كيف أُدرب نفسي على الشراء والاختيار بمفردي دون الحاجة لأحد معي؟

Question

انا بنت عندي ١٢ سنه مبعرفش انزل لوحدي اشتري حاجه ليا أو لماما ودائما ببقي عايزه حد معايا وانا بشتري عشان اخيره ودائما ماما تقولي لا اختاري لنفسك اعمل ايه

Accepted Answer

السلام عليكم ورحمة الله وبركاته بدايا أشكرك على انك عايزة تحلي المشكلة وموضوعك سهل وحابب اقول لك اني عندي نفس المشكلة تقريبا وبحاول فيها ربنا يعين السبب احنا ضاغطين نفسنا و حاطين في دماغنا ان "لازم نشتري أحسن حاجة والا يبقا احنا مش كويسين" سبب السبب ممكن نكون حطينا كده في دماغنا بسبب الضغوط العالية من المجتمع اللي بيحملنا فوق طاقتنا بذات في الدراسة واللبس والتعامل وغيرها الهدف نشتري ونعرف اننا كويسين حتى لو مجبناش أحسن حاجة الحل •أول شرط هو اني مضغطش على نفسي و احب نفسي زي ما هي منغير شروط لأني إنسان لي قيمتي •أعرف كويس ان كل الناس غلطت وبتغلط وهتغلط وده الطبيعي •بدل ما اركز على الغلط الأحسن اني اتعلم منه للمرة الجاية •الواحد أحيانا لازم يرحم نفسه لأنه بيتعب باختصار الواحد يحب نفسه بكل عيوبها ويعرف ان له احترامه لأنه انسان

Answer

الامر بسيط بس محتاج شوية تدريب في الاول هيبان صعب لاكن مع الاستمرار هيبقا سهل جدا الاول قبل ماتنزلي تشتري حددي إنتي عاوزه تجيبي إيه ولما تحددي ممكن تبدئي تحددي اللون اللي عاوزاه فتبقي نازله مقرره هتجيبي إيه ومنين فهيبقا الامر سهل لاكن تجنبي تنزلي وإنتا مش عارفه هتجيبي إيه لإن إنتي هتبقي متردده جدا ومش هتعرفي تشتري.

Answer

السلام عليكم ورحمه الله وبركاته انت بنوته جميله جدا جدا وانك تسالي في انك ازاي تعتمدي على نفسك دي حاجه جميله قوي قوي قوي قوي وكل ما دربتي نفسك بقى في كل حاجه انك تقدري تعتمدي على نفسك هتكوني شخصيه جميله جدا كل ما تكبري سنه عن سنه وان شاء الله تكوني فخوره بنفسك بعد 10 سنين من دلوقتي وتشوفي قد ايه انت كونتي نفسك شخصيه كويسه طول ما انت مركزه كده بنفس الطريقه تعالوا بقى نقول انت ازاي تعتمد على نفسك في انك تشتري حاجه ليكي اولا اولا لازم تبدئي تعرفي نفسك يعني تعرفي انت بتحبي الوان ايه انت بتحبي انهي ستايل ايه الحاجه اللي بتليق عليك ايه الحاجه اللي انت بتحبي تشوفي نفسك فيها دي اول حاجه تجمعي كل المعلومه دي عن نفسك وتبدئي وانت رايحه تشتري الحاجه تدوري على كل الحاجات اللي انت جمعتيها دي يعني مثلا انا بحب اللون الازرق والبينك والاسود طيب تمام انا لما هنزل النهارده يا ترى هشتري حاجه فيها كل الالوان ولا انا عايزه اشتري حاجه فيها لون واحد منهم. فتبقي قدرتي تركزي على الحاجه اللي انت هتختاريها وانت رايحه. انا بحب مثلا انهي انواع قماشات انا بحب القماشه الجبردين وبحب القماش الجينز مش بحب القماشات التانيه تمام جدا يبقى وانا داخله انا عارفه انا بدور على ايه فهعرف اختار من بين كل الحاجات اللي قدامي ايه طيب لو انا بقى مش عارفه انا بحب ايه بالظبط يبقى انا هنا محتاجه مرحله التجربه لان انا ممكن اكون في حاجات لسه ما جربتهاش فهنا بقى هتبقى حاجه لطيفه جدا جدا تعمليها مع نفسك من غير ما يكون حد معاكي خذي بعضك وانت معديه جنب اي محل قرري انك تخشي تجربي ادخلي المحل اساليه هو ده قماشته ايه تقول لك مثلا ده ده قماشته ليكرا انا ما اعرفش انا مجربتش حاجه ليكرا قبل كده ما اعرفش هتكون عامله عليا ازاي او شكلها ايه او هتكون مريحه ولا لا طب خلاص انا هاخد اجرب وادخلي في المحل ادخلي اوضه القياس وجربي وشوفي هل لقيتي ان هو لطيف ولا مش لطيف مناسب لك ولا مش مناسب ليكي على حسب مبادئك الشخصيه في اللبس وذوقك في اللبس ولا لا وهكذا. هتبدئي من هنا تجمعي المعلومات عن نفسك بحب ايه مش بحب ايه ينفعني ومش هينفعني ايه وده هيساعدك كثير جدا في الاختيار. بعد ما تبقي خلاص عرفتي كل حاجه عن نفسك انت مفيش مشكله خالص لما يبقى جزء من اختياري ان انا اسال والله انا بقى دلوقتي نقيت اللون اللي عاجبني والقماشه اللي عاجبني وكل حاجه وابدا اخذ رايي الناس اللي شايفيني من بره لانه طبعا عيني انا مش هتشوف زي عين اللي شايفني من بره بسال ماما هسال اخواتي هسال صحابي ايه رايكم في ده علي شكله حلو ولا لا هو ممكن يكون شكله حلو بس يكون في حاجه ثانيه شكلها احلى عادي جدا فهم ممكن ان هم يقولوا لك اه شكله حلو بس مثلا لو جبتي اللون الفلاني هيبقى احلى طب شوفي كده نفس شكل البنطلون او نفس شكل الجيب بس تبقى مقاس مختلف هتبقى الطف وهكذا عادي جدا. تقدري انك تاخدي رايهم في الاعتبار اه طبعا تقدري تاخدي رايهم في الاعتبار ايه المشكله ولكن ابدئي دائما بانك انت اللي تكوني عارفه نفسك وعارفه الحاجات اللي بتليق عليك واللي انت بتحبيها واللي بترتاحي فيها وبعد كده خلي رايهم هم رقم اثنين لكن ما يبقاش بالنسبه لك الاساس انك عايزاهم هم اللي يختاروا ويكون ما عندكيش ثقه في اختيارك ولا تكوني عارفه انت بتحبي ايه بالظبط وان شاء الله مره مع مره هتلاقي نفسك بقى لك ذوقك الخاص وبقى سهل جدا انك تنزلي لوحدك او انك حتى لو معاكي حد انت اللي تروحي تنقي بنفسك.

كيف أُدرب نفسي على الشراء والاختيار بمفردي دون الحاجة لأحد معي؟

نفسية

منوع

ثقة بالنفس

تجارب

سؤال من احد أعضاء فدني

تم النشر السبت، ٤ يناير ٢٠٢٥

5 إجابة

17 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك