السلام عليكم، الظاهرة دي زي ما قالت ذكية هي الديجا فو (Déjà Vu) ودي كلمة فرنسية معناها (سبق رؤيته). وعلى فكرة هي منتشرة جدًا ومعظم البشر بيمروا بها. فيه نظريات علمية كتير حاولت تفسر الظاهرة دي، منها مثلا إن بيحصل خلل في توصيل الإشارة العصبية للمخ فبتوصل لجزء قبل الثاني بفارق أجزاء من الثانية فبتكون الذاكرة اتكونت في مكان قبل الثاني والفارق البسيط ده بيخليكِ تفتكري إن فعلا الحدث ده مريتِ به قبل كده لأن يعتبر المخ شافه مرتين. فيه نظرية تانية بتقول إن ده له علاقة بالطريقة اللي بيتم بها تخزين الذكريات واسترجاعها فممكن تشوفي مشهد جديد خالص لكنه مشابه لحد ما بمشهد تاني فهتحسي بنفس تأثير المشهد القديم، آخر تفسير سمعته كان في محاضرة دينية والمتحدث أرجعها إن ممكن دي بتكون ذكريات لحياتنا اتعرضت علينا قبل خلقنا واحنا في عالم الذر، يعني ممكن ربنا عرض علينا شريط حياتنا كله قبل ما نتخلق على الأرض وممكن بقي أثر من الصور اللي شفناها وكل فترة كده بنشوف موقف فنحس إننا عشناه قبل كده، والله أعلم. عامة، الكلام كتير فيها والدراسات بتحاول تفهم سببها. فأنتِ تجاهليها عشان مترهقيش نفسك، متركزيش خالص معها لو حصلت وهتنسيها بعد شوية، هي مش حاجة خطر ومنتشرة جدًا أكتر مما أنتِ متخيلة ومفيش قلق منها.
لعرض الإجابة في فدني اضغط هنا