، وكمان من اصعب تجارب الفقد تاثير على نفسية الانسان وتقبل الامر بياخد وقت من 3 شهور ل 6 شهور ، لحد ما تقدري تقولي انك رجعتي متوازنة تاني. كل ما عدى الوقت ، كل ما بقت الامور اخف نفسيا عليكي وعلى اخواتك ، وبداتو تتاقلمو وتتعايشو مع الظروف الجديدة وغياب الاب عن البيت وترتبو ظروف حياتكم. انتي محتاجة وقت عشان تتقبلي الامر، والصداع والالم اللى بتحسي بيه نتيجة انك بتخفي مشاعرك وبتحاولي تتظاهري بغير اللى جواكي .. وحله انك محتاجة تفريغ للمشاعر والافكار اللي جواكي ودا ممكن يحصل بالاتي بالكتابة ... اكتبي كل اللى جواكي على الورق ، مشاعر وافكار ، كل يوم قبل ما تنامي بالرسم والتلوين .. هتساعدك على الاسترخاء وتهدئة الاعصاب الرياضة .. المشي او الجري .. بتساعد على التخلص من التوتر والانفعالات الزيادة وبتساعد على الهدوء والتفكير المتوازن اتكلمي مع حد من صحباتك ، تكوني بتحبيها وبتثقي فيها وبتحبك وهتقدر تسمعك و تتفهم مشاعرك وتخفف عنك اولا واخيرا اللجوء لله سبحانه وتعالي ، الدعاء لبابا وليكي ولاخواتك ، الصدقة لبابا ، \ واليتيم له مكانة كبيرة جدا عند ربنا ، ودي مش حاجة تعيبكم ولا تقلل منكم .. المهم انتي وماما تحاولو تمشو البيت زي ما بابا كان ممشيه ولو محدش من قرايبك ولا خيلانك فعلا لا بيراعيكو ولا بيهتم بيكو، يبقى متوافقوش على تغيير اي حاجة انتو كنتو ماشين عليها .. ولا تسمحو لحد يستغلكم او يستغل فلوسكم تحت اسم انه راجل وهيعرف يتصرف عنكم.. لو محدش فيهم فعلا خايف عليكم .. ارفضو انه يفرض وصايته عليكو .. طالما انتو محافظين على دينكم واخلاقكم وبتراعو ربنا في نفسكم .. وانتي كبيرة مش صغيرة تقدري تميزي بين الصح والغلط . لو عملتي كل الخطوات اللى كتبتهالك دي ، لو بعد شهرين، لاقيتي نفسيتك لسه تعبانة اوي ومش قادرة تمشي امورك وتركزي في حياتك ، او لاقيتي نفسك تعبانة اكتر ومبقتيش قادرة تتمالكي اعصابك او تركيزك ممكن تلجأي لمتخصص نفسي يساعدك على التعافي والخروج من حالة الفقد دي. ربنا يعينك ويعدي الايام بخير .. استعيني بالله
تم النشر الأحد، ١٠ نوفمبر ٢٠٢٤
في البداية كده.البقاء لله وربنا يجعله في مكانه عاليه أن شاء الله اكيد الوفاة أثرت عليكي بشكل كبير جدا سواء في نمط حياتك أو نفسيا .حاولي تتقبلي الوضع لانه واقع ولازم تتعاملي على الأساس ده .فكري انك الكبيرة يعني عليكي مسئوليه كبيره ولازم تفهمي أن بباكي عايش فيكي وفي اخواتك .حاولي تكملي الحاجات اللي كان بيعملها .ساعدي اخواتك لانك بالنسبة ليهم مصدر قوة.فرغي طاقتك في حاجه بترتاحي فيها .حاولي تتكلمي مع صديقه مقربه اكيد هيفرق معاكى جدا.اكتبي كل حاجه جواكي وبتحسي بيها الكتابه هتساعدك تتخلصي من اي افكار ممكن تأثر عليكي. لو في مجال شغل ممكن تنضمي ليه حاولي تبدأي فيه . وبالنسبة لاقاربك حاولي تتكلمي معاهم بهدوء وتوصلي ليهم الوضع الأنسب ليكم ايه وافتكرى دايما أن ربنا معاكى فى كل خطواتك وبيساعدك وانك قوية وهتقدرى 🌷
تم النشر الأحد، ١٠ نوفمبر ٢٠٢٤
تقربي من الله عز وجل واطلبي منه العون والسند ولو كلام خالك فيه مصلحة ليكو اسمعي كلامهم لو في حاجة انتوا مش حابينها اتكلموا معاهم بهدوء وضحي وجهة نظرك بكل هدوء،لانك اكيد هتحتاجيهم وحاولي تخلي بالك من اخواتك وانصحيهم وراعيهم علي قد ماتقدرك وربنا يرحمه ويغفر له ويجعلك سند لاخواتك ولنفسك بعد الله عز وجل
تم النشر الاثنين، ١١ نوفمبر ٢٠٢٤
عزيزتي زهره اللوتس، أشعر بألمك الكبير ومعاناتك بعد فقدان والدك، وهو تجربة صعبة جدًا. الحزن على فقدان شخص عزيز، خاصة إذا كان والدًا، شعور طبيعي وصحي. من المهم أن تعطي لنفسك الوقت الكافي لتجربة مشاعرك، سواء كانت حزن، ألم، أو حتى خيبة أمل. من الواضح أنك تحملين عبئًا كبيرًا كأخت كبيرة، ومحاولتك لتكوني قوية أمام أخواتك هو أمر نبيل. ولكن، تذكري أنه لا بأس من الضعف أحيانًا، ولا تواجهي الأمر بمفردك. حاولي التحدث مع من تثقين بهم، سواء كانوا أصدقاء مقربين أو أفراد في عائلتك. الدعم الاجتماعي قد يكون له أثر كبير في تخفيف الألم. فيما يتعلق بالأعراض الجسدية التي تشعرين بها، مثل الألم في ذراعك وصداعك، قد يكون من الأفضل زيارة طبيب مختص للتحقق من ذلك. الصحة الجسدية والنفسية مرتبطتان ارتباطًا وثيقًا، وقد يكون من المفيد طلب المساعدة في كلا الجانبين. فكري أيضًا في ممارسة طرق تعبيرية عن مشاعرك، مثل الكتابة أو الرسم، فقد يساعدك ذلك في معالجة الحزن. ولا تنسي الدعاء وطلب الصبر من الله، فهو القادر على منحك القوة والطمأنينة في هذا الوقت الصعب. كوني حنونة مع نفسك، وامنحي نفسك الوقت الذي تحتاجينه لتقبل هذا الفقد. تذكري أن كل شعور تمرين به هو جزء من عملية الشفاء. (يرجى ملاحظة أن هذه إجابة آلية بواسطة الذكاء الصناعي ولا تغني عن زيارة الطبيب في الأمور الصحية)
تم النشر الأحد، ١٠ نوفمبر ٢٠٢٤
ربنا يقوي قلبك
تم النشر الاثنين، ١١ نوفمبر ٢٠٢٤
ربًنِآ يَرحًمًه وٌيَسِکْنِه فُسِيَحً جّنِآتٌه
تم النشر الاثنين، ١١ نوفمبر ٢٠٢٤
ربنا يرحمه ويغفر له ويسكنه فسيح جناته ويلهم أهله وذويه الصبر
تم النشر الاثنين، ١١ نوفمبر ٢٠٢٤
البقاء لله ربنا يرحمه ويغفر له ويسكنه فسيح جناته
تم النشر الاثنين، ١١ نوفمبر ٢٠٢٤
البقاء لله ربنا يرحم والدك ويسكنه الفردوس الاعلى واتمنى افيدك ببعض ارشادات الدعم بالرابط التالي https://www.facebook.com/share/p/18KDjoqLmR/
تم النشر الاثنين، ١١ نوفمبر ٢٠٢٤
اللهم امين شكرا ليكم 🙏
تم النشر الاثنين، ١١ نوفمبر ٢٠٢٤
لعرض السؤال في فدني اضغط هنا