بالنسبة للمشروعات، فأغلب المشروعات ممكن تبدأ بحجم صغير، حتى المشروعات الصناعية. ياما مصانع أصحابها بدأوا في ورشة صغيرة، والنهاردة ومع والعولمة بقيت ممكن تلاقي مصنع أو خط إنتاج يشتغل لحسابك وبعدد قطع محدود. من ناحية التمويل، ممكن تشوف خدمات مواقع زي Kick Starter لو فعلا منتجك جديد ومبتكرة. فكر في إيه بيستهويك وفاهمه بنسبة كبيرة وابدأ مشروعك فيه. بالتأكيد الاستخارة مقدمة على التنفيذ. خد بالك إن المشروعات الإنتاجية أو المعتمدة على منتج ملموس عادة بتاخد وقت أطول غاية ما تدر دخل ويبقى لها مردود مناسب أكتر من المشروعات الخدمية. دة مش معناه إن المشروعات الخدمية أبسط أو أسهل، الفكرة إن تحدياتها ومساراتها مختلفة شويتين. في شق السفر، وحسب معلوماتي، مكاتب السفر بتخلص ورق ما بين والوزارات المصرية والسفارات، مش بتجيب فرص عمل. يمكن قصدك على مكاتب تصدير وتوظيف العمال بالخارج ودي معرفش حاجة عن أسلوب شغلها. الأفضل دائما إنك تبحث عن وظيفة بنفسك. ابحث عن الدول اللي أنت شايفها مناسبة وظروف الحياة فيها وبيئاتها وابحث عن متوسط الأجور لوظيفتك وخبرتك، وكمان متوسط تكاليف المعيشة فيها. مدينة زي دبي ماينفعش تفرح بألف ولا ألفين دولار مرتب شهري لأنك هاتلاقي السكن غالي جدا فيها، وهاتكتشف كمان إن الايجار بيدفع سنويا ومقدما. ممكن تستخدم موقع زي اللينك دة عشان تحسب منه متوسط تكاليف المعيشية في مدينة معينة. https://www.numbeo.com/cost-of-living/in/Dubai وقارن تكلفة المعيشة بمتوسط الدخل المتوقع وممكن تحاول تعرفه من موقع زي Pay Scale https://www.payscale.com/research/AE/Location=Dubai/Salary ممكن تبحث عن الوظيفة من خلال مواقع زي Bayt.com وGlassDoor وأكيد طبعا LinkedIn. أخيرا، السفر محتاج فلوس تغطي بيها مصاريفك واحتمال تكاليف سفرك كمان أول شهر على الأقل غاية ما تقبض أول مرتب.
لعرض الإجابة في فدني اضغط هنا