أنا في تالتة اعدادي والامتحانات يوم ١٨ وانا مش مظبط في المواد، يعني الإنجليزي حالل تقريبا ٤ محافظات بس مش مراجع على جرامر كويس بس مذاكر منهج الحمد لله
والماث مخلص المنهج بس أنا مش بآخد درس فيه أنا بذاكر من ع النت، فيه مدرس شاطر جدا على يوتيوب بيشرح ماث انا بجد مش بفهم غير منه وهو عامل مراجعة بس حاسس إنه بيشرح المسائل الصعبة بس وكمان مش بيشرح وهو بيحل فأنا مبقاش مستوعب اوي فدلوقتي بقيت بسمع مراجعات بتاع السنة اللي فاتت
والعربي لسالي تقريبا درس واحد قراءة واكون خاصت المنهج والنحو معرفش فيه حاجة يعني مذاكر المنادى كويس بس مش حالل عليه كويس صراحة والباقي على الله
والدراسات مبدأتش أحل محافظات محلتش ولا محافظة وانا مذاكر المنهج بس حاسس اني جايلي غيبوبة والمنهج كله أنا مش فاكره بالذات الجغرافيا معقدة اوي وداخلة في بعضها والساينس بآخد درس وخلصت المنهج الحمد لله، بس انا قلقان عشان أنا مش هغش إن شاء الله وربنا يثبتني على الفتنة دي بجد
فانا خايف مجبش مجموع ثانوي وانا بذاكر ومش بضيع وقت في اليوم بس بحس اني مش بنتج يعني ممكن اذاكر ٥ ساعات بس برضوا احس انس معملتش حاجة او مظبطش المنهج بس اكون بذاكر بتركيز والله
وثاني حاجة بحس ان الدروس مش بستفاد منها ومجرد تضييع للوقت وبحس بإحباط لما اروح درس ومستفدتش حاجة زي العربي درس عربي مراجعة النحو مش ببقى فاهم حاجة وبضيع في الوقت بس وهكذا الانجليزي بحس اني لو كنت ذاكرت في البيت كان أحسن لي وانا لو عليا اذاكر في البيت بس المدرسين هيخدوا عني فكرة وحشة وهكذا وعندي وساوس قهرية بجد بتضيع لي وقتي كل يوم ومش بذاكر بسببها
واهلي بيطلبوا مني طلبات كتير وانا عايز اذاكر ومش فاضي صراحة وانا مش عارف مفروض اصبر على ده ابتلاء ولا ايه مش عارف
السلام عليكم ورحمه الله وبركاته ان شاء الله ان شاء الله باذن الله ربنا يوفقك في الامتحانات وهتحصل نتيجه كويسه تكون انت فخور بيها وتنقلك للمرحله اللي بعدها بامان ان شاء الله في المرحله الحاليه انا هقول لك على افضل طريقه يعني بنستخدمها في التوقيت ده اللي هو خلاص احنا الامتحانات فاضل عليها كام يوم فاحنا مش عايزين نشتت نفسنا ما بين ان احنا نرجع للدرس ولا نقعد نحل ولا نعمل ايه الحاجه الاساسيه اللي تكون بتعملها في اي ماده بتقعد دلوقتي تذاكرها انك تفتح تحل الامتحانات تمام طيب وانا بحل الامتحان جيت لقيت فيه جزء ايه ده انا مش فاكره يعني السؤال ده في حته انا مش فاكرها ساعتها روح ارجع للدرس وشوف الحته دي وراجع الدرس كده سريعا حتى ولو بالعين عشان تشوف النقط اللي انت اكتشفت وانت بتحل ان هي ايه انت مش فاكرها كويس او واقعه منك بنسبه ما دي هتكون احسن طريقه عشان ما تشتتش نفسك وعلشان تبقى عودت ايدك على حل الاسئله وفي نفس الوقت تبقى عملت شكل من اشكال المراجعه ربنا يوفقك ان شاء الله وسيبك من اي افكار ثانيه وعموما ان اهلك بيطلبوا طلبات منك او بيحتاجوك في حاجه طول اليوم دي حاجه عاديه لانك كده كده مش هتقدر تذاكر ال 24 ساعه ومش هتقدر تحل في ال 24 ساعه.
تم النشر الأربعاء، ١٥ يناير ٢٠٢٥
السلام عليكم ورحمه الله وبركاته صباح النور والسرور أولا حضرتك مش عندك مشكله حضرتك عندك قلق مفرط اوي وخليك عارف لكل مجتهد نصيب حضرتك عندك فراغات في المواد بس مذاكر طيب حلو أول حاجة هنتكلم في الرياضيه هرشح لك مدرس علي اليوتيوب اسمه المهندس محمد خالد البقري هو بيبسط المعلومة أو حل التقييمات مهم اوي وكمان هتيجي منه الامتحان وكمان هات إجابات مذكرة التوجيه على حسب محافظتك وتاني ماده ممكن تجيب مراجعه pdf جغرافيا وتاريخ علي فكره المنهج تحفه وذاكر من المفكرة حلو برضوا والتقييمات اما العربي في دا وحش الكون مفيش افضل منو اما على النحو ذاكر مراجعه القاعده في اخر الشرح شوف ايه نقاط ضعفك وحاول تحلها يعني امته اعرف ان دا منادي مضاف او شبيه مضاف او نكره غير مقصوده كده يعني دا المنادي بس هتلاقي ملخص القاعده والعلوم برضوا حلو وعايز فهم بس وذاكر من المفكره والإنجليزية لو علي الجرامر ف دا سهل جدا وممكن تذاكره في ساعه طيب انت لازم تاخذ قسط راحه من النوم يعني نام 10وقوم4 الفجر وذاكر لحد 10الصبح وراجع المواد من المفكرات وركز حاليا علي العربي عشان تقدر توفق بين مجموع المواد تقدر بكل هدوء تطلب من اهلك انك تذاكر وإن شاء الله تجيب مجموع بكالوريا الاحباط من الدورس وانك بضيع وقت دا فعل عكسي من المخ لانو مضغوط فانت اصبر كده واتفائل طيب عندك وسواس من ناحية ايه تفكر مفرط ولا نظافه ولا خوف ربنا يوفقك وينجحك وتيجي تقولي جبت مجموع حلو.
تم النشر الأربعاء، ١٥ يناير ٢٠٢٥
السلام عليكم و رحمه اللّٰه و بركاته أعمل الي عليك و مترهقش نفسك زياده الجمله دي كان نفسي حد يقولهالي و أنا ف تالته إعدادي حقيقي عشان أنا ارهقت نفسي نفسياً و جسدياً ف تالته و عرفت ان المجموع مش مهم و المهم اكتر صحتي النفسية الي فقدتها. ممكن تعمل شويه حاجات تخليك تلم الي فاتك بس بلاش توتر نفسك و تضغط نفسك و ترهق نفسيتك زياده فاضلك ٣ ايام كويسين عشان تلم فيهم العربي أسمع مستر محمد صلاح هو مستر ثانوي بس عامل فيديوهات نحو لكل المراحل حقيقي شاطر جداً و هيعجبك الجغرافيا كانت مشكلتي و انا في إعدادي بردو بس كل الي عليك الحل الكتير فيها عشان تتمكن منها أسمع مدرس يوتيوب شوف مستر عماد ممكن يعجبك، و كتاب الجغرافيا و التاريخ خد بالك جداا من المعلومات الي بتبقا بين الأسطر عشان هي دي الي بيجيبوها في الإمتحان ،و نصيحه بجد بلاش تنزل مراجعات سناتر قبل الإمتحانات غير في الرياضه ،، باقي المواد هتقدر تلمها و أنت ف البيت بشكل احسن بكتير بالنسبه للمسائل الصعبه الي بيحلها المدرسين كتير ف الرياضه ف هو ده الصح لما تحل سؤال صعب و تتعود على المسائل الصعبه في الرياضه وقتها اي سؤال سهل هتعرف تحلو و معدل المسائل الي هتقف معاك هيقل جداً في جمله مفهمتهاش و هي " لو عليا اذاكر ف البيت بس المدرسين هياخدو عني فكره وحشه" ليه هياخدو فكره وحشه عنك أنت عملت ايه غلط؟ انت بتحاول تشوف طريقه المذاكره المريحه بالنسبالك و ده الصح... اكبر غلط ممكن تاخدو ف حياتك هو اعتمادك على كلامهم عليك او رد فعلهم لما تسيب الدرس لازم تشوف ايه المريح بالنسبالك و تعملو ده مش هيكون مؤذي ليهم لكن لو عملت اللي ف دماغهم دا هيبقا مؤذي ليك أنتَ! بالعكس مذاكره البيت اونلاين احسن بمراحل من السناتر بتوفر وقت و مجهود كبير و كمان بتقدر تنظم وقتك من خلالها بشكل احسن بكتير بلاش تكرر الغلط في الترم التاني ، شوف المواد الي حاسس انك هتقدر تلمها و تذاكرها احسن في البيت ساعتها اعملها جدول مذاكره ينقسم لجزء شرح و جزء مراجعه و جزء حل بعد كل درس و قبل كل درس التزم على الجدول و في نفس الوقت حاول تعمل ايام اجازه عشان لو بعد الشر تعبت و مقدرتش تذاكر يكون ليك فرصه تانيه تلم فيها اللي فاتك صدقني تالته هتعدي بسهوله بس متضغطش نفسك اعمل الي عليك و توكل على اللّٰه و إن شاء اللّٰه هتنجح بتفوق
تم النشر الأربعاء، ١٥ يناير ٢٠٢٥
السلام عليكم، ربنا معك ويوفقك إن شاء الله بامتحاناتك. أنا شايفة إن مشكلتك كلها قلق وتوتر من قرب الامتحانات وده شيء طبيعي. عاوزة أقول لك كتير من الطلاب بيمروا بالمشكلة دي ومهما كانت قوة مذاكرتهم وحفظهم للمواد... أنا عن نفسي كنت يوم الامتحان بحس إن عقلي صفحة بيضاء ومش فاكرة أي معلومة رغم إني متأكدة إني مذاكرة، وقت ما بتمسك ورقة الأسئلة وتركز بتلاقي المعلومات بتنساب معك. المهم بس تكون نايم كويس قبل ما تروح الامتحانات عشان تقدر تسترجع المعلومات اللي انت مذاكرها فعلا. لو مذاكر 100% ورايح الامتحان مش مركز ومش نايم كويس مش هتقدر تحل والعكس... *** ممكن كمان حالتك دي راجعة لموضوع الوساوس... الوسواس عامة علاجه في التجاهل للأفكار دي. فأنت دماغك دلوقتي بتوسوس لك إنك مش مذاكر كويس وإن كل مذاكرتك دي مفيش إنجاز منها. تجاهل أي فكرة تقول لك كده وكمل مذاكرة. *** فيه حاجات عملتها وفرقت معايا سواء في الامتحانات أو في تعلمي لأي كورسات أو مهارات من الانترنت. أهم شيء الاستعانة بالله والتوكل عليه وتجديد نيتك من المذاكرة. قسم جدول مذاكرتك مع مواعيد الصلاة... ده هيخليك متقصرش في العبادة وهيخلي فيه تنظيم وبركة في وقتك ومذاكرتك. ذاكر 25 أو 50 دقيقة وافصل بخمس أو عشر دقائق اقرأ فيهم قرآن... وكما يُقال.. ما زاحم القرآن شيئًا إلا باركه. أي دقيقة بتفرق، لو نازل مشوار ولا راكب مواصلات طلع كتاب أو اسمع جزء من درس على يوتيوب أو اقرأ من ملاحظات كنت كاتبها. أؤكد مرة تانية على النوم لساعات كافية وخاصة ليلة الامتحانات. مهم جدًا المراجعة المستمرة لتثبيت المعلومات ونقلها إلى الذاكرة طويلة المدى. ***** بالنسبة لنقطة إن أهلك حاولت تكلمهم ومسمعوش لك. فحاول أكثر من مرة وأكد عليهم أهمية إنك تذاكر. وإذا فشلت محاولاتك فتأقلم... مش بس تتأقلم... ده انت ممكن تقلب الموضوع لصالحك. بمعنى... انوي إن كل مرة ينادوك ويعطلوك عن المذاكرة تكون برًا بأهلك وطاعة لله... بكده هيقل إحساسك بالضيق وربنا هيبارك لك في مذاكرتك بإذن. افتكر إن مهما اجتهدت التوفيق من ربنا... فتعامل مع ضعوطات أهلك في الفترة دي على أنك بتطيع ربنا ببرك لهم. ** أرجو إني أكون أفدتك. بالتوفيق إن شاء الله.
تم النشر الأربعاء، ١٥ يناير ٢٠٢٥
اولا ربنا معاك ويبارك في وقتك وجهدك ويوفقك ،اوعي تقف كمل ده توتر امتحانات عادي جدا لما الامتحان يارب تحس انك مش عارف حاجه ف المنهج ،كمل قرب من ربنا أبدأ اليوم من بدري صلي الفجر وابدأ خير آمتي في بكورها هتلاقي بركه في اليوم بتاعك والله صلي الفجر وتوكل ع الله وقول اذكارك ووردك من القرآن ولو صفحه، ذاكر ع قدر استطاعتك كمل النحو وحل عليه لحد الظهر مثلا ريح شويه ارجع امسك unit English خلصها كل ما تتعب افصل وريح اشرب مياه كتير قوم اتحرك اعمل اي رياضه خمس دقايق ف الاوضه كل اي حاجه وارجع كمل وهكذا خلي الجمعه كامل للعربي ،وربنا هيعينك ويوفقك باذن الله
تم النشر الثلاثاء، ١٤ يناير ٢٠٢٥
أولاً، أود أن أهنئك على جهدك وتفانيك في الدراسة على الرغم من الصعوبات التي تواجهها. تعد السنة الثالثة الإعدادية مرحلة مهمة، ومن الطبيعي أن تشعر بالضغط والقلق في هذه الفترة. دعنا نستعرض بعض النقاط التي قد تساعدك في تنظيم دراستك وتحقيق نتائج مرضية. تحديد الأولويات : حاول أن تحدد المواد التي تحتاج إلى تركيز أكبر عليها ثم قم بوضع خطة لدراستها. رتب المواد حسب الأهمية والوقت المتبقي قبل الامتحانات. على سبيل المثال، يمكنك التركيز على اللغة العربية والنحو والأسئلة التي تجد صعوبة فيها. استراتيجية المذاكرة : جرب استخدام أساليب مختلفة للمذاكرة مثل استخدام الملخصات، الرسم البياني، أو أي طريقة تساعد على فهم المعلومات بطريقة أفضل. يمكنك مثلاً كتابة النقاط الرئيسية التي تدرسها بدلاً من القراءة فقط. التقليل من الدروس الخصوصية : بما أنك تشعر بأنك لا تستفيد كثيراً من الدروس، حاول تقليل عددها والتركيز أكثر على الدراسة الذاتية في المواد التي تشعر أنك قادر على مراجعتها بنفسك. إنشاء جدول زمني : ضع جدولا زمنيا للدراسة يتضمن أوقاتاً ثابتة لمراجعة كل مادة. حاول الالتزام بهذا الجدول بقدر الإمكان. التغلب على القلق : مواجهة الوساوس القهرية يمكن أن تكون صعبة. حاول أن تتحدث مع أحد أفراد عائلتك أو مع شخص تثق به حول مشاعرك. قد يكون من المفيد أيضاً البحث عن طرق لتعزيز الثقة بنفسك وتحفيزها، مثل تذكير نفسك بنجاحاتك السابقة. طلب المساعدة عند الحاجة : لا تتردد في طلب المساعدة من معلميك أو زملائك في المدرسة إذا واجهت صعوبات. تذكر أن التعلم هو عملية جماعية. تحسين الوضع الأسري : حاول التواصل مع عائلتك بوضوح حول احتياجاتك الحالية وأهمية فترة المراجعة للامتحانات. قد يساعدهم فهم وضعك على تقديم الدعم المناسب لك. في النهاية، تذكر أنك تعمل بجد وأن صبرك على هذه التحديات سيكون له أثر إيجابي في المستقبل. أسأل الله أن يوفقك ويعينك على التغلب على هذه الصعوبات، وأن يمنحك النجاح في امتحاناتك.
تم النشر الثلاثاء، ١٤ يناير ٢٠٢٥
وهقولك علي حاجه الإنسان مش بيقدر يركز طلاما منمش كويس انت نومك متلخبط خالص مينفعش ..+احنا مخنا بيفصل من بعض مواد بعد ما يعدي ساعه معينه مثلا أنا مخي بيفصل من رياضه بعد ساعه١٢ضهر..وبيدء يركز مثلا علي الانجليزي واعتقد كلنا كده..ثالثا سوره يس هتحسنلك نفسيتك أنا شفت فيها معجزات حرفيا كانت بتخليني مركزه اوي ولما بفصل واقرأ اذكار صباح كنت بحس بأن نفسيتي راقت و وسوسه شيطان راحت و حتي لو حسيت نفسي مش هنجح أو مش فاهمه القي نفسي بقول لا ربنا هيحلها..رابعا ..ثق في ربنا اوييييي وافتكر ربنا شايف رغبتك وتعبت و نيتك ومش هيضيع كل ده
تم النشر الأربعاء، ١٥ يناير ٢٠٢٥
سلام عليكم..أنا أولي ثانوي وكان بيواجهني مشكله دي..فا هقولك عملت ايه وان شاء الله اقدر اساعدك..اولا نام علي ساعه٨بليل علي قد ما تقدر اخرك٩بس مهم تنام٨ساعات ميقلوش عن ٨..واصحي الساعه٤فجر صلي قيام ليل و فجر بعدين بين وقت بين فجر وقيام ليل ظبط ليك جدول يوم مثلا هذاكر عربي هذاكر نحو وقصه في مدرس حلو اسمو محمد صلاح أنا كنت زيك أنا لحد الاسبوع القبل الامتحانات مكنتش فاتحه منهج اساسا ..اتفرج علي نحو الاول و بعدين النصوص دول اهم بعدين قرأه وقصه حاول تخلص مثلا منهج عربي علي يومين مثلا..دلوقتي انت صحيت وصليت فجر وبدأت تذأكر ذاكر ساعتين متواصلين وخد بريك ساعه اتفرج علي حاجه(متلعبش علي تيك توك ولا فيس ولا انستا!)بعد الساعه دي ابدء ماده خفيفه شويه مثلا انجليزي في قناه اسمه خطه تعليميه هستاعدك في انجليزي والأهم احفظ جرامر وركز في كلمات..الرياضه في قناه اسمها مقهي رياضيات حلوه وفيديوهات الحصص مش لتتجاوز ٣٣دقيقه ..العلوم ابحث عن قنوات وهتلاقي لكل مواد شرح في قناه خطه تعليميه..وافتكر انت مذاكره انت محتاج تهدي أنا كنت لحد ما ورق بتتسلملي وانا بقول اني مش فاكره حاجه لما بشوف اساله بفتكر ..دي وسوسه شيطان عايز يبعدك عن مذاكره بس لا انت كمل ومتعدش علي معلومه ٣مرات كفايه مره..وانت بتذاكر اكتب ملخص أو اكتب حاجه مفيده عايز تراجع عليها ليله الأمتحان..اقرأ ادعيه تثبيت معلومات وادعيه ما قبل الامتحان هتفيدك وحاول كل يوم تقرأ سوره ياسين هتنفعك اوي وياريت قبل دراسه وحافظ علي اذكار صباح ..لما تحس بأن دماغك فصلت رجع راسك لورا وغمض عينك خمس دقائق..هي سنه صعبه بس انت قدها هتقدر تعديها
تم النشر الأربعاء، ١٥ يناير ٢٠٢٥
احساسك بالتوتر. والخوف هو. ده سبب المشكله. مفيش داعي. للدكتور. لازم يكون الموضوع نابع من الداخل. يعني فكر وقول لنفسك. انا هجتاز. كل ده والأمور هتكون بخير. حضن الاب والام منص التوتر هيزال
تم النشر الجمعة، ١٧ يناير ٢٠٢٥
اهم حاجه متوترش نفسك ومتقلقش هي سنه بسيطه والله أنا كنت مش مذاكر حاجه طول السنه وذكرت ليلة الامتحان وجبت260 يعني لو انت بتستوعب بسرعة فهي مجرد مراجعه على الماشي بما انك ماشاءالله مذاكر فخيف ليه
تم النشر الخميس، ١٦ يناير ٢٠٢٥
والوساوس دي لما بتيجي بقعد افكر كتير واقلق لحد ما امسك ااموبايل والوقت دي بيكون اليوم طار لما امسك الموبايل
تم النشر الثلاثاء، ١٤ يناير ٢٠٢٥
وبحس اني مش بلاقي وقت اذاكر يعني انا بنام ساعة ١ بليل مثلا بصحى الفجر بكون نمتلي ٤ ساعات بصحي اصلي الفجر اقول اذكاري وانام تاني اكمل ال٨ساعات نومي بكون صحيت عصلاة الضهر ساعة ١٢ لما ببدأ اذاكر بحس اني بنشغل بصلوات الفروض وطلبات أهلي والدروس يعني مش لاقي كده ٦ ساعات مش ورايا فيهم اي حاجة اقدر اذاكر فيهم
تم النشر الثلاثاء، ١٤ يناير ٢٠٢٥
وكلمت امي قلتلها اني عايز اروح لدكتور عشان وساوس دي بس هي مش مقتنعة باني محتاج دكتور ومش عايزة تقتنع غالبا بس انا برضو مقلتلهاش ان فعلا الوساوس دي مأثرة عليت بشكل كبير
تم النشر الثلاثاء، ١٤ يناير ٢٠٢٥
وكلمت اهلي كتير ووصلتلهم اني عايز اذاكر بس مفيش فايدة
تم النشر الثلاثاء، ١٤ يناير ٢٠٢٥
لعرض السؤال في فدني اضغط هنا