السلام عليكم
هو ازي الواحد يبقي عنده قناعه وراضي عن نفسه كده وعن حاله ويبطل يشغل نفسه بحياه الناس ويبطل يبقي عنده فضول يعرف كل حاجه عن الناس ويبطل يحكي كل حاجه عن نفسه بالتفصيل لاني للاسف بحكي كل حاجه عني للاشخاص اللي اعرفهم وببقي عاوزه اعرف عنهم كل حاجه بالتفصيل بس هما مش بيحكوا كل حاجه وبزعل وبضايق مع اني حاسه ان هما الي صح وانا الي غلط وازي ابقي راضيه عن حالي حتي لو مش احسن حاجه بس كويس الحمدلله
كويس جدا انك عرفت فين مشكلتك وبتدور علي حلها انت كدا قطعت اكتر من نص الطريق بنفسك. كل واحد ليه طريق النجاح الخاص بيه في واحده هتلاقي نفسها بعد ما تبقي ام وواحد هيلاقي نفسه بعد التخرج وواحد هيلاقي نفسه في نشاط اجتماعي. علشان كدا مينفعش اقيس نجاحي الشخصي علي مدي تقدمي او تأخري عن زملائي الآخريين. في ناس بتبقي مش احسن حاجه في الكلية وبعد ما تشتغل بتبقي احسن من بعض الناس اللي كانو بيجيبو درجات اعلي منهم. مقياس النجاح لازم يبقي غير مرتبط بأي شخص أخر غير نفسك.
تم النشر الثلاثاء، ٢٨ مارس ٢٠٢٣
شوف حالك وقول الحمدلله انت احسن من غيرك بكتير بس انت مش واخد بالك خليك في حياتك ومتقوليش أي حاجة لاي حد خلي في خصوصية في حياتك بلاش تعرف الكل عن حياتك وخليك راضي بحالك وبحياتك واتمني أن كلامي يفيدك 😊
تم النشر الأحد، ٢ أبريل ٢٠٢٣
خلى كل حاجة مرتبطة بهدف مفهوم ليك متعملش حاجة لمجرد ان هى كده وخلاص او كل الناس بتعمل كده. يعنى انا هحاول اعرف عن صاحبي التفصيلة دى ليه؟ مينفعش اقول عشان هو صاحبي...ده مش هدف....ممكن عشان اقدر اساعده ..ممكن عشان حابب انى اعمل زيه فيها....وهكذا. طب انا هحكى الموقف ده عن نفسي ...ليه؟ مينفعش عشان انا عاوز احكى وخلاص... ممكن عشان انا بثق فى الشخص ده ومحتاج اعرف رأيه فى تصرفى او عشان فخور بنفسي وحابب احكي ده عنى فاكون متشاف بصورة حلوة. لو استمريت على ده هتلاقى حاجات كتير ملهاش لازمه تتقال وحاجات اكتر ملهاش لازمه تتعرف عن اللى حواليك.
تم النشر الثلاثاء، ٢٨ مارس ٢٠٢٣
ده الطبيعي ... محدش لازم يحكي كل حاجة مش لازم ابدا تبقى حياة الناس مشاع للجميع. لازم تبقى في خصوصية، وحياة خاصة ... ولازم انتي كمان تعمي ده ... لان انتي متوقعة للاسف ان الناس لازم تحكي كل حاجه زي ما انتي بتحكي مع انه غلط كبير. لانك اني فقط اللي توقعتي ده .. محدش قالك انا هحكي ليكي كل حاجه في حياتي ... ف لازم تفكري في طريقة ادارتك لحياتك من اول جديد، وتركزي كويس لان ممكن التفاصيل للي بتحكيها لاي حد في حياتك تبقى مش امان ليكي بعد كده، مش لازم كل الناس تبقى عارفه قصة حياتك بالتفصيل وعارفه كل حاجه عنها.
تم النشر الثلاثاء، ٢٨ مارس ٢٠٢٣
هو فعلا من الافضل انك تخلي في خصوصيه عن حياتك وحجات بسيطه الي الناس تعرفها مش من حق اي حد يعرف عنك كل حاجه ف حياتك ولا تكون مقفوله عليكي شويه لو هم بيعملوا ده من باب الخصوصيه ف عندهم حق كمان هي بتقي من حجات كتير زي ان الناس تشوفك مبسوطه ومرتاحه ف كل حاجه وتتحسدي مثلا او ان اسرار بيتك تتعرف للناس ووارد ف اقرب مشكله مع حد قريب منك يقعوا بلسانهم ويقولوا مبلاش انتي تتكلمي انتي نسيتي انك قلتي كذا او عملتي كذا وعشان تساعدي نفسك تكوني راضيه لازم تفكري ففكره انه اوقات من المشاعر السلبيه عندنا وعدم الرضى بالواقع بنشوف ان كل الناس كويسه ومبسوطه واحنا لا بس هسألك سؤال لو جالك ضيف بتعملي ايه بتروقي وتنضفي المكان الي هيقعد فيه حتى لو ع حساب باقي البيت وتلبسي انضف حاجه عندك حتى لو ده الطقم الوحيد الي عندك وبتطلعي تضايفه احسن ماعندك واوقات بتستلفي اطباق او معالق او صنيه عشان في ضيوف جايين هو ده حال الناس مابينهم ومابين بعض ف حياتهم الماديه والاجتماعيه بيظهروا احسن حاجه بس مش ضروري انهم كل يوم خارجين كل يوم مسافرين كل يوم بيروحوا اماكن حلوه ومش معنى ان في صوره لتجمع عائلي انهم وهم حاضنين بعض انهم بيحبوا بعض دول بيتصوروا وهم بينهم محاكم اصلا بس عشان منظرهم قدام الناس كل واحد حوليكي عنده مشكلته ومصيبته والعقبه الي ف حياته ومنغصه عليه عيشته بس انتي مش شايفها وهو م شعايز يقول لانه شايف ان دي حاجه تخصه بس الفكره دي فكري فيها ع طول هتريحك كتير عشان وانتي بتقارني نفسك بيهم هتلاقي ان مش كلهم مبسوط من قلبه ومش كلهم مرتاحين ومش كلهن نايمين مش معيطين ولا شليلين هم دين وهكذا وعشان كده دايما بنقول الحمد لله احنا احسن من غيرنا عشان فعلا في غيرنا مش لاقي نص الي معانا وده الي لازم تفكر فيه كده هتوصلي لمرحله كبيره من الرضى عن نفسك وحياتك وفعلا تاخدي قرار انك متتكلميش كتير عن حياتك
تم النشر الثلاثاء، ٢٨ مارس ٢٠٢٣
عليك السلام، يبدو أن هناك انعكاسًا لنقص في الثقة بالنفس والحاجة إلى الاعتماد على التأكيدات الخارجية لتحديد مشاعر الرضا والقبول الذاتي. من المهم أن تعلمي أن القناعة هي شعور داخلي ولها الكثير من العلاقة بالحالة النفسية والتفكير الإيجابي. لابد من تحديد أولوياتك وأهدافك والتركيز على العمل عليها، بدلاً من التركيز على أمور لا تخصك مباشرة. يمكنك العمل على تطوير هواياتك واهتماماتك الشخصية حتى تتمكني من الاستفادة من وقتك بأفضل شكل، تجنب أن تكون جريئة في الحديث عن نفسك، حاولي قدر الإمكان الحفاظ على حياتك الشخصية خاصة، وبالتدريج ستلاحظين راحتك النفسية والثقة بالنفس.
تم النشر الثلاثاء، ٢٨ مارس ٢٠٢٣
كمان بدل مبتتفرجي علي غيرك وهو بينجح انجحي زيه واشغلي نفسك بحياتك وبحل المشاكل اللي عندك اكيد كلنا عندنا عيوب ومشاكل ومحتاجة تغيير
تم النشر الثلاثاء، ٢٨ مارس ٢٠٢٣
ترضي عن نفسك لما تفتكري كم النعم الهائل اللي ربنا غامرك فيه من صحه وبيت واكل وملبس حتي لو قليل ولو انتي مش حاسه بالنعم دي غمضي عينك وتخيلي انك كنتي مع الناس اللي الزلازل هدوم بيوتهم والموت اخد ذويهم ولم يبقي سواكي فقط شو احساسك الان انتي في نعم ولا أو تخيلي انك الوحيدة من أهلك اللي بتر يده اوقدمه أو فقد بصره .وعلشان تبطلي تفكري في الناس تخيلي انك متي هل هينفعك تفكيري ونظرك لحياة غيرك في شي .كمان بدل مبتضيعي عمرك في متابعه حياة غيرك حاولي تشغلي نفسك ازاي تكوني ناجحه ومتطورة باستمرار ازاي تساعدي غيرك اذاي تحققي هدفك اللي خلقني من أجله وهو تعمير الارض
تم النشر الثلاثاء، ٢٨ مارس ٢٠٢٣
لعرض السؤال في فدني اضغط هنا