انا طالبة في كلية التربية جامعة اسكندرية قسم علم نفس في سنة تالتة ومعايا شهادات ديلف لغة فرنسية كمان
ازاي اجذب الطلاب ياخدو دروس معايا و اعمل دعايا لنفسي ازاي؟؟
ابدأي ب عيلتك ب اخواتك اولاد عمك وكدا وهم هيجيبوا اصحابهم واصحابهم يجيبوا اصحابهم وهكذا لما حد بيشكر ف شرحك كلوا هيجوا يحجزوا معاكي عشان معظم الناس بتشوف اكتر مدرس الناس بتشكرا فيه وبيرحولوا
تم النشر الجمعة، ٧ يوليو ٢٠٢٣
ممكن تبدأي تسوقي لنفسك بعمل فيديوهات او ريلز على الفيسبوك بتتكلمي فيها عن قاعدة معينة من اللغة، لو مش عايزة تعملي فيديوهات ممكن تعملي فقرة مكتوبة على فيسبوك والمنصات الاجتماعية بنفس المضمون وتشيري في نهايته الى طريقة حجز الدروس معاكِ.. حاولي تجتذبي طالبة او اتنين وتركزي معاهم جدًا بحيث تفرقي في مستواهم وهما بنفسهم هيكونوا دعايا ليكِ .. عرفي دوائرك المقربة انك قررتي تدي دروس في المادة الفلانية وصدقيني دول احسن دعايا ليكِ ... والمقصد بالدوائر المقربة اهلك في البيت.. مامتك هتقوم بمهمة نشر الخبر بين الاخوال والجيران والعمات والصحبات ... قرايبك ... صحابك .. اي حد تعرفيه قولي له انك بتدي دروس فرنساوي.. مش لازم تقوليها بشكل مباشر، ممكن تدخليها وسط حوار بينك وبينهم كده يعني
تم النشر الثلاثاء، ٤ يوليو ٢٠٢٣
كنت لسه بقرا في الكتاب ولمسني هذا الجزء فقلت اساعدك .. كل اللي انا اقصده انك حاولي تساعدي الناس حتى لو مش هتاخدي مقابل في ده نحتسبه عند الله اجرا وربنا يتقبل ان شاء الله
تم النشر الاثنين، ٣ يوليو ٢٠٢٣
بصي انا من رايي ان انت تدرسي للبنات بس تمام ثاني حاجه في الفكره التسويقيه بتاعتك ان انت تجذبي طلاب اكثر وكده حاولي مثلا لو هتدي مثلا المستوى الاول مثلا في اللغه الفرنسيه هتقولي لهم مثلا ان انا هدي اول مستوى ببلاش تماما تمام وبعد كده ممكن مثلا ايه في المستويات الجايه وكده ممكن انت تحطي ايه سعر للكورس بقى اللي بعد كده حاولي دائما تكوني في تواصل معاهم زي لو حد مثلا رن عليك تردي عليه تعملي جروب وتساب جروب تليجرام تكون ليك قناه على برنامج الزوم او كده ممكن مثلا لو انت ما رحتيش او حاجه فلا يا جماعه انا احنا هنعمل محاضره النهارده على برنامج الزوم من البيت وفي الختام ما تنسيش ان ربنا انعم علينا بنعمه التعلم وان احنا نتعلم اكثر اكثر ونفيد الناس فعليك ان اي حد هيجي يسالك عن حاجه حاولي ان انت تكسبيه وتقولي له مثلا المعلومه دي بكل صراحه حتى مثلا لو جه واحد وما معهوش مثلا فلوس او كده وعايز يدرس معاكي اوعي تقولي له لا واكسابيه وعلميه وان شاء الله ربنا يجزيكي خير وحسنات والجنه باذن الله ❤️
تم النشر الاثنين، ٣ يوليو ٢٠٢٣
أنصحك تركزي على التدريس للبنات بس وتكون دي نقطة في صالحك تجذب البنات ليكي لما يعرفوا أن مجموعاتك مكونة من البنات فقط لأن دة هيكون أريح لهم بكتير - ساعتها ممكن ببساطة تعملي لنفسك صفحة على الفيس وتبدئي تعلني عن نفسك في جروبات الطلبة في منطقتك
تم النشر الاثنين، ٣ يوليو ٢٠٢٣
السوشال ميديا هي الحل اكييييد
تم النشر الخميس، ٦ يوليو ٢٠٢٣
حاولي تجربي تشتغلي في حضانه مثلا في الاول او تشوفي ناس قرايبك و تلمي و تعملي صيط واحدة واحدة و حاولي متطلبيش مبالغ كبيرة اوي في الاول و شوفي طرق تخلي الطلاب الي عندك يحبو اللغة و يشكرو فيكي دي الحاجة الوحيدة الي هتفيدك اوي
تم النشر الثلاثاء، ٤ يوليو ٢٠٢٣
هل ناوية تعطي دروس لأولاد وبنات ولا بنات بس؟
تم النشر الأحد، ٢ يوليو ٢٠٢٣
الأحسن إنك تشتغلي فى مدرسة ثانوية و تشوفوا هناك إذا كان حد عايز درس و يجمع صحابوا (الفكرة استلهمتها علشان أنا أصلا باخد عند مدرسة علم نفس عرفتها من المدرسة )
تم النشر الأحد، ٢ يوليو ٢٠٢٣
مش عارفة بصراحة مفكرتش
تم النشر الاثنين، ٣ يوليو ٢٠٢٣
لعرض السؤال في فدني اضغط هنا