انا عايشة مع والدتي ...هي حاليا ٦٠ سنة. مؤخرا بقا ليها طباع عجيبة ديما قلقانة وخايفة وبتشك في اخواتي الكبار انه هيئذونا وهيسجنوها وهييهدلونا ...وهم محدش منهم يجرؤ يعمل كدا في الحقيقة ...قلقانة وخايفة من مشكلة مثلا النور والكهربا لو حصل شيء في العداد في الشركة هتيجي تقبض عليها لأنها هي ماسكة البيت بعد وفاة بابا وهكذا ...وتفضل طول الليل صاحية تفكر في كل حاجة ورايحة جاية واحيانا تخبط في ايدها او في رجلها بإيدها وتسرح كتير وتحلم بكوابيس ... واحيانا مترضاش تستحمى وترفض تاخد العلاج ...فكرت كذا مرة اعرضها ع دكتور نفساني لكن هي كانت بترفض وع طول بعدها تتحسن وشوية بعدها ترجع لاصعب من الاول ...مش عارفة اعمل ايه وكل دا ليه ...وخايفة يحصلها حاجة واقصر في حقها او اعمل فيها حاجة غلط وانا مش فاهمة ....
بابا متوفي من ٨ شهور
عملنا تحاليل وظايف كبد وكلى وغدة وكله كويس ...بس هي عندها الضغط وكانت بتوقف العلاج بالشهر مع نفسها مش بتبلغني
اقترح عليكي تعرضيها على طبيب "مخ واعصاب" ، تمهيد انها تروح لدكتور "نفسية وعصبية" زيارة دكتور المخ والاعصاب عموما في سنها دا ضروري ، اقنعيها انها تروحله للاطمئنان على صحتها وعلى ضغطها وعشان مبتنامش كويس 8 شهور في حالة الفقد الكبيرة بوفاة والدك ، ممكن تكون كل الاعراض اللى هي بتعاني منها دي اعراض طبيعية خصوصا لو كان والدك الله يرحمه كان راجل طيب وبيراعيها وشايل عنها مسؤولية كل حاجة من اول جوازهم ، طبيعي انها بعد وفاته تحس بالقلق والخوف من كل حاجة حواليها .. كل اعراضها اعراض خوف وقلق ومخاوف من المستقبل .. عليكم دور انتي واخواتك تعملوه عشان الاعراض دي تخف من عند ماما .. اكيد هي محتاجة منك ومن اخواتكم التواجد، محاوطتها بالاهتمام والحنية، طمأنتها باستمرار بالكلام انكم جنبها ومش هتسيبوها... اخواتك الاكبر (خصوصا لو في منهم اخوات رجالة) ، وانتي عليكم تتكلمو سوا وتفكرو ازاي تشيلو من عليها المسؤوليات والاعباء .. يعني تتابعو انتو الفواتير ، غاز وكهربا وميا ، توفرو من مصروف البيت على جنب للفواتير دي مقدما ، فمتقلقش منها خلاص لو في من اخواتك اللى بيشتغل ويقدر يوفر مبلغ على جنب يحطه على مصروف البيت لماما ، يعمل دا ، لو لسه بتمشو في اجراءات المعاش لبابا ساعدوها فيها .. لان وجود مصدر دخل ثابت مستمر معاها زي ما كان بيحصل في وجود والدكم اكيد هيطمنها ويقلل التوتر والقلق اللى عندها. محتاجة كمان حد يتكلم معاها من الناحية الدينية ، يثبتها ويطمنها، حد من صحابها او من قرايبكم يكون عاقل وحكيم ، يعينها ويصبرها ويفهمها ان لو زوجها اتوفى فهو كان مجرد سبب في رزقها ، لكن رزقها ورزقكم وحياتكم كلها بتدبير من ربنا سبحانه وتعالى ، فتلجأ لله وتدعوه وتقرا قران ، وتصلي وتقيم الليل وتتوكل على الله وهيرزقها من حيث لا تحتسب .. واستمري كل اسبوع اسبوعين بعرض الفكرة و محاولة اقناعها - بالهدوء والحنية ـ انها تتكلم مع معالج او طبيب نفسي (الافضل اخصائية/معالجة/طبيبة نفسية) ، اكدي عليها ان العلاج النفسي اتطور دلوقتي ، وبقى ناس كتير بتلجأ للمعالجين والاطباء النفسيين ، وانه مش غلط ولا فيه مشكلة ولا حاجة تقلق ، وانه هيساعدها قلقها يخف وترتب افكارها عشان تستعيد توازنها مرة تانية وضغطها وصحتها عموما تبقى احسن. الله يرحم والدك ويغفر له ويلهمكم الصبر والسكينة ويعينك على بر والدتك
تم النشر الأربعاء، ٢١ أغسطس ٢٠٢٤
أنا آسفة إلي بتحصلي مع والدتك، الوضع فعلاً صعب ومحير. يبدو إنها بتمر بحالة صعبة بعد وفاة والدك، وده طبيعي، بس مهم نساعدها تتجاوز مرحلة الحزن والقلق. أول شيء، حاولي تتكلمي مع والدتك بلطف وتشرحي لها إنه مهم تعتني بنفسها وتاخد علاجها. حاولت تخليها تشوف طبيب نفسي؟ حاولي تقنعيها أنه هيساعدها يحسّن حالتها. لو تقدروا تاخدوا مواعيد مع الدكتور مع بعض، هيكون أفضل، كده هتحس بالأمان إنها مش لوحدها. بالنسبة لمشاعر القلق والخوف اللي بتحس بيها، يمكن تكون بسبب الضغوطات النفسية بعد الفقد، وده يخليها تفكر في أمور مبالغ فيها. حاولي تتحدثي مع أخواتك وتوضحي لهم حالتها، و شجعوها على طلب المساعدة من المختصين. المهم إنك تظلي جنبها، وتعاملي معها بهدوء وصبر. حاولي تشغليها في نشاطات خفيفة أو تحكي لها قصص ترفيهية. ممكن كمان تجربوا تمارين الاسترخاء سوا أو حتى المشي في الهواء الطلق. وفي نهاية اليوم، إذا لقيتي إنه وضعها مُستمر أو بيتدهور، ما تترديش في طلب المساعدة، سواء من طبيب نفسي أو من مؤسسات الدعم النفسي. आपकी माँ की भलाई सबसे महत्वपूर्ण है और आपको समर्थन के साथ रहना चाहिए।
تم النشر الأربعاء، ٢١ أغسطس ٢٠٢٤
هو كده ده فى الاغلب درجة من الاكتئاب مرتبطة بحالة الفقد دى وارد جدا تكون شديدة مع الاشخاص كمان اللى فى سن كبير بسبب الخوف من مسئوليات هى لا تقدر عليها بحالتها الصحية الحالية او الذهنيه زائد ان لو والدتك بتشوف اخبار او احداث او مسلسلات بتدور حوالين العقوق والمشاكل الاقتصادية المفاجئة فهيبقى هو ده مصدر الخوف انه رغم انكم كويسين بس هى تشبعت بالفكرة وشافت انها وارد انها تحصل بغض النظر عن طبيعتكم
تم النشر الأربعاء، ٢١ أغسطس ٢٠٢٤
اعتقد لازم طبيب نفسى او على الاقل اخصائى نفسى متخصص فيه بعض الاخصائين أو الاطباء ممكن يجوا البيت بصفه غير رسميه لمتابعة الحاله لان للاسف ممكن الحاله تطور عن كدا
تم النشر الخميس، ٢٢ أغسطس ٢٠٢٤
لازم تعرفي ان هي بتمر بحاله نفسية مش احسن حاجه وان ده مياثرش علي نفسيتك بسلب او تاخدي حاجه بمحمل شخصي حاولي تكوني جنبها وتوفرلي ليها رعاية واهتمام علي قد ما تقدري و ده كله هيكون في ميزان حسانتك
تم النشر الخميس، ٢٢ أغسطس ٢٠٢٤
اعتقد هي محتاجاكلوا في الوقت ده
تم النشر الأربعاء، ٢١ أغسطس ٢٠٢٤
لعرض السؤال في فدني اضغط هنا