انا عندي 20 سنة متعودة طول عمري اني اقعد ف البيت مبخرجش من بيتي للمدرسة او من بيتي للجامعة واروح تاني ع طول ف انا مبعرفش اتعامل مع الناس ..مبعرفش اتكلم ولا اتعامل مع حد وهادية جدا وبتكسف اني اطلب حاجة حتى لو من حقي والموضوع دا عاملي ازمة كبيرة جدا بجد
يعني انا نزلت شغل سكرتارية واحدة اعرفها هي الي جابتلي الشغل ف هي بتعمل علاج طبيعي مساعدة يعني من الدكتور ومعاه من زمان ف انا لما نزلت الشغل لقيتها ع طول مثلا لو التليفون بيرن دا المفروض شغلي انا المفروض انا الي ارد مثلا ف بلاقيها هي الي ردت والدكتور مخلي رقم الشغل الي الناس تتصل عليه معاها هي لانها طبعا موجودة من قبلي حتى لو مثلا المفروض ابلغ الدكتور مواعيد ناس هتيجي كشف او كده هي الي بتقوله ع المواعيد وهي الي بترد ع التليفون وانا مكسوفة اكلمها معرفش بتكسف ليه مع ان دا شغلي وحقي ف انا مش عارفة ازاي اقولها واوقفها عند حدها يعني متدخلش ف شغلي من غير م ابقى مكسوفة او محرجة مع العلم ان انا بقالي شهر ف الشغل بس فعلا الموضوع مدايقني جدا بجد
تم النشر السبت، ٨ يونيو ٢٠٢٤
دايما انت لو لك حق حاولي تاخديها لانه حقك ودائما في واحد قال لي كلمه وانا لسه حافظها لحد دلوقتي اعمل اللي يرضيك ويرضى ربنا غير كده خلاص... بحيث ان انا اعمل اللي يراضيني انا واللي انا شايفه صح وطول ما هو صح خلاص ما حدش يقدر يلومني وما تسمعيش لكلام الناس
تم النشر السبت، ٨ يونيو ٢٠٢٤
هو طبعا مش هتقوليلها متدخلش في شغلك و متفكريش بالطريقة دي لان الطريقة دي هتسبب عداوة من جواكي ناحيتها و هتخسريها و هي على كلامك بتعمل حاجات ليكي حلوة هي ممكن تكون خايفة على الشغل اوي و أن انتي تبعها فا في وشها اي غلطة هتتعمل مثلا فا اعتبريها بتساعدك و خليها تساعدك خديها مرة قوليلها انا نفسي ارد على المكالمات و كدة و اخد ال risk ممكن اجرب مرة و تبقى معايا و ممكن تعرفي اسمك في المكالمة بحيث لما حد ييجي يبقى في كلامه انا البنت الفلانية حجزتلي تيجي تقولك مثلا هبلغ المواعيد للدكتور قوليها خليكي انتي تعبانة من الصبح هبلغه انا كدة اتعاملي معاها بحب و كانكم بتساعدوا بعض
تم النشر الجمعة، ٧ يونيو ٢٠٢٤
يا حبيبتي، انا متفهمة جدا الموقف اللي انتي فيه. طيب انا هقولك على شوية خطوات ممكن تساعدك انك تكسري الحاجز ده وتكتسبي شوية ثقة بالنفس: خطوة خطوة: مفيش مانع انك تبتدي بشوية حاجات صغيرة متعديش حدود راحتك البسيطة. جربي تطلبي حاجات صغيرة غير مرهقة ومش محرجة، زي انك تطلبي من حد يساعدك في شغل معين. التواصل الهادي والودي: حاولي تتكلمي مع الزميلة بتاعتك بشكل واضح ودي، قولي لها انك مبسوطة انك بتتعلمي منها، بس انتي كمان بتحاولى تاخدي مسئولياتك وتتعلمي منها. ٣. التدريب على المواقف الصعبة: قبل ما تتكلمي معاها أو مع الدكتور، حاولي تتدربي على الكلام قدام المراية أو مع صديقة. ٤. تحديد الأهداف: حددي لنفسك كل يوم هدف بسيط تحاولي تحققيه، زي مثلا انك تردي على التليفون مرة، أو تبلغي معلومة للدكتور. ٥. الاستفادة من الآخرين: لو حاسة انك بتتعلمي منه، مفيش مشكلة انك تتعلمى منها ازاي ترد على الناس أو تتعامل معاهم. بس لازم تفهميها ان ده شغلك انتي كمان. ٦. تطوير المهارات: القراية عن تطوير الذات، وحضور دورات تدريبية، ممكن يساعدك في تعزيز ثقتك بنفسك. ٧. الاحتفال بالنجاح البسيط: احتفلي بأي نجاح صغير تحققيه، ده هيديكي ثقة بنفسك وحدة وحدة. اوعي تنسي إن كل الناس بتمر بتجارب صعبة، وانتي باين عليك قوية وجريئة عشان بتسألي وبتحاولي تطوري من نفسك. أنا واثقة إنك هتقدري تتغلبي على ده وتتميزي في شغلك.
تم النشر الأربعاء، ٥ يونيو ٢٠٢٤
من حقك انك تطلبي حقك ، لكن راعي انك تطلبيه بطريقه مقبوله ، قد يكون تصرفها تلقائي لانك خجوله فبستاعدك أو بتحاول ترفع عنك الحرج أو غيره ... ممكن تقوليها حبيتي " انا محتاجه اتعود ارد علي التليفونات أو محتاجه اعمل كذا بحيث لو انتي مش موجوده اكون قادره اتصرف لواحدي " أو انا اتعلمت هنا حاجات كتير ناقص بس اعمل كذا " الموضوع بسيط جدا في حاله أنها رفضت بيكون الكلام واضح وحازم أن دي مسؤليتي أو لو مفيش استجابه بنصعد الموضوع لصاحب المكان .. ولكن دي كلها استجابات كبيره اوي علي الموقف
تم النشر السبت، ٨ يونيو ٢٠٢٤
لعرض السؤال في فدني اضغط هنا